To The Word – Day 108

₁“Ke ne nka araba

ba sa reng letho ka nna;

ke ne nka fumanwa

ke ba sa kang ba mpatla.

Ho tjhaba se neng se sa nthapele

ka re:

‘Ke nna enwa! Ke nna enwa!’

₂Ke qetile letsatsi lohle

ke otlolotse matsoho a ka,

ke a otlolletse setjhaba,

tjhaba se melala e thata

se itsamaelang

ka tsela ya sona e kgopo,

se latelang mehopolo ya sona feela.

₃Ke tjhaba se mphephetsang kamehla

ke se shebile,

se etsetsang mahlabelo ka dirapeng,

se tjhesetsang mokubetso

hodima aletare ya ditene.

₄Ke tjhaba se itulelang hara mabitla,

se qetang masiu

se entse tebelo ya sephiri;

se itjellang le nama ya dikolobe,

seo pitsa tsa sona

di nang le moro wa tse manyala.

₅Ke tjhaba se reng:

‘Emella thokwana,

o se atamele ho rona,

hobane rona re halalela haholo,

re halalela ho o feta!’

Batho ba jwalo

ba nkga sa mosi nkong tsa ka,

ba ka mollo

o qetang tsatsi lohle o tuka.

₆“Tsohle di se di ngotswe,

di kapele ho nna,

ha nka ke ka kgutla,

ke busetsa molamu sefateng,

ke o busetsa sefateng

ka sefutho se le seholo,

₇ka baka la dibe tsa lona

le tsa baholoholo ba lona,”

ho rialo Morena.

“Ba ne ba tjhesetse mokubetso

hodima dithaba,

ba nnyefola

ha ba le hodima maralla,

ka baka leo,

ke tla ba lekanyetsa moputso,

ketso tsa bona tsa pele

ke di putse ka ho tlala.”

“Ha morara o lesihleng

o sa na le lero,

batho ba ye ba re:

‘Le se ke la o lahla,

hobane o sa na le molemo.’

Ka baka la bahlanka ba ka

le nna ke tla etsa jwalo,

ha nka ke ka ba timetsa,

ka ba timetsa bohlebohle.

₉Ke tla sitsa Jakobo ka ditloholo,

tsa Juda tsona e be majalefa,

majalefa a thaba tsa ka;

thaba tseo e tla ba lefa

la bakgethwa ba ka,

mme bahlanka ba ka

ba tla aha ho tsona.

₁₀Metebo ya dikgutshwane

e tla hlongwa Sharone,

kgohlong ya Akore

makgomo a bothe teng,

e le mehlape ya tjhaba sa ka,

tjhaba se mpatlang.

₁₁“Empa ha e le lona

ba furallang Morena,

ba lebalang thaba ya ka,

thaba e halalelang,

ba batlang leseho

ka ho nyehella Tosa ka dijo,

ba nyehellang Sefalabohoho

ka jwala bo bohale;

₁₂lona ke tla le abela sabole,

bohle le tla kgumama

ba le bolaye,

hobane ha ke bitsa

ha le a ka la arabela,

ka bua le lona

la se ke la mamela.

Le entse bokgopo

moo ke ntseng ke le bona,

la ikgethela dintho

tse sa nthabiseng.”

“Bahlanka ba ka ba tla kgora,

empa lona le tla lapa;

bahlanka ba ka ba tla nwa,

empa lona le tla nyorwa;

bahlanka ba ka ba tla thaba,

empa lona le tla swaba.

₁₄Bahlanka ba ka ba tla bina,

ba bine hobane pelo di nyakaletse;

empa lona le tla lla,

le lliswe ke pelo tse bohloko,

le bokolliswe

ke ho tubeha ha meya ya lona.

₁₅Le tla siela bakgethwa ba ka

bitso la lona,

bona ba tla le sebedisa

ha ba etsa thohako;

lona, Morena Modimo

o tla le bolaya,

bahlanka ba hae

a ba bitse ka lebitso lesele.

₁₆Ya kopang tlhohonolofatso

mona lefatsheng,

o tla kopa ho hlohonolofatswa

ke Modimo wa nnete;

ya hlapanyang mona lefatsheng,

o tla hlapanya

ka Modimo wa nnete,

hobane tsietsi tsa pele

di tla be di lebetswe,

le mahlong a ka

di se di patehile.”

₁₇“Bonang,

ke bopa mahodimo a matjha

le fatshe le letjha,

dintho tsa kgale

ha di sa tla hopolwa,

ha di ka ke tsa hlola

di sa nahanwa.

₁₈Lona thabang, le nyakalle kamehla,

le nyakallele tseo ke di bopang.

Ke tla bopa Jerusalema

e nyakaletseng,

baahi ba yona

e be ba tletseng thabo.

₁₉Ke tla nyakallela Jerusalema,

tjhaba sa ka le sona ke se thabele.

Ha ho sa tla utlwahala

dillo Jerusalema,

leha e le mehoo ya ba ditsietsing.

₂₀“Ha ho sa tla ba ngwana

ya shwang e le lesea,

ha ho motho ya sa tlo qeta

lemo tsa hae tsa pallo,

ya shwang

lemo tsa hae di le lekgolo

ho tla thwe o shwele

e sa le mohlankana;

ya sa qeteng

lemo tse lekgolo a phela,

yena ke moetsadibe, o rohakehile.

₂₁Ba tla haha matlo,

mme ba phele ho wona;

ba tla lema morara,

ba je tholwana tsa wona.

₂₂Ha ba sa tla haha matlo,

ebe ho wona ho phela basele;

ha ba sa tla hlola ba lema,

ebe jwale ho ja basele;

tjhaba sa ka se tla phela halelele,

se phele halelele

jwalokaha sefate se phela,

bakgethwa ba ka ba je ditholwana,

ba je tholwana tsa matsoho a bona.

₂₃Ha ba ka ke ba sebeletsa lelea,

kapa ba tswalla bana ba bona,

ba ba tswalla ditsietsi,

ke peo ya ba hlohonolofaditsweng,

ba hlohonolofaditsweng ke Morena,

bona mmoho le ditloholo tsa bona.

₂₄Ke tla arabela

ba eso ka ba ipiletsa,

ke be ke ba utlwe

e le hona ba ntseng ba rapela.

₂₅Phiri le konyana

di tla fula di le mmoho,

tau e je jwang

jwalokaha pohwana e bo ja,

sehahabi sona se phele

ka ho ja lehlabathe.

Ha di ka ke tsa ntsha kotsi

leha e le ho bolaya,

hohlehohle thabeng ya ka,

thabeng e halalelang,”

ho rialo Morena.

“Lehodimo ke terone ya ka,

lefatshe ke bonamelo ba maoto a ka.

E kae ntlo eo ba nkgahelang yona?

Se kae sebaka

seo ke tla phomola ho sona?

₂Ntho tsena tsohle di entswe ke nna,

ka di etsa, mme jwale di teng,”

ho rialo Morena.

“Ya tjena ke yena eo ke mo ratang:

Ya ikokobeditseng,

ya moya o robehileng,

ya thothomelang

ha a utlwa lentswe la ka.

₃Empa ya etsang mahlabelo ka poho,

o tshwana le mmolai wa motho;

ya etsang nyehelo ka konyana,

o tshwana le ya robang ntja molala;

ya etsang nyehelo ka dijo,

o tshwana le ya nyehelang

ka madi a kolobe;

ya tjhesang mokubetso

ho etsa kgopotso,

o tshwana le ya kgumamelang

modimo wa bohata.

E, ba ikgethetse tsela tsa bona,

meya ya bona

e thabela manyala a bona.

₄Le nna ke tla ba otla

ka kotlo e bohloko,

ke ba tlisetse sona

seo ba se tshabang.

Ha ke ne ke bitsa,

ha ho ya kila arabela,

ha ke ne ke bua,

ha ba a ka ba mamela.

Ba entse bobe

moo ke ntseng ke ba shebile,

ba ikgethela dintho

tse sa nthabiseng.”

₅Lona ba thothomelang

ha Morena a bua,

mamelang dipolelo tsa hae:

“Bana babo lona ba le hloileng,

ba le kgesang

ka baka la lebitso la ka, ba re:

‘Morena ha a ke a tlotliswe,

re bone thabo ya lona!’

Empa bona

ba tla hlajwa ke dihlong.

₆Utlwang morusu

o tswang kahara motse!

Utlwang lerata

le tswang ka Tempeleng!

Ke modumo o tswang ho Morena,

o putsa dira tsa hae

ho ya ka mesebetsi ya tsona.

₇“Mosadi o belehile

a eso utlwe mahlaba a pelehi,

a beleha mora, mahlaba a pelehi

a eso mo fihlele.

₈Ya kila utlwa ntho e tjee ke mang?

Ya kila bona ntho tse tjee ke mang?

Na fatshe le ka boptjwa

ka tsatsi le le leng,

kapa sona setjhaba

sa tswalwa ka motsotswana?

Eitse ha Sione e utlwa

mahlaba a pelehi,

yaba e beleha

bana ba yona hanghang.

₉Na nka fihlisa mosadi

kgatheng la ho beleha,

yaba ke thibela

ho tswalwa ha ngwana wa hae?”

ho rialo Morena.

“Na ke ye ke kwale

popelo ya mosadi,

ke e kwale ka nako ya pelehi?”

ho rialo Modimo wa hao.

₁₀“Lona bohle ba ratang Jerusalema,

thabang le nyakalle mmoho le yona;

lona bohle ba e llelang,

thabang haholo mmoho le yona.

₁₁Matsweleng a yona

le tla anya le kgotsofale,

le tshedisehe, le mokonye haholo,

le thabele ho sisa ha yona.”

“Ke tla e tlisetsa kgotso

sa noka e tletseng,

ke e tlisetse maruo a ditjhaba

sa nokana e tletse tswete!

E tla le anyesa,

e le sike ka matsoho a yona,

lona le bapalle mangweleng a yona.

₁₃Jwalokaha mosadi

a bobisa ngwana wa hae,

le nna ke tla le tshedisa jwalo,

ke le tshedise le le Jerusalema.”

₁₄Ha le bona tsena

pelo tsa lona di tla nyakalla,

le tlokome jwaloka jwang

ha bo tlokoma.

Bahlanka ba Morena

ba tla tseba matla a hae,

dira tsa hae tsona

di bone kgalefo ya hae.

₁₅Bonang,

Morena o tla a le hara mollo,

kariki tsa hae tsa ntwa

di ka setsokotsane,

kgalefo ya hae e tlokomang

o e dihela ka mabifi,

malakabe a mollo

ke yona kgalemo ya hae.

₁₆Morena o tla ahlola bohle

ka mollo le ka sabole,

bao a tla ba bolaya

e tla ba boiyane.

₁₇“Ba ikgalaletsang, ba itlhwekisang,

ba itlhwekisetsa

ho kgumamela medingwana,

ho e kgumamela masimong,

ba emeng kamora sefate

se bohareng ba tshimo,

ba jang nama ya dikolobe

le ya ditweba, le tse manyala,

bana ba tla timetswa kaofela,”

ho rialo Morena.

₁₈“Ke tseba diketso tsa bona

le mehopolo ya bona;

nako e tla fihla,

ke kgobokanye ditjhaba,

le ba dipuo tsohle,

bohle ba tla tla

ba bohe tlotla ya ka.

₁₉“Ke tla etsa pontsho hara bona,

ba phonyohileng

ke ba romele ditjhabeng

tsa Tarshishe, le Pule, le Lode,

e leng tsona tse tummeng

ka ho fula ka metsu.

Ke tla ba romela Tubale le Jafane,

le dihlekehlekeng tse hole,

tse eso utlwe botumo ba ka,

tse eso bone le yona tlotla ya ka;

ba tla phatlalatsa

tlotla ya ka hara ditjhaba.

₂₀Ba tla tlisa bana babo lona bohle,

ba ba tlise ba etswa ditjhabeng,

ba ba tlise ho Morena e le nyehelo,

ba ba tlise ba palame dipere,

le kariki tsa ntwa le makoloi,

ba ba tlise

ba palame dimmeile le dikamele,

ba ba tlise Jerusalema,

thabeng ya ka e halalelang,”

ho rialo Morena.

“Ba tla ba tlisa sa bana ba Iseraele,

ba tlisa nyehelo,

ba e tlisa ka Tempeleng ya Morena,

ba e tlisa

e le ka janeng se hlwekileng.

₂₁Ba bang ba bona

ke tla ba etsa baprista,

ke ba etse Balevi,”

ho rialo Morena.

₂₂“Jwalokaha mahodimo a matjha

le lefatshe le letjha,

e leng dintho tseo ke tla di bopa,

di tla ba kapele ho nna kamehla,”

ho rialo Morena,

“ditloholo tsa ona

di tla hlola jwalo,

le lona lebitso la lona

le hlole jwalo.”

₂₃Morena o re:

“Batho bohle ba tla nkgumamela,

ba nkgumalele

ha kgwedi ka nngwe e thwasa;

ba nkgumamele

ka Sabatha se seng le se seng.

₂₄Ba tla tsamaya, ba yo bona ditopo,

topo tsa ba ileng ba ntshitelwa;

boko tse ba jang

ha di ka ke tsa eshwa,

mollo o ba tjhesang

ha o ka ke wa tima,

mme batho bohle

ba tla ba nyonya.”

Morena, ke ipiletsa ho wena,

ako mpotlakele;

sekehela lentswe la ka tsebe,

ha ke ipiletsa ho wena.

₂Thapelo ya ka

e nyolohele ho wena,

e nyolohe jwaloka mokubetso,

ke phahamise matsoho a ka

e le nyehelo ya mantsiboya.

₃Morena, ako bee molebedi,

o mmee molomong wa ka,

o dise monyako wa molomo wa ka;

₄pelo ya ka e se ke ya sekama,

ya sekamela dinthong tse mpe.

Ke se ke ka etsa

mesebetsi ya bokgopo

mokgatlong wa batho ba sa lokang;

ke se ke ka latswa menate ya bona.

₅Ho molemo

ha ke otlwa ke ya lokileng,

ke kgalemelwa ke yena;

hoo ke ole eo hlooho ya ka

e ke keng ya e hana,

ke tla nne ke rapele

leha ba kgopo ba ntshwenya.

₆Mohla baahlodi ba bona

ba dihelwang dilomong,

ke hona batho ba tla tseba

hore mantswe a ka e ne e le a nnete.

₇Jwalokaha ho kgathwa,

ho tabolwa thite,

masapo a bona

a tla qhalanngwa jwalo,

a qhalanngwe

kgorong ya Nqalo ya Bafu.

₈Morena, monga ka,

mahlo a ka a tadimile ho wena,

ke tshabela ho wena,

se ntlohelle hore ke timele.

₉Nqobise sefi

seo ba ntjhehileng ka sona,

le mamena

a ba etsang tse sa lokang.

₁₀Bohle ba kgopo

ba ke ba wele marabeng a bona,

ha nna ke phonyoha.

₂Ke lla ho Morena

ka lentswe le phahameng,

ke etsa thapedi ho Morena

ka lentswe le phahameng.

₃Ke hlahisa sello sa ka,

ke se hlahisa kapele ho yena,

ke bea tsietsi ya ka kapele ho yena.

₄Ha moya wa ka o imetswe,

wena o tseba tsela ya ka.

Tseleng eo ke tsamayang ho yona

ba ntjhehetse sefi.

₅Ke tadima ka tsohong la ka le letona:

Ha ho ya ntsotellang;

ha ho moo nka tshabelang teng,

ha ho motho ya nnatsang.

₆Morena, ke lla ho wena,

ke re: “Ke wena setshabelo sa ka,

o kabelo ya ka

lefatsheng la ba phelang.”

₇Ako mamele sello sa ka,

hobane ke kokobeditswe haholo.

Nnamolele ho ba ntlhorisang,

hobane ba mpheta ka matla.

₈Ako nntshe tjhankaneng,

ke tle ke boke lebitso la hao.

Ba lokileng ba tla mpokanela,

hoba o tla be o ntswetse molemo.

₁Ya kgopo o baleha

a sa phaladiswe ke motho,

ba lokileng

bona ba sebete jwaloka tau.

₂Tjhaba ha se le kgopo

se hlahlamanya babusi,

empa toka e hlaha

ka ya nang le bohlale le tsebo.

₃Mofumanehi

ya hatellang bafumanehi

o ka sekgohola se senyang dijalo.

₄Ba tlolang molao

ba thoholetsa ba kgopo,

empa ba o bolokang

ba hanyetsana le ba kgopo.

₅Batho ba kgopo

ha ba na kutlwisiso ya toka,

ba kgumamelang Morena

ba na le kutlwisiso ya tsohle.

₆Ho molemo ho ba mofutsana

ya phelang ka botshepehi,

ho ena le ho ba morui

ya phelang ka bolotsana.

₇Ya bolokang molao

ke mora ya bohlale,

ya tlwaetseng menyollo

o hlabisa ntatae dihlong.

₈Ya atisang ruo la hae

ka ho le tswadisa,

a le atise le ka ho hanyapetsa,

o le bokellela

ya tla hauhela mafutsana.

₉Ya ithibang ditsebe

hore a se utlwe molao,

thapelo tsa hae

le tsona ke manyala.

₁₀Ya kgelosang ba lokileng

hore ba ye tseleng tse kgopo,

o tla wela lemeneng

le tjhekilweng ke yena;

ba se nang molato

ba tla ja lefa la tse molemo.

₁₁Morui o ithetsa

ka ho re o bohlale,

mofutsana ya sedi

o lemoha boithetso boo ba hae.

₁₂Ha ba lokileng ba busa

tjhaba se a thoholetsa;

ha ba kgopo ba busa

tjhaba se a ipata.

₁₃Ya patang dibe tsa hae

a ke ke a ba le katleho;

ya ipolelang tsona, a di bakela,

o tla fumana mohau.

₁₄Ho lehlohonolo motho

ya tshabang Morena kamehla,

empa ya ithatafatsang pelo

o tla wela tsietsing.

₁₅Jwalokaha tau e puruma

le bere e kgobolaka,

mmusi ya kgopo o jwalo

ha a busa bafumanehi.

₁₆Mmusi ya sethoto

ke mmampodi ya sehloho;

ya hloileng maruo a bolotsana

o tla phela halelele.

₁₇Ya molato

wa ho tsholla madi a motho,

e tla ba mophaphathehi

ho isa lefung,

ho se be ya lekang ho mo thiba.

₁₈Ya phelang ka botshepehi

o tla fumana pholoho;

ya phelang ka bokgopo

yena hanghang o tla timela.

₁₉Ya lemang masimo a hae

o tla tjhaya haholo;

ya pheellang mafeela

o tla futsaneha haholo.

₂₀Motho ya tshepahalang

o tla hlohonolofala haholo,

athe ya potlakelang ho rua,

kotlo o tla e fumana.

₂₁Ho ahlola ka leeme

hase ntho e ntle,

empa motho a ka nna etsa sebe,

hore a fumane sengwathwana.

₂₂Ya mahlo a matsho

o potlakela leruo,

ha a nahane le hore bofuma

bo tla mo wela hodimo.

₂₃Ya kgalemang motho e mong,

o tla ratwa,

ho feta ya qekisang ka leleme la hae.

₂₄Ya utswetsang ntatae kapa mmae,

a ntsa ithetsa ka ho re:

“Hona hase sebe,”

ya jwalo yena

ke motswalle wa disenyi hantle.

₂₅Motho ya ikgohomosang

o fehla moferefere;

ya itshepelang Morena

o tla fumana katleho.

₂₆Motho ya sethoto

ke ya itshepang boyena,

ya sebetsang ka bohlale

o tla fumana pholoho.

₂₇Ya fanang ho mafutsana

ha ho seo a ka se hlokang;

ya sa a natseng ka letho

o tla rohakwa ke ba bangata.

₂₈Ha ba kgopo ba busa,

tjhaba se a ipata;

empa ha ba timela,

ba lokileng ba tla ngatafala.

₁Motho ya nnileng a kgalengwa

empa a satalatsa molala,

hanghang o tla welwa ke kotsi,

pheko e be siyo.

₂Ha ba lokileng ba ngatafala,

tjhaba se a nyakalla,

empa ha ba kgopo ba busa

tjhaba se a lla,

₃Ya ratang bohlale o thabisa ntatae,

ya mathang le diotswa

o hafaka leruo la hae.

₄Ha kgosi e thahasella toka,

puso e a tsitsa,

kgosi e kgethisang setjhaba haboima

e futsanehisa naha.

₅Motho ya phoqang mohahabo

o itjhehela leraba ka boyena.

₆Sebe sa ya kgopo

ke lemena ho yena,

empa ya lokileng

o bina a nyakaletse.

₇Ya lokileng

o hlokomela tokelo tsa bafumanehi,

empa ya kgopo

yena ha a di natse ka letho.

₈Basomi ba fehla moferefere,

ba o fehla kahara motse,

empa ba bohlale

ba kokobetsa kgalefo.

₉Ha motho ya bohlale

a qosana le ya sethoto,

leha ya sethoto a ka halefa,

kapa a tsheha,

kgotso e ke ke ya eba teng.

₁₀Ba nyoretsweng madi

ba hloile ba lokileng,

empa ba lokileng

ba boulela bophelo ba hae.

₁₁Sethoto se hlatsa kgalefo ya sona,

empa ya bohlale yena o a e bipa.

₁₂Ha mmusi a mamela mashano,

bahlanka ba hae bohle

ba tla ba kgopo.

₁₃Mofumanehi le mohatelli

ba tshwana ka sena:

Morena o tutubolla mahlo,

mahlo a bona bobedi.

₁₄Kgosi e ahlolelang bafumanehi,

e ba ahlolelang ka toka,

terone ya yona

e tla tsitsa kamehla yohle.

₁₅Thupa le kgalemo di tlisa bohlale,

empa ngwana ya tlohetsweng feela,

o hlabisa mmae dihlong.

₁₆Ha ba kgopo ba anafala,

bokgopo bo a eketseha;

empa ba lokileng

ba tla bona ha ba timela.

₁₇Kgalema mora wa hao,

o tla fumana phomolo,

le moya wa hao o nyakalle.

₁₈Tjhaba se sa senolelwang ditaba,

se iketsetsa borata,

empa ho lehlohonolo

ya bolokang molao.

₁₉Lekgoba le ke ke la kgalengwa

ka ho buiswa feela,

le hoja le utlwisisa,

le ke ke la phetha taelo.

₂₀Motho eo ereng ha a bua

a phasolohe,

o ka tshepa sethoto

ho ena le yena.

₂₁Ya bokotsang kgoba la hae

ha a le hodisa,

le tla qetella le mo hlokela teboho.

₂₂Motho ya bohale o baka diqabang,

ya hlonameng

yena o tletse bokgopo.

₂₃Boikakaso ba motho bo a mo diha,

empa boikokobetso

bo mo tlisetsa hlompho.

₂₄Motswalle wa leshodu o itlhoile,

o utlwa thohako, empa ha a e natse,

₂₅Ho tshaba batho

ke ho itjhehela leraba,

empa ya tshepang Morena

o tla bolokeha.

₂₆Ba bangata

ba batla ho ratwa ke mmusi,

empa motho

o fumana toka ho Morena feela.

₂₇Ba lokileng ba nyonya ba sa lokang,

ba sa lokang ba nyonya ba lokileng.