Bible Reading Plan – Day 123

Bonang, ho hotle,

ho monate hakaakang,

ha bana ba motho

ba phedisana ka kgotso!

₂Ho jwaloka ole ya bohlokwa,

ole e tlotsang hlooho,

e keleketlelang ditedung,

ditedung tsa Arone,

e lepellelang molaleng

wa seaparo sa hae.

₃Ho jwaloka phoka ya Heremone,

e lalang hodima dithaba tsa Sione;

ke moo Morena a faneng

ka tlhohonolofatso ya hae teng,

e leng bophelo,

bophelo ba kamehla le mehla.

Tloong, le boke Morena,

lona bahlanka bohle ba Morena,

ba emang ka Tlung ya Morena,

ba emang ka teng ka masiu wohle.

₂Phahamisang matsoho a lona,

le a phahamisetse Sehalalelong,

le boke Morena.

₃Morena a ke a o hlohonolofatse,

a o hlohonolofatse a le Sione,

yena ya entseng

mahodimo le lefatshe.

₁Haleluja!

Rorisang lebitso la Morena,

mo roriseng,

lona bahlanka ba Morena,

₂ba emang ka Tlung ya Morena,

mabaleng a Ntlo ya Modimo,

Ntlo ya Modimo wa rona.

₃Rorisang Morena,

hobane Morena o molemo;

rokang lebitso la hae,

hobane o a rateha.

₄Morena o ikgethetse,

a ikgethela leloko la Jakobo,

e leng Iseraele,

hore e be leruo la hae.

₅Ruri ke a tseba

hore Morena o moholo,

Morena wa rona o moholo,

o moholo ho medimo yohle.

₆Morena o etsa tsohle

tseo a di ratang,

mahodimong le lefatsheng,

mawatleng le madibeng wohle.

₇Ke yena ya nyollang maru,

a a nyolle dipheletsong tsa lefatshe,

ya nesang pula ka mahadima,

ya bulelang difefo

moo a di kwaletseng teng.

₈Ke yena ya ileng a bolaya,

a bolaya matsibolo a Egepeta,

ho qala ka a batho

ho isa ho a diphoofolo.

₉Ho wena Egepeta,

o ile a romela

dipontsho le dimakatso, ho Faro

le ho bahlanka bohle ba hae.

₁₀Ke yena ya ileng a timetsa,

a timetsa ditjhaba tse ngata,

a bolaya dikgosi tse matla:

₁₁Sihone, kgosi ya Baamore,

le Oge, kgosi ya Bashane,

le mebuso yohle ya Kanana.

₁₂A fana ka naha ya bona

hore e be lefa,

lefa la Iseraele setjhaba sa hae.

₁₃Morena, lebitso la hao

ke la kamehla yohle;

Morena, o tla hopolwa,

o hopolwe ke meloko yohle.

₁₄Morena o tla ahlola,

a ahlolele setjhaba sa hae,

mme a qenehele bahlanka ba hae.

₁₅Medimo ya bohata ya baditjhaba

ke ya silefera le ya kgauta,

ke mosebetsi wa matsoho a batho.

₁₆E na le melomo, empa ha e bue;

e na le mahlo, empa ha e bone.

₁₇E na le ditsebe, empa ha e utlwe;

le ho phefumoloha,

ha e phefumolohe.

₁₈Ba e etsang

ba ke ba tshwane le yona,

ba be jwalo bohle ba e tshepang.

₁₉Lona, ba ntlo ya Iseraele,

bokang Morena;

lona ba ntlo ya Arone,

bokang Morena;

₂₀lona ba ntlo ya Levi,

bokang Morena;

le lona ba tshabang Morena,

bokang Morena.

₂₁Morena a ke a bokwe ke ba Sione,

yena ya ahileng Jerusalema.

Haleluja!

₁Haleluja!

Bokang Morena, hobane o molemo;

mohau wa hae ke wa kamehla yohle.

₂Bokang Modimo wa medimo;

mohau wa hae ke wa kamehla yohle.

₃Bokang Morena wa marena;

mohau wa hae ke wa kamehla yohle.

₄Ke yena a inotshi

ya entseng dimakatso tse kgolo;

mohau wa hae ke wa kamehla yohle.

₅Ke yena ya entseng mahodimo,

a a etsa ka bohlale;

mohau wa hae ke wa kamehla yohle.

₆O adile lefatshe hodima metsi;

mohau wa hae ke wa kamehla yohle.

₇O entse masedi a maholo;

mohau wa hae ke wa kamehla yohle;

₈letsatsi ho busa motsheare;

mohau wa hae ke wa kamehla yohle;

₉kgwedi le dinaledi ho busa bosiu;

mohau wa hae ke wa kamehla yohle.

₁₀Ke yena ya ileng a bolaya,

a bolaya matsibolo a Egepeta;

mohau wa hae ke wa kamehla yohle.

₁₁A ntsha Iseraele naheng ya Egepeta;

mohau wa hae ke wa kamehla yohle;

₁₂ka letsoho le matla

le sephaka se otlolohileng;

mohau wa hae ke wa kamehla yohle.

₁₃O ile a phatlola

Lewatle la Sufe koto tse pedi;

mohau wa hae ke wa kamehla yohle.

₁₄A tshedisa Iseraele hara lona;

mohau wa hae ke wa kamehla yohle.

₁₅A dihela Faro le mabotho a hae,

a a dihela Lewatleng la Sufe;

mohau wa hae ke wa kamehla yohle.

₁₆Ke yena ya ileng a tsamaisa setjhaba,

a tsamaisa tjhaba sa hae lehwatateng;

mohau wa hae ke wa kamehla yohle.

₁₇O ile a timetsa dikgosi tse kgolo;

mohau wa hae ke wa kamehla yohle.

₁₈A bolaya dikgosi tse matla;

mohau wa hae ke wa kamehla yohle:

₁₉Sihone, kgosi ya Baamore;

mohau wa hae ke wa kamehla yohle;

₂₀le Oge, kgosi ya Bashane;

mohau wa hae ke wa kamehla yohle.

₂₁A fana ka naha ya bona

hore e be lefa;

mohau wa hae ke wa kamehla yohle;

₂₂e be lefa la Iseraele,

mohlanka wa hae;

mohau wa hae ke wa kamehla yohle.

₂₃Ke yena ya ileng a re hopola

ha re ne re kokobeditswe;

mohau wa hae ke wa kamehla yohle.

₂₄A re phamola ho dira tsa rona;

mohau wa hae ke wa kamehla yohle.

₂₅Ke yena ya fepang dibopuwa tsohle;

mohau wa hae ke wa kamehla yohle.

₂₆Bokang Modimo wa mahodimo;

mohau wa hae ke wa kamehla yohle.

₁Mabopong a dinoka tsa Babilona,

re ne re dutse re lla,

ha re hopola Sione.

₂Meduwaneng ya tsona

re ne re fanyehile diharepa tsa rona.

₃Ke moo ba neng ba re hapile

ba ileng ba re kopa

hore re ba binele;

batubi ba rona

ba re kopa dipina tsa thabo,

ba re:

“Re bineleng difela tsa Sione!”

₄Re ka bina sefela sa Morena jwang,

lefatsheng la baditjhaba?

₅Haeba nka o lebala,

wena Jerusalema,

letsoho la ka le letona le ke le shwe.

₆Leleme la ka

le kgomarele mahalapeng a ka,

haeba ke sa o hopole,

ke sa thabele Jerusalema,

ke sa e thabele ho feta tsohle.

₇Morena, ako hopole,

ako hopole bana ba Edomo,

mohla letsatsi la Jerusalema,

ha ba ne ba re:

“E heletseng, e heletseng,

ho isa metheong ya yona!”

₈Wena motse wa Babilona,

o seng o tla ripitlwa,

ho lehlohonolo ya tla o buseletsa

seo o re entseng sona.

₉Ho lehlohonolo

ya tla nka masea a hao,

a a pshatlanye hodima lefika.

Morena, ke o boka

ka pelo ya ka yohle,

ke o roka pontsheng ya mangeloi.

₂Ke kgumama ke shebile Tempeleng,

Tempeleng ya hao e halalelang,

ke boka lebitso la hao

ka baka la mohau wa hao

le botshepehi ba hao;

o tumisitse lebitso la hao

le tshepiso ya hao ho feta tsohle.

₃Ha ke ne ke ipiletsa ho wena

o ile wa nkaraba,

wa matlafatsa moya wa ka.

₄Morena, dikgosi tsohle tsa lefatshe

di tla o boka,

ha di utlwa mantswe

a tswang molomong wa hao.

₅Di tla rorisa ditsela tsa Morena,

di re: “Tlotla ya Morena e kgolo.”

₆Leha Morena a phahame hakaalo,

o bona ba eisehang;

ba ikgantshang

o ba tseba ba sa le hole.

₇Leha nka phela hara ditsietsi,

wena o baballa bophelo ba ka;

letsoho la hao

le ntshireletsa bohaleng,

bohaleng ba dira tsa ka,

letsoho la hao le letona

le a mpholosa.

₈Morena o tla phetha

seo a ntheretseng sona.

Morena, mohau wa hao

ke wa kamehla yohle;

o se lahle

mosebetsi wa diatla tsa hao.

Morena, o ntlhahlobile, o a ntseba.

₂O tseba ha ke dula le ha ke ema,

o hlalohanya mehopolo ya ka,

o e hlalohanya ke sa le hole.

₃O ntisa ha ke tsamaya

le ha ke robetse,

o tsebisisa metsamao ya ka yohle.

₄Lentswe le eso be teng lemeng la ka,

o se o le tseba hantle, Morena.

₅O ntlhahile kamahohle,

o beile letsoho la hao hodima ka.

₆Tsebo ena e makatsang e a mpheta;

e tebile hoo nke keng ka e fihlela.

₇Nka ya kae

ho ipatela moya wa hao?

Nka balehela kae

ho ipatela sefahleho sa hao?

₈Ha nka nyolohela mahodimong,

o teng moo;

leha nka theohela Nqalong ya Bafu,

le teng o teng.

₉Leha nka adima mapheo a mafube,

ka ya aha dipheletsong tsa lewatle,

₁₀le hona moo letsoho la hao

le tla ntsamaisa,

letsoho la hao le letona

le tla ntshwara.

₁₁Leha nka re:

“Ruri lefifi le tla mpata,

lesedi le nteetseng hare

le tla fetoha bosiu,”

₁₂empa ho wena lefifi hase lefifi,

bosiu bo kganya jwaloka letsatsi,

lefifi le jwaloka lesedi.

₁₃Ke wena ya bopileng

bokahare ba ka,

ya kopantseng ditho tsa ka

ke sa le popelong ya mme.

₁₄Ke a o boka,

hobane o mpopile

ka mokgwa o makatsang;

mesebetsi ya hao e a hlolla,

hona ke ho tseba hantle.

₁₅Masapo a ka

a ne a sa pateha ho wena,

ha ke ne ke bopjwa sephiring,

ke kopanngwa ditho

ke le botebong ba lefatshe.

₁₆Mahlo a hao

a mpone ke eso tswalwe;

tsohle tsa ka

di ne di se di ngotswe bukeng ya hao,

le pele ke eba teng.

₁₇Modimo, mehopolo ya hao

e thata hakaakang!

Palo ya yona

e kgolo hakaakang!

₁₈Ha nka e bala,

e mengata ho feta lehlabathe;

ha nka e qeta,

o ntse o ena le nna.

₁₉Oho, Modimo,

hoja wa timetsa ba kgopo,

hoja ba tshollang madi

ba suthela hole le nna!

₂₀Ke ba buang hampe ka wena,

ba o lwantshetsang lefeela.

₂₁Na nke ke ka hloya

ba o hloileng, Morena,

ka halefela ba o tsohelang matla?

₂₂Ke ba hloile

ka lehloyo le phethehileng,

le nna ke dira tsa ka.

₂₃Ntlhahlobe, Modimo,

o tsebe pelo ya ka;

o nnonye maikutlo,

o tsebe mehopolo ya ka;

₂₄o bone hore na ke tseleng e mpe,

o ntsamaise tseleng

ya kamehla yohle.

₂Morena ako nnamolele

ho batho ba kgopo,

o ntshireletse

ho batho ba sehloho.

₃Ba loha mano ka dipelong tsa bona,

ba qholotsa ntwa kamehla.

₄Ba leotsa maleme a bona

a be jwaloka a dinoha,

mahloko a marabe

a tswa melomong ya bona.

₅Morena, ako nnamolele,

o nnamolele diatleng tsa ba babe,

o ntshireletse ho batho ba sehloho,

ba rerang hore ke kgothometsehe.

₆Baikgohomosi ba ntjhehetse sefi,

ba nketseditse leraba ka dikgwele,

ba ntjheketse mamena pela tsela.

₇Ke itse ho Morena:

“Ke wena Modimo wa ka.”

Oho, Morena, sekeha tsebe,

o sekehele sello sa thapedi ya ka tsebe.

₈Morena, monga ka,

mopholosi wa ka ya matla,

o sireletsa hlooho ya ka,

o e sireletsa ka nako ya ntwa.

₉Morena,

se dumelle ditakatso tsa ya kgopo,

se dumelle hore di phethahale,

le hore merero ya hae e atlehe.

₁₀Ba ntikanetseng ba se tsohe molota,

ditshokelo tsa bona

di ke di ba wele hodimo.

₁₁Morena a ba nesetse

mashala a tukang,

a ba dihele mohohlong

oo ba ke keng ba tswa ho wona.

₁₂Moetseletsi a se hlole a eba teng,

e eba teng lefatsheng lena,

motho ya sehloho

a futuhelwe ke bokgopo,

bo mo timetsang.

₁₃Ke a tseba

hore Morena o tla emela

a emele nyewe ya mohlophehi,

a ahlolele le mofutsana.