Bible Reading Plan – Day 114

Morena, baditjhaba ba kene,

ba kene hara lefa la hao,

ba silafaditse Tempele,

Tempele ya hao e halalelang,

ba fetotse Jerusalema lesupi.

₂Ditopo tsa bahlanka ba hao

ba di abetse nonyana tse fofang,

ditopo tsa batshepuwa ba hao

ba di abetse batana tsa naha.

₃Ba tsholotse madi a bona

jwaloka metsi hohle Jerusalema,

mme ha ho ya ba epelang.

₄Re sekgobo

ho bao re ahisaneng le bona,

re pale le sesomo

ho ba re potapotileng.

₅Morena, o tla re halefela

ho fihlela neng?

Lefufa la hao le tla nne le tuke,

le tuke jwaloka mollo

ho fihlela neng?

₆Theolela kgalefo ya hao

hodima baditjhaba,

baditjhaba bana ba sa o tsebeng,

le hodima mebuso ena,

mebuso e sa rapeleng lebitso la hao;

₇hobane di metsitse leloko la Jakobo,

di fetotse leaho la lona lesupi.

₈O se ke wa re balla melato,

melato ya bo-ntata rona,

o mpe o re kgahlanyetse kapele,

o re kgahlanyetse ka lerato la hao,

hobane re nyenyefaditswe haholo.

₉Ako re thuse, Modimo,

wena mopholosi wa rona,

bitso la hao le tle le tlotliswe;

ako re namolele,

mme o re tshwarele dibe

ka baka la lebitso la hao.

₁₀Ke hobaneng ha baditjhaba ba tla re:

“O kae Modimo wa bona?”

A re ke re bone ka mahlo a rona

ha o phetetsa madi

a bahlanka ba hao,

madi a tsholotsweng ke baditjhaba.

₁₁Mefehelo ya batshwaruwa

e ke e finyelle ho wena,

ka matla a letsoho la hao

ako pholose ba ahloletsweng lefu.

₁₂Morena, bao re ahisaneng le bona

o ke o ba buseletse hasupa

dinyefolo tseo

ba o nyefotseng ka tsona.

₁₃Empa rona setjhaba sa hao,

mohlape wa makgulo a hao,

re tla o boka kamehla,

re phetele meloko yohle

dithoko tsa hao.

₂Oho, modisa wa Iseraele,

ako re sekehele tsebe;

wena ya tsamaisang leloko la Josefa,

ya le tsamaisang jwaloka mohlape,

wena ya dutseng

hodima dikerubime,

₃ako iponahatse ho Efraime,

le ho Benjamine, le ho Manase.

Bontsha matla a hao, o re pholose.

₄Oho, Modimo, ako boele o re tsose,

o re bontshe sefahleho

se kganyang kgotso,

re tle re pholohe.

₅Morena, Modimo wa mabotho,

o tla re halefela ho fihlela neng,

rona tjhaba sa hao se o rapelang?

₆O se phedisa ka dikgapha

jwalokaha eka ke bohobe,

o se nwesa meokgo e mengata.

₇O re entse sesosa sa ditsekisano

tsa bao re ahisaneng le bona,

dira tsa rona di a re soma.

₈Oho, Modimo wa mabotho,

ako boele o re tsose,

o re bontshe sefahleho

se kganyang kgotso,

re tle re pholohe.

₉O ile wa hlomola morara Egepeta,

wa tla o hloma moo,

moo o lelekileng ditjhaba teng.

₁₀O ile wa o lokisetsa mobu,

metso ya teba,

yaba wona o tlala naha.

₁₁Moriti wa wona wa kwahela dithaba,

mahlaku a kwahela difate,

fate tsa dikedare tse telelehadi.

₁₂Makala a wona a nama,

a nama ho ya fihla Lewatleng,

mahlomela a ya fihla Nokeng.

₁₃Keng ha o dihile metero ya wona,

hore o tle o ikgellwe

ke mofetakatsela,

₁₄o tle o fatakwe ke kolobemoru,

o jewe ke batana tsa naha?

₁₅Oho, Modimo wa mabotho,

ako boele o kgutle;

ako tadime o le mahodimong,

o bone, o hlokomele morara ona.

₁₆Sireletsa se hlomilweng

ke tsoho la hao le letona,

mora eo o ikgodiseditseng yena.

₁₇Ba o tjhesitseng ka mollo,

ba o remileng,

ba ke ba timetswe ke kgalefo,

kgalefo ya fahleho sa hao.

₁₈Tsoho la hao le ke le be

hodima mokgethwa wa hao,

mora eo o ikgodiseditseng yena.

₁₉Jwale ha re sa tla hlola re o furalla,

ako boele o re phedise,

re tle re rapele lebitso la hao.

₂₀Oho, Morena, Modimo wa mabotho,

ako boele o re tsose,

o re bontshe sefahleho

se kganyang kgotso,

re tle re pholohe.

₂Tshelang Modimo ka ditlatse,

ke yena matla a rona;

etsetsang Modimo wa Jakobo mehoo,

mo etsetseng mehoo ya thabo.

₃Phokolang pina, le tidinye meropa,

le letse harepa,

le letse le seletsa

se modumo o monate.

₄Letsang lenaka ha kgwedi e thwasitse,

leha e tolokile,

mohla mokete wa rona.

₅Ke molao wa Iseraele,

ke taelo ya Modimo wa Jakobo;

₆ke temoso eo a neng a e nee leloko,

a e nea leloko la Josefa,

mohla le tswang naheng ya Egepeta.

Ka utlwa lentswe

ke sa le tsebe, le re:

₇“Ke tlositse mojaro

mahetleng a hao,

matsoho a hao a nyahladitse seroto;

₈ha o le matshwenyehong

wa ipiletsa ho nna,

mme ka o lopolla.

Ka o araba

ke ipatile marung a dumang,

ka o nonya maikutlo

metsing a Meriba.

₉“Mamelang, ha ke le eletsa;

lona setjhaba sa ka,

Iseraele, hoja wa ka wa mmamela!

₁₀Ho se be le modimo osele haeno,

o se kgumamele modimo

wa baditjhaba.

₁₁Ke nna Morena, Modimo wa hao,

ya neng a o ntshe naheng ya Egepeta.

Ahlama, ke tle ke o fepe.

₁₂“Setjhaba sa ka

ha se a ka sa mamela,

sa mamela lentswe la ka,

Iseraele ha a a ka a nnatsa.

₁₃Ka baka leo, ke ba tlohetse

mangangeng a dipelo tsa bona,

ba tsamaye

ho latela merero ya bona.

₁₄“Hoja setjhaba sa ka se ka mmamela,

Iseraele a tsamaya ka ditsela tsa ka,

₁₅nka be ke kokobetsa dira tsa hae,

ke di kokobetsa hanghang,

ke hlola ba mo lwantshang,

ke ba hlola ka letsoho la ka.

₁₆Bohle ba hloileng Morena

ba tla tlameha ho mo hlompha,

kotlo ya bona

e tla ba ya mehla yohle.

₁₇Empa Iseraele yena

ke ne ke tla mo fepa,

ke mo fepe ka koro e ntle,

ke mo kgorise ka mahe a dinotshi,

mahe a tswang lefikeng.”

Modimo o dutse lekgotleng

la bomodimo,

o ahlola a le hara baahlodi.

₂O re: “Le tla ahlola

ho fihlela neng,

le ntse le ahlola hampe,

le nne le emele ba kgopo?

₃Ahlolelang mofokodi ka toka,

ahlolelang le kgutsana ka toka;

etsetsang mohlophehi toka,

le mohloki le mo etsetse yona.

₄Lopollang mofokodi le mofutsana,

le ba namolele matsohong

a ba kgopo.”

₅Ha ba na tsebo kapa kutlwisiso,

ba itsamaela lefifing,

ba sisinya metheo ya toka.

₆Ke ile ka re: “Le medimo,

lona bohle

le bana ba Ya Hodimodimo;

₇empa le tla shwa jwaloka batho,

le we jwaloka kgosana efe kapa efe.”

₈Thusa, Modimo, o ahlole lefatshe,

hobane ditjhaba tsohle ke tsa hao.

₂Oho, Modimo,

o se ke wa ipha tshwea;

se kgutse, Modimo,

se kgobe matshwafo.

₃Bona, dira tsa hao di a rora,

ba o hloileng ba tsosa mohlahla.

₄Ba lohela setjhaba sa hao mano,

ba kunuta bao o ba sireleditseng.

₅Ba re: “Tloong, re ba fedise,

e se hlole e eba setjhaba,

bitso la Iseraele

le se hlole le hopolwa.”

₆Ba rerisana ba le pelonngwe,

ba entse selekane ho o lwantsha:

₇Baahi ba Edomo le Baishemaele,

Bamoabe le Bahagare,

₈Bagebale le Baamone le Baamaleke,

Bafilesita le baahi ba Tire,

₉le ba Asiria ba ikopantse le bona;

ba thusana le bana ba Lota.

₁₀Ako ba etse jwaloka ba Midiane,

o ba etse jwaloka Sisera,

le Jabine nokaneng ya Kishone,

₁₁ba neng ba timele Ene-Dore,

ba fetoha moitedi mobung.

₁₂Etsa hore marena a bona

a tshwane le Orebe le Seebe,

mahosana wohle a bona

a tshwane le Seba le Salemuna,

₁₃ba neng ba ile ba re:

“A re ikgapeleng

naha ya Modimo, e be ya rona.”

₁₄Oho, Modimo wa ka,

ako etse hore ba tshwane

le ditlhokwa setsokotsaneng,

ba tshwane le mmoko moyeng.

₁₅Jwalokaha mollo o tjhesa moru,

le hlaha e hotetsa dithaba,

₁₆ba lelekise ka sefefo sa hao jwalo,

o ba tshose ka sefefo sa kganyapa.

₁₇Etsa hore difahleho tsa bona

di aparelwe ke dihlong,

e le hore ba o batle, wena Morena.

₁₈Ba ke ba hlajwe ke dihlong,

ba tshohele ruri,

ba tlontlolohe, mme ba timele.

₁₉Ba tsebe hore ke wena feela Morena,

Morena, Ya Hodimodimo

ya okametseng lefatshe lohle.

₂Meaho ya hao e rateha hakaakang,

wena Morena wa mabotho!

₃Moya wa ka o motela ke ho hlolohela

mabala a ntlo ya Morena;

pelo ya ka le mmele wa ka

di etsetsa Modimo ya phelang ditlatse.

₄Esitana le serobele

se iphumanela leaho,

le lefokotsane le iphumanela sehlaha,

moo le beang madinyane a lona teng,

haufi le dialetare tsa hao,

wena, Morena wa mabotho,

kgosi ya ka, le Modimo wa ka.

₅Ho lehlohonolo

ba phelang tlung ya hao,

ba sa kgaotseng ho o rorisa.

₆Ho lehlohonolo

batho bao wena o leng matla a bona,

ba thabelang maeto a ho ya rapela.

₇Ha ba feta kgohlong e omeletseng,

e fetoha didiba;

le yona pula ya selemo

e e apesa ka mahlohonolo.

₈Ba ntse ba matlafala ho ya pele,

ha ba itlhahisa ho Modimo, Sione.

₉Oho, Morena Modimo wa mabotho,

ako utlwe thapelo ya ka,

o ntshekehele tsebe,

Modimo wa Jakobo.

₁₀Modimo, wena thebe ya rona,

ako tadime, o bone sefahleho,

fahleho sa motlotsuwa wa hao.

₁₁Letsatsi le le leng

le hlolwang mabaleng a hao,

le molemo ho feta a sekete

a hlolwang hosele.

Ke rata ho ba monyako

wa ntlo ya Modimo wa ka,

ho ena le ho phela

metlotlwaneng ya ba kgopo.

₁₂Morena Modimo ke qhobosheane,

ke thebe ya rona,

o fana ka mohau le tlotla;

ha ho letho le molemo

leo Morena a ka le timang

ba metsamao e hlwekileng.

₁₃Morena wa mabotho,

ho lehlohonolo motho ya o tshepang.

₂Morena, o ile wa kgahlwa,

wa kgahlwa ke lefatshe la hao,

wa kgutlisa ba leloko la Jakobo,

wa ba kgutlisa bothopuweng.

₃O ile wa leballa setjhaba sa hao,

wa se leballa molato wa sona,

wa se tshwarela dibe tsohle tsa sona.

₄O ile wa kokobetsa

bohale bohle ba hao,

wa kgutla kgalefong ya hao e tukang.

₅Ako boele o re kgutlise, Modimo,

wena, mopholosi wa rona,

o fedise kgalefo ya hao ho rona.

₆Na o tla nne o re halefele kamehla?

Na kgalefo ya hao

e ke ke ya kgaotsa

ho isa melokong e tlang?

₇Na o ke ke wa boela wa re phedisa,

setjhaba sa hao se tle se o thabele?

₈Morena, ako re bontshe

mohau wa hao,

mme o re pholose.

₉A nke ke utlwe

seo Morena Modimo a se bolelang,

hobane o tla bolella setjhaba sa hae

le batshepuwa ba hae tsa kgotso,

e le hore ba se ke ba kgutla,

ba kgutlela bothotong ba bona.

₁₀Ruri ho pholosa ha hae

ho haufi le ba mo tshabang,

e le hore tlotla ya hae

e tle e ahe fatsheng la rona.

₁₁Mohau le botshepehi di tla kopana,

ho loka le kgotso di tla akana.

₁₂Botshepehi bo tla ropoha lefatsheng,

ho loka ho tla theoha lehodimong.

₁₃Morena o tla fana ka tse molemo,

fatshe la rona le be le tjhai e kgolo.