Bible Reading Plan – Day 104

₂Modimo wa ka, Modimo wa ka,

o ntahletseng?

O hole le ho mpholosa,

ha o utlwe ho dumaela ha ka.

₃Modimo wa ka,

ke ipiletsa le motsheare,

empa ha o nkarabe;

ke howa le bosiu, ha ke kgutse.

₄Athe wena o a halelela,

wena eo Iseraele

a o binelang dithoko.

₅Bo-ntata rona ba nnile ba o tshepa;

ba o tshepa, mme wa ba namolela.

₆Ba nnile ba o llela,

mme ba phonyoha;

ba o tshepa,

mme ha ba a ka ba hlajwa ke dihlong.

₇Empa nna ke seboko, ha ke motho;

ke sekgobo ho bohle,

ke nyediswa ke setjhaba.

₈Bohle ba mponang ba a ntshoma,

ba nnyekoletsa melomo,

ba ntshisinyetsa dihlooho, ba re:

₉“O tshepile Morena!

A ke a mo lopolle,

a mo pholose haeba a mo rata!”

₁₀Athe ke wena

ya nntshitseng popelong ya mme,

wa etsa hore mme

a ntshike sefubeng sa hae;

₁₁ke abetswe wena

ho tloha tswalong ya ka,

o bile Modimo wa ka

ke sa le popelong ya mme.

₁₂Se be hole le nna,

hobane matshwenyeho a haufi,

mme ha ho ya ka nthusang.

₁₃Dipohwana tse ngata di ntikile,

dipoho tsa ditonana tsa Bashane

di mpokanetse;

₁₄dira di mpetletse meno,

jwaloka tau tse purumang,

tse harolang.

₁₅Ke jwaloka metsi a tsholohang,

masapo a ka a tswenehile;

pelo ya ka e jwaloka tshotso,

e qhibidiha ka sefubeng sa ka;

₁₆mmetso wa ka

o omeletse jwaloka lengetana,

leleme la ka

le kgomaretse mahalapeng a ka.

O nthobaditse leroleng la lefu.

₁₇Dintja tse ngata di ntikile,

sehlopha sa dinokwane

se ntikanetse,

tsena di ntlepotse maoto le matsoho.

₁₈Nka bala masapo a ka kaofela.

Batho ba ntjhebile, ba mmakaletse;

₁₉ba arolelana diaparo tsa ka,

ba laola aparo sa ka ka lotho.

₂₀Empa wena Morena,

o se be hole le nna;

wena, matla a ka,

potlakela ho nthusa.

₂₁Pholosa bophelo ba ka saboleng;

ke bona feela,

bo pholose marong a ntja.

₂₂Mpholose ditleneng tsa tau;

nna ya fokolang

mpholose nakeng tsa dinare.

₂₃Ke tla tumisa lebitso la hao

hara bana beso,

ke o rorise hara phutheho, ke re:

₂₄“Lona ba hlomphang Morena,

mo roriseng;

lona ditloholo tsohle tsa Jakobo,

mo tlotliseng;

lona ditloholo tsohle tsa Israele,

mo tshabeng.

₂₅“Ha a a ka a nyedisa ya hlophehileng,

leha e le ho se tsotelle

bohlophehi ba hae;

ha a a ka a mo patela fahleho sa hae,

empa o ile a utlwa ha a mo llela.”

₂₆Ke tla o rorisa phuthehong e kgolo,

kapele ho ba o hlomphang,

ke phethe dikano tsa ka.

₂₇Ba eisehang ba tla ja, ba kgore,

ba batlang Morena ba tla mo rorisa;

pelo tsa bona

di ke di thabe kamehla.

₂₈Lefatshe ka bophara ba lona

le hopole Morena,

le ke le kgutlele ho yena;

merabe yohle ya lefatshe e itihele,

e ke e itihele maotong a hae;

₂₉hobane puso ke ya Morena,

mme o rena hodima ditjhaba.

₃₀Bohle ba nang le matla lefatsheng

ba tla itihela maotong a hae;

bohle ba fellang leroleng

ba tla mo kgumamela.

Nna ke tla phelela yena;

₃₁ditloholo tsa ka di tla mo sebeletsa.

Meloko e tlang

e tla tsebiswa Morena,

₃₂setjhaba se esong ho tswalwe

se tla senolelwa ho loka ha hae:

Ona ke mosebetsi wa Morena.

Morena ke modisa wa ka,

ha ke hloke letho.

₂o nkatla makgulong a matala,

o nkisa pela metsi

moo ke tla phomola teng.

₃Ke mmusapelo:

O ntsamaisa tseleng tsa ho loka,

ka baka la lebitso la hae.

₄Leha nka tsamaya kgohlong e lefifi,

nke ke ka tshaba bobe,

hobane o na le nna,

lere la hao le molamu wa hao

di a nkgothatsa.

₅O ntokisetsa dijo

mahlong a dira tsa ka;

o nkamohela

ka ho ntlotsa hlooho ka ole,

le ka ho tlatsa mohope wa ka haholo.

₆Ruri lehlohonolo le mohau

di tla ba le nna,

ka matsatsi wohle a bophelo ba ka;

mme ke tla phela ka tlung ya Morena,

ke phele kateng kamehla yohle.

Lefatshe ke la Morena

le tsohle tse ho lona,

lefatshe le bohle

ba ahileng ho lona.

₂Ke yena ya le theileng

hodima mawatle,

a le tiisa hodima madiba.

₃Ke mang ya ka nyolohelang

thabeng ya Morena?

Ke mang ya ka emang

Sehalalelong sa hae?

₄Ke ya matsoho a hlokang molato,

ya pelo e hlwekileng,

ya sa lakatseng mafeela,

ya sa hlapanyetseng leshano.

₅O tla fumana lehlohonolo

ho Morena,

le ho loka ho Modimo,

mopholosi wa hae.

₆O jwalo moloko

wa ba batlang Modimo,

ba ratang ho bona fahleho sa hao,

wena Modimo wa Jakobo.

₇Lona menyako, bulehang!

Ipuleng, lona menyako

ya boholoholo,

ho tle ho kene Kgosi e tlotlehang.

₈Kgosi eo e tlotlehang ke mang?

Ke Morena ya matla, wa mohale,

Morena eo e leng mohale ntweng.

₉Lona menyako, bulehang!

Ipuleng, lona menyako

ya boholoholo,

ho tle ho kene Kgosi e tlotlehang.

₁₀Kgosi eo e tlotlehang ke mang?

Ke Morena wa mabotho,

ke yena Kgosi e tlotlehang.

Morena ke o rapela

ka moya wa ka wohle,

₂ke rapela wena Modimo wa ka.

Ke o tshepile,

ke se ke ka hlajwa ke dihlong;

dira tsa ka di se ke tsa ntsheha.

₃Bohle ba o tshepang

ha ba hlajwe ke dihlong,

dihlong di hlaba

ba sa tshepahaleng.

₄Morena, mpontshe ditsela tsa hao,

o nthute mehlala ya hao.

₅Ntsamaise nneteng ya hao,

o nthute yona,

hobane wena o Modimo

ya mpholosang;

ke o lebeletse ka matsatsi wohle,

ka baka la molemo wa hao Morena.

₆Morena, hopola lerato

le mohau wa hao,

hobane esale o le teng

ho tloha kgale.

₇Nteballe dibe le ditlolo

tsa botjha ba ka,

nkgopole ka mohau wa hao.

₈Morena o molemo, o lokile;

kahoo o busetsa baetsadibe tseleng.

₉Ba eisehang o ba tsamaisa ho lokeng,

o ruta ba eisehang tsela ya hae.

₁₀Ditsela tsohle tsa Morena

ke tsa mohau le botshepehi,

ho ba bolokang selekane sa hae,

le ho ba bolokang ditemoso tsa hae.

₁₁Ka baka la lebitso la hao Morena,

ntshwarele molato wa ka,

hobane o moholo.

₁₂Haeba ho teng ya tshabang Morena,

Morena o tla mmontsha tsela,

tsela eo a tshwanetseng ho e kgetha.

₁₃Eo o tla phela ka boiketlo,

lefatshe e tla ba lefa

la ditloholo tsa hae.

₁₄Morena ke motswalle

wa ba mo tshabang,

o ba tsebisa selekane sa hae.

₁₅Mahlo a ka

a tadimile Morena kamehla,

hobane ke yena ya tshwasollang

maoto a ka lerabeng.

₁₆Retelehela ho nna, o nkgauhele,

hobane ke nnotshi,

mme ke hlophehile.

₁₇Fedisa matshwenyeho a pelo ya ka,

o nntshe makaqabetsing a ka.

₁₈Tadima ho hlopheha ha ka

le tsietsi ya ka,

mme o ntshwarele dibe tsa ka tsohle.

₁₉Bona kamoo dira tsa ka

di leng ngata kateng,

le kamoo

di ntlhoileng hampe kateng.

₂₀Ako baballe bophelo ba ka,

o nnamolele,

ke se ke ka hlajwa ke dihlong,

kaha ke tshabela ho wena.

₂₁Ako ntshireletse

hobane ke hloka kodi, ke lokile;

hobane ke o lebeletse, Morena.

₂₂Modimo, ako lopolle Iseraele,

o mo lopolle

matshwenyehong a hae wohle.

Nkahlolele Morena;

metsamao ya ka ha e na kodi,

ke a o tshepa, ha ke thekesele.

₂Ntlhahlobe, Morena,

o nonye maikutlo a ka,

hlahlobisisa moya wa ka

le pelo ya ka.

₃Ke hopola mohau wa hao kamehla,

ke phela ho ya ka nnete ya hao.

₄Ha ke ahisane le batho ba leshano,

ha ke kopane le baikaketsi.

₅Ke hloile mokgatlo

wa ba etsang bobe,

nke ke ka ahisana le ba kgopo.

₆Ke hlapa matsoho

ho bontsha hore ha ke na molato,

ke potapota aletare ya hao Morena,

₇ke ntse ke bina sefela sa teboho,

mme ke bolela dimakatso tsa hao.

₈Morena, ke rata ntlo

eo o ahileng ho yona,

e leng sebaka seo tlotla ya hao

e dulang ho sona.

₉O se ke wa ntimetsa

mmoho le baetsadibe,

wa fedisa bophelo ba ka

mmoho le ba bona,

bona ba ratang ho tsholla madi,

₁₀bao matsoho a bona

a etsang tsa bolotsana,

bao diatla tsa bona

di amohelang tjotjo.

₁₁Ha e le nna,

metsamao ya ka ha e na kodi;

ako ntopolle, o nkgauhele.

₁₂Maoto a ka a eme motsitseng;

Morena, ke tla o boka diphuthehong.

Morena ke lesedi la ka

le pholoho ya ka;

nka tshaba mang?

Morena ke setshabelo

sa bophelo ba ka;

nka tshoha mang?

₂Ha ba etsang bobe

ba ntwantsha ho mpolaya,

dira tseo tsa ka le bao ba ntlhoileng

ba a kgothometseha, ba we.

₃Leha nka dikanelwa ke mara,

nke ke ka tshoha letho;

esita leha nka futuhelwa,

le teng ke tla nne ke be le tshepo.

₄Ntho e le nngwe feela

eo ke e kopang,

eo ke e batlang ho Morena,

ke hore ke phele ka tlung ya Morena

ka matsatsi wohle a bophelo ba ka,

ke tle ke bohe

bokgabane ba Morena,

ke bo nahanisise

ke le ka Tempeleng ya hae.

₅Nakong ya tsietsi o tla ntshireletsa,

a ntshireletse

motlotlwaneng wa hae,

a mpate motsheo ho tente ya hae,

a ntlhwesetse

hodima lefika la pholoho.

₆Jwale ke tla phahamela

dira tsa ka tse ntikileng,

ke tla etsa mohoo wa thabo

ha ke nyehela,

ha ke nyehela ka mahlabelo

ka tenteng ya hae,

ke bine, ke roke Morena.

₇Ako nkutlwe, Morena,

ha ke ipiletsa ho wena;

o nkgauhele, o nkarabe.

₈Pelo ya ka e lohotha wena, e re:

“Batla fahleho sa hae.”

Ruri ke batla fahleho sa hao,

wena Morena.

₉O se mpatele fahleho sa hao;

o se halefele mohlanka wa hao,

wa mo leleka.

Ke wena mothusi wa ka,

o se ke wa ntebela;

o se ke wa ntahla Modimo,

mopholosi wa ka.

₁₀Leha ntate le mme ba ka ntahla,

Morena o tla nthola.

₁₁Mpontshe tsela ya hao Morena,

o ntsamaise mmileng o bataletseng,

ka baka la ba ntaletseng.

₁₂Se tlohele dira tsa ka

ho etsa borata ka nna,

hobane paki tsa bohata

di eme lepaketla

di a nqosa,

di bile di a ntshokela.

₁₃Ruri Morena o tla ntswela molemo,

a ntswele molemo

lefatsheng la ba phelang.

₁₄Lebella Morena, o be sebete;

tiya pelo, o lebelle Morena.

Ke ipiletsa ho wena Morena;

Lefika la ka, ntshekehele tsebe,

esere ha o sa mmamele,

ka ba jwaloka ba theohelang,

ba theohelang lebitleng.

₂Ako utlwe thapedi ya ka,

ha ke o llela,

ke phahamiseditse matsoho a ka

Sehalalelong se halalelang

ka ho fetisisa.

₃Se nkahlole le ba kgopo,

ba etsang tse sa lokang,

ba buisanang le batho ka kgotso,

empa pelo tsa bona di tletse bobe.

₄Ba putse

ho ya ka mesebetsi ya bona,

ho ya ka bobe ba diketso tsa bona;

ba putse ho ya ka mesebetsi,

mesebetsi ya matsoho a bona,

o ba nee tse ba lokelang.

₅Kaha ba sa natse

diketso tsa Morena,

le ho tsotella mesebetsi,

Mesebetsi ya matsoho a hae,

o tla ba tamolla, a ba timetse.

₆Ho bokwe Morena,

hobane o utlwile thapedi ya ka.

₇Morena ke matla a ka le thebe ya ka;

pelo ya ka e mo tshepile,

mme o nthusitse;

pelo ya ka e nyakaletse,

ke mmoka ka dipina.

₈Morena ke matla a setjhaba sa hae,

ke setshabelo se pholosang,

setshabelo sa Motlotsuwa wa hae.

₉Pholosa setjhaba sa hao,

o hlohonolofatse lefa la hao;

o se fepe,

o se pepe kamehla le mehla.