Day 44 – Godly Wisdom

₂a rutang motho

bohlale le kgalemo,

le ho utlwisisa

polelo tse tebileng;

₃a rutang bohlale, ho loka,

kutlwisiso, le ho nepahetseng.

₄Ya se nang tsebo

o tla hlalefiswa ke wona,

mohlankana a rue tsebo le kelello.

₅Ya bohlale a a mamele,

a eketse tsebo le kutlwisiso,

ya nang le kutlwisiso

a fumane tataiso,

₆a utlwisise maele le dipapiso,

polelo le dilotho tsa ba bohlale.

₇Ho tshaba Modimo

ke qaleho ya tsebo,

empa dithoto di nyedisa bohlale,

di nyedisa le tayo.

₈Mora ka, mamela tayo ya ntatao,

o se furalle thuto ya mmao.

₉Tsena ke moqhaka

wa bokgabane hloohong,

le lepetu le bohehang

molaleng wa hao.

₁₀Mora wa ka,

ha baetsadibe ba o hohela,

o se ke wa ineela ho bona.

₁₁Ha ba re: “Tloo le rona,

re yo lalla motho re mmolaye,

re tsholle madi

a ba se nang molato;

₁₂re ba metse ba phela

sa Nqalo ya Bafu,

re ba metse bokwiditane

sa ba welang ka mohohlong;

₁₃matlotlo a bohlokwa re tla a hapa,

matlo a rona a tlale kgapo ya rona;

₁₄rona le wena a re ikopanye,

mokotla o be mong, re arolelane.”

₁₅Mora wa ka,

se tsamaisane tsela le bona,

mohlaleng wa bona

o se ke be wa hata.

₁₆Maoto a bona a titimela bobeng,

a potlakela ho ya tsholla madi.

₁₇Ke bothoto ho tjheha leraba

moo nonyana e ntseng e le bona.

₁₈Banna bana ba emetse lefu la bona,

ba itjhehetse leraba ka bobona.

₁₉Ba fella jwalo

ba ithuisang ka bolotsana,

bophelo ba bona

bo fediswa ke matsoho a bona.

₂₀Tseleng tsohle bohlale bo a meketsa,

mabaleng a motse bo a tlerola.

₂₁Hara mmidimidi bohlale bo a howa,

bo phatlalatsa puo tsa bona

kgorong tsa motse, bo re:

₂₂“Lona ba se nang tsebo,

le tla rata ho se be le tsebo

ho fihlela neng?

Basomi ba thabele ho soma

ho fihlela neng?

Thoto di hloye tsebo

ho fihlela neng?

₂₃Hoja le ka mamela kgalemo ya ka,

pelo ya ka nkabe ke le bulela yona,

mehopolo ya ka ke le tsebisa yona.

₂₄Kaha le hanne ha ke le bitsa,

ha ke otlolla tsoho la ka

la se ke la ela hloko;

₂₅kaha keletso ya ka

le sa ka la e natsa,

le kgalemo ya ka

le sa e mamela;

₂₆koduweng ya lona

ke tla le ja tlepane,

ke le je ditsheho

ha tlokotsi e le wela hodimo.

₂₇Ha tlokotsi e le wela hodimo,

e le wela hodimo sa sefefo,

koduwa e le fefola,

e le fefola sa setsokotsane,

mahlomola le mapalesapelo

a le sithabeditse,

₂₈ba tla ipiletsa ho nna

ke se ke ka ba araba,

ba mpatle ba se ke ba mphumana.

₂₉Kaha ba hloile tsebo,

ba ikgethetse ho se tshabe Modimo;

₃₀kaha keletso ya ka ba sa e amohela,

ba nyedisitse kgalemo ya ka yohle,

₃₁kahoo ba tla kotula

seo ba se jetseng,

ba kgore ditholwana

tsa ditakatso tsa bona.

₃₂Ba se nang tsebo

ba a bolawa ke ho kgeloha ha bona,

dithoto tsona di a timela,

di timetswe

ke ho se tsotelle ha tsona.

₃₃Ya mmamelang

o tla phela a sireletsehile,

a phele ka boiketlo

a sa tshabe bobe.”

₁Mora wa ka,

ha o ka mamela polelo tsa ka,

wa boloka ditaelo tsa ka;

₂wa sekehela bohlale tsebe,

pelo ya hao ya labalabela

ho ba le kutlwisiso;

₃ha o ka ipiletsa hore o be sedi,

wa kopa hore o be le kutlwisiso;

₄ha o ka e batla

sa hoja o batla silefera,

wa e batla sa tlotlo e le patuwe;

₅kutlwisiso ya ho tshaba Morena

o tla e fihlela,

ho tseba Modimo le hona

o ho fumane.

₆Ke Morena ya fanang ka bohlale,

tsebo le kutlwisiso di tswa ho yena.

₇O hlokomela metsamao

ya ba lokileng,

ke thebe ho ba hlokang kodi.

₈O baballa ba lokileng

tseleng tsa bona,

batshepuwa ba hae a ba sireletse.

₉O tla utlwisisa ho loka,

ho tshepeha, le ho nepahetseng,

o utlwisise le ditsela tsohle,

tsela tsohle, tse lokileng;

₁₀hobane bohlale

bo tla kena pelong ya hao,

tsebo e be boithabiso,

boithabiso ba pelo ya hao.

₁₁O tla baballwa ke ho ba le kelello,

kutlwisiso e o sireletse,

₁₂e o pholose tseleng tse kgopo,

e o phemise ba buang tse mpe,

₁₃ba lahlang tsela tse lokileng,

ba tsamayang tseleng tse lefifi.

₁₄Bona ba thabela ho etsa bobe,

ba thabela bokgopo ba ba kgopo,

₁₅bao tsela tsa bona di kgopameng,

metsamao ya bona e kgelohileng.

₁₆O tla phemiswa mosadi wa sehlola,

mosadi ya ekang ka dipolelo,

₁₇ya sa tshepahaleng

ho monna wa hae,

ya lebalang

selekane sa Modimo wa hae.

₁₈Lapa la hae le kgannela lefung,

tsela tsa hae di isa ho ba shweleng.

₁₉Ba kenang lapeng leo

ha ba ke ba kgutla,

le tsela ya bophelo ha ba e fumane.

₂₀Kahoo o tla tsamaya

tseleng ya ba lokileng,

o tsamaye tseleng ya ba hlokang kodi.

₂₁Ba lokileng ba tla phela lefatsheng,

ba hlokang kodi ba ahe ho lona.

₂₂Ba kgopo ba tla fediswa lefatsheng,

mahlabaphiyo a timetswe ho lona.

₁Mora wa ka,

se lebale thuto ya ka,

pelong ya hao

melao ya ka o e boloke,

₂o tlo lelefaletswe matsatsi a hao,

lemo tsa kgotso di tle di o atele.

₃Eba le lerato, o be le botshepehi,

molaleng wa hao o itlame ka tsona;

o di ngole tlapeng la pelo ya hao.

₄O tla ratwa ke Modimo le batho,

o iketsetse lebitso mahlong a bona.

₅Tshepa Morena

ka pelo ya hao yohle,

o se ke wa tshepa bohlale ba hao.

₆Kenya Morena mererong ya hao,

mo kenye ho yona yohle,

tsela tsa hao a tla di otlolle.

₇O se ipone o le bohlale,

tshaba Morena, o sesefe bobe.

₈O tla phela hantle mmeleng,

masapo a hao a tiye.

₉Tlotla Morena ka maruo a hao,

le ka lopotsiya tsohle

tsa dijalo tsa hao.

₁₀Disiu tsa hao

di tla sasamatswa ke tjhai,

merifi ya hao e kgaphatsehe veine.

₁₁Mora wa ka,

se nyedise kgalemelo ya Morena,

se kgathale ha a o laya,

₁₂hoba Morena o kgalema

eo a mo ratang,

sa ntata, ngwaneng eo a mo ratang.

₁₃Ho lehlohonolo

ya iphumanetseng bohlale,

ya bileng a fihletseng kutlwisiso,

₁₄hoba bo feta silefera ka bohlokwa,

ho bo fihlela

ke tlotlo le fetang kgauta;

₁₅bo kgahleha

ho feta le mabenyane a bohlokwa,

ha ho letho

le ka bapiswang le bona;

₁₆ka ho le letona

bo kakatletse bolelele ba bophelo,

ka ho le letshehadi

bo kakatletse maruo le tlotla.

₁₇Tsela tsa bona di a kgahleha,

moo bo tsamayang teng

ho rena kgotso.

₁₈Ho ba bo kgomarelang

ke fate sa bophelo,

ho lehlohonolo

ba itshwarellang ka bona.

₁₉Ka bohlale

Morena o radile metheo ya lefatshe,

ka kelello

Morena a ala le mahodimo;

₂₀ka tsebo ya hae a arohanya madiba,

maru a latsa phoka,

a e latsa hodima lefatshe.

₂₁Mora wa ka,

boloka bohlale le tlhalohanyo,

di se tlohe mahlong a hao.

₂₂Tsena ho wena e tla ba bophelo,

di qhake molala wa hao,

di o kgabise.

₂₃O tla tsamaya o sireletsehile,

leoto la hao le ke ke la kgoptjwa.

₂₄Ha o robala

o ke ke wa tshaba letho,

ha o robala

o tla kgaleha thuwe!

₂₅Se tshabe tlokotsi

e o tlelang ka tsometso,

kapa timetso

e welang ba kgopo hodimo;

₂₆hobane Morena

ke yena letshepa la hao,

leoto la hao

le ke ke la wela lerabeng.

₂₇Fana ka tse molemo

ho ba di hlokang,

ha o ena le matla a ho etsa jwalo.

₂₈O se ke wa re ho wa heno:

“Tsamaya o boele o kgutle,

ke tla o nea yona hosasa,”

empa o ntso ena le yona.

₂₉O se ke wa rerela wa heno bokgopo,

empa yena a phela le wena

a o tshepile.

₃₀Se qose motho ho se na lebaka,

ha yena a sa o senyetsa letho.

₃₁Se kgahlwe ke motho

ya kgantshang bohanka,

se latele le e nngwe ya tsela tsa hae.

₃₂Morena o hloile ya sothang nnete,

empa ya lokileng

yena o a mo tshepa.

₃₃Morena o rohaka

malapa a ba kgopo;

o hlohonolofatsa a ba lokileng.

₃₄Morena o soma baikakasi,

athe baikokobetsi o a ba hauhela.

₃₅Ba bohlale bona o a ba tlotla,

athe lefa la dithoto ke ho tlontloloha.

₁Bana, mamelang thuto,

thuto ya ntata lona,

le e ele hloko,

e tle le ruise kutlwisiso.

₂Ke le nea thuto ya sebele,

se e furalleng ke hona.

₃Ha ke ne ke le ngwana

ya ratwang ke ntatae,

ngwana ya mong feela,

sebokotswa-ke-mmae,

₄ntate a na nthuta, a re:

“Polelo tsa ka

di se tlohe pelong ya hao,

boloka taelo tsa ka o tle o phele.

₅Iphumanele bohlale,

iphumanele kutlwisiso,

se lebale polelo tsa ka,

o se di kgelohe;

₆se furalle bohlale, bo tla o sireletsa;

bo rate, bo tle bo o lebele.

₇Bo kahodimo ho tsohle,

iphumanele bona,

ka tsohle tseo o nang le tsona,

o bo reke, o iphumanele kutlwisiso.

₈Bo thoholetse, bo tla o phahamisa;

ha o bo kgomarela bo tla o tlotla.

₉Bo tla kgabisa hlooho ya hao,

bo e kgabise

ka moqhaka o bohehang,

bo o rwese mofapahlooho wa tlotla.”

₁₀Mora wa ka, mamela,

o amohele polelo tsa ka,

lemo tsa bophelo ba hao di tle di ate.

₁₁Ke o rutile tsela tsa bohlale,

ka o tsamaisa tseleng tse otlolohileng.

₁₂Ha o tsamaya

o ke ke wa sitiswa ke letho,

ha o matha o ke ke wa kgoptjwa.

₁₃Tshwara thuto ena, o e mamarele,

o e dise ka thata,

ke yona bophelo ba hao.

₁₄Se tsamaye tseleng tsa ba kgopo,

se tsamaye tseleng ya baetsadibe.

₁₅E kgese, o be o e kwekwetle;

e kgelohe, o ikele ka tsela ya hao.

₁₆Ha ba sa etse bokgopo

ha ba robale,

ba fadimehiswa

ke takatso ya ho bolaya.

₁₇Ba ja bohobe ba bokgopo,

ba nwe veine ya meferefere.

₁₈Tsela ya ba lokileng

e ka mafube a meso,

kganya ya yona e eketseha,

ho fihlela hara mpa motsheare.

₁₉Tsela ya ba kgopo e ka fifi le letsho,

ha ba tsebe se ba kgothometsang.

₂₀Mora wa ka,

mamela mantswe ana a ka,

o sekehele polelo tsa ka tsebe.

₂₁Polelo tsa ka o se di lebale,

o di boloke ka pelong ya hao;

₂₂ke bophelo ho ba di amohelang,

di phedisa mmele ya bona hamonate.

₂₃Baballa pelo ya hao,

e baballe ho feta tsohle,

hobane ke yona diba sa bophelo.

₂₄Se bue leshano ka molomo wa hao,

puo tse thetsang

di se tswe ka hanong la hao.

₂₅Mahlo a hao

a tadime kapele ho wena,

dintshi tsa hao di se ke tsa panya.

₂₆Qamaka ka hloko

moo o hatang teng,

tsela tsohle tsa hao di tle di tsitse.

₂₇Se kgelohele ka ho le letona

kapa ka ho le letshehadi,

mehato ya hao

e o phemise bokgopo.