Bible Reading Plan – Day 250

₂Lona maqheku mamelang mona!

Lona baahi bohle ba naha,

sekehang tsebe!

Na mehleng ya lona

ntho e tjee e kila bonwa?

Mehleng ya bo-ntata lona

teng e kila bonwa?

₃Lona le e phetele bana ba lona;

bona ba e phetele ditloholo tsa lona;

tsona di e phetele

ditloholwana tsa lona.

₄Ditsie tsa fihlellana ka mekgahlelo:

wa pele wa eja dijalo, wa siya,

wa bobedi wa eja, le wona wa siya,

wa boraro wa eja, le wona wa siya,

wa bone wa eja, wa kokona tsohle.

₅Lona matahwa, tsohang le lle!

Lona bohle ba nwang veine,

bokollang, le lle,

le llele veine e ntjha,

hoba le e amohilwe

le le kgatheng la ho e latswa.

₆Tjhaba ke seo

se futuhela naha ya heso,

ke tjhaba se matla,

palo ya sona ke boiyane;

meno a sona ekare a lekakuba,

mekwetsepe ya sona

ekare ya tauhadi.

₇Fate tsa ka tsa morara

se se se di sentse,

tsa feiye tsona

sa di ebola makgapetla,

sa a ebola, sa a lahlela hole,

makala a tsona a sala a sweufetse.

₈Bokollang sa ngwetsana

e apere tse mahwashe,

e bokollela mohatsa yona

wa matswathaka.

₉Nyehelo ya dijo le ya dino

e fedisitswe ka Tempeleng,

ka Tempeleng ya Morena.

Baprista ba aparetswe ke bofifi,

bona baprista

ba sebeletsang Morena.

₁₀Masimo a lobetswe, a senyehile,

naha e omeletse, e se le sekaka,

mabele a lobetswe, a senyehile,

veine e ntjha ha e sa ritelwa,

ole le yona ha e sa fumanwa.

₁₁Lona balemi, nyahamang dipelo!

Lona ba lemang morara, bokollang!

Bokollelang koro,

le bokollele harese,

hoba kotulo e senyehetse masimong.

₁₂Fate tsa morara di se di omeletse,

fate tsa feiye tsona di ponne,

fate tsa kgarenate,

tsa palema le tsa diapole:

Difate tsohle tsa naha di omeletse.

Ruri batho ba feletswe ke monyaka.

₁₃Lona baprista,

aparang tse mahwashe, le lle!

Lona basebeletsi ba aletare,

bokollang!

Tloong, le lale le apere,

le apere tse mahwashe,

lona basebeletsi ba Modimo wa ka,

hoba nyehelo ya dijo le ya dino

e fedisitswe ka Tempeleng,

ka Tempeleng ya Modimo wa lona.

₁₄Kgethang letsatsi la ho itima dijo,

le meme phutheho e halalelang.

Phuthang maqheku

le baahi bohle ba naha,

ba phuthehele

ka Tempeleng ya Morena,

ya Morena Modimo wa rona:

bohle ba meketso,

ba ipiletse ho Morena.

₁₅A letsatsi le tshabehang!

Tsatsi la Morena le se le le haufi!

Le tla tla e le tsatsi la timetso

e tswang ho Ya Matla wohle.

₁₆Na dijo ha di a senyeha

re ntse re di shebile?

Ka Tempeleng ya rona

thabo le monyaka di kae?

₁₇Peo e bolelletse katlasa makwete,

mediko e senyehile, disiu di tabohile,

hobane mabele le wona a phutsitse.

₁₈Diphoofolo di dumaela habohloko!

Mehlape ya dikgomo e a diila,

e hloka makgulo;

mehlape ya dikgutshwane

le yona e a tsherema.

₁₉Oho, Morena,

ke ipiletsa ho wena,

hobane hlaha e tjhesitse

makgulo a lehwatata,

fate tsohle le tsona

tsa tjhella hara dithota.

₂₀Dibatana tsa naha di a o bokollela,

hobane metsi a dinoka

a pshele pshi!

Hlaha e tjhesitse

le makgulo a lehwatata.

₁Letsang lenaka le le Sione,

le hlabe mokgosi

thabeng ya ka e halalelang!

Baahi bohle ba naha ba thothomele,

hobane letsatsi la Morena

le atametse,

tsatsi la Morena le se le le haufi.

₂Ke tsatsi la lefifi la bo-nka-ntjana,

tsatsi le phetheselang maru,

maru a matshomatsho!

Lebotho le leholo, le matla, le a tla,

le tla hlaha sa mafube dithabeng;

le kaalo ka lona

ha le eso ka le bonwa,

e bile le kaalo ha le sa tla bonwa.

₃Kapele ho lona hlaha e a tjhesetsa,

kamorao ho lona ho tuka malakabe.

Kapele ho lona

naha e ka tshimo ya Edene,

kamorao ho lona

naha e sala e le nanaola;

le a fiela, ha le siye le letho.

₄Ho ropoha ha lona

ho tshwana le ha dipere,

le matha sa dipere,

sa pere tsa ntwa di kgema;

₅le laqoma

hodima ditlhoro tsa dithaba,

lerata la lona e ka la kariki tsa ntwa,

e ka la mollo o qhoma,

o tjhesa matlakala,

e ka la diqhobane

di eme thekong ya ntwa.

₆Ha tjhaba di le bona

e ba di a tlallwa,

fahleho tsohle di pudufale.

₇Le kgoroha jwaloka bahale,

le hlwa marako sa bahlabani.

Le tsamaya le tobile pele feela,

theko ya lona e entse lekaka.

₈Ha le tsamaya

ha le theselane ka ditswe,

mohlabani ka mong

o tsamaya a tobile pele feela.

Le a fohla,

le itukubetse hara marumo,

ha ho letho le ka le emang kapele.

₉Le feresa motse,

le mathe hodima marako,

le hlwelle le kahodima matlo,

le kene ka difesetere se ka mashodu.

₁₀Ha botho lena le kgoroha,

fatshe le a reketla,

mahodimo le wona a tsukutlehe;

letsatsi le kgwedi di a fifala,

dinaledi di kgaotse ho phatsima.

₁₁Morena o kgaruma

a eteletse mabotho a hae pele,

hoba mabotho a hae

e hlile ke boiyane;

ke dinatla, a phetha taelo ya hae.

Letsatsi la Morena le leholo,

le leholo le bile le a tshabeha!

E be ke mang ya ka le mamellang?

₁₂“Hona jwale,” ho rialo Morena,

“kgutlelang ho nna

ka pelo tsa lona tsohle,

ka ho itima dijo,

ka meokgo le ka dillo.”

₁₃Pelo tsa lona di ke di swabe,

ho ena le ho hahola

diaparo tsa lona.

Kgutlelang ho Morena,

Morena Modimo wa lona,

hobane o mosa, o mohau,

o dieha ho halefa,

o tletse lerato,

o hauhela ba etsang bokgopo.

₁₄Mohlomong Morena

a ka nna a hauha,

a boela a le hlohonolofatsa,

a le fa dijo le dino

tsa ho nyehella Morena,

Morena Modimo wa lona.

₁₅Letsang lenaka le le Sione,

le kgethe letsatsi la ho itima dijo,

le meme phutheho e halalelang.

₁₆Bokellang setjhaba se kgobokane,

le meme phutheho e halalelang;

phuthang maqheku le phuthe bana,

le phuthe le masea a anyesang.

Monyadi a tswe

ka kamoreng ya hae,

monyaduwa a tswe

ka leqatheng la hae.

₁₇Pakeng tsa lethule,

lethule la Tempele le aletare,

baprista, bahlanka ba Morena,

ba lle, ba re:

“Hauhela tjhaba sa hao, Morena;

tjhaba sa hao se se fetohe sekgobo,

sa fetoha sesomo hara baditjhaba,

esere baditjhaba ba se soma, ba re:

‘O kae Modimo eo wa bona?’ ”

₁₈Morena a boulela naha ya hae,

setjhaba sa hae a se hauhela.

₁₉Morena a araba tjhaba sa hae,

a re: “Bonang,

ke tla le fa tjhai e ngata,

le tjhaye koro le veine le ole,

le je, le be le di shebe feela,

baditjhaba ba se hlole

ba le etsa sesomo.

₂₀“Ke tla leleka lebotho

le tswang leboya,

ke le lelekele naheng e ommeng,

naha ya matswatlare,

sehlooho sa lona se lebe

watleng le ka botjhabela,

serao se lebe

watleng le ka bophirima.

Ditopo tsa lona di tla nkga,

di nkge di re phu!

Seputa sa tsona se etse sehou,

hobane lebotho leo

le entse tse kgolo.”

₂₁Wena lefatshe,

se ke wa tshaba letho;

thaba, mme o nyakalle,

hobane Morena o entse tse kgolo.

₂₂Lona dibatana tsa naha,

se tshoheng letho,

hobane makgulo a lefeella

a ba matalana;

fate se beha ditholwana tsa sona:

Fate sa feiye le sa morara

di beha haholo.

₂₃Lona bana ba Sione, thabang,

le thabele Morena Modimo wa lona;

o le neseditse dipula

hobane a lokile,

a le nesetsa pula tsa ditlwebelele,

pula tsa selemo le tsa hwetla

jwaloka pele.

₂₄Diotlo tsa lona di tla tlala mabele,

merifi e kgaphatsehe veine le ole.

₂₅“Ke tla le buseletsa,

ke le buseletse se senyehileng,

se jelweng ke ditsie

ka dilemo tse ngata;

sa jewa ke mekgahlelo ya ditsie,

ya se ja, ya se kokona sohle;

lebothohadi leo

ke le neeletseng ka lona.

₂₆Lona le tla ja

le be le di shebe feela,

le nto boka

Morena Modimo wa lona,

yena ya le etseditseng tse kgolo.

Tjhaba sa ka se ke ke

sa hlola se tlontloloha!

₂₇Le tla tseba

hore ke na le Baiseraele,

le hore nna Morena

ke Modimo wa lona,

ebile ha ho modimo e mong;

tjhaba sa ka se ke ke

sa hlola se tlontloloha!”

₂₈“Etlare hoba tsena di phethahale,

ke theolele Moya wa ka

hodima batho bohle;

bara le baradi ba lona

ba tla porofeta,

bannabaholo ba lona

ba tla lora ditoro,

bahlankana ba lona

ba tla bona dipono.

₂₉Le hodima bahlanka ba ka

le makgabunyane a ka

ke tla theolela Moya wa ka

matsatsing ao.

₃₀Ke tla etsa dimakatso

hodimo, lehodimong,

le mehlolo fatshe, lefatsheng:

madi, le mollo, le mouwane wa mosi.

₃₁Letsatsi le tla fifala,

kgwedi e tla ba kgubedu jwaloka madi,

pele letsatsi le leholo la Morena,

le kgethehileng, le fihla.

₃₂Mang le mang ya tla rapela Morena

o tla pholoswa,

hobane Thabeng ya Sione,

motseng wa Jerusalema,

pholoho e tla ba teng,

jwalokaha Morena a boletse,

bakeng sa masalla

ao Morena a a bitsang.

₁“Bonang, ka matsatsi ao,

ka yona nako eo,

ke tla atlehisa ba Juda

le ba Jerusalema.

₂Ke tla phutha ditjhaba tsohle,

ke di theolele

ka Kgohlong ya Jehoshafate,

ke di ahlolele hona kateng,

ka baka la setjhaba sa ka,

setjhaba sa ka sa Iseraele,

hobane di ile tsa se qhalanyetsa

hara baditjhaba,

tsa arola naha ya ka dikotokoto.

₃Di ile tsa laola

setjhaba sa ka ka lotho,

tsa ananya moshanyana ka seotswa,

tsa reka veine ka ngwanana,

hore di tle di e nwe.

₉“Phatlalletsang ditjhaba hona,

le re: ‘Hlomellang ntwa!

Bitsang bahale!

Bahlabani bohle ba ke ba atamele,

ba atamele, ba tlo futuha!

₁₀Kgobang mehoma ya lona,

le etse disabole;

leotsang disekele tsa lona,

le etse marumo!

Ya fokolang a ke a re:

“Nna ke mohale!”

₁₁Lona ditjhaba tsohle,

phallang, kgobokanang,

le phuthehele ka Kgohlong!’ ”

Morena, laola bahale ba hao

ba theohe.

₁₂“Ditjhaba di ke di itokise,

di theohele

ka Kgohlong ya Jehoshafate;

ke tla dula kateng, ke di ahlole,

ke ahlole tjhaba tsohle

tse phuthehileng.

₁₃Akgelang sekele,

hobane mabele a butswitse.

Tloong, le tlo hatakela morara,

hobane setlhotlelo sa morara

se tletse;

merifi e tletse, e a kgaphatseha,

hobane bokgopo ba tsona

bo totile!”

₁₄Matshweletshwele

a sa le ka Kgohlong ya Kahlolo!

Letsatsi la Morena le haufi,

le atametse,

tsatsi la ho theohela

ka Kgohlong ya Kahlolo.

₁₅Letsatsi le kgwedi di tla fifala,

dinaledi le tsona

di ke ke tsa phatsima.

₁₆Morena o tla puruma a le Sione,

a thwathwaretse a le Jerusalema,

mahodimo le lefatshe di reketle.

Morena ke setshabelo

sa tjhaba sa hae,

ke qhobosheane

ya tjhaba sa Iseraele.

₁₇“Kahoo le tla tseba

hore ke nna Morena,

Morena Modimo wa lona,

ya ahileng Sione,

thabeng ya ka e halalelang;

Jerusalema e tla ba sebaka,

baka se kgethehileng,

baditjhaba ba ke ke

ba hlola ba feta kahara yona.

₁₈“Mohla tsatsi leo,

thaba di tla rothisa veine,

maralla wona a kopotse lebese;

melatswana yohle ya Juda

e phalle metsi.

Sediba se tla kolla

ka Tempeleng ya Morena, se kolle,

se nwesetse Kgohlo ya Shitime.

₁₉“Egepeta e tla fetoha nanaola,

Edomo yona e fetohe lefeella,

hobane tjhaba sa Juda

se ile sa hlekefetswa,

madi a sona a tshollwa

a se na molato.

₂₀Naha ya Juda

e tla ba le baahi kamehla yohle,

Jerusalema

e be le baahi ba meloko yohle.

₂₁Ke tla tshwarela tjhaba sa ka,

ke se tshwarele dibe tsa sona,

dibe tseo ke neng

ke eso se tshwarele tsona.

Nna Morena, ke tla aha Sione!”