Comfort from the Word – Day 30

₈₉Morena, lentswe la hao

ke la mehla yohle,

le tiile jwaloka mahodimo.

₉₀Botshepehi ba hao

ke ba meloko yohle,

o theile lefatshe, mme le tsitsitse.

₉₁Ho ya ka dikahlolo tsa hao,

tsohle di ntse di tiile:

Dintho tsohle di a o sebeletsa.

₂Ke tla bina tsa mohau wa Morena,

ke di bine kamehla,

ka molomo wa ka ke tla tsebisa

meloko yohle botshepehi ba hao;

₃hobane o itse:

“Mohau wa ka

o hlola kamehla yohle,

botshepehi ba ka

bo theilwe mahodimong.

₄“Ke entse selekane

le mokgethwa wa ka,

ke hlapanyeditse Davida,

mohlanka wa ka, ka re:

₅‘Ke tla etsa hore leloko la hao

le hlole kamehla yohle,

ke tiise terone ya hao

melokong yohle.’ ”

₆Morena, mahodimo a a boka,

a boka dimakatso tsa hao,

a bolela botshepehi ba hao

phuthehong ya bahalaledi.

₇Ke mang, mahodimong,

ya ka lekanngwang le Morena?

Ke mang ya tshwanang le Morena,

hara bara ba Modimo?

₈Phuthehong ya bahalaledi

Modimo o tshajwa haholo,

o hlomphuwa haholo

ke bohle ba mo teetseng hare.

₉Morena, Modimo wa mabotho,

ke mang ya kang wena?

Morena, wena ya matla,

botshepehi ba hao ke kobo ya hao.

₁₀Ke wena

ya busang lewatle le befileng,

ke wena

ya kgutsisang maqhubu a bilohang.

₁₁Ke wena

ya qhemeditseng Rahaba,

wa moqhemetsa jwaloka setopo,

ka tsoho la hao le matla

o qhalakantse dira tsa hao.

₁₂Mahodimo ke a hao,

le lefatshe ke la hao;

lefatshe le tsohle tse ho lona

ke wena ya di theileng.

₁₃Leboya le borwa

ke wena ya di hlodileng,

Tabore le Heremone

di etsetsa lebitso la hao ditlatse.

₁₄O sefea, letsoho la hao le matla;

letsoho la hao le letona le phahame.

₁₅Ho loka le toka

ke motheo wa terone ya hao,

mohau le botshepehi

di o eteletse pele.

₁₆Ho lehlohonolo setjhaba

se tsebang ho etsa mehoo ya thabo,

se tsamayang kganyeng

ya sefahleho sa hao, Morena,

₁₇se thabelang lebitso la hao kamehla,

se phahamiswang

ka baka la ho loka ha hao.

₁₈Ke wena matla

ao se ithorisang ka wona,

o re tsosa molota

ka ho rata ha hao.

₁₉Thebe ya rona ke ya Morena,

kgosi ya rona

ke ya Ya Halalelang wa Iseraele.

₂₀Wa na wa bua le batshepuwa ba hao,

wa bua le bona ka pono, wa re:

“Ke thusitse mohale,

ka phahamisa ya kgethilweng,

ya kgethilweng hara setjhaba.

₂₁Ke fumane Davida,

mohlanka wa ka,

ka mo tlotsa

ka ole ya ka e halalelang.

₂₂Seatla sa ka se tla mo tshehetsa,

letsoho la ka le mo matlafatse.

₂₃Ha ho sera se tla mo tsometsa,

le ya kgopo a ke ke a mo hlola.

₂₄Ba mo lwantshang

ke tla ba ripitla mahlong a hae,

ke fenye ba mo hloileng.

₂₅Botshepehi ba ka le mohau wa ka

di tla ba le yena,

ka lebitso la ka o tla tsoha molota.

₂₆Ke tla namisa mmuso wa hae

ho ya fihla Lewatleng,

le puso ya hae ho ya fihla dinokeng.

₂₇O tla re ho nna: ‘O ntate,

wena Modimo wa ka,

lefika le mpholosang.’

₂₈Nna ke tla mo etsa letsibolo,

a phahamele dikgosi tsohle,

kgosi tsa lefatshe.

₂₉Ke tla mo hauhela kamehla,

selekane sa rona le yena

e tla ba se tiileng.

₃₀Ke tla etsa hore leloko la hae

le hlole kamehla yohle,

le terone ya hae e be teng

ha mahodimo a ntse a le teng.

₃₁“Haeba bara ba hae

ba furalla Molao wa ka,

ba sa latele dikahlolo tsa ka;

₃₂ha ba tlola ditaelo tsa ka,

ba sa boloke melao ya ka;

₃₃ke tla ba kgalemella ditlolo tsa bona,

ke ba kgalemelle tsona ka thupa,

le melato ya bona ka phafa.

₃₄Feela Davida nke ke ka mo amoha,

ka mo amoha mohau wa ka,

ka kweneha botshepehing ba ka.

₃₅Nke ke ka kwenehela selekane sa ka;

seo ke se buileng

nke ke ka se fetohela.

₃₆Ke hlapantse hanngwe feela

ka lebitso la ka le halalelang:

Ha nka ke ka thetsa Davida.

₃₇Leloko la hae le tla hlola kamehla,

terone ya hae e be teng

ha letsatsi le ntse le le pela ka;

₃₈e hlole kamehla jwaloka kgwedi,

paki eo e tshepahalang

e mahodimong.”

₃₉Leha ho le jwalo,

o halefetse motlotsuwa wa hao,

wa mo lahla, wa mo nyedisa.

₄₀O hlakotse selekane sa hao

le mohlanka wa hao,

wa silafatsa mofapahlooho wa hae,

wa o silafatsa leroleng.

₄₁O dihile metero yohle ya hae,

metse ya hae e haheleditsweng

wa e fetola masupi.

₄₂Bo-mofetakatsela bohle

ba mo hapetse tsa hae,

a fetoha sesomo

ho bao a ahisaneng le bona.

₄₃O matlafaditse matsoho

a ba mo lwantshang,

wa thabisa dira tsohle tsa hae.

₄₄O thithibantse bohale

ba sabole ya hae,

wa se ke wa mo tshehetsa ntweng.

₄₅O mo amohile lere la puso,

wa dihela terone ya hae fatshe.

₄₆O kgutsufaditse matsatsi,

matsatsi a botjha ba hae,

wa etsa hore a aparelwe ke dihlong.

₄₇Morena, o tla ipata ho fihlela neng?

Kgalefo ya hao

e tla tuka, e tuke jwaloka mollo

ho fihlela neng?

₄₈Morena, ako hopole

bokgutshwanyane ba bophelo,

hopola hore batho bohle

o ba bopetse lefeela.

₄₉Na motho o teng ya ka phelang,

mme a se ke a shwa,

ya ka itopollang

matleng a Nqalo ya Bafu?

₅₀Morena, o kae mohau wa hao,

mohau wa hao wa pele,

oo ka botshepehi ba hao

o o hlapanyeditseng Davida?

₅₁Ako hopole ho hlapaolwa

ha bahlanka ba hao, Morena!

Ke jere dinyediso tse ngata

tsa ditjhaba ka sefubeng sa ka.

₅₂Morena, dira tsa hao di re hlapaotse,

di setse motlotsuwa wa hao morao

di ntse di mo hlapaola.

₅₃Ho bokwe Morena kamehla yohle!

Amen. Amen.

₂Morena o moholo,

o lokelwa ke thoriso e kgolo

motseng wa Modimo wa rona,

thabeng ya hae e a halalelang.

₃Thaba ya Sione e a kgahleha,

e kgahleha ka bophahamo ba yona,

e thabisa lefatshe lohle;

e ka leboya

ho motse wa Kgosi e kgolo.

₄Modimo o teng matlung a bokgosi,

matlung a bokgosi a motse oo,

yena o tsejwa e le qhobosheane.

₅Bonang, dikgosi di ile tsa kopana,

tsa o futuhela di le mmoho.

₆Tsa o bona, mme tsa hlollwa;

tsa ferekana, mme tsa baleha.

₇Tsa tshwarwa ke thothomelo,

ya di tshwara hona moo,

le bohloko bo kang ba pelehi;

₈jwalokaha moya wa botjhabela

o pshatlakanya dikepe,

kepe tsa Tarashishe.

₉Seo re se utlwileng re bile re se bone

motseng wa Morena wa mabotho,

motseng wa Modimo wa rona,

oo Modimo a o tiisitseng

ka ho sa feleng.

₁₀Modimo, re hopola mohau wa hao

re le ka Tempeleng ya hao.

₁₁Jwaloka lebitso la hao Modimo,

thoriso ya hao e fihla jwalo,

e fihla jwalo pheletsong tsa lefatshe.

Tsoho la hao le letona le tletse toka.

₁₂Thaba ya Sione e ke e thabe;

metse ya Juda e ke e nyakalle

ka baka la kahlolo tsa hao.

₁₃Potapotang Sione, le e potolohe,

balang ditora tsa yona;

₁₄elang hloko lerako la yona,

rako la yona la tshireletso,

hlahlobang matlo a yona a bokgosi,

le tle le phetele moloko o tlang,

le re:

₁₅“Enwa ke Modimo,

ke Modimo wa rona

kamehla le mehla,

o tla re tsamaisa.”

Morena, o bile setshabelo sa rona

melokong yohle.

₂Dithaba di eso be teng,

le lefatshe, le tsohletsohle

di eso hlahe,

haesale o le Modimo

ya se nang bofelo.

₁₄re sitse ka mohau wa hao,

re tle re o etsetse ditlatse,

re thabe ka matsatsi wohle.

₁₅Ako re thabise

ka matsatsi a lekanang

le ao o re hlokofaditseng ka wona,

le ka dilemo tse lekanang

le tseo re bileng madimabe,

ra ba madimabe ka tsona.

₁₆Ako bonahatse mosebetsi wa hao

ho bahlanka ba hao,

le kganya ya hao

ho bana ba bona.

₁₇Morena Modimo wa rona

a ke a be mosa ho rona,

a atlehise mosebetsi

wa matsoho a rona,

e, a atlehise mosebetsi

wa matsoho a rona.