Bible Reading Plan – Day 110

₂Lona babusi, na ruri

le ahlola ka ho loka?

Na le ahlola batho ka toka?

₃Tjhe, ka dipelong tsa lona

le rera tse kgopo,

lefatsheng le etsa tse sehloho,

le di etsa ka matsoho a lona.

₄Ba kgopo ba senyehile

ho tloha popelong,

ba leshano ba kgelohile

ho tloha tswalong ya bona.

₅Mahloko a bona

a tshwana le mahloko a noha;

ba ithibile ditsebe

sa marabe ya manganga,

₆ya sa utlweng lentswe

la ya mo weweletsang,

la ya mo bobisang ka bohlale ba hae.

₇Oho, Modimo,

pshatla meno a bona,

a pshatlelle ka mahanong a bona;

oho, Morena, motsula meno,

meno a mekwetsepe a ditawana.

₈Ba ke ba nyamele

sa metsi a phallang,

ba ke ba omelle

sa jwang bo hataketsweng.

₉Ba ke ba qhididihe

sa kgofu ha e ntse e tsamaya,

ba be jwaloka sefolotsana,

sona se sa boneng letsatsi.

₁₀Etlare ba eso lemohe

a ba fothole sa hlabahlabane,

a ba fefole sa lehola ka kgalefo,

ka kgalefo ya hae e tukang.

₁₁Ya lokileng o tla thaba

ha a bona phetetso,

o tla hlatswa maoto a hae

ka madi a ba kgopo.

₁₂Batho ba tla re:

“Ruri, ya lokileng o newa moputso;

ruri, Modimo o teng,

o ahlola batho lefatsheng.”

₂Modimo wa ka,

ako nnamolele direng tsa ka,

o ntshireletse

ho ba ntsohetseng matla.

₃Ako nnamolele

ho ba etsang tse kgopo,

o mpholose

ho ba ratang ho tsholla madi.

₄Ke bao ba matla ba bokane,

ba ntaletse,

le hoja ke se na molato

kapa sebe, Morena.

₅Ba a potlaka, ba itokisetsa nna,

le hoja ke sa etsa phoso;

tsoha, o nkgahlanyetse,

mme o bone.

₆Wena Morena,

Modimo wa mabotho,

Modimo wa Iseraele,

tsoha, o otle baditjhaba bohle,

o se ke wa hauhela le ya mong,

le ya mong wa mahlabaphiyo ao.

₇Kamehla ba kgutla ka phirimana,

ba rore sa dintja,

ba solle hara motse.

₈Ke bao ba bebera haholo,

ka melomong ya bona

ho tswa disabole,

mme ba re:

“Ke mang ya re utlwang?”

₉Empa wena Morena, o a ba tsheha,

o soma baditjhaba bohle.

₁₀Wena o leng matla a ka,

ke shebile wena,

hobane Modimo

ke qhobosheane ya ka.

₁₁Modimo ya nkgauhelang

o tla nthusetsa,

Modimo o tla etsa hore

ke telle ba ntaletseng.

₁₂O se ke wa ba bolaya,

esere tjhaba sa heso sa lebala;

o ba qhale ka matla a hao,

o ba dihe,

wena Morena, thebe ya rona.

₁₃Sebe sa bona ke mantswe a bona,

mantswe a tswang

melomong ya bona;

ba tshwaswe

ke boikgohomoso ba bona,

ka baka la dithohako

le wona mashano ao ba a buang.

₁₄Ba fedise ka kgalefo ya hao;

ba fedise, ba se hlole ba eba teng,

ba tle ba tsebe hore

Modimo o a busa,

o busa ntlo ya Jakobo,

ho isa dipheletsong tsa lefatshe.

₁₅Kamehla ba kgutla ka phirimana,

ba rore sa dintja,

ba solle hara motse,

₁₆ba shote, ba batle dijo,

ba komakome ha ba sa kgore.

₁₇Ha e le nna ke tla bina,

ke rorise matla a hao,

e sa le hosasa ke tla bolela,

ke bolele tsa mohau wa hao

ke di bolele ka mehoo ya thabo,

hobane o bile qhobosheane ya ka,

o bile setshabelo sa ka

mohla tsatsi

la matshwenyeho a ka.

₁₈Wena o leng matla a ka,

ke tla o roka,

hobane Modimo

ke qhobosheane ya ka,

ke Modimo ya nkgauhelang.

₃Modimo, o re lahlile, o re ripitlile;

o ne o halefile,

empa jwale ako kgutle,

o kgutlele ho rona.

₄O reketlisitse lefatshe, wa le petsola;

ako thibe mapatso a lona,

hobane le a qhehemana.

₅O bontshitse tjhaba sa hao bothata,

O re nwesitse jwala

bo re tsekedisang.

₆O mokgele ho ba o tshabang,

hore ba phonyohe metsu ya sera,

₇baratuwa ba hao ba tle ba lopollwe.

Re pholose

ka letsoho la hao le letona,

re pholose, o be o re utlwe.

₈Modimo o buile

a le Sehalalelong sa hae,

o buile a le ho sona, a re:

“Ke nyakaletse,

ke tla arola Shekeme,

ke sehe kgohlo ya Sukote dikoto.

₉Gileade ke ya ka,

le Manase ke ya ka,

Efraime ke katiba ya ka ya tshepe,

Juda yena ke lere la ka la puso.

₁₀Moabe ke lefiso la ho itlhatswetsa,

leo ke itlhatswetsang ho lona,

Edomo yona ke tla e hapa,

Filesitiya teng

ke tla etsa ditlatse tsa tlholo.”

₁₁Ke mang ya tla nkisa motseng,

motseng wa diqhobosheane?

Ke mang ya tla mphihlisa Edomo,

₁₂ha e le moo wena, Modimo,

o re lahlile,

o se o sa tswe le mabotho a rona?

₁₃Ako re thusetse direng tsa rona,

hobane thuso ya motho ke lefeela.

₁₄Ka thuso ya Modimo

re tla lwana senna,

ke yena ya tla hatakela dira tsa rona.

₂Modimo, ako utlwe sello sa ka,

ako mamele thapelo ya ka.

₃Ke ipiletsa ho wena

ke le pheletsong tsa lefatshe,

pelo ya ka e saretswe.

O ntlhwesetse lefikeng

leo ke sitwang ho le hlwa,

₄hobane o setshabelo sa ka,

qhobosheane e matla

mahlong a dira tsa ka.

₅A nke ke dule

ka Tempeleng ya hao kamehla,

ke tle ke tshabele

tlasa mapheo a hao.

₆Wena Modimo,

o amohetse dikano tsa ka;

ba tshabang lebitso la hao

o ba fa seo ba se lakatsang.

₇Ekeletsa kgosi matsatsi a bophelo,

dilemo tsa yona

di akaretse le meloko e tlang.

₈E ke e dule teroneng

kamehla le mehla,

e dule kapele ho Modimo;

mohau le nnete ya hao

di ke di e boloke.

₉Ke moo ke tla roka

lebitso la hao kamehla,

ha ke ntse ke phetha dikano tsa ka,

ke di phetha ka matsatsi wohle.

₂Ke ho Modimo feela

moo moya wa ka o ka phomolang,

pholoho ya ka e tswa ho yena.

₃Ke yena feela lefika la ka,

ke yena feela pholoho ya ka;

ke qhobosheane ya ka,

nke ke ka sisinyeha.

₄Lona bohle, le tla nne le pheelle

ho rusolla motho ho fihlela neng,

leha a se a le jwaloka lerako,

rako le hlephileng,

le motero o nyehlileng?

₅Ruri ba rera ho mo diha

boemong ba hae bo phahameng,

ba thabela leshano.

Ka melomo

ba hlohonolofatsa motho,

empa ka dipelong

ba a mo rohaka.

₆Moya wa ka o phomola

ho Modimo feela,

hobane tshepo ya ka e tswa ho yena.

₇Ke yena feela lefika la ka

le pholoho ya ka;

ke qhobosheane ya ka,

nke ke ka sisinyeha.

₈Pholoho ya ka

e tswa ho Modimo,

le tlotla ya ka

e tswa ho yena,

ke yena lefika la ka le matla;

Modimo ke setshabelo sa ka.

₉Mo tshepeng ka dinako tsohle,

mo tshepeng lona tjhaba sa heso,

mmuleleng difuba tsa lona.

Modimo ke setshabelo sa rona.

₁₀Bafo ke lefeela,

marena ke thetso;

sekaleng ba bobebe,

kaofela ha bona ke lefeela.

₁₁Se tshepeng ho hanyapetsa batho,

se ithetseng ka ho ikgapela maruo,

ka ho ikgapela maruo a ba bang;

leha maruo a lona a ka eketseha,

se beeng pelo tsa lona ho wona.

₁₂Modimo o buile hanngwe,

nna ka utlwa tsena tse pedi:

Matla ke a Modimo,

₁₃ke mohau ke wa hao, Morena;

ke wena ya putsang motho,

ho ya ka diketso tsa hae.

₂Modimo, ke wena Modimo wa ka,

Modimo eo ke mmatlang,

moya wa ka o o nyoretswe,

mmele wa ka o o hlolohetswe,

jwaloka naha e omeletseng,

e kgathetseng, e hlokang metsi.

₃Ka o tadima

o le Sehalalelong sa hao,

ka boha matla a hao le tlotla ya hao.

₄Mohau wa hao o molemo

ho feta bophelo,

molomo wa ka o tla o rorisa.

₅Ke tla o boka ha ke ntse ke phela,

ke phahamise matsoho a ka,

ke a phahamisetse ho wena.

₆Moya wa ka o tla kgora

jwaloka ya jang moko le mafura,

molomo wa ka o o rorise

o o rorise ka dithoko tsa thabo.

₇Ha ke ntse ke robetse ke a o hopola,

ke o nahana ka dinako tsa bosiu,

₈hobane o mothusi wa ka,

ke nyakalla moriting

wa mapheo a hao.

₉Moya wa ka o o kgomaretse,

tsoho la hao le letona

le a ntshehetsa.

₁₀Ba batlang ho timetsa bophelo ba ka

ba tla theohela

botebong ba lefatshe;

₁₁ba tla bolawa ka sabole e bohale,

mme ba jewe ke diphiri.

₁₂Athe kgosi e tla thabela Modimo,

bohle ba ikanang ka yena

ba tla ithorisa,

empa ba leshano

ba tla thijwa melomo.

₂Modimo, ako utlwe sello sa ka,

sello sa ka sa masisapelo,

o sireletse bophelo ba ka

o bo sireletse ha sera se ntshosa.

₃Mpate hole le mokgatlo,

mokgatlo wa ba etsang bobe,

hole le sehlopha sa ba kgopo;

₄ba leotsang maleme a bona

ba a leotsa sa disabole,

ba hlabang ka mantswe a babang,

mantswe a kang metsu.

₅Ba fula ya se nang kodi ba ipatile,

ba mo fula ka tsometso

ba se na letswalo.

₆Ba tiile morerong wa bona o mobe,

ba rera ho tjheha maraba, ba re:

“Re tla bonwa ke mang?”

₇Ba rera bokgopo, ba re:

“Re lohile mano ka bohlale.”

Mehopolo ya motho ke kweetsa,

le pelo ya hae ke kweetsa.

₈Empa Modimo o ba fula

ka metsu ya hae,

o ba hlaba ka ho ba tsometsa.

₉Maleme a bona a a ba timetsa;

bohle ba ba bonang

ba sisinya dihlooho.

₁₀Jwale bohle ba tla tshaba,

ba bolele mosebetsi wa Modimo,

ba utlwisise ketso ya hae.

₁₁Ya lokileng o tla thabela Morena,

mme a tshabele ho yena;

bohle ba pelo di ntle ba ithorise.

₂Modimo, o lokelwa ke thoriso,

e o lokela o le Sione;

dikano di phethelwa wena,

₃wena ya utlwang thapelo.

Batho bohle ba tla tla ho wena,

₄ba tle ka baka la dibe tsa bona.

Ha re imetswe ke melato,

wena o a re tshwarela.

₅Ho lehlohonolo eo o mo kgethileng,

wa mo amohela,

hore a tle a ahe mabaleng a hao.

Re tla kgora tse molemo

tsa Ntlo ya hao,

tse halalelang tsa Tempele ya hao.

₆O re arabela ka diketso tse hlollang,

diketso tse hlollang tsa toka,

wena Modimo, mopholosi wa rona;

wena o leng tshepo ya bohle

ho isa dipheletsong tsa lefatshe,

le dihlekehlekeng tse hole.

₇Ka matla a hao o hlomile dithaba,

o bontsha bonatla ba hao;

₈o kgutsisa ho tuduana ha mawatle,

ho tuduana ha maqhubu a wona,

le ho dumaduma ha ditjhaba.

₉Ba ahileng dipheletsong tsa lefatshe

ba tshaba dipontsho tsa hao;

o etsa hore bohle ba howe ka thabo,

ho tloha botjhabela

ho isa bophirimela.

₁₀O etela lefatshe, o a le nwesetsa,

o le sitsa ka nala;

noka tsa mahodimo di phename,

ho fa batho dijo.

Ka mokgwa oo o lokisa lefatshe,

₁₁ka ho kolobisa boleme ba masimo,

ho phophotha makwete a wona,

ho nolofatsa mobu

ka pula tsa medupe,

le ho hlohonolofatsa

dijalo tsa wona.

₁₂O rwesa selemo mofapahlooho,

mofapahlooho wa tse molemo tsa hao,

mehlaleng ya hao ke nala feela.

₁₃Makgulo a lehwatata

a tshwetshwetha metsi,

maralla a aparetswe ke thabo.