Bible Reading Plan – Day 185

₁O madimabe hakaakang,

wena motimetsi,

wena o esong ho ka o timetswa!

O madimabe hakaakang,

wena lehlabaphiyo,

wena o esong ho ka e ekwa!

Ha o qeta ho timetsa,

wena o tla timetswa,

ha o kgaotsa ho eka,

wena ba tla o eka.

₂Oho, Morena, ako re hauhele,

rona ba o tshepileng!

Hoseng ho hong le ho hong

o re matlafatse,

o re pholose nakong ya ditsietsi.

₃Ha tolo la hao le thwathwaretsa,

tjhaba di a baleha,

ha o phahama,

tjhaba di a phasalla.

₄Lona ditjhaba,

kgapo ya lona e jelwe sa bookgolane

ha bo kumola,

banna ba e tsholohela

sa boiyane ba ditsie.

₅Morena o phahame,

hobane o ahile hodimo,

o entse hore toka le ho loka

di be teng Sione.

₆Morena e tla ba motheo wa nnete,

e be motheo mehleng ya lona,

e be sesiu sa pholoho

le bohlale le tsebo;

ho tshaba Morena

ke lona letlotlo la lona.

₇Bonang, bahale ba a bokolla,

ba bokolla hara diterata,

maqosa a kgotso

a lla sa mmokotsane.

₈Mmila e meholo e setse e le feela,

ditseleng le teng

batsamai ha ba sa bonwa,

selekane se senyehile,

metse e nyedisitswe,

ha ho sa le le ya hlomphehang.

₉Naha e omeletse, e ponne,

Lebanone e swabile, e a pona,

Sharone e fetohile lehwatata,

Bashane le Karamele

di hlohloreha mahaba.

₁₀“Jwale ke tla ema,”

ho rialo Morena;

“jwale ke tla tuma,

jwale ke tla phahama.

₁₁Le emotse mmoko,

le tla tswala ditlhaka,

ho phefumoloha ha lona

ke mollo o tla le timetsa.

₁₂Ditjhaba di tla tjha jwaloka kalaka,

di tjhe jwaloka fate tsa leoka

tse remilweng.”

₁₃Lona ba hole,

utlwang seo ke se entseng,

lona ba haufi,

ananelang matla a ka.

₁₄Baetsadibe ba Sione

ba tshwerwe ke tshabo,

ba kgopo bona ba a thothomela:

“Ke mang ho rona ya ka phelang

mollong o timetsang?

Ke mang ho rona ya ka phelang

malakabeng a kamehla yohle?”

₁₅Motho ya metsamao e lokileng,

ya puo di ntle,

ya hloileng ho rua ka mahahapa,

ya sa amoheleng tjotjo,

ya sa mameleng

merero ya ho bolaya,

ya thibelang mahlo a hae

hore a se bone bobe;

₁₆ke yena ya tla phela

bakeng tse phahameng,

eo setshabelo sa hae

e tla ba qhobosheane e thabeng.

Dijo o tla di fuwa,

a ke ke a hloka metsi.

₁₇Mahlo a lona

a tla bona kgosi e kgabile,

le bone le naha e nametseng hole.

₁₈Pelong ya hao

o tla lohotha tsietsi tsa pele:

“O kae

ya neng a bala dithelo?

O kae

ya neng a bea tjhelete sekaleng?

Se kae

sehlwela se neng se bala ditora?”

₁₉Tjhaba seo sa baikakasi

o ke ke wa hlola o se bona,

tjhaba seo puo ya sona

e sa tsebahaleng,

tjhaba sa mahwelea,

seo puo ya sona e sa utlwahaleng.

₂₀Tadimang Sione,

motse wa mekete e halalelang,

mahlo a lona

a tla bona Jerusalema,

leaho la kgotso,

tente e ke keng ya thakgollwa,

thakgisa tsa yona

ha di ka ke tsa kgokgothollwa,

thapo tsa yona

ha di ka ke tsa kgaoha.

₂₁Ke moo Morena

a tla tlotleha ho rona,

e tla ba baka sa dinoka tse batsi

le melatswana.

Ha ho kepe sa masokwana

se tla feta teng,

ha ho kepe se seholo

se tla sesiswa teng.

₂₂Morena ke yena moahlodi wa rona,

Morena ke yena

ya re beelang molao,

Morena ke yena kgosi ya rona,

Morena ke yena ya tla re pholosa.

₂₃Thapo tsa sekepe sa hao

di hlephile,

ha di sa tiisa thupa

e tshwereng diseile,

diseile di se di sitwa

ho thathalla.

Kgapo e ngata e tla arolelanwa,

esita le dihlotsa

di tla fumana seabo.

₂₄Ha ho moahi wa Sione ya tla re:

“Ke a kula!”

Dibe tsa baahi ba moo

di tla tshwarelwa.

₁Lona ditjhaba tsohle

atamelang, le mamele,

lona merabe sekehang tsebe!

Lefatshe le tsohle tse ho lona,

le tsohle tse tswang ho lona,

le ke le mamele!

₂Morena o halefetse ditjhaba tsohle,

kgalefo ya hae

e hodima mabotho wohle a tsona;

o di timeditse kaofela ha tsona,

o neelane ka tsona hore di bolawe.

₃Ba bolailweng

ba tla lahlelwa kantle,

topong tsa bona

ho tswe bodu se nkgang phu!

Thaba di be di thelle,

di thelle ke madi a bona.

₄Naledi tsohle tsa lehodimo

di tla nyamela,

mahodimo a phuthwe

sa ha ho phuthuwa lengolo;

naledi tsohle di tla wela fatshe,

di we sa mahaba a morara,

sa mahaba a omeletse,

sa feiye ha e hlohloreha sefateng.

₅Sabole ya Morena

e tswa lehodimong,

bonang ke eo e theoha

ho ahlola Edomo,

tjhaba seo a rerileng

ho se timetsa.

₆Sabole ya Morena

e kganathetse madi,

mafura e a jele

sa mpana-phatloha;

e kganathetse madi

a dikonyana le a dipodi,

e kganathetse mafura

a diphiyo tsa dipheleu.

Morena o tla etsa sehlabelo,

a se etse a le Bosera,

Baedomo a ba bolaye,

a ba etse mofela.

₇Dinare di tla bolawa,

di bolawe mmoho le bona,

ho bolawe le dipohwana

le poho tsa diqhashola.

Naha ya bona

e tla ba qhafutso ya madi,

mobu wa bona

o tshwetshwethe mafura.

₈Morena o kgethile letsatsi

la ho phetetsa,

le selemo sa ho lefeletsa Sione.

₉Metsi a noka tsa Edomo

a tla fetoha boka,

mobu wa yona o fetohe sebabole,

naha e fetohe boka

bo tukang malakabe!

₁₀E ke ke ya tingwa

motsheare le bosiu,

mosi wa yona

o tla foqoha kamehla yohle.

Naha e tla ba nanaola

ka mengwaha yohle,

ha ho ya sa tla feta hara yona.

₁₁Morubisi le sephookwana

di tla hahela ho yona,

makgohlo le lekgwaba

di etse dihlaha ho yona.

Modimo o tla e fetola letswatlare,

e be feela,

e hloke sebopeho jwaloka pele

pele ho tlholeho ya dintho.

₁₂Ha ho kgosi e tla busa naha eo,

mahosana wohle a yona

a tla fetoha lefeela.

₁₃Matlo a bokgosi

a tla mela meutlwa,

qhobosheane di melelle bobatsi

le hlabahlabane.

naha eo e tla fetoha

hae la diphokojwe,

e be moo dimpshe di phelang teng.

₁₄Batana tsa naha

di tla kopana le makanyane,

matsa a bitsane

ka ho etsa lemeemee;

phoofolo tsa bosiu di tla itlela moo,

di itlele moo

ho batla baka sa ho phomola.

₁₅makgohlo o tla haha sehlaha teng,

a behele a be a qhotse,

madinyane a a sireletse

ka mapheo a hae;

matlaka le wona

a tla kgobokanela moo,

le letona ka leng

le be le sethole sa lona.

₁₆Fuputsa bukeng ya Morena,

o bale:

Ha ho le e nngwe ya tsona

e tla ba siyo,

ha ho le e nngwe ya tsona

e tla hloka molekane.

Ke molomo wa Morena

o entseng taelo,

ke Moya wa hae o tla di bokella.

₁₇Morena o di abetse naha ka lotho,

ka tsoho la hae o di fa ka ho lekana,

di tla rua naha eo kamehla yohle,

meloko ya tsona e phele ho yona

ka ho hlahlamana.

₁Lehwatata le letswatlare

di tla thaba,

lefeella le nyakalle,

palesa di thunye.

₂Hwatata le tla thunya haholo,

le bine ka thabo, le fumane tlotla

e kang ya Lebanone,

botle e ke ba Karamele

le ba Sharone;

batho ba tla bona tlotla ya Morena,

ba bone le botle

ba Modimo wa rona.

₃Matlafatsang matsoho a fokolang,

le tiise le mangwele a rerekelang;

₄ho ba pelo di tshohileng le re:

“Matlafalang, le se ke la tshaba,

bonang, Modimo wa lona

o tla ho le phetetsa,

Modimo ke yena

ya tla otla dira tsa lona,

Modimo o tla tla, a le pholose.”

₅Mahlo a difofu a tla tutubollwa,

ditsebe tsa bo-tutu di thibollwe;

₆sehlotsa se tla tlola

se tlole jwaloka kgama,

leleme la semumu le bine ka thabo.

Metsi a tla phorosela hara lefeella,

melatswana e phalle hara lehwatata.

₇Hlabathe le tjhesang

le tla fetoha letsha,

diba di kopotse mobung o ommeng.

Moo e ne le dilao tsa diphokojwe

ho tla mela jwang, le lehlaka, le lodi.

₈Mmila o moholo o tla ba teng moo,

o rewe lebitso la Tsela ya Kgalalelo.

Baetsadibe ba ke ke

ba tsamaya ka yona,

e tla ba ya ba lokelang ho e tsamaya,

ba ke ke ba lahleha leha e le dithoto.

₉Tseleng tau e ke ke ya eba teng,

batana se bohale

se ke ke sa e tsamaya,

ha ho le se seng

se tla bonwa ho yona,

balopollwa ke bona feela

ba tla e tsamaya.

₁₀Balopollwa ba Morena

ba tla kgutla ka yona,

ba kene Sione ba bina ka nyakallo,

thabo ya kamehla

e be mefaphahlooho ya bona,

thabo le nyakallo di ba aperele,

maswabi le masisipelo

wona a ba tlohele.