Bible Reading Plan – Day 237

₁Tsoha! Tsoha!

O matlafale wena Sione!

Wena Jerusalema,

motse o halalelang,

apara aparo tsa hao,

aparo tse majabajaba,

maqai le ba sesila

ba ke ke ba hlola ba kena,

ba kena ho wena.

₂Hlohlora lerole le ho wena,

wena Jerusalema,

o eme, o dule teroneng,

wena Jerusalema.

Kgaola mahlaahlela

a molaleng wa hao,

wena moradi wa Sione,

o leng mothopuwa.

₃Morena o bua tjena:

“Le ile la rekiswa

ntle ho tjhelete,

le tla be le lopollwe

ntle ho tjhelete.”

₄Morena Modimo o bua tjena:

“Tjhaba sa ka se ile sa ya Egepeta

ho jaka teng,

hamorao Baasiria ba se tuba

ntle ho mabaka!”

₅Morena o re:

“Ebe jwale moo ke bonang?

Tjhaba sa ka se thopilwe

ntle ho lebaka,

babusi ba sona ba a soma,”

ho rialo Morena.

“Bitso la ka le nyefolwa kamehla.

₆Kahoo tjhaba sa ka

se tla tseba lebitso la ka,

mohlang oo se tsebe

hore ke nna ya buang.

E, efela ke nna ya buang.”

₇A matle hakaakang maoto

a ba tsamayang hodima dithaba,

bona ba tlisang molaetsa o molemo,

ba phatlalatsang taba tsa kgotso

ba tlisang molaetsa o molemo,

ba phatlalatsang taba tsa topollo,

ba reng ho Sione:

“Modimo wa hao o a busa!”

₈Mamelang,

bohodi tsa lona di a howeletsa,

di howeletsa hammoho ka thabo,

hobane ka mahlo a tsona di a bona,

di bona ha Morena a kgutlela Sione.

₉Binang pina tsa thabo,

le di bine le le mmoho,

binang lona masupi a Jerusalema,

hobane Morena o tshedisitse,

a tshedisa setjhaba sa hae,

Morena o lopolotse Jerusalema.

₁₀Morena o bontshitse tsoho la hae

le halalelang,

a le bontsha moo tjhaba tsohle

di ntseng di bona,

pheletso tsohle tsa lefatshe

di tla bona,

di bone ho pholosa

ha Modimo wa rona.

₁₁Tsamayang! Tsamayang

le tlohe mona!

Le se ame letho le silafetseng!

Tswang Babilona le itlhwekise,

lona ba nkang dijana tsa Morena.

₁₂Ha le na ho tswa le potlakile

kapa le baleha,

hobane Morena

o tla le etella pele,

Modimo wa Iseraele

o tla le sireletsa serao.

₁₃Bonang, mohlanka wa ka

o tla atleha,

o tla tlotlwa, a thoholetswe,

a phahamisetswe tulong tse hodimo.

₁₄Batho ba bangata

ba ne ba mo makaletse,

tshobotsi ya hae e ne senyehile

ho feta ya bohle,

sebopeho sa hae

se sa tshwane le sa batho.

₁₅Empa tjhaba tse ngata

di tla mo makalla,

kgosi di fetohe dimumu

kapele ho yena,

hobane di tla be di bona

seo di esong ho se bolellwe,

seo di esong ho se utlwe,

di tla se utlwisisa.

₁Ke mang ya dumelang

seo re se bolelang?

Tsoho la Morena

le bonahaditswe ho mang?

₂Mohlanka wa Morena

o metse pela hae jwaloka lehlomela,

jwaloka motso o melang

mobung o omeletseng.

O na hloka sebopeho

kapa bokgabane ba ho re hohela,

ha re mo tadima

bopeho sa hae se sa re kgahle.

₃O ile a nyediswa,

a furallwa ke batho,

ya eba motho wa mahlomola,

ya tsebang mahloko.

A tshwana le eo batho

ba tshabang le ho mo tadima;

o ile a nyediswa,

ra se ke ra mo natsa.

₄Ruri o ipelesitse mahloko a rona,

malwetse a rona

le wona a inkela wona,

empa rona ra hopola

e le ya otlwang, ya shapuwang,

le ho hlokofatswa ke Modimo.

₅O ila hlajwa

ka baka la ditshito tsa rona,

a tetetswa

ka baka la dibe tsa rona,

kotlo e re tlisetsang kgotso

ya mo wela hodimo,

ra fodiswa ke maqeba a hae.

₆Rona bohle

re tshwana le dinku tsa malahleha,

motho ka mong

o iketse ka tselana ya hae,

Morena o mmelesitse makgopo

a rona bohle.

₇O ila tlatlapuwa,

a ikokobetsa ha a hlokofatswa,

empa ha ho letho

leo a ila le bua;

a qhojwa sa konyana

ha e iswa tlhabong,

mme jwalokaha nku e sa lle

ha e kutwa,

le yena ha ho letho

leo a ila le bua.

₈A kgannwa ka dikgoka,

a ahlolwa ntle ho toka,

ba leloko la hae

ba se ke ba mo natsa.

A tloswa hara ba phelang

ba fatshe lena,

a bolawa ka baka la makgopo

a tjhaba sa ka.

₉O na hopoletswe

ho epelwa mabitleng a ba kgopo,

le hoja

a ne a eso ka a etsa phoso,

le leshano le eso tswe

molomong wa hae;

empa ha a sa shwele

a epelwa bitleng la morui.

₁₀Ho ratile Morena

hore a tetetswe, a hlokofatswe,

bophelo ba hae e be nyehelo

e tlosang sebe;

kahoo o tla bona ditloholo tsa hae,

matsatsi a bophelo ba hae a lelefale,

thato ya Morena

e atlehiswe ke letsoho la hae.

₁₁Ha moya wa hae

o so hlokofaditswe,

o tla bona tholwana

tsa ho hlokofatswa ha hae.

Mohlanka wa ka ya lokileng

o tla lokafatsa,

a lokafatse ba bangata

ka tsebo ya hae,

a be a jare le makgopo a bona.

₁₂Kahoo o tla ba le seabo

hara ba baholo,

kgapo yona

a e arolelane le dinatla,

hobane bophelo ba hae

o ila bo tella lefu,

a ba a balellwa le baetsadibe.

O ila itjarisa dibe

dibe tsa ba bangata,

mme baetsadibe a ba rapella.

₁“Bina, wena nyopa,

o sa kang wa beleha,

tsanyaola, o bine ka thabo,

wena o sa kang wa utlwa

bohloko ba pelehi,

hobane bana ba mosadi ya lahlilweng,

ba bangata ho feta

ba mosadi ya nyetsweng,”

ho rialo Morena.

₂“Atolosa setsha sa tente ya hao,

o sarolle le masira a ntlo ya hao;

lelefatsa kgwele tsa masira a hao,

le dimapo tsa tsona

o di kgokgothele.

₃O tla namela ka ho le letona

le ka ho le letshehadi,

ditloholo tsa hao

di tla hapa naha tsa baditjhaba,

di ahe metseng

eo e seng e le masupi.

₄“O se ke wa tshaba,

o ke ke wa hlajwa ke dihlong,

se tshabe ho tlontloloha,

o ke ke wa nyenyefatswa.

O tla lebala dihlong

tsa botjha ba hao,

ho nyediswa ha bohlolohadi ba hao,

ha o sa tla hlola o ho hopola.

₅Mmopi wa hao

ke yena monna wa hao,

Morena wa mabotho

ke lona lebitso la hae;

Ya Halalelang wa Iseraele

ke yena Molopolli wa hao,

o bitswa Modimo wa lefatshe lohle.

₆“Morena o o bitsitse

sa mosadi ya lahlilweng,

a o bitsa

sa mosadi ya hlomohileng,

ya nyetsweng a sa le monyenyane

a ba a lahlwa,”

ho rialo Modimo wa hao.

₇“Ke ile ka o furalla

ka motsotswana feela,

empa ka baka la kutlwelobohloko

ke tla o kgutlisa.

₈“Ka baka la kgalefo ya ka

ke ile ka o furalla,

ka o patela fahleho sa ka

ka motsotswana;

empa kahobane ke o rata,

ke tla o utlwela bohloko

kamehla yohle,”

ho rialo Morena, Molopolli wa hao.

₉“Ho nna tsena di tshwana

le tsa mehleng ya Nowe,

ha ke ne ke hlapanya ke re:

Morallo o ke ke wa eba teng hape;

kahoo ke hlapanya hore

nke ke ka hlola ke o halefela,

nke ke ka hlola ke o kgalema.

₁₀Leha dithaba di ka sisinngwa

le maralla a suthiswa,

lerato la ka le matla ho wena

le ke ke la sisinyeha,

kapa selekane sa ka sa kgotso

sa fediswa,”

ho rialo Morena, yena ya o utlwelang bohloko.

₁₁“Wena motse o hlokofaditsweng,

wa tsukutlwa ke difefo,

wa hloka motshedisi,

majwe a marako a hao

ke tla a hahella hodima sekama,

metheo ke e hahe ka majwe a safire.

₁₂Tora tsa hao ke tla di haha

ka mahakwe a mafubedu,

kgoro e be tsa majwe

a bofubedu ba malakabe,

marako e be a mahakwe a bohlokwa.

₁₃“Bara ba hao bohle

ba tla rutwa ke Morena,

ditloholo tsa hao

di be le kgotso ya sebele.

₁₄Ha o etsa tse lokileng

o tla matlafala,

bompodi bona

bo ke ke ba eba teng ho wena,

ha o ka ke wa tshaba letho,

esita le ditshoso

di ke ke tsa o atamela.

₁₅Bona, o tla fela o futuhelwe,

feela e se ka tumello ya ka;

empa ya o futuhelang

o tla ineela ho wena.

₁₆“Ke nna ya bopileng lelala,

lona le butswelang

mashala sefuthelong,

ebe le etsa hlomo

tse loketseng mosebetsi wa tsona;

le mosenyi ya senyang

o bopilwe ke nna.

₁₇Ha ho na sebetsa se tla o bolaya,

bohle ba o qosang

o tla ba hlola ka nyewe.

Lena ke lona lefa

la bahlanka ba Morena,

ke ho loka hoo ke ba neang hona,”

ho rialo Morena.

₁“Lona bohle ba nyorilweng,

tloong le nwe metsi,

le lona ba se nang tjhelete,

tloong le reke dijo, le je!

Tloong le ithekele veine,

le ithekele le lebese,

le di reke le se na tjhelete,

le sa lefe letho.

₂Le senyetsang tjhelete

ka tseo e seng bohobe?

Dintho tse sa kgotsofatseng,

keng ha le di sebeletsa ka thata?

Mmameleng ka hloko,

le je tse molemo,

meya ya lona e ithabise

ka tse monate.

₃“Ntshekeheleng tsebe,

mme le tle ho nna, le mmamele,

meya ya lona e tle e phele.

Ke tla etsa selekane

sa kamehla le lona,

e leng mehauhelo

eo ke neng ke e tshepise Davida.

₄Bonang, ke entse Davida

paki ya ka ho ditjhaba,

ka mo etsa moetapele

le molaodi wa ditjhaba.

₅Ruri le tla bitsa

tjhaba tseo le sa di tsebeng,

tjhaba tse sa le tsebeng

di tla mathela ho lona

ka baka la Morena

Modimo wa lona,

yena Ya Halalelang wa Iseraele,

hobane o le tlotlisitse.

₆“Batlang Morena

ha a sa ntse a ka fumanwa,

ipiletseng ho yena a sa le haufi;

₇ya kgopo

a furalle ditsela tsa hae,

molotsana

a furalle mehopolo ya hae,

a sokolohele ho Morena wa hae,

mme Morena o tla mo hauhela;

a sokolohele ho Modimo wa rona,

hobane yena o tshwarela haholo.

₈Mehopolo ya ka

hase mehopolo ya lona,

tsela tsa lona

hase tsela tsa ka,”

ho rialo Morena.

₉“Jwalokaha lehodimo

le phahametse lefatshe,

tsela tsa ka le tsona

di phahametse tsa lona,

le mehopolo ya ka

e phahametse ya lona.

₁₀“Jwalokaha pula le lehlwa

di etswa lehodimong,

mme di sa kgutlele teng

di sa kolobisa lefatshe,

hore le medise dimela di tle di atlehe,

di hlahisetse mojadi peo,

batho ba fumane dijo;

₁₁le dipolelo

tseo ke di buang di jwalo,

di ke ke tsa kgutlela ho nna

di sa sebetsa letho,

empa di tla phethahatsa

seo ke se ratang,

di phethe merero

eo ke di rometseng ho e phetha.

₁₂Le tla tloha ka thabo,

kgotso e le eteletse pele,

dithaba le maralla

di bine le di tadimile,

fate tsohle tsa naha

di le opele mahofi.

₁₃Moo ho metseng leoka

ho tla mela modutu,

moo ho metseng hlabahlabane

ebe ho mela mohlakola.

Tsena ke tsona

tse tla tumisa Morena,

e be pontsho ya kamehla yohle,

e ke keng ya fediswa.”

“Ahlolang ka toka,

le etse ho nepahetseng,

hobane ho pholosa ha ka

ho se ho le haufi,

le ho loka ha ka

ho se ho tla senolwa.

₂Ho lehlohonolo motho

ya etsang tsena,

ho lehlohonolo motho

ya di kgomarelang,

ya bolokang Sabatha,

ya sa se silafetseng,

eo tsoho la hae

le sa etseng tse mpe.

₃“Se dumelle moditjhaba

ya ikabetseng Morena hore a re:

‘Morena o tla nkgetholla

tjhabeng sa hae ho hang!’

Se dumelle lehaole

ho ipelaetsa, le re:

‘Nna ke sefate se omeletseng!’ ”

₄Morena o bua tjena ho mahaole:

“Mahaole a bolokang

Disabatha tsa ka,

a ikgethelang tse nthabisang,

a kgomarelang selekane sa ka,

₅kahara tempele ya ka,

kahara marako a yona,

ke tla a etsetsa kgopotso,

ke a ree lebitso, bitso le fetang

la ba nang le bara le baradi,

ke tla a rea lebitso la kamehla yohle,

bitso le ke keng la hlola le fediswa.

₆“Haele baditjhaba

ba ikabetseng Morena,

ba ikabetseng ho mo sebeletsa,

le hona ho rata bitso la hae,

bao e leng bahlanka ba hae,

ba bolokang Sabatha,

ba se boloka ba sa se silafatse,

ba kgomaretseng selekane sa ka;

₇bona ke tla ba tlisa

thabeng ya ka e halalelang,

ke ba thabise

ka tlung ya ka ya thapelo.

Nyehelo tsa bona tsa setjheso

le mahlabelo a bona,

tsena ke tla di amohela

aletareng ya ka,

hobane ntlo ya ka

e tla bitswa ntlo ya thapelo,

e bitswe ntlo ya thapelo

ya ditjhaba tsohle.”

“Ke sa tla boela

ke mo kgutlisetsa ba bang,

ntle ho bao

ke seng ke ba kgutlisitse.”

₉“Lona batana tsohle tsa naha

tloong, le harole,

lona dibatana tsohle tsa meru.

₁₀Balebedi ba Iseraele ba foufetse,

ha ba na tsebo,

ke ntja tsa dimumu,

ha di tsebe ho bohola,

di a robala, di bothe,

di ithatela boroko.

₁₁Ke ntja tsa menyollo,

ha di ke be di kgore,

ke badisana ba se nang kutlwisiso,

motho ka mong

o ikela ka tsela ya hae,

motho ka mong

o ipatlela mouno

moo o ka bang teng.

₁₂Motho ka mong o re:

‘Tloong kwano, ke tla lata veine!

A re itlopeng jwala,

re be re bo shebe feela!

La hosasane

le tla nne le ke la kajeno,

mohlomong le tla ba letle

ho feta lena!’ ”