Comfort from the Word – Day 34

₁Morena, o emelang hole hakaalo?

O ipatelang

nakong ya matshwenyeho?

₄Ya kgopo o swenya dinko, o re:

“Modimo ha a phetetse,

ha ho na Modimo.”

Ke phetho seo a se nahanang.

₅Kamehla o atleha mererong ya hae,

dikahlolo tsa hao di mo phahametse,

dira tsa hae tsohle

o di tadima maotong.

₁₂Thusa, Morena! Oho, Modimo,

itokisetse ho otla;

o se ke wa lebala bahlophehi.

₁₄Athe wena o bona bomadimabe

le mahlomola;

o a di lemoha, mme o a di laola.

Ya tsielehileng o tshepile wena,

ke wena mothusi wa dikgutsana.

₁₆Morena ke kgosi kamehla le mehla,

baditjhaba ba fedile naheng ya hae.

₁₇Morena, o utlwile takatso

tsa ba eisehang,

o ba matlafatsa dipelo,

o ba sekehela tsebe,

Ruri Modimo o molemo ho Iseraele,

e, le ho ba pelo di hlwekileng.

₂Empa nna,

ke batlile ke kgothometseha,

maoto a ka a batlile a thella;

₃hobane ke ne ke honohela baikakasi,

ha ke bona katleho ya ba kgopo.

₁₆Ha ke ntse ke nahanahana,

ke nahana hore ke utlwisise tsena,

ka fumana e le ntho e thata,

₁₇ho fihlela ke ba ke kena Sehalalelong,

Sehalalelong sa Modimo,

mme ke utlwisisa

seo qetello ya ba kgopo

e tla ba sona.

₂₃Empa leha ho le jwalo,

ke na le wena kamehla,

o ntshwere ka letsoho le letona.

₂₄O ntsamaisa ka keletso ya hao,

mme qetellong

o tla nkamohela ka tlotla.

₂₅Nka ba le mang lehodimong

haese wena?

Ha ke ena le wena,

ha ke sa lakatsa letho lefatsheng.

₂₈Empa ho nna ho ba haufi le Modimo,

ke ntho yona e molemo.

Ke ikgethetse Morena,

Morena wa ka,

ho ba setshabelo sa ka,

ke tle ke bolele

mesebetsi ya hae yohle.