Bible Reading Plan – Day 102

₂Morena, ke o boka

ka pelo ya ka yohle,

ke bolela dimakatso tsohle tsa hao.

₃Ke a o thabela,

ke nyakallela ho wena;

ke roka lebitso la hao,

wena Ya Hodimodimo.

₄Dira tsa ka di tjhetjhile ka santhao,

di kgopilwe, tsa timela ha o hlaha,

₅hobane o emetse nyewe ya ka

le ditokelo tsa ka,

o dutse teroneng ya hao

o le moahlodi ya lokileng.

₆O kgalemetse ditjhaba,

wa timetsa ba kgopo,

mabitso a bona wa a hlakolela ruri.

₇Dira di ripitletswe ruri;

metse ya tsona o e fetotse masupi,

ha e sa tla hlola e hopolwa.

₈Empa Morena o busa kamehla,

terone ya hae o e theetse ho ahlola.

₉O ahlola lefatshe ka toka,

ditjhaba o di ahlola a se na leeme.

₁₀Morena e ke e be qhobosheane

ya ba hatellwang,

qhobosheane

nakong ya matshwenyeho.

₁₁Ba tsebang lebitso la hao

ba ke ba o tshepe,

ba o tshepe hobane wena Morena,

o ke ke wa furalla ba o batlang.

₁₂Rokang Morena ya busang Sione,

phatlalatsang diketso tsa hae,

le di phatlalatse hara ditjhaba,

₁₃hobane ya phetetsang madi

o hopola bahlophehi,

ha a lebale sello sa bona.

₁₄Nkgauhele Morena,

tadima kamoo

ke hlophehileng kateng,

ke hlophehile

ka baka la ba ntlhoileng,

wena ya nnyolotseng kgorong

ya motse wa bafu,

₁₅e le hore

ke tle ke bolele dithoko tsa hao,

ke di bolele

kgorong ya motse wa Sione,

mme ke nyakalle

hobane o mpholositse.

₁₆Ditjhaba di wetse lemeneng

leo di le tjhekileng,

maoto a tsona a tshwasitswe

ke leraba leo di le tjhehileng.

₁₇Morena o itsebahaditse,

o phethahaditse kahlolo,

ba kgopo ba kgatilwe ke mesebetsi,

mesebetsi ya diatla tsa bona.

₁₈Ba kgopo ba ikela Nqalong ya Bafu:

tjhaba tsohle

tse sa reng letho ka Modimo.

₁₉Mafutsana a ke ke a leballwa ruri,

tshepo ya bahlophehi

e ke ke ya fetoha lefeela.

₂₀Thusa, Morena!

Motho a se ke a kgantsha matla,

ditjhaba di ahlolwe kapela hao.

₂₁Di kenye letswalo, Morena;

ditjhaba di ke di tsebe

hore e ntse e le batho feela.

₁Morena, o emelang hole hakaalo?

O ipatelang

nakong ya matshwenyeho?

₂Ya kgopo o a ikgantsha,

o befetse ya hlophehileng;

a ke a tshwaswe

ke mano ao a a lohileng.

₃Ya kgopo o ithorisa

ka merero ya hae e mebe,

ya meharo o rohaka Morena,

o a mo nyedisa.

₄Ya kgopo o swenya dinko, o re:

“Modimo ha a phetetse,

ha ho na Modimo.”

Ke phetho seo a se nahanang.

₅Kamehla o atleha mererong ya hae,

dikahlolo tsa hao di mo phahametse,

dira tsa hae tsohle

o di tadima maotong.

₆Ka pelong ya hae o re:

“Nke ke ka sisinngwa ke letho,

nke ke ka hlahelwa ke bobe

le ka mohla.”

₇Molomong wa hae ho tswa ditlhapa,

le mashano le bomenemene,

lelemeng la hae

ho maname bolotsana,

ho maname le bona bokgopo.

₈O dula a laletse pela metsana,

o bolaya ba se nang molato,

o ba bolaya a ipatile.

Ka mahlo o tsoma ba tsielehileng,

₉o lalla jwaloka tau

e bothile selaong sa yona;

o lalla jwalo

hore a tle a qhautse mohlophehi,

a mo qhautse

ka ho mo tshwasa ka leraba la hae.

₁₀O a qatjhama, a batalle;

ya tsielehileng

a wele marong a hae.

₁₁Ka pelong ya kgopo o re:

“Modimo o a lebala,

o ipatile sefahleho,

a ke ke a bona letho le kgale.”

₁₂Thusa, Morena! Oho, Modimo,

itokisetse ho otla;

o se ke wa lebala bahlophehi.

₁₃Ya kgopo o nyedisetsang Modimo,

ka pelong ya hae a re:

“A ke ke a phetetsa?”

₁₄Athe wena o bona bomadimabe

le mahlomola;

o a di lemoha, mme o a di laola.

Ya tsielehileng o tshepile wena,

ke wena mothusi wa dikgutsana.

₁₅Robokela ya kgopo le e mobe,

o phetetse bokgopo ba hae

bo fele tu!

₁₆Morena ke kgosi kamehla le mehla,

baditjhaba ba fedile naheng ya hae.

₁₇Morena, o utlwile takatso

tsa ba eisehang,

o ba matlafatsa dipelo,

o ba sekehela tsebe,

₁₈ho ahlolela kgutsana

le ya hatellwang,

hore motho wa lefatshe

a se hlole a tshosa ba bang.

Ke tshabela ho Morena.

Keng ha le re ho nna:

“Balehela thabeng

jwaloka nonyana?”

₂Ba kgopo ba se ba hula

diqha tsa bona,

ba kgwesa metsu ya bona,

ba e kgwesa ba le lefifing

ho fula ba pelo di ntle.

₃Ha metheo e se e heleditswe,

ya lokileng a ka etsa eng?

₄Morena o ka tempeleng ya hae

e halalelang,

terone ya Morena e mahodimong.

Mahlo a hae a bona bana ba batho,

o a ba tadimisisa, o a ba hlahloba.

₅Morena o hlahloba

ya lokileng le ya kgopo,

ya sehloho yena o mo hloile.

₆Ba kgopo o tla ba nesetsa mashala,

mashala a hlenneng le sebabole,

kabelo ya bona

e tla ba moya o tukang.

₇Morena o lokile,

mme o rata tse lokileng;

ba pelo di ntle

ba tla bona fahleho sa hae.

₂Re pholose Morena,

batshepuwa ba fedile;

botshepehi ha bo sa le yo

ho bana ba batho.

₃Batho ba bolellana mashano,

maleme a bona a monate,

empa ke bo-temepedi.

₄Morena a ke a fedise bohle,

bohle ba maleme a monate,

le bohle ba melomo e ikakasang,

₅e leng batho ba reng:

“Re tla hlola ka maleme a rona;

re tseba ho ipuella,

ke mang ya ka re busang?”

₆Morena o re:

“Ka baka la ho tujwa ha bahlophehi,

le la ho dumaela ha mafutsana,

jwale ke kena dipakeng;

ke tla ba fa pholoho

eo ba e hloretseng.”

₇Dipolelo tsa Morena

ke dipolelo tse hlwekileng,

di ka silefera

e qhibidisitsweng seboping,

silefera e hlwekisitsweng hasupa.

₈Ke wena Morena, ya re lebelang,

ya re sireletsang kamehla

molokong ona,

₉ho ba kgopo ba tletseng hohle,

ha bosoro bo totile

hara bana ba batho.

₂Morena, o tla nne o ntebale

ho fihlela neng?

O tla mpatela sefahleho sa hao

ho fihlela neng?

₃Ke ho fihlela neng

moya wa ka o tla utlwa bohloko,

le pelo ya ka e hlomohe

ka matsatsi wohle?

Sera sa ka se tla ntlhola

ho fihlela neng?

₄Morena Modimo wa ka,

tadima, o nkarabe hle;

ako edise mahlo a ka,

esere ka roballa ruri,

₅sera sa ka sa tshoha se re:

“Ke mo hlotse,”

le ba ntwantshang

ba thabela ho wa ha ka.

₆Ha e le nna,

ke tshepile mohau wa hao;

pelo ya ka e ke e nyakalle

hobane o mpholositse.

₇A nke ke binele Morena,

hobane o nketseditse tse molemo.

Ka pelong sethoto se re:

“Ha ho na Modimo.”

Diketso tsa batho di bodile,

di a nyonyeha,

ha ho le ya mong ya etsang tse ntle.

₂Morena, a le mahodimong,

o tadima bana ba batho,

ho bona hore na ho teng

ya utlwisisang,

ya batlang Modimo.

₃Bohle ba kgelohile,

ba senyehile kaofela;

ha ho ya etsang tse ntle,

ha ho le ya mong.

₄Na baa bohle ha ba na tsebo,

baa ba etsang tse sa lokang,

baa ba itjellang setjhaba sa ka,

jwalokaha ba eja bohobe,

ba sa ipiletse ho Morena?

₅Jwale ba tla tshoha haholo,

ba tshohe,

hobane Modimo o ka thekong,

ya moloko o lokileng.

₆Lona le ka soma merero

ya ya hlophehileng,

empa Morena ke setshabelo sa hae.

₇E se eka pholoho ya Iseraele

e ka tswa Sione!

Mohla Morena a kgutlisang

setjhaba sa hae,

a se kgutlisa bothopuweng,

Jakobo o tla nyakalla,

Iseraele le yena a thabe.

Morena, ke mang ya ka dulang

ka Tempeleng ya hao?

Ke mang ya ka ahang

thabeng ya hao e halalelang?

₂Ke ya metsamao e se nang kodi,

ya etsang tse lokileng;

ya buang nnete

e tswang pelong ya hae,

₃ya sa etseletseng ka leleme la hae,

ya sa etseng mohahabo hampe,

ya sa tlameletseng wa habo,

₄ya nyedisang ya kgopo,

empa a hlompha

ba tshabang Morena.

Leha a ka senyehelwa,

ha a kwenehele kano ya hae.

₅Ha a adimane ka tjhelete

ho iphumanela phaello,

ha a amohele tjotjo

ho ahlola ya se nang molato.

Ya etsang tsena

a ke ke a sisinngwa le ka mohla.

Ako mpaballe Modimo,

hobane ke tshabela ho wena.

₂Ke re ho Morena:

“Ke wena Morena wa ka,

ha ke na lehlohonolo

ntle ho wena.”

₃Ha e le medimo ya bohata

e lefatsheng,

ba kgahlwang ke yona

ba rohakehile.

₄Ba mathang kamora yona

ba ipakela mahlomola;

nke ke ka e etsetsa nyehelo ya madi,

esita le ho bolela mabitso a yona,

ho a bolela ka molomo wa ka.

₅Morena, ke wena lefa la ka

le mohope wa ka;

tseo ke nang le tsona

di tswa ho wena.

₆Ke sehetswe kgubung,

ruri ke thabela lefa la ka.

₇Ke tla boka Morena, moeletsi wa ka;

le bosiu pelo ya ka e a ntemosa.

₈Kamehla

ke ntse ke hopotse Morena,

hobane o ka tsohong la ka

le letona,

nke ke ka sisinngwa.

₉Kahoo pelo ya ka e thabile,

moya wa ka o nyakaletse,

le wona mmele wa ka o tla phomola,

o tla phomola o phutholohile;

₁₀o ke ke

wa ntlohela Nqalong ya Bafu,

o ke ke

wa lesela motshepuwa wa hao,

wa mo lesella ho bolla lebitleng.

₁₁O tla mpontsha tsela ya bophelo;

thabo e kgaphatsehang

e fumanwa ho wena,

ho ba ka tsohong la hao le letona

ke monyaka o sa feleng.

Morena, ako utlwe thapedi ya ka,

o mamele sello sa ka;

o sekehele thapelo ya ka tsebe,

hobane e tswa molomong

o se nang mano.

₂A nke ke ahlolwe ke wena,

mahlo a hao a bone seo e leng toka.

₃O hlahlobile pelo ya ka,

wa ntlhwela le bosiu,

wa nnonya,

empa ha wa fumana letho le kgopo;

ha ke a bua tse mpe jwaloka ba bang.

₄Ho ya ka mantswe

a tswang molomong wa hao,

ke qobile mekgwa ya dinokwane.

₅Mehato ya ka

e latetse mehlala ya hao,

maoto a ka

ha a a ka a kgothometseha.

₆Nna ke ipiletsa ho wena Modimo,

hobane o tla nkaraba;

ntshekehele tsebe,

o mamele lentswe la ka.

₇Ako bonahatse mohau wa hao,

mohau o hlollang.

Ba balehelang ka tsohong la hao

le letona,

ke wena ya ba pholosang

ho ba ba tsohelang matla.

₈O mpaballe

jwaloka thaka ya leihlo la hao;

o mpate moriting wa mapheo a hao,

₉hole le ba kgopo ba ntlhekefetsang,

hole le dira tse ntikanetseng.

₁₀Pelo tsa bona ha di na mohau,

melomo ya bona e tletse boikakaso.

₁₁Ba tla ba ntobile,

jwale ba nketsetsa sakana-la-nkope,

ba ntswepetse mahlo

ho nkgatakella fatshe.

₁₂Ba jwaloka tau

e labalabelang ho harola,

le jwaloka tawana

e bothileng selaong.

₁₃Thusa, Morena!

Ba futuhele, o ba dihe;

ka sabole ya hao

pholosa bophelo ba ka ho ba kgopo;

₁₄ka letsoho la hao mpholose Morena,

mpholose ho batho bana ba lefatshe,

bao moputso wa bona

o leng bophelong bona.

Ba kgorise sa mpanaphatloha,

ba kgorise

ka tseo o ba boloketseng tsona;

le bana ba bona

ba tla di kgotsofalla,

ba tle ba di siele

le ditloholo tsa bona.

₁₅Empa nna, ha ke se ke ahloletswe,

ke tla bona fahleho sa hao;

ha ke tsoha

ke tla kgotsofalla boteng ba hao.