Bible Reading Plan – Day 135

₁Na ebe bohlale ha bo howe?

Kutlwisiso yona

ha e phahamise ntswe la yona?

₂Bo eme tseleng tse phahameng,

bo eme mateanong a ditsela.

₃Bo howeletsa

bo le kgorong tsa motse,

bo howeletsa

bo le monyako wa motse:

₄“Banna, mamelang, ke bitsa lona,

ke ipiletsa ho batho bohle.

₅Lona ba se nang tsebo

ithuteng bohlale!

Lona dithoto batlang kutlwisiso!

₆Theang tsebe

ke le bolelle tsa bohlokwa,

ke le phatlalletse tse lokileng.

₇Ke tla bua nnete feela,

hobane bokgopo ke bo hloile.

₈Polelo tsohle tsa ka ke tsa nnete,

thetso le bomenemene

ha di yo ho tsona,

₉di utlwahala tsohle

ho ya nang le kelello,

di nepahetse tsohle

ho ba nang le tsebo.

₁₀Inkeleng thuto ya ka

ho ena le silefera,

ikgetheleng tsebo ho ena le kgauta.

₁₁“Bohlale bo molemo

ho feta mabenyane a bohlokwa,

ha ho letho le ka bapiswang le bona.

₁₂Nna, Bohlale, ke fana le ka masene,

tsebo le tlhalohanyo

le tsona ke di ruile.

₁₃Ho tshaba Morena

ke ho hloya bobe,

ke hloile boikgohomoso,

ke hloile le boikakaso,

boitshwaro bo bobe le leshano

le tsona ke di hloile.

₁₄Boeletsi le ho ba sedi

le tsona ke tsa ka,

kutlwisiso le matla le tsona ke tsa ka.

₁₅Ke ka nna

kgosi di tsebang ho rena,

le babusi

ba etsang melao e lokileng.

₁₆Ke ka nna mahosi le mahosana

a tsebang ho busa,

le baahlodi bohle

ba tsebang ho ahlola.

₁₇Ba nthatang le nna ke a ba rata,

ba mpatlang

bona ba tla mphumana.

₁₈Ho nna maruo le tlotla di teng,

maruo a sa feleng le hona ho loka.

₁₉Tholwana ya ka

e kgahleha ho feta kgauta,

e feta kgauta e hlwekisitsweng,

tse fumanwang ho nna

di feta silefera e hlwekisitsweng.

₂₀Ke tsamaya tseleng ya toka,

tsela ya ka ke tsela ya molao.

₂₁Ba nthatang ke ba abela lefa,

matlole a bona ke a tlatse,

a be mohlohlo.

₂₂“Morena o mpopile

qalehong ya mesebetsi ya hae,

pele ho mesebetsi ya hae,

mesebetsi ya kgalekgale;

₂₃ke hlodilwe kgale,

pele ho mehla yohle,

ke hlodilwe tshimolohong,

fatshe le eso be teng.

₂₄Ka tswalwa

pele mawatle a eba teng,

didiba tse kollang di eso ka di runya;

₂₅ka tswalwa thaba di eso ka di thewa,

ka tswalwa le maralla a eso be teng,

₂₆pele fatshe le eba teng

le masimo a lona,

pele role la lefatshe

le lona le eba teng.

₂₇Ke ne ke le teng

ha a bea mahodimo bakeng sa wona,

a seha moedi wa loapi,

a o seha hodima mawatle;

₂₈ha a etsa lenamola la maru,

a le etsa sepakapakeng,

a phunya mehlodi ya madiba

a e tsitsisa;

₂₉ha a sehela lewatle moedi wa lona,

metsi a se ke a tlola taelo ya hae;

le ha a rala metheo ya lefatshe.

₃₀Ke ne ke le tsoho la hae le letona,

ka matsatsi wohle ke mo thabisa,

ke nyakaletse ke le kapele ho yena;

₃₁ke thabetse lefatshe e le la hae,

ke thabetse le batho a ba bopile.

₃₂“Jwale, bana ba ka, mmameleng!

Ho lehlohonolo

ba tsamayang tseleng tsa ka.

₃₃Mamelang thuto ya ka

le tle le hlalefe,

le se ke la hana ho e mamela.

₃₄Ho lehlohonolo

motho ya mmamelang,

ya lebelang kamehla

menyakong ya ka,

ya kokomalang thuleng la ntlo ya ka.

₃₅Ya mphumanang o fumana bophelo,

Morena o tla mo rekolohela.

₃₆Ya sa mphumaneng o ipea kotsing,

bohle ba ntlhoileng

bona ba rata lefu.”

₁Bohlale bo hahile ntlo ya bona,

ba hloma ditshiya tsa yona,

ba di hloma di supile;

₂ba hlaba dikgomo, ba ritela veine,

tafoleng ya bona ba bea mapetle.

₃Bo romme makgabunyane a bona

ho ya howa a le qhoweng ya motse:

₄“Bohle ba se nang tsebo

ba ke ba tle kwano!”

Le ho ba hlokang kelello bo re:

₅“Tloong le tlo ja,

le itjelle dijo tsa ka,

le inwelle veine eo ke e ritetseng.

₆Furallang ba se nang tsebo

le tle le phele,

le tsamaye tseleng ya kutlwisiso.

₇“Ya layang mosomi

o ipiletsa mahlapa,

ya kgalemang ya kgopo

o ipiletsa ho tlontloloha.

₈Se kgaleme mosomi,

esere a o hloya,

kgalema ya bohlale,

yena o tla o rata.

₉Rupela mohlalefi

a tla hlalefe haholo,

o rute ya lokileng

a eketse thuto ya hae.

₁₀“Ho tshaba Morena

ke qaleho ya bohlale,

ho tseba Ya Halalelang

ke yona kutlwisiso.

₁₁Ke ka nna bohlale

tshiu tsa hao di tla anafala,

lemo tsa bophelo ba hao

di lelefatswe.

₁₂Haeba o le bohlale,

bohlale ba hao bo tla o putsa,

haeba o le mosomi,

molato e tla ba wa hao.”

₁₃Bothoto bo ka mosadi,

mosadi ya lerata haholo:

Ha a tsebe letho, ke tseketseke.

₁₄O kokomala monyako

wa ntlo ya hae,

tulong se beilweng qhoweng,

sa bewa qhoweng ya motse.

₁₅O emeletse ho bitsa,

ho bitsa bo-mofeta-ka-tsela,

ba ikelang ka tsela tsa bona.

₁₆O re: “Kenang le mona

lona ba se nang tsebo!”

O rialo ho ba hlokang kelello.

₁₇“Metsi a utsuwang

a monate haholo,

qhoqha e jelwang sephiring

e a hlabosa!”

₁₈Ya se nang tsebo ha a tsebe

hore lefu le laletse moo,

baeti ba mosadi eo

ba feletse lebitleng.

₁Ana ke maele a Solomone:

Ngwana ya bohlale

o thabisa ntatae,

ngwana ya sethoto

ke masisapelo ho mmae.

₂Maruo a fumanweng ka bokgopo

ha a na thuso,

empa toka e lokolla motho lefung.

₃Ba lokileng

Morena ha a ba bolaise tlala,

takatso tsa ya kgopo o a di nyopisa.

₄Ya phuthileng matsoho

o tla futsaneha,

athe matsoho a kgothetseng

a ruisa monga wona.

₅Ya bokellang dijo hlabula

ke ngwana ya bohlale,

ya robalang ha ho kotulwa

o hlabisa dihlong.

₆Mahlohonolo a aparela ba lokileng,

polelo tsa ya kgopo

di kwetlile bosoro.

₇Ho hopolwa ha mofu ya lokileng

ho lehlohonolo,

empa bitso la ya kgopo

le ke ke la hopolwa.

₈Ya bohlale

o tla mamela molao pelong ya hae,

sethoto se beberang

sona se tla timela.

₉Motho wa nnete

o tsamaya a sireletsehile,

ya se nang nnete, yena o tla senolwa.

₁₀Ya iphapanyetsang phoso

o baka moferefere,

sethoto se beberang

sona se tla timela.

₁₁Polelo tsa ya lokileng

ke diba sa bophelo,

athe tsa ya kgopo

tsona di kwetlile bosoro.

₁₂Lehloyo le fehla moferefere,

athe lerato lona

le iphapanyetsa diphoso tsohle.

₁₃Bohlale bo fumanwa dipolelong

tsa ya nang le kutlwisiso,

empa thupa e kgalema

ya se nang kutlwisiso.

₁₄Ba bohlale ba ipokellela tsebo,

empa polelo tsa sethoto

di isa timelong.

₁₅Morui o tshepile maruo a hae,

mofutsana o timetswa

ke bofuma ba hae.

₁₆Mesebetsi ya ba lokileng

e ba tlisetsa bophelo,

empa ya ba kgopo

e ba hulela sebeng.

₁₇Ya mamelang ha a kgalengwa

o tseleng ya bophelo,

empa ya sa mameleng,

yena o a kgeloha.

₁₈Ya patang lehloyo ke mothetsi,

ya sebang ba bang, yena ke sethoto.

₁₉Ya buang haholo

sebe se teng polelong tsa hae,

ya sa buabueng

yena ke motho ya bohlale.

₂₀Polelo tsa ya lokileng

ke silefera e hlwekisitsweng,

pelo ya ya kgopo ha e na thuso.

₂₁Polelo tsa ba lokileng

di ruta ba bangata,

thoto tsona di shwa

ke ho hloka kutlwisiso.

₂₂Hlohonolo la Morena

le entsha motho,

ha ho maswabi ao le a tlisang.

₂₃Sethoto se thabela ho etsa bobe,

ya nang le kutlwisiso

o thabela bohlale.

₂₄Se tshajwang ke ya kgopo

se tla mo wela hodimo,

empa takatso ya ya lokileng

e tla phethahatswa.

₂₅Sefefo se sheshena ya kgopo

se ye le yena,

motheo wa ya lokileng

o hlola kamehla yohle.

₂₆Jwalokaha asene

e thellisa meno a motho,

mosi le wona o llisa mahlo a motho,

sekgoba se jwalo ho ba se romang.

₂₇Ho tshaba Morena

ho lelefatsa phelo ba motho,

empa lemo tsa ba kgopo

di tla kgutsufatswa.

₂₈Letshepa la ba lokileng

le hlahisa thabo,

athe la ba kgopo lona le a nyamela.

₂₉Tsela ya Morena

ke tshabelo sa ba lokileng,

empa ba kgopo bona e a ba timetsa.

₃₀Ya lokileng a ke ke a sisinyeha,

empa ba kgopo

ba tla fela lefatsheng.

₃₁Molomong wa ya lokileng

ho tswa bohlale,

leme le kgopameng le tla pongwa.

₃₂Ya lokileng

o bua puo tse thabisang,

athe ya kgopo

o tseba ho sokamisa ditaba.