UZAKARIYA 10

₁Celani kuJehova imvula

ngesikhathi semvula yamuva,

uJehova owenza imibani,

abesebanika izihlambi zemvula,

yilowo nalowo aphiwe utshani ezweni lakhe.

₂Ngokuba amatherafi* akhulumile okuyize,

nababhuli baboné okungamanga;

bakhuluma amaphupho angelutho,

baduduza ngeze;

ngalokho bayasuka njengezimvu,

bathotshisiwe, ngokuba kungekho umalusi.

₃Intukuthelo yami ivuthele abelusi;

ngiyakujezisa izimpongo,

ngokuba uJehova-Sebawoti uyakuhambela umhlambi wakhe, indlu yakwaJuda,

abenze babe-njengehashi elinobukhosi ekulweni.

₄Kuyena kuyakuphuma itshe legumbi,

kuyena isikhonkwane,

kuyena umnsalo wempi,

kuyena bonke ababusi kanyekanye.

₅Bayakuba-njengamaqhawe

anyathela udaka ezitaladini ekulweni;

bayakulwa, ngokuba uJehova unabo,

nezinkweli zamahashi ziyakujabha.

₆Ngiyakuqinisa indlu yakwaJuda,

ngisindise indlu yakwaJosefa,

ngibabuyise, ngokuba nginomusa kubo,

babe-kungathi angizange ngibalahle,

ngokuba nginguJehova uNkulunkulu wabo; ngiyakubezwa.

₇UEfrayimi uyakuba-njengeqhawe;

inhliziyo yabo iyakuthokoza njengangewayini;

abantwana babo bayakukubona, bathokoze;

inhliziyo yabo iyakujabula kuJehova.

₈Ngiyakubahlabela ikhwelo, ngibabuthe,

ngokuba ngibahlengile;

bayakwanda njengalokho kade banda.

₉Nalapho ngibahlwanyela phakathi kwabantu,

bayakungikhumbula ezindaweni ezikude,

baphile kanye nabantwana babo, babuye.

₁₀Ngiyakubabuyisa ezweni laseGibithe,

ngibabuthe eAsiriya,

ngibangenise ezweni lakwaGileyadi naseLebanoni,

abayikutholelwa indawo.

₁₁Bayakudabula elwandle lokuhlupheka,

kushaywe amaza olwandle,

nezintwa zonke zeNayile ziyakoma,

kwehliswe ukuziphakamisa kweAsiriya,

isuke intonga yaseGibithe.

₁₂Ngiyakubaqinisa kuJehova,

bahambe egameni lakhe, usho uJehova.