Bible Reading Plan – Day 165

“Morena o puruma a le Sione,

o thwathwaretsa a le Jerusalema;

makgulo a badisa a a omella,

tlhoro ya Karamele yona e a pona.”

“Baahi ba Damaseka ba ntshitetswe

ka makgetlo a se na palo,

kahoo ha nka ke ka ba tshwarela;

ba siditse Gileade ka dilei,

ka dilei tse nang le meno a tshepe.

₄Ntlo ya Hasaele ke tla e tjhesa,

matlo a dikwele tsa Bene-Hadade

ke a timetse.

₅Ke tla roba mekwallo

ya kgoro tsa Damaseka,

ke timetse ba ahileng

ka Kgohlong ya Afene,

le ya tshwereng lere la puso,

puso ya Bete-Edene

baahi ba Arame ba thopelwe Kire,”

ho rialo Morena.

“Baahi ba Gasa ba ntshitetswe

ka makgetlo a se na palo,

kahoo ha nka ke ka ba tshwarela;

ba thopile setjhaba,

ba se thopa kaofela ha sona,

ba se rekisetsa Baedomo

hore e be makgoba.

₇Marako a Gasa ke tla a tjhesa,

matlo a dikwele tsa yona

ke a timetse.

₈Ke tla timetsa baahi ba Ashedode,

le ya tshwereng lere la puso,

puso ya Ashekelone;

motse wa Ekerone ke tla o otla,

masalla wohle a Bafilesita

ke a timetse,”

ho rialo Morena Modimo.

“Baahi ba Tire ba ntshitetswe

ka makgetlo a se na palo,

kahoo ha nka ke ka ba tshwarela;

ba thopetse setjhaba kaofela Edomo,

ba sa llelane letsetse

sa bana ba motho.

₁₀Marako a Tire ke tla a tjhesa,

matlo a dikwele tsa yona

ke a timetse.”

“Baahi ba Edomo ba ntshitetswe

ka makgetlo a se na palo,

kahoo ha nka ke ka ba tshwarela.

Ba manakisitse bana babo bona,

ba ba manakisa ka sabole,

ba ba manakisa ba se na mohau,

ba pheella kgalefong ya bona,

bohale ba bona ba tuka malakabe,

ba tuka sa malakabe a sa time.

₁₂Motse wa Temana ke tla o tjesa,

matlo a dikwele tsa Bosera

ke a timetse.”

“Baahi ba Amone ba ntshitetswe

ka makgetlo a se na palo,

kahoo ha nka ke ka ba tshwarela.

Ba tabotse baimana ba Gileade,

ba ba tabola dimpa,

ba tle ba atolose meedi ya bona.

₁₄Marako a Raba ke tla a tjhesa,

matlo a dikwele tsa yona ke a timetse,

hara mokorotlo,

mohla tsatsi la ntwa,

hara lehoduotswana,

mohla tsatsi la sefefo.

₁₅Kgosi ya Amone e tla thopuwa,

Yona le mahosana a yona kaofela,”

ho rialo Morena.

“Baahi ha Moabe ba ntshitetswe

ka makgetlo a se na palo,

kahoo ha nka ke ka ba tshwarela;

ba tjhesitse masapo,

masapo a kgosi ya Edomo,

ba a tjhesa a ba a fetoha molora!

₂Naha ya Moabe ke tla e tjhesa,

matlo a dikwele tsa Keriote

ke a timetse.

Moabe e tla timela ho le morusu,

ho le mokorotlo, ho lla lenaka.

₃Mmusi wa Moabe ke tla mo timetsa,

ke mmolaye

le mahosana a hae kaofela,”

ho rialo Morena.

“Baahi ba Juda ba ntshitetswe

ka makgetlo a se na palo,

kahoo ha nka ke ka ba tshwarela.

Ba furaletse Molao wa Morena,

ha ba a boloka ditaelo tsa hae;

ba kgelositswe ke medingwana bona,

eo bo-ntata bona

ba neng ba e sebeletsa.

₅Naha ya Juda ke tla e tjhesa,

matlo a dikwele tsa Jerusalema

ke a timetse.”

“Baiseraele le bona ba ntshitetswe

ka makgetlo a se na palo,

kahoo ha nka ke ka ba tshwarela.

Ya lokileng ba mo rekisa tjhelete,

mofutsana ba mo rekise meqathatso.

₇Ba fokolang ba ba hatakela dihlooho,

ba hatakelle

hlooho tsa bona leroleng,

batlatlapuwa ba ba hlokele toka.

Mora le ntatae ba kopanela seotswa,

bitso la ka le halalelang

ba le hlompholle jwalo.

₈Kathoko ho aletare tsohle

ba a robala,

ba robale ka kobo

tse beilweng paneng.

Ka Tempeleng ya Modimo wa bona

ba nwela veine

eo ba lefilweng ka yona.

₉Ke ne ke timetse Baamore

ba le thibetse tsela,

leha ba ne ba le balelele,

ba le balelele sa dikedare,

ba le matla sa difate tsa dieike.

Tholwana tsa bona ka di fedisa,

le metso ya bona ka e fothola.

₁₀Ke ne ke le ntshe,

ka le ntsha naheng ya Egepeta,

ka le ntsha,

ka le tsamaisa lehwatateng,

ka le tsamaisa

ka lemo tse mashome a mane,

ho ya le nea naha ya Baamore.

₁₁Hara bara ba lona

ka hlahisa baporofeta,

hara bahlankana ba lona

ka hlahisa bakgethwa.

Na ha ho jwalo,

lona tjhaba sa Iseraele?”

ho rialo Morena.

₁₂“Empa bakgethwa

le ba nwesitse veine,

la ba la hanela baporofeta,

la ba hanela ho porofeta.

₁₃“Bonang, ke tla le ripitla,

ke le pidile

sa koloi e qeqeketse haholo.

₁₄Ba lebelo ba ke ke ba phonyoha,

matla a diqhobane a ke ke a di thusa,

le mohlabani a ke ke a ipholosa.

₁₅Ya fulang ka motsu a ke ke a ema,

mohlabani ya lebelo

a ke ke a phonyoha,

le mopalami a ke ke a ipholosa.

₁₆Le bahale ba bahale ba tla baleha,

ba balehe ba le poosho

mohla tsatsi leo,”

ho rialo Morena.

₂“Hara ditjhaba tsohle tsa lefatshe,

ke lona feela ke ileng ka le kgetha;

ka baka leo, ke tla le otla,

ke le otlele makgopo a lona,

makgopo a lona kaofela.”

₃Na ba babedi

ba ka tsamaisana tsela

ba sa ka ba dumellana ho etsa jwalo?

₄Na tau e ka puruma hara moru,

ya puruma e sa bolaya nyamatsane?

Na tawana e ka rora

ka selaong sa yona,

ya rora ho se seo e se tshwereng?

₅Na nonyana e ka tshwaswa ke leraba,

la e tshwasa le sa tjhehwa ke motho?

Na sefi se ka raha mokgwephetsane,

ho se letho

le thetsitseng mokgwephetsane?

₆Ha lenaka le palaola hara motse

na setjhaba ha se ke se thothomela?

Ha koduwa e wela motse hodimo,

na hase Morena

ya tlisitseng koduwa eo?

₇Ruri Morena Modimo

ha a ke a etsa letho

a eso senole morero wa hae,

a o senolela bahlanka ba hae,

bahlanka ba hae, baporofeta.

₈Jwale tau e se e purumile;

ya ke keng a tshoha ke mang?

Morena Modimo o se a buile;

ya ke keng a porofeta ke mang.

₉Hlabang mokgosi,

le o hlabele matlo a dikwele,

dikwele tsa Ashedode,

le o hlabele le a Egepeta, le re:

“Phuthehelang dithabeng,

thabeng tsa Samaria,

le bone meferefere e kahara motse,

le bone kgatello

e hara baahi ba wona.

₁₀“Ba bokellang qhoqha,

ba bokelle kgapo,

ba e bokelle ka matlung

a dikwele tsa bona,

ha ba tsebe

ho etsa ho nepahetseng,”

ho rialo Morena.

“Sera se tla futuhela naha,

se e futuhele kahohle,

marako a lona a tshireletso

se a heletse,

matlotlo a matlo

a dikwele tsa lona se a hahare.”

“Jwalokaha modisa

a hlotha hanong la tau

meomo e mmedi feela

kapa ntlhana ya tsebe,

Baiseraele le bona

ba tla pholoswa jwalo,

bona ba phelang naheng ya Samaria,

motho a nkile

tsekana sa moalo wa hae,

kapa a nkile

otwana la setulo sa hae.

₁₄“Mohla ke otlang Baiseraele,

ke ba otlela dibe tsa bona,

ke tla heletsa dialetare,

aletare tsa Bethele;

manakana a aletare a tla kgaolwa,

a kgaolwe, a be a wele fatshe.

₁₅Ntlo e dulwang mariha

ke tla e heletsa,

ke heletse le e dulwang hlabula;

matlo a kgabisitsweng,

a kgabiswa ka manaka a tlou,

a tla heletswa,

mehohoma ya matlo

e fetohe masupi,”

ho rialo Morena.