To The Word – Day 142

₁Dihlopha tsa balebedi ba menyako di ne di eme tjena: Ho bara ba Kora e ne e le Meshelemiya, mora wa Kore, e mong wa bara ba Asafo. ₂Bara ba Meshelemiya e ne e le Sekariya, letsibolo la hae, wa bobedi e le Jediaele, wa boraro e le Sebadiya, wa bone e le Jateniele, ₃wa bohlano e le Elame, wa botshelela e le Jehohanane, wa bosupa e le Eleunai.

₄Bara ba Obede-Edomo e ne e le Shemaya, letsibolo la hae, wa bobedi e le Jehosabada, wa boraro e le Jowa, wa bone e le Sakara, wa bohlano e le Netanele, ₅wa botshelela e le Amiele, wa bosupa e le Isakare, wa borobedi e le Peuletai, ho ya kamoo Modimo a neng a hlohonolofaditse Obede-Edomo kateng.

₆Mora wa hae Shemaya a tswala bara ba neng ba busa lelapa lohle labo bona, hobane e ne e le bahale. ₇Bara ba Shemaya e ne e le Oteni, le Refaele, le Obede, le Elesabade. Baena ba bona, e leng Elehu le Semakiya, e ne e le banna ba matla. ₈Bana bohle e ne e le ditloholo tsa Obede-Edomo; bona le bara ba bona, le bang ka bona, e ne e le banna ba matla, ba sebetsang ka thata. Ditloholo tsa Obede-Edomo di ne di le mashome a tsheletseng a metso e mmedi.

₉Meshelemiya le yena o ne a ena le bara, le baena ba matla, ba leshome le metso e robedi. ₁₀Le Hosa, wa bana ba Merari, o ne a ena le bara. Shimeri e ne e le yena hlooho ya bona. Le hoja e ne e se yena letsibolo, feela ntatae o ile a mo etsa hlooho. ₁₁Mora wa bobedi e ne e le Hilekiya, wa boraro e le Tebaleya, wa bone e le Sekariya. Kaofela bara ba Hosa le baena ba hae ba ne ba le leshome le metso e meraro.

₁₂Dihlopha tsena tsa balebedi ba menyako, di le tlasa baokamedi ba tsona, di ne di abetswe ho sebeletsa ka Tempeleng ya Morena, sehlopha ka seng se sebeletsa jwaloka tse ding. ₁₃Monyako ka mong wa kgethelwa balebedi ba wona ka lotho, ho ya ka malapa abo bona, ha kgethwa ba baholo le ba banyenyane.

₁₄Lotho le kgethang molebedi wa monyako o ka botjhabela la ntsha Shelemiya. Mora wa hae Sekariya, eo e neng e le moeletsi ya bohlale, le yena a etsetswa lotho, mme la mo ntshetsa ho lebela monyako o ka leboya.

₁₅Lotho le kgethang molebedi wa monyako o ka borwa la ntsha Obede-Edomo, mme lotho le kgethang balebedi ba ntlo ya polokelo la ntsha bara ba hae.

₁₆Lotho le kgethang balebedi ba monyako o ka bophirimela, le balebedi ba monyako wa Shalekete, o mmileng o kahodimo, la ntsha Shupime le Hosa.

Balebedi ba ne ba suthelana. ₁₇Ka letsatsi le leng le le leng, Balevi ba tsheletseng ba ne ba lebela ka botjhabela, ba bane ba lebela ka leboya, ba bane ba lebela ka borwa, mme tlung ya polokelo ba lebela ka bobedi, ba suthelana. ₁₈Lebaleng le ka bophirimela, ba bane ba ne ba lebela pela tsela, ba babedi ba lebela hona lebaleng moo.

₁₉Tsena e ne e le tsona dihlopha tsa balebedi ba menyako, bao e neng e le ditloholo tsa Kore le tsa Merari.

₂₀Balevi, le bana babo bona, e ne e le bona balebedi ba matlotlo a Tempele ya Modimo, le balebedi ba matlotlo a dimpho tse halalelang.

₂₁Hara ditloholo tsa Ladane, wa morabe wa Gereshone, bao e neng e le dihlooho tsa malapa abo bona e ne e le ditloholo tsa Jehiele. ₂₂Bara ba Jehiele, e leng Setame le Joele ngwanabo, e ne e le balebedi ba matlotlo a Tempele ya Morena.

₂₃Hara ditloholo tsa Amorame, le tsa Isihare, le tsa Heborone, le tsa Usiele, ₂₄setloholo sa Moshe, e leng Shebuele, mora wa Gereshome, e ne e le yena mookamedi wa balebedi ba matlotlo. ₂₅Bang ka yena, ba tswetsweng ke Eleesere, ke bana: Eleesere a tswala Rehabeya, Rehabeya a tswala Jeshaya, Jeshaya a tswala Jorame, Jorame a tswala Sikeri, Sikeri a tswala Shelomite. ₂₆Ke bo-Shelomite le bana babo, bao e neng e le balebedi ba matlotlo a dimpho tse abetsweng Morena, tseo kgosi Davida, le dihlooho tsa malapa, le balaodi ba bahlabani ba sekete, le ba bahlabani ba lekgolo, le balaodi ba mabotho, ba ileng ba di abela Morena. ₂₇Dinthong tse ileng tsa hapuwa ntweng, ba fana ka tse ding hore di tle di sebediswe Tempeleng ya Morena. ₂₈Tsohle tseo moporofeta Samuele, le Saule mora wa Kishe, le Abinere mora wa Nere, le Joabe mora wa Seruya, ba neng ba di abetse Morena, le tsohle tseo mang kapa mang a neng a di abetse Morena, di ne di laolwa ke Shelomite le bana babo.

₂₉Hara ditloholo tsa Isihare, Kenaniya le bara ba hae ba ne ba abetswe mosebetsi wa ho tsamaisa ditaba tsa naha ya Iseraele, e le bangodi le baahlodi. ₃₀Hara ditloholo tsa Heborone, Hashabiya le bana babo ba sekete le makgolo a supileng bao e neng e le bahale, e ne e le bona baokamedi ba mosebetsi wohle wa Morena, ba okametse le tshebeletso yohle ya kgosi naheng ya Iseraele e ka bophirimela ho Jorodane. ₃₁Hara ditloholo tsa Heborone, Jeriya e ne e le yena hlooho, ho ya ka ho hlahlamana ha malapa abo tsona. Ka selemo sa mashome a mane sa puso ya Davida, ba fuputsa hara ba morabe wa Heborone, mme ha fumanwa bahale Jasere e Gileade. ₃₂Bang ka yena, ba dikete tse pedi le makgolo a supileng bao e neng e le bahale, e bile e le dihlooho tsa malapa abo bona, ba laelwa ke Davida hore ditabeng tsohle tsa borapedi, le tsa puso, ba okamele ba morabe wa Rubene, le wa Gade, le ba karolo ya morabe wa Manase.

₁Lena ke lenane la bana ba Iseraele, ho ya ka palo ya bona, e leng dihlooho tsa malapa a bona, le balaodi ba bahlabani ba dikete, le ba bahlabani ba makgolo, le bahlanka ba sebeletsang kgosi ditabeng tsohle tse amanang le mabotho. Ba ne ba sebetsa ka dihlopha tse suthelanang ka kgwedi le kgwedi, selemo sohle. Lebotho ka leng le ne le ena le bahlabani ba dikete tse mashome a mabedi a metso e mene.

₂Jeshobame, mora wa Sabediele, o ne a laola lebotho le kenang mosebetsing ka kgwedi ya pele. Le ne le ena le bahlabani ba dikete tse mashome a mabedi a metso e mene. ₃E ne e le wa leloko la Perese, e le hlooho ya balaodi bohle ba mabotho a sebetsang ka kgwedi ya pele.

₄Dodai, wa morabe wa Ahohi, o ne a laola lebotho le kenang mosebetsing ka kgwedi ya bobedi, motlatsi wa hae e ne e le Mikelote. Le yena lebotho la hae le ne le ena le bahlabani ba dikete tse mashome a mabedi a metso e mene.

₅Benaya, mora wa Moprista e Moholo Jehoyada, e ne e le molaodi wa lebotho le kenang mosebetsing ka kgwedi ya boraro. Lebotho la hae le ne le ena le bahlabani ba dikete tse mashome a mabedi a metso e mene. ₆Ke yena Benaya yane eo e neng e le e mong wa bahale ba mashome a mararo e bile e le mookamedi wa bona. Amisabade, mora wa hae, e ne e le yena ya laolang lebotho lena.

₇Asaele, ngwanabo Joabe, e ne e le molaodi wa lebotho le kenang mosebetsing ka kgwedi ya bone. Sebadiya, mora wa hae, o ne a mo hlahlama. Lebotho la hae le ne le ena le bahlabani ba dikete tse mashome a mabedi a metso e mene.

₈Shameute, wa morabe wa Isera, e ne e le molaodi wa lebotho le kenang mosebetsing ka kgwedi ya bohlano. Lebotho la hae le ne le ena le bahlabani ba dikete tse mashome a mabedi a metso e mene.

₉Ira, mora wa Ikeshe wa Tekowa, e ne e le molaodi wa lebotho le kenang mosebetsing ka kgwedi ya botshelela. Lebotho la hae le ne le ena le bahlabani ba dikete tse mashome a mabedi a metso e mene.

₁₀Helese wa Mopelone, wa morabe wa Efraime, e ne e le molaodi wa lebotho le kenang mosebetsing ka kgwedi ya bosupa. Lebotho la hae le ne le ena le bahlabani ba dikete tse mashome a mabedi a metso e mene.

₁₁Sibekai wa Mohusha, wa morabe wa Sera, e ne e le molaodi wa lebotho le kenang mosebetsing ka kgwedi ya borobedi. Lebotho la hae le ne le ena le bahlabani ba dikete tse mashome a mabedi a metso e mene.

₁₂Abiesere wa Moanatote, wa morabe wa Benjamine, e ne e le molaodi wa lebotho le kenang mosebetsing ka kgwedi ya borobong. Lebotho la hae le ne le ena le bahlabani ba dikete tse mashome a mabedi a metso e mene.

₁₃Maharai wa Monetofa, wa morabe wa Sera, e ne e le molaodi wa lebotho le kenang mosebetsing ka kgwedi ya leshome. Lebotho la hae le ne le ena le bahlabani ba dikete tse mashome a mabedi a metso e mene.

₁₄Benaya wa Mopiratone, wa morabe wa Efraime, e ne e le molaodi wa lebotho le kenang mosebetsing ka kgwedi ya leshome le motso o mong. Lebotho la hae le ne le ena le bahlabani ba dikete tse mashome a mabedi a metso e mene.

₁₅Heledai wa Monetofa, wa morabe wa Oteniele, e ne e le molaodi wa lebotho le kenang mosebetsing ka kgwedi ya leshome le metso e mmedi. Lebotho la hae le ne le ena le bahlabani ba dikete tse mashome a mabedi a metso e mene.

₁₆Dihlooho tsa merabe ya Iseraele e ne e le tsena: Hlooho ya ba morabe wa Rubene e ne e le Eleesere, mora wa Sikeri; ya ba morabe wa Simeone e le Shefatiya, mora wa Maaka. ₁₇Ho ba morabe wa Levi, hlooho e ne e le Hashabiya, mora wa Kemuele; ho ba morabe wa Arone e le Sadoke. ₁₈Ho ba morabe wa Juda hlooho e ne e le Elehu, e mong wa bana babo Davida; ho ba morabe wa Isakare e le Omeri, mora wa Mikaele. ₁₉Ho ba morabe wa Sebulone hlooho e ne e le Jishemaya, mora wa Obadiya; ho ba morabe wa Nafthali e le Jeremote, mora wa Aseriele. ₂₀Ho ba morabe wa Efraime hlooho e ne e le Hoshea, mora wa Asasiya; ho ba karolo e nngwe ya ba morabe wa Manase e le Joele, mora wa Pedaya. ₂₁Ho ba karolo e nngwe ya ba morabe wa Manase e Gileade, hlooho e ne e le Ido, mora wa Sekariya; ho ba morabe wa Benjamine e le Jaasiele, mora wa Abinere. ₂₂Ho ba morabe wa Dane hlooho e ne e le Asariele, mora wa Jerohame.

Bana e ne e le mahosana a merabe ya Iseraele.

₂₃Empa Davida ha a a ka a bala ba dilemo tse mashome a mabedi ho ya tlase, hobane Morena o ne a itse o tla ngatafatsa Baiseraele, ba be kaalo ka dinaledi tsa lehodimo. ₂₄Joabe, mora wa Seruya, o ne a ile a qala ho bala batho, empa a se ke a qeta. Ho bala setjhaba hoo ha tlisetsa Baiseraele kotlo; ka baka leo, palo eo ha ya ka ya ngolwa Bukeng ya Diketsahalo tsa kgosi Davida.

₂₅Matlotlo a kgosi a ne a hlokomelwa ke Asemafete, mora wa Adiele; athe disiu tse ka mathoko, le tse metseng, le tse metsaneng, le tse diqhobosheaneng, di ne di hlokomelwa ke Jehonathane, mora wa Usiya. ₂₆Eseri, mora wa Kelobe, o ne a hlokomela balemi. ₂₇Shimei, ya neng a ahile Rama, o ne a hlokomela masimo a morara; Sabedi, ya neng a ahile Shifame, o ne a hlokomela morara o yang ditlhotlelong. ₂₈Baale-Hanane wa Mogedere, o ne a hlokomela difate tsa mohlwaare le tsa monokotshwai tse maralleng a ka bophirimela; Jowashe o ne a hlokomela matlo ao ho bolokwang ole ka ho wona.

₂₉Shiterai wa Mosharone o ne a hlokomela dikgomo tse neng di le metebong e Sharone; Shafate, mora wa Adelai, o ne a hlokomela dikgomo tse neng di le ka dikgohlong. ₃₀Obile wa Moishemaele o ne a hlokomela dikamele; Jehedeya, ya neng a ahile Meronote, o ne a hlokomela ditonki. ₃₁Jasise wa Mohagare o ne a hlokomela dikgutshwane. Bana bohle e ne e le badisa ba maruo wohle a kgosi Davida.

₃₂Jonathane, rangwana Davida, e ne e le moeletsi ya bohlale, e bile e le mongodi, mme Jehiele, mora wa Hakemoni, o ne a hlokomela bara ba kgosi. ₃₃Ahitofele e ne e le moeletsi wa kgosi; Hushai wa Moarake e le motswalle wa kgosi. ₃₄Ahitofele a hlahlangwa ke Jehoyada, mora wa Benaya, le Abiatare.

Molaodi wa mabotho a kgosi e ne e le Joabe.

₁Davida a kgobokanya mahosana wohle a Iseraele, Jerusalema, le mahosana a merabe, le balaodi ba mabotho a sebeletsang kgosi ka dihlopha tsa wona ka ho suthelana, le balaodi ba bahlabani ba dikete, le balaodi ba ba makgolo, le bahlokomedi ba maruo wohle le matlotlo wohle a kgosi, le bahlokomedi ba bara ba kgosi, le bahlanka bohle, le banna ba dinatla, le bahale.

₂Jwale kgosi Davida a ema, a re: “Mmameleng, lona bana beso, le setjhaba sa heso. Ke ne ke ena le maikutlo a ho hahela areka ya selekane sa Morena Tempele, eo e tla dula ka ho yona, le moo Modimo wa rona a tla namela teng, mme ke se ke entse ditokiso tsa ho e haha. ₃Empa Modimo o ile a re ho nna: ‘O ke ke wa nkgahela Tempele, hobane o bile motho wa dintwa, mme o tsholotse madi.’

₄“Leha ho le jwalo, Morena Modimo wa Iseraele, o kgethile nna, ho ba lelapa lohle la ntate, hore ke be kgosi ya Iseraele kamehla yohle. O kgethile Juda ho ba moetapele, mme morabeng wa Juda o kgethile lelapa leso. Hara bana beso o ile a kgahlwa ke nna, mme a mpea kgosi ya Iseraele yohle. ₅Morena o mphile bara ba bangata, mme hara bara bohle o kgethile Solomone, mora wa ka, ho dula teroneng ya mmuso wa Morena, a buse Iseraele.

₆“Morena o ile a re ho nna: ‘Solomone, mora wa hao, ke yena ya tla nkgahela Tempele, le mabala a yona, hobane ke mo kgethile hore e be mora wa ka, mme nna ke be ntatae. ₇Ke tla tiisa mmuso wa hae kamehla yohle, haeba a ka nna a boloka melao ya ka le ditemoso tsa ka, jwalokaha a ntse a etsa.’

₈“Ka baka leo, pontsheng ya Baiseraele bohle, e leng setjhaba sa Morena, le moo Modimo wa rona a ntseng a utlwa, batlang, mme le boloke melao yohle ya Morena Modimo wa lona, e le hore le tle le rue naha ena e ntle, le e siele bana ba lona, e be ya bona kamehla yohle.

₉“Jwale wena Solomone, mora wa ka, tseba Modimo wa ntatao, o mo sebeletse ka pelo ya hao yohle, le ka maikutlo a hao wohle. Morena o lekola dipelo tsohle, mme o tseba menahano yohle, le mehopolo yohle. Ha o ka mmatla, o tla mo fumana, empa haeba o ka mo furalla, o tla o lahlela ruri! ₁₀Hlokomela he, hobane Morena o o kgethetse hore o mo hahele Tempele eo e leng Sehalalelo sa hae. Eba monna, o etse jwalo.”

₁₁Jwale Davida a nea Solomone, mora wa hae, setshwantsho sa lethule la Tempele, le sa matlo a yona, le sa dikamore tsa matlotlo, le sa dikamore tse kahodimo, le sa dikamore tse kahare, le sa sekwahelo sa tefelo ya sebe. ₁₂A mo nea le setshwantsho sa tsohle tse neng di le mohopolong wa hae, e leng mabala a Tempele ya Morena, le dikamore tse a potapotileng, le dikamore tsa matlotlo a Tempele ya Modimo, le dikamore tsa dimpho tse halalelang.

₁₃Davida a laela Solomone kamoo a tla hlopha baprista le Balevi kateng, hore ba etse mosebetsi wohle wa tshebeletso ya Tempele ya Morena; le kamoo thepa yohle e tla sebediswa kateng ha ho sebeletswa ka Tempeleng ya Morena. ₁₄A mo laela le hore na boima ba kgauta le ba silefera e tla etsa thepa yohle, e tla sebediswa, bo be bokae. ₁₅A mmolella le boima ba kgauta e tla etsa didulwana tsa mabone, le e tla etsa mabone, le boima ba silefera e tla etsa didulwana tsa mabone, le e tla etsa mabone, ho ya kamoo sedulwana ka seng se tla sebediswa kateng. ₁₆A mmolella le boima ba kgauta e tla etsa tafole e nngwe le e nngwe e tla bea bohobe bo halalelang, le boima ba silefera e tla etsa ditafole tsa silefera, ₁₇le boima ba kgauta e hlwekisitsweng e tla etsa difereko, le dikotlolwana, le dikomiki, le boima ba kgauta e tla etsa sekotlolo ka seng sa kgauta, le boima ba silefera e tla etsa sekotlolo ka seng sa silefera. ₁₈A ba a mmolella le boima ba kgauta e hlwekisitsweng, e tla etsa aletare ya ho tjhesetsa mokubetso, a mo nea le setshwantsho sa kariki, ke ho re sa dikerubime tsa kgauta, tse tla thathalatsa mapheo, di kgurumetse areka ya selekane sa Morena.

₁₉Yaba Davida o re: “Tsena tsohle ke di ngotse, hobane letsoho la Morena le ile la ntataisa, mme a etsa hore ke utlwisise diqaqiso tsohle tsa setshwantsho sena.”

₂₀Davida a boela a re ho mora wa hae Solomone: “Eba monna, o be sebete, o etse jwalo. O se ke wa tshaba, kapa wa tsieleha, hobane Morena Modimo, e leng Modimo wa ka, o tla ba le wena. Ha a ka ke a o lahla, kapa a o furulla, ho fihlela o qeta mosebetsi wohle wa ho haha Tempele ya Morena. ₂₁Dihlopha tsa baprista le tsa Balevi di tla o thusa mosebetsing wohle wa Tempele ya Modimo. Banna bohle ba ditsebi ba tla o thusa mesebetsing yohle e batlang tsebo; le mahosana le setjhaba sohle se tla mamela taelo ya hao.”

₁Kgosi Davida a boela a re ho setjhaba sohle: “Solomone, mora wa ka, eo e leng yena feela eo Modimo a mo kgethileng, o sa le monyenyane, o a tetema, athe mosebetsi o moholo, hobane Tempele ena hase ya motho, empa ke ya Morena Modimo. ₂Ka matla a ka wohle ke lokisitse dintho tsa Tempele ya Modimo wa ka: Kgauta e tla etsa dintho tsa kgauta, le silefera e tla etsa dintho tsa silefera, le lethose le tla etsa dintho tsa lethose, le tshepe e tla etsa dintho tsa tshepe, le mapolanka a tla etsa dintho tsa mapolanka, le majwe a bohlokwa a oniki, le majwe a phatsimang a tla kgabisa, a mebalabala, le mefuta yohle ya majwe a bohlokwa, le mahakwe. ₃Ho feta mona, kaha ke rata Tempele ya Modimo wa ka, kahodima tsohle tseo ke seng ke di lokiseditse Tempele ena e halalelang, le nna ke abela Tempele ena ya Modimo wa ka matlotlo a ka a kgauta le a silefera: ₄Ke kgauta ya Ofire, e etsang boima ba dithane tse lekgolo, le silefera e hlwekisitsweng, e etsang boima ba dithane tse makgolo a mabedi le mashome a mane, e tla manehwa maboteng a Tempele; ₅e leng kgauta e tla etsa dintho tsa kgauta, le silefera e tla etsa dintho tsa silefera, le mesebetsi yohle e tla etswa ke ditsebi tsa mesebetsi ya matsoho. Jwale ke mang ya ithaopelang ho sebeletsa Morena kajeno?”

₆Yaba bao e leng dihlooho tsa malapa abo bona, le mahosana a merabe ya Iseraele, le balaodi ba bahlabani ba sekete, le ba ba lekgolo, le baokamedi ba mesebetsi ya kgosi, ba a ithaopa. ₇Bakeng sa mesebetsi ya Tempele ya Modimo ba fana ka kgauta eo boima ba yona bo fetang dithane tse lekgolo le mashome a supileng, le silefera eo boima ba yona bo fetang dithane tse makgolo a mararo le mashome a mane, le lethose le etsang boima bo ka bang dithane tse makgolo a tsheletseng le mashome a mabedi, le tshepe eo boima ba yona bo fetang dithane tse dikete tse tharo le makgolo a mane. ₈Ba neng ba ena le majwe a bohlokwa ba a abela letlole la Tempele ya Morena le neng le hlokomelwa ke Jehiele wa Mogereshone. ₉Setjhaba sa nyakalla, hobane bao ba ne ba ithaopetse ho fana, mme ba efa Morena ka dipelo tsa bona tsohle. Kgosi Davida le yena a thaba haholo.

₁₀Davida a rorisa Morena moo setjhaba sohle se leng teng, a re:

₁₄“Empa nna ke mang? Tjhaba sa ka sona ke eng, hoo re ka ithaopelang ho fana hakaalekaale? Tsohle ke tsa hao, mme tseo re faneng ka tsona di tswa ho wena. ₁₅Mahlong a hao re baeti le bajaki, jwaloka bo-ntata rona bohle. Matsatsi a rona, lefatsheng mona, a jwaloka seriti, mme ha ho ya nang le tshepo. ₁₆Oho, Morena Modimo wa rona, dintho tsena tsohle, tseo re di lokiseditseng ho o hahela Tempele ka tsona, ho tlotla lebitso la hao le halalelang, di tswa ho wena, ke tsa hao. ₁₇Hape ke a tseba, Modimo wa ka, hore o leka pelo ya motho, mme o thabela ho loka. Ha e le nna ke o nyeheletse ka dintho tsena tsohle ka boithaopo, ka pelo ya ka yohle. Jwale ke thabetse le ho bona setjhaba sa hao, se teng mona, se o nyehella ka boithaopo. ₁₈Oho, Morena Modimo wa bo-ntata rona Aborahama, le Isaka, le Iseraele, etsa hore maikutlo ana a nne a be teng mehopolong ya dipelo tsa setjhaba sa hao, se nne se tshepahale ho wena. ₁₉Ako etse hore Solomone, mora wa ka, a tshepahale, hore a boloke melao ya hao, le ditemoso tsa hao, le ditaelo tsa hao, a phethe dintho tsena tsohle, a hahe Tempele eo ke seng ke lokiseditse hore e hahwe.”

₂₀Yaba Davida o re ho setjhaba sohle: “Rorisang Morena Modimo wa lona!” Setjhaba sohle sa rorisa Morena Modimo wa bo-ntata sona; sa inamisa dihlooho tsa sona, sa kgumamela Morena, sa isa hlompho ho kgosi.

₂₁Ka letsatsi le hlahlamang leo, setjhaba sa etsetsa Morena mahlabelo le dinyehelo tsa setjheso ka dipohwana tse sekete, le dipheleu tse sekete, le dikonyana tse sekete, le dinyehelo tsa dino, le mahlabelo a mang a mangata, a etsetswang Baiseraele bohle. ₂₂Ka lona letsatsi leo ba eja, ba enwa ba nyakaletse haholo, ba le kapele ho Morena.

Ba boela ba bea Solomone, mora wa Davida, kgetlo la bobedi, hore e be kgosi; ba mo tlotsetsa Morena, hore e be mmusi e moholo, Sadoke yena e be moprista. ₂₃Solomone a dula teroneng ya Morena, ya eba kgosi sebakeng sa ntatae Davida, mme a atleha. Baiseraele bohle ba mo hlompha. ₂₄Mahosana wohle, le bahale, le bara bohle ba kgosi, ba ipea tlasa kgosi Solomone.

₂₅Morena a phahamisa Solomone haholo mahlong a Baiseraele bohle; a mo apesa botlotlehi boo ho seng kgosi e neng e kile ya eba le bona, naheng ya Iseraele, pele ho yena.

₂₆Davida, mora wa Jese, a busa Baiseraele bohle. ₂₇A ba busa ka dilemo tse mashome a mane; ka tse supileng a busa a le Heborone, ka tse mashome a mararo a metso e meraro a le Jerusalema. ₂₈A shwa a se a tsofetse haholo, a phetse dilemo tse ngata, a bile le maruo, mme a hlompheha. Solomone, mora wa hae, a mo hlahlama.

₂₉Diketso tsa kgosi Davida, ho tloha qalong ho isa qetellong, di ngotswe Bukeng ya Moporofeta Samuele, le Bukeng ya Moporofeta Nathane, le Bukeng ya Moporofeta Gade. ₃₀Di ngotswe mmoho le tsohle tsa puso ya hae, le tsa bonatla ba hae, le diketsahalo tsohle tse ileng tsa mo hlahela naheng ya Iseraele, le mebusong yohle ya dinaha tse ding.

₁Pesalema ya Davida. Thothokiso e nang le thuto.