To The Word – Day 143

₁Binelang Morena sefela se setjha,

lona ba lefatshe lohle

le ke le binele Morena.

₂Binelang Morena,

bokang lebitso la hae,

ka letsatsi le letsatsi, phatlalatsang

le phatlalatse tsa ho pholosa ha hae.

₃Bolelang tsa tlotla ya hae

hara ditjhaba,

le dimakatso tsa hae

hara merabe yohle.

₄Morena o moholo,

o lokelwa ke thoriso e kgolo,

o tshabeha ho feta medimo yohle.

₅Medimo yohle ya baditjhaba

ke mafeelafelane,

athe Morena

ke yena ya entseng mahodimo.

₆O eteletswe pele

ke tlotla le botlotlehi,

matla le kganya

di Sehalalelong sa hae.

₇Thoholetsang Morena,

lona ditjhaba tsa mefutafuta,

thoholetsang

tlotla le matla a Morena.

₈Thoholetsang tlotla

e lokelang lebitso la Morena,

tloong mabaleng a hae,

le mo nyehelle.

₉Kgumamelang Morena

le kgabile ka tse halalelang,

lefatshe lohle le thothomele,

le thothomele kapele ho yena.

₁₀Ereng ho baditjhaba:

“Morena ke kgosi,

o tiisitse lefatshe,

le ke ke la sisinyeha;

o ahlola ditjhaba ka ho loka.”

₁₁Mahodimo a ke a thabe,

lefatshe le nyakalle,

lewatle le hwase

le tsohle tse ka ho lona.

₁₂Naha e nyakalle

le tsohle tse ho yona,

difate tsa meru di etse ditlatse

₁₃kapele ho Morena, hobane o a tla,

o tlilo ahlola lefatshe.

O tla ahlola lefatshe ka toka,

le ditjhaba ka nnete ya hae.

₁Bokang Morena,

le rapele lebitso la hae,

le tumise diketso tsa hae,

le di tumise hara ditjhaba.

₂Mmineleng, le mo roke,

le nahane dimakatso tsa hae tsohle.

₃Ithoriseng ka lebitso la hae,

lebitso la hae le halalelang,

pelo tsa ba batlang Morena

di ke di thabe.

₄Batlang Morena le matla a hae;

le nne le batle fahleho sa hae,

le se batle kamehla le mehla.

₅Hopolang dimakatso tsa hae

tseo a di entseng,

mehlolo ya hae,

le dikahlolo tseo a di boletseng,

₆lona ba leloko la Aborahama,

mohlanka wa hae,

lona bana ba Jakobo,

bao a ikgethetseng bona.

₇Morena ke yena Modimo wa rona,

ke yena ya ahlolang lefatshe lohle.

₈Ha a lebale selekane sa hae

le ka mohla,

tshepiso eo a e entseng,

a e etsetsa meloko e sekete;

₉selekane seo a se entseng,

a se etsa le Aborahama,

le kano eo a e entseng,

a e etsetsa Isaka,

₁₀hore e be molao o tiileng ho Jakobo,

le lekane sa kamehla yohle

ho Iseraele,

₁₁ha a re:

“Ke tla o nea naha ya Kanana,

e le lefa leo ke o abelang lona.”

₁₂Ha ba ne ba sa le mmalwana,

e le bajaki ba seng bakae naheng eo,

₁₃ba ntse ba lelera hara ditjhaba,

ba tloha mmusong o mong,

ba eya ho o mong,

₁₄Modimo ha a a ka a dumela,

a dumella motho hore a ba tube,

mme ka baka la bona

a kgalema dikgosi, a re:

₁₅“Le se ke la ama

batlotsuwa ba ka,

le se ke la etsa

baporofeta ba ka hampe.”

₁₆Jwale a dihela tlala lefatsheng,

dijo tsohle tse ba phedisang

a di fedisa;

₁₇yaba o romela monna e le selelekela:

Josefa a rekiswa ho ba lekgoba.

₁₈Ba mo hlokofatsa

ka ho mo tlama maoto ka ditshepe,

ba mmofa ka mahlaahlela,

₁₉ho fihlela se etsahala,

seo a se boletseng e sa le pele,

mme a pakwa

ke lentswe la Modimo.

₂₀Kgosi ya laela hore a tlamollwe,

mmusi wa ditjhaba a mo lokolla.

₂₁Ya mo etsa mookamedi

wa lelapa la yona,

le mmusi wa tsohle

tseo e di ruileng,

₂₂a tle a rute mahosana

ho ya ka thato ya hae,

a hlalefise baholo

ba setjhaba sa yona.

₂₃Yaba Iseraele o fallela Egepeta,

Jakobo a jaka naheng ya Kama.

₂₄Modimo a ngatafatsa setjhaba sa hae,

a se ngatafatsa haholo,

a se matlafatsa ho feta dira tsa sona.

₂₅A fetola pelo tsa tsona,

tsa hloya tjhaba sa hae,

tsa sebetsa bahlanka ba hae

ka bolotsana.

₂₆A romela Moshe, mohlanka wa hae,

le Arone eo a mo kgethileng.

₂₇A etsa dipontsho tsa hae ka bona,

le dimakatso tsa hae

naheng ya Kama.

₂₈A romela lefifi, mme ha fifala;

empa Baegepeta ba hanyetsa,

ba hanyetsa polelo tsa hae.

₂₉Metsi a naha ya bona

a a fetola madi,

a bolaya le ditlhapi tse ho wona.

₃₀Naha ya bona

ya nyeunya dihohwana,

esita le ka matlung

a dikgosi tsa bona.

₃₁A laela, ha hlaha diboba,

le menwang, naheng yohle ya bona.

₃₂Bakeng sa pula a ba nesetsa sefako,

mollo wa lehadima

wa wela naha ya bona.

₃₃A senya morara wa bona le feiye,

a roba difate tsa naha ya bona.

₃₄A laela, ha hlaha ditsie,

le bookgolane bo se nang palo.

₃₅Tsa kumola jwang bohle

ba naha ya bona,

tsa kokona tsohle

tse behwang ke naha.

₃₆A bolaya matsibolo wohle

a naha ya bona,

bana ba bona ba matswathaka.

₃₇A ntsha Baiseraele ba kakatetse,

ba kakatetse silefera le kgauta,

ho se ya tsiapaneng

hara meloko ya bona.

₃₈Egepeta ya thabela ho falla ha bona,

hobane e ne e tshohile haholo.

₃₉A phuphuthisa leru, la ba kwahela;

mollo wa ba bonesetsa bosiu.

₄₀Ba kopa,

yaba o ba tlisetsa dikwekwe;

a ba kgorisa ka bohobe

bo tswang mahodimong.

₄₁A petsola lefika, metsi a phorosela;

a phalla dibataolong eka ke noka.

₄₂Ke hobane o ne a hopotse tshepiso,

tshepiso ya hae e halalelang,

ho Aborahama, mohlanka wa hae.

₄₃A ntsha setjhaba sa hae ka nyakallo,

bakgethwa ba hae

ka ditlatse tsa thabo.

₄₄Yaba o ba nea naha tsa baditjhaba,

ba ja lefa la mofufutso

wa merabe eo,

₄₅hore ba tle ba boloke ditaelo,

ba boloke taelo tsa hae,

ba hlomphe melao ya hae.

Haleluja!

₁Haleluja!

Bokang Morena, hobane o molemo;

mohau wa hae ke wa kamehla yohle.

₂Ke mang ya ka bolelang

ketso tse matla tsa Morena,

ya ka tumisang

thoriso yohle ya hae?

₃Ho lehlohonolo ba etsang toka,

ba etsang ho lokileng ka nako tsohle.

₄Morena, ako nkgopole,

ha o sitsa setjhaba sa hao,

o nketele, o tlo mpholosa.

₅A nke ke bone katleho

ya bakgethwa ba hao,

ke be le kabelo thabong

ya setjhaba sa hao,

ke tle ke ithorise

mmoho le bao e leng lefa la hao.

₆Rona le bo-ntata rona re entse dibe,

re molato, re kgopo.

₇Bo-ntata rona, ha ba sa le Egepeta,

ha ba a ka ba utlwisisa

dimakatso tsa hao;

ba ile ba lebala

mohau wa hao o moholo,

ba mpa ba fetohela Ya Hodimodimo

ha ba le Lewatleng la Sufe.

₈Empa o ile a ba pholosa

ka baka la lebitso la hae,

hore ho tle ho bonahatswe

matla a hae.

₉A kgalemela Lewatle la Sufe,

yaba le a psha;

a ba tsamaisa madibeng

jwalokaha eka ke sebataolong.

₁₀A ba pholosa matsohong

a ba ba hloileng,

a ba namolela matsohong a sera.

₁₁Metsi a kwahela ba ba lwantshang,

ha se ke ha phonyoha le ya mong.

₁₂Yaba ba qala

ho kgolwa tshepiso tsa hae,

ba mminela dithoko.

₁₃Empa ba phakisa ho lebala,

ho lebala diketso tsa hae,

ba tlohela ho batla keletso ho yena.

₁₄Ba mpa ba laolwa

ke ditakatso tsa bona lefeelleng,

ba leka Modimo ba le lehwatateng.

₁₅A ba nea seo ba neng ba se kopa,

athe o tla ba neella

ka lefu le ba timetsang.

₁₆Ba honohela Moshe ba le diahelong,

le yena Arone,

mohalaledi wa Modimo.

₁₇Lefatshe la ahlama,

la metsa Datane,

la kwenya sehlopha sa Abirame.

₁₈Mollo wa tuka

hara sehlopha sa bona,

malakabe a wona

a tjhesa bao ba kgopo.

₁₉Ha ba le Horebe,

ba ipopela namane,

ba kgumamela setshwantsho

se bopilweng ka kgauta.

₂₀Ba lahla tlotla ya Modimo,

ba tlotlisa setshwantsho sa pohwana,

ntho e jang jwang.

₂₁Ba lebala Modimo,

mopholosi wa bona,

ya entseng tse kgolo Egepeta,

₂₂dimakatso naheng ya Kama,

le tse tshosang Lewatleng la Sufe.

₂₃Yaba o re o a ba fedisa,

empa Moshe, mokgethwa wa hae,

a kena dipakeng,

a phoka bohale ba hae

hore bo se ba timetse.

₂₄Ba nyedisa naha e kgahlehang,

hobane ba ne ba sa kgolwe,

ba sa kgolwe ditshepiso tsa hae.

₂₅Ba dumaduma

ba le ditenteng tsa bona,

ba se ke ba mamela

lentswe la Morena.

₂₆A phahamisa letsoho,

a ba hlapanyetsa

hore o tla ba bolaela lehwatateng,

₂₇a qhalanye tloholo tsa bona,

a di qhalanyetse hara ditjhaba,

a di qhalanyetse dinaheng.

₂₈Ba kgomarela Baale wa Peore,

ba eja mahlabelo

a etseditsweng bafu.

₂₉Ba phephetsa Modimo

ka diketso tsa bona,

ba welwa ke lefu la sewa.

₃₀Empa Finease a ema,

a ahlola ba molato,

yaba lefu la sewa le a fela.

₃₁Hoo a ho ballwa e le ho loka,

ho isa melokong yohle,

kamehla le mehla.

₃₂Ba boela ba halefisa Morena,

ba mo halefisa metsing a Meriba,

Moshe a ba tsietsing

ka baka la bona;

₃₃ba kgopisa moya wa hae,

hoo a bileng a bua a sa inahana.

₃₄Ha ba a ka ba timetsa ditjhaba

jwalokaha Morena a ne a ba laetse;

₃₅ba mpa ba nyallana le baditjhaba,

ba ithuta mekgwa ya bona.

₃₆Ba sebeletsa medimo ya bona,

medimo ya bona ya ditshwantsho,

e ileng ya ba fetohela leraba.

₃₇Ba etsetsa bademona mahlabelo,

ka bara le baradi ba bona.

₃₈Ba tsholla madi a se nang molato,

madi a bara le baradi ba bona,

ba ba etsa mahlabelo a medimo,

medimo ya ditshwantsho ya Kanana:

Naha ya silafala ke madi.

₃₉Ba itshilafatsa

ka mesebetsi eo ya bona,

ka ketso tseo tsa bona

ba kwenehela Morena.

₄₀Morena a halefela setjhaba sa hae,

a nyonya bao e leng lefa la hae.

₄₁A ba neela matsohong a baditjhaba,

ba buswe ke ba ba hloileng.

₄₂Dira tsa bona tsa ba hatella,

ba ba katlasa taolo ya tsona.

₄₃A nna a ba lopolla

ka makgetlokgetlo,

ba mpa ba ikgethela ho mo tella,

ba tetebela bokgopong ba bona.

₄₄Jwale a tadima ho tshwenyeha

ha bona, ha a utlwa sello sa bona.

₄₅A hopola selekane sa hae le bona,

a ba hauhela

ka baka la rato la hae le leholo.

₄₆A etsa hore bohle

ba neng ba ba isitse bothopuweng

ba ba utlwele bohloko.

₄₇Morena Modimo wa rona,

ako re pholose;

o re phuthe, o re ntshe ditjhabeng,

re tle re boke lebitso la hao,

lebitso la hao le halalelang,

re o rorise re le motlotlo.

₄₈Ho bokwe Morena,

Modimo wa Iseraele,

a bokwe kamehla yohle,

e se nang qaleho le qetello.

Setjhaba sohle se ke se re:

“A ho be jwalo!”

Haleluja!