Bible Reading Plan – Day 298

₁Yare ha Jesu a phahamisa mahlo, a bona barui ba nokela dinyehelo tsa bona letloleng la matlotlo. ₂A bona le mosadi e mong wa mohlolohadi, ya futsanehileng, a nokela teng tjheletana tse pedi. ₃Jesu a re: “Kannete ke a le bolella: Mohlolohadi eo ya futsanehileng o noketse ho feta bohle, ₄hobane bao bohle ba noketse dinyehelo ba nkile bonkong, athe yena o noketse seo a se nkileng bohloking, sohle seo a neng a ena le sona, seo a neng a tla phela ka sona.”

₅Yare ha ba bang ba bua ka Tempele, ba re e kgabisitswe ka majwe a matle le ka dinyehelo, Jesu a re: ₆“Ha e le tseo le di bonang, ho tla tla matsatsi ao ka wona ho ke keng ha siuwa lejwe hodima lejwe le leng le sa heletswa.”

₇Ba mmotsa, ba re: “Moruti, dintho tsee di tla etsahala neng? Pontsho e tla ba efe ha tseo di se di tla etsahala?”

₈A re: “Hlokomelang hore le se ke la tshoha le kgeloswa, hobane ba bangata ba tla tla ka lebitso la ka, ba re: ‘Ke nna,’ ba be ba re: ‘Nako e atametse.’ Le se ke la ba sala morao. ₉Ha le utlwa mekgosi ya dintwa le meferefere, le se ke la tshoha, hobane eka kgona tseo di etsahale pele, empa bofelo bo ke ke ba eba teng hanghang.”

₁₀Yaba o re ho bona: “Ditjhaba di tla tsohelana matla, le mebuso e futuhelane. ₁₁Dibakeng tse ding ho tla ba le ditshisinyeho tse kgolo tsa lefatshe, le mafu a sewa, le ditlala, le matshabeho, le dipontsho tse kgolo tse tswang lehodimong.

₁₂“Empa pele ho tseo tsohle ba tla le tshwara, ba le hlorise, ba neelane ka lona matlung a thapelo le ditjhankaneng, ba le ise pela mahosi le babusisi ka baka la lebitso la ka. ₁₃Hona ho tla etsa hore le mpake. ₁₄Ka hona qetelang ka dipelong tsa lona hore ha le na ho itokisetsa boitshireletso ba lona, ₁₅hobane ke tla le nea mantswe le bohlale boo bahanyetsi bohle ba lona ba tla sitwa ho bo hanyetsa le ho bo lwantsha. ₁₆Batswadi ba lona, le bana babo lona, ba tla neelana ka lona, mme ba tla bolaya ba bang ba lona. ₁₇Bohle ba tla le hloya ka baka la lebitso la ka. ₁₈Empa ha ho ka ke ha lahleha leha e le qoba e le nngwe ya moriri hloohong tsa lona. ₁₉Ka tiisetso ya lona le tla ithuela bophelo.”

₂₀“Etlare ha le bona Jerusalema e teelwa hare ke mabotho, le tsebe hore ho ripitlwa ha yona ho atametse. ₂₁Mohlang oo ba leng Judea ba balehele dithabeng, ba hara motse ba tswe, mme ba naheng ba se ke ba kena ho wona, ₂₂hobane ke wona matsatsi a phetetso, ho tle ho phethahale tsohle tse ngotsweng. ₂₃Matsatsing ao ho tla ba madimabe baimana le batswetse. Tlokotsi e tla ba kgolo lefatsheng, le kgalefo ya Modimo setjhabeng sena. ₂₄Ba tla bolawa ka sabole, ba qhalanyetswe ditjhabeng tsohle e le bathopuwa, mme Jerusalema e tla hatakelwa ke baditjhaba, ho fihlela nako ya bona e fela.”

₂₅“Ho tla ba le dipontsho letsatsing, kgweding, le dinaleding. Lefatsheng ditjhaba di tla ba matswalong le tsielehong ka baka la modumo wa lewatle le maqhubu. ₂₆Batho ba tla akgeha ke tshabo le tebello ya tse tlang lefatsheng, hobane dinaledi tsa lehodimo di tla tsukutleha. ₂₇Jwale ba tla bona Mora Motho a etla a le lerung, ka matla le ka tlotla e kgolo. ₂₈E tle ere ha tsena di qala ho etsahala le pashalle, le phahamise dihlooho, hobane topollo ya lona e atametse.”

₂₉Jesu a ba bolella setshwantsho, a re: “Tadimang sefate sa feiye le difate tsohle: ₃₀Ha le di bona di fupa, le tseba ka bolona hore lehlabula le se le le haufi. ₃₁Ka mokgwa o jwalo le lona, ha le bona tsena di etsahala, le tsebe hore Mmuso wa Modimo o haufi.

₃₂“Ruri ke a le bolella hore moloko ona ha o ka ke wa fela tsena tsohle di eso etsahale. ₃₃Lehodimo le lefatshe di tla fela, empa mantswe a ka ha a ka ke a fela.”

₃₄“Itlhokomeleng, esere mohlomong dipelo tsa lona tsa imelwa ke botlofa le botahwa, le matshwenyeho a bophelo bona, mme letsatsi lela la le tsometsa, ₃₅hobane jwaloka sefi, le tla pitla bohle ba ahileng lefatsheng lohle. ₃₆Fadimehang ke hona, le rapele ka dinako tsohle, hore le tle le be le matla a ho phonyoha tsena tsohle, tse seng di tla etsahala, le a ho ema pela Mora Motho.”

₃₇Jesu o ne a ruta ka Tempeleng motsheare, empa bosiu o ne a etswa, a ya hlola thabeng e bitswang Thaba ya Mehlwaare, ₃₈mme batho bohle ba ne ba tsohella ho yena Tempeleng ho ya mo mamela.

₁Mokete wa bohobe bo sa lomoswang, o bitswang Paseka, o ne o atametse. ₂Kaha baprista ba baholo le Ditsebi tsa Molao ba ne ba tshaba batho, ba batla leqheka la ho bolaya Jesu. ₃Yaba Satane o kena ka ho Judase ya bitswang Isekariota, eo e neng e le e mong wa ba leshome le metso e mmedi. ₄A ya buisana le baprista ba baholo le balaodi ba Tempele kamoo a ka ba neelang yena kateng. ₅Ba thaba, mme ba dumellana le yena ho mo fa tjhelete. ₆A utlwisisa, a ba a batla monyetla wa ho ba neela yena letshwele le le siyo.

₇Jwale ha fihla letsatsi la bohobe bo sa lomoswang, leo konyana ya Paseka e neng eka kgona e hlajwe ka lona. ₈Jesu a roma Petrose le Johanne, a re: “Eyang, le re lokisetse Paseka, hore re tle re e je.”

₉Ba re ho yena: “O rata ha re e lokisetsa kae?”

₁₀A re ho bona: “Bonang, ha le kena motseng le tla kgahlana le motho ya jereng nkgo ya metsi; mo lateleng ho ya tlung eo a kenang ho yona. ₁₁Le re ho monga ntlo: ‘Moruti o re ho wena: Kamore e kae, eo nka jelang Paseka ho yona mmoho le barutuwa ba ka?’ ₁₂Motho eo o tla le bontsha kamore e kahodimo, e kgolo, e nang le thepa. Le lokisetse Paseka hona teng.”

₁₃Ba ya, ba fumana ho le jwalokaha a ba boleletse, mme ba lokisetsa Paseka.

₁₄Nako ha e fihlile, Jesu a qala ho ja le baapostola ba hae. ₁₅A re ho bona: “Ke lakaditse haholo ho ja Paseka ena le lona, ke eso hlokofatswe, ₁₆hobane ke a le bolella hore ha nka ke ka e ja ho fihlela e phethahatswa Mmusong wa Modimo.”

₁₇A nka senwelo, a leboha, a re: “Se nkeng, mme le se sielane, ₁₈hobane ke a le bolella, ho tloha jwale ha nka ke ka hlola ke enwa se tswang tholwaneng ya morara ho fihlela Mmuso wa Modimo o etla.”

₁₉A nka bohobe, a leboha, a bo ngwatha, a ba nea bona, a re: “Hona ke mmele wa ka o fanwang ka baka la lona; etsang hona hore le tle le nkgopole.”

₂₀Ha ba se ba jele, a etsa jwalo le ka senwelo, a re: “Senwelo sena ke selekane se setjha se tiisitsweng ka madi a ka, a tshollelwang lona. ₂₁Empa bonang, ya nkekang o na le nna mona tafoleng. ₂₂Ruri Mora Motho o ikela ho ya kamoo ho rerilweng kateng; leha ho le jwalo, ho madimabe motho ya mo ekang.” ₂₃Ba qala ho botsana hore na ekaba ke ofe ho bona ya tla etsa hona.

₂₄Kgang ya eba teng hara bona, ya hore na ke ofe ho bona ya ka nkwang e le e moholo. ₂₅Empa Jesu a re ho bona: “Mahosi a ditjhaba a a di busa, mme ba nang le matla hodima tsona ba bitswa bababalli. ₂₆Empa ho lona ho se be jwalo; e moholo hara lona a mpe a be jwaloka e monyenyane, mme ya tsamaisang a be jwaloka ya sebeletsang. ₂₇Ana e moholo ke ofe: Na ke ya jang kapa ya fepang? Na hase ya jang? Hara lona, nna ke jwaloka ya fepang. ₂₈Lona le ba ileng ba ema le nna ha ke ne ke lekwa. ₂₉Jwalokaha Ntate a nkgethetse Mmuso, le nna ke le kgethela wona, ₃₀hore le je, le nwe tafoleng ya ka Mmusong wa ka. Le tla dula diteroneng le ahlole meloko e leshome le metso e mmedi ya Iseraele.”

₃₁“Simone, Simone, bona, Satane o le kopile hore a le hlokole jwaloka koro, ₃₂empa ke o rapeletse hore o se ke wa fellwa ke tumelo. Jwale wena, ha o se o bakile, o matlafatse bana beno.”

₃₃Simone a re ho yena: “Morena, ke itokiseditse ho ya le wena tjhankaneng le lefung.”

₃₄Empa Jesu a re: “Petrose, ke a o bolella hore kajeno, pele mokoko o lla, o tla be o se o ntatotse hararo, o re ha o ntsebe.”

₃₅Jesu a re ho bona: “Ha ke ne ke le romile le se na sepatjhe, mokotla, le meqathatso, na le ile la haellwa ke letho?”

Ba re: “Le letho.”

₃₆A re ho bona: “Empa jwale, ya nang le sepatjhe a se nke, le wona mokotla ka mokgwa o jwalo. Ya hlokang sabole a rekise seaparo sa hae, a e reke. ₃₇Ke a le bolella hore se ngotsweng, se reng: ‘O baleletswe le baetsadibe’, eka kgona se phethahale ho nna, hobane se ngotsweng ka nna se tla phethahala.”

₃₈Yaba ba re: “Morena, bona, disabole tse pedi ke tsena.”

A re ho bona: “Ho lekane.”

₃₉Jesu a tswa, a ya Thabeng ya Mehlwaare ka tlwaelo ya hae, mme barutuwa ba hae ba mo latela. ₄₀Yare ha a fihla sebakeng seo, a re ho bona: “Rapelang, hore le se kene molekong.” ₄₁A sutha pela bona, sebaka se ka bang kaa ka sa lejwe ha le betswa, mme a kgumama, a rapela, ₄₂a re: “Ntate, ha o rata, ako tlose senwelo sena ho nna; feela ho etswe thato ya hao, e seng ya ka.” ₄₃Lengeloi la hlaha ho yena le etswa lehodimong, la mo matlafatsa. ₄₄Ha a le ditlallong tsa lefu a rapela ka ho fetisisa, mme mofufutso wa hae wa eba jwaloka marothodi a madi a rothelang fatshe.

₄₅Ha a rapetse a ya ho barutuwa, a ba fumana ba kgalehile ke maswabi, ₄₆mme a re ho bona: “Le robaletseng? Tsohang le rapele, hore le se kene molekong.”

₄₇Yare Jesu a sa bua, ha hlaha letshwele, mme e mong wa ba leshome le metso e mmedi ya bitswang Judase, o ne a le eteletse pele. Yaba o atamela ho Jesu, hore a mo ake. ₄₈Jesu a re ho yena: “Judase, na o ka eka Mora Motho ka kako na?”

₄₉Yare ha ba potapotileng Jesu ba bona se tla etsahala, ba re: “Morena, re ba hlathe ka sabole?” ₅₀Yaba e mong wa bona o se a hlatha mohlanka wa Moprista e Moholo, a mo poma tsebe ya letsoho le letona.

₅₁Jesu a re: “Tlohelang, ho lekane!” Yaba o ama tsebe ya hae, o a mo fodisa.

₅₂Jwale Jesu a re ho baprista ba baholo le balaodi ba Tempele ba tlileng ho mo tshwara: “Na ebe ke senokwane ha le tlile ka disabole le dikoto tjee? ₅₃Ke ne ke ntse ke ena le lona ka matsatsi wohle ka Tempeleng, ha le a ka la ntshwara! Empa nako ena ke ya lona le ya Matla a Lefifi.”

₅₄Yare hoba ba mo tshware, ba mo isa ha Moprista e Moholo. Petrose a latela a le sebakana. ₅₅Ha ba se ba besitse mollo hara lebala, mme ba dutse hammoho, Petrose a dula hara bona. ₅₆Lekgabunyane le leng ha le mmona a dutse mollong, la mo tadimisisa, la re: “Le enwa o ne a ena le yena.”

₅₇Empa a latola, a re: “Hela mosadi, ha ke mo tsebe!”

₅₈Ho se hokae e mong a mmona, a re: “Le wena o wa bona.”

Petrose a re: “He, monna, ha ke yena!”

₅₉Ha ho fetile nako e ka bang hora, e mong hape a tiisa, a re: “Kannete le enwa o ne a ena le yena, etswe ke Mogalelea.”

₆₀Empa Petrose a re: “Hela, monna, ha ke tsebe seo o se bolelang.” Hanghang, a sa bua, mokoko wa lla. ₆₁Yaba Morena o a reteleha, o tadima Petrose, mme Petrose a hopola polelo ya Morena, kamoo a ileng a re ho yena kateng: “Kajeno, pele mokoko o lla, o tla be o se o ntatotse hararo.” ₆₂A tswela kantle a lla habohloko.

₆₃Banna ba tshwereng Jesu ba mo soma, ba mo otla. ₆₄Ba ne ba mo kgurumetsa sefahleho, ba mmotsa, ba re: “Porofeta! Ke mang ya o otlileng?” ₆₅Ba mmuela le tse ding tse ngata ka ho mo nyefola.

₆₆Ha bo sele, lekgotla la baholo ba setjhaba la phutheha, le baprista ba baholo le Ditsebi tsa Molao. Ba tlisa Jesu kgotleng la bona, ₆₇ba re: “Haeba o le Kreste, re bolelle.”

A re ho bona: “Ha nka le bolella, ha le ka ke la ntumela, ₆₈mme ha nka le botsa, ha le ka ke la nkaraba. ₆₉Empa ho tloha jwale, Mora Motho o tla dula ka letsohong le letona la Modimo ya matla wohle.”

₇₀Jwale bohle ba re: “Ha ho le jwalo, na o Mora wa Modimo?”

Yena a re ho bona: “Le a bolela, ke yena.”

₇₁Ba re: “Re sa hloka bopaki ba eng? Re ikutlwetse molomong wa hae.”