Bible Reading Plan – Day 116

Morena, o bile setshabelo sa rona

melokong yohle.

₂Dithaba di eso be teng,

le lefatshe, le tsohletsohle

di eso hlahe,

haesale o le Modimo

ya se nang bofelo.

₃O kgutlisetsa motho leroleng,

o re: “Kgutlang, bana ba batho.”

₄Mahlong a hao dilemo tse sekete

di ka letsatsi la maobane

le seng le fetile,

di ka nakwana ya bosiu.

₅O fedisa batho hanghang,

e be e ke ke toro,

ba ka jwang bo melang hoseng.

₆Hoseng bo a mela, bo palese;

mantsiboya bo a pona, bo omelle.

₇Re fediswa ke kgalefo ya hao,

re thothometswa ke bohale ba hao.

₈Makgopo a rona o a a bona,

dibe tsa rona tse patehileng

wa di bea pontsheng ya hao.

₉Ditshiu tsa rona tsohle

di a kgutsufala,

di kgutsufatswa ke bohale ba hao,

dilemo tsa rona

di feta jwaloka mofehelo.

₁₀Ditshiu tsa ho phela ha rona

ke dilemo tse mashome a supileng;

ha re phela hantle,

di mashome a robedi.

Empa bongata ba tsona

ke ba ditsietsi le mahlomola;

di feta kapele, ebe re ile.

₁₁Ke mang ya ka tsebang

matla a bohale ba hao,

le ho tshabeha ha kgalefo ya hao?

₁₂Kahoo re rute

ho bala ditshiu tsa rona,

pelo tsa rona di tle di hlalefe.

₁₃Ako boele o re hopole, Morena!

O tla dieha ho fihlela neng?

Qenehela bahlanka ba hao.

E sa le hoseng,

₁₄re sitse ka mohau wa hao,

re tle re o etsetse ditlatse,

re thabe ka matsatsi wohle.

₁₅Ako re thabise

ka matsatsi a lekanang

le ao o re hlokofaditseng ka wona,

le ka dilemo tse lekanang

le tseo re bileng madimabe,

ra ba madimabe ka tsona.

₁₆Ako bonahatse mosebetsi wa hao

ho bahlanka ba hao,

le kganya ya hao

ho bana ba bona.

₁₇Morena Modimo wa rona

a ke a be mosa ho rona,

a atlehise mosebetsi

wa matsoho a rona,

e, a atlehise mosebetsi

wa matsoho a rona.

₁Ya phelang tshireletsong

ya Ya Hodimodimo,

ya ahileng moriting

wa Ya Matla wohle,

₂o re ho Morena:

“O setshabelo sa ka

le qhobosheane ya ka,

Modimo wa ka eo ke mo tshepang.”

₃Ke yena ya tla o tshwasolla

lerabeng la setsomi,

le lefung le timetsang la sewa.

₄O tla o kwahela ka masiba a hae,

o tshabele tlasa mapheo a hae.

Botshepehi ba hae

ke thebe le thejana:

₅O ke ke wa tshaba ditshosa tsa

bosiu,

kapa metsu e bebang motsheare,

₆leha e le lefu la sewa

le kgukgunang lefifing,

leha e le koduwa e timetsang

hara mpa ya motsheare.

₇Batho ba sekete ba ka wa,

ba wa lehlakoreng la hao,

le ba kete tse leshome

ka letsohong la hao le letona;

empa wena

o ke ke wa hlahelwa ke letho.

₈O tla bona ka mahlo a hao

ha ba kgopo ba putswa.

₉Kahobane o entse Morena

setshabelo sa hao,

mme Ya Hodimodimo

o mo entse qhobosheane ya hao,

₁₀ha ho bobe bo ka o welang hodimo,

ha ho kotlo e ka atamelang

motlotlwane wa hao.

₁₁O tla laela mangeloi a hae,

a o lebele ditseleng tsohle tsa hao.

₁₂A tla o kgakeletsa ka diatla tsa wona,

esere leoto la hao

la kgoptjwa ke lejwe.

₁₃O tla hata tau le marabe,

o hatakele tawana le noha.

₁₄“Kaha o a nthata, ke tla mo lopolla,”

ho rialo Morena,

“ke mo sireletse,

hobane o tseba lebitso la ka.

₁₅Ha a ipiletsa ho nna ke tla mo araba;

matshwenyehong ke be le yena,

ke mo lopolle, ke mo tlotlise.

₁₆Ke tla mo sitsa ka ditshiu tse telele,

ke mmontshe ho pholosa ha ka.”

₂Ke hantle ho boka Morena,

ho roka lebitso la hao,

wena Ya Hodimodimo,

₃ho bolela mohau wa hao

e sa le hoseng,

le botshepehi ba hao

ka masiu wohle,

₄ka seletsa se dikgwele tse leshome,

le ka harepa,

le thomo e modumo o monate.

₅Wena Morena,

o nthabisitse ka diketso tsa hao;

mesebetsi ya diatla tsa hao

ke e etsetsa ditlatse.

₆Morena, mesebetsi ya hao

e meholo hakaakang!

Mehopolo ya hao

e tebile hakaakang!

₇Motho wa lewatla a ke ke a e tseba,

sethoto se ke ke sa e utlwisisa.

₈Leha ba bolotsana ba mela,

ba mela jwaloka jwang,

mme bohle ba kgopo ba atleha,

ba loketse ho timella ruri.

₉Empa wena Morena,

o ya phahameng kamehla yohle.

₁₀Bona dira tsa hao, Morena,

bona, dira tsa hao di a timela;

bohle ba kgopo ba a qhalanngwa.

₁₁Empa nna o mmatlafaditse,

wa mmatlafatsa jwaloka nare,

wa ntlotsa ka ole e hlwekileng.

₁₂Ba ntaletseng ke ba tadima ka tello,

ke utlwa diboko tsa ba kgopo

ba ntsohelang matla.

₁₃Ya lokileng o a atleha,

o atleha jwaloka sefate sa palema,

o hola jwaloka sefate,

fate sa kedare ya Lebanone.

₁₄Ba hlomilweng ka tlung ya Morena

ba tla atleha

mabaleng a Modimo wa rona.

₁₅Le boqhekung

ba beha ditholwana,

jwaloka difate tse nonneng,

fate tse talana,

₁₆ho bontsha hore Morena o lokile,

ke lefika la ka,

ha ho na bobe ho yena.

₁Morena ke kgosi,

o kgabile ka botlotlehi;

matla ke seaparo sa hae

le leqhama la hae.

O tiisitse lefatshe,

le ke ke la sisinyeha.

₂Terone ya hao haesale e tiya

ho tloha kgalekgale,

haesale o le teng

ho tloha mehleng ya kgalekgale.

₃Dinoka di a tlala, Morena,

dinoka di a hwasa,

dinoka di a duma.

₄O matla ho feta diaduma,

diaduma tsa metsi a lewatle,

o matla ho feta maqhubu a lona;

Morena ya hodimodimo o matla.

₅Ditemoso tsa hao

di tshepahala haholo;

ntlo ya hao

e tshwanelwa ke kgalalelo,

kamehla le mehla, wena Morena.

₁Morena,

wena Modimo ya phetetsang,

ako iponahatse,

wena Modimo ya phetetsang.

₂Tsoha, wena moahlodi wa lefatshe,

o nee baikgohomosi

moputso wa bona.

₃Ba kgopo ba tla thaba

ho fihlela neng?

E tla ba ho fihlela neng, Morena?

₄Ba a hehla, ba bua ka boikakaso,

bohle ba kgopo ba a ithorisa.

₅Morena, ba hatakela setjhaba sa hao,

ba hatella bao e leng lefa la hao.

₆Ba fenetha mohlolohadi le mojaki,

ba bolaya le dikgutsana.

₇Ba re: “Morena ha a bone,

Modimo wa Jakobo ha a lemohe.”

₈Utlwisisang,

lona setjhaba sa mawatla;

dithoto ting! le tla hlalefa neng?

₉Na ya entseng tsebe

a ke ke a utlwa?

Ya bopileng leihlo

na a ke ke a bona?

₁₀Na yena ya kgalemelang ditjhaba

a ke ke a di otla,

yena ya rutang batho bohlale?

₁₁Morena o tseba mehopolo ya motho,

o a tseba hore ke lefeela.

₁₂Morena, ho lehlohonolo motho

eo o mo kgalemelang,

eo o mo rutang ka Molao wa hao,

₁₃hore o tle o mo kgatholle,

o mo kgatholle matsatsing a mabe,

ha ba kgopo bona

ba tjhekelwa lemena.

₁₄Morena a ke ke a furalla

tjhaba sa hae,

a ke ke a lahla

bao e leng lefa la hae.

₁₅Dikahlolo

di tla boela di etswa ka toka,

bohle ba pelo di ntle ba tla e latela.

₁₆Ke mang ya tla ntshireletsa

ho ba kgopo?

Ke mang ya tla mpuella

ho ba bolotsana?

₁₇Hoja Morena a se ke a nthusa,

nka be ke se ke robetse lebitleng.

₁₈Moo ke reng:

“Leoto la ka le a thella,”

mohau wa hao

o a ntshehetsa, Morena.

₁₉Ha pelo ya ka e touta haholo,

matshediso a hao

a hlabolla moya wa ka.

₂₀Na o ka ba le kopano le baahlodi,

baahlodi ba kgopo,

ba fetolang bobe molao?

₂₁Ba ikopanya mmoho

ho fedisa bophelo ba ya lokileng,

ba ahlolela ya se nang molato lefu.

₂₂Empa Morena

ke qhohosheane ya ka,

Modimo wa ka ke lefika

leo ke tshabelang ho lona.

₂₃O tla ba buseletsa bokgopo ba bona,

a ba timetse

ka baka la bobe ba bona.

Morena Modimo wa rona,

o tla ba timetsa.

₁Tloong,

a re etsetseng Morena mehoo,

re mo etsetse mehoo ya thabo,

lefika le re pholosang

re le etsetse ditlatse.

₂A re itlhahiseng kapele ho yena,

re itlhahise ka teboho,

re mo rokeng ka mehoo ya thabo.

₃Morena ke Modimo e moholo,

ke kgosi e kgolo,

e phahametseng medimo yohle.

₄Dikgohlo tsohle tsa lefatshe

di matsohong a hae,

le tsona ditlhoro tsa dithaba

ke tsa hae.

₅Lewatle ke la hae,

ke yena ya le entseng;

lefatshe o le bopile

ka diatla tsa hae.

₆Tloong,

a re itiheleng maotong a hae,

re itihele ka hlompho,

re weng ka mangwele

kapele ho Morena,

Morena, Mmopi wa rona.

₇Ke yena Modimo wa rona,

re setjhaba se diswang ke yena,

re mohlape o matsohong a hae.

Kajeno ha le utlwa lentswe la hae,

₈se thatafatseng dipelo tsa lona

jwaloka mohla Meriba,

jwaloka mohla Masa, lehwatateng;

₉moo bo-ntata lona

ba ileng ba nteka teng,

ba nnonya

leha ba ne ba bone diketso tsa ka.

₁₀Ka halefela moloko oo

ka dilemo tse mashome a mane,

ka ba ka re:

“Ke setjhaba se pelo di kgelohileng,

ha se tsebe ditsela tsa ka.”

₁₁Yaba ke hlapanya ke halefile, ke re:

“Ba ke ke ba ba ba kena

ba kena phomolong ya ka.”

₁Binelang Morena sefela se setjha,

lona ba lefatshe lohle

le ke le binele Morena.

₂Binelang Morena,

bokang lebitso la hae,

ka letsatsi le letsatsi, phatlalatsang

le phatlalatse tsa ho pholosa ha hae.

₃Bolelang tsa tlotla ya hae

hara ditjhaba,

le dimakatso tsa hae

hara merabe yohle.

₄Morena o moholo,

o lokelwa ke thoriso e kgolo,

o tshabeha ho feta medimo yohle.

₅Medimo yohle ya baditjhaba

ke mafeelafelane,

athe Morena

ke yena ya entseng mahodimo.

₆O eteletswe pele

ke tlotla le botlotlehi,

matla le kganya

di Sehalalelong sa hae.

₇Thoholetsang Morena,

lona ditjhaba tsa mefutafuta,

thoholetsang

tlotla le matla a Morena.

₈Thoholetsang tlotla

e lokelang lebitso la Morena,

tloong mabaleng a hae,

le mo nyehelle.

₉Kgumamelang Morena

le kgabile ka tse halalelang,

lefatshe lohle le thothomele,

le thothomele kapele ho yena.

₁₀Ereng ho baditjhaba:

“Morena ke kgosi,

o tiisitse lefatshe,

le ke ke la sisinyeha;

o ahlola ditjhaba ka ho loka.”

₁₁Mahodimo a ke a thabe,

lefatshe le nyakalle,

lewatle le hwase

le tsohle tse ka ho lona.

₁₂Naha e nyakalle

le tsohle tse ho yona,

difate tsa meru di etse ditlatse

₁₃kapele ho Morena, hobane o a tla,

o tlilo ahlola lefatshe.

O tla ahlola lefatshe ka toka,

le ditjhaba ka nnete ya hae.