To The Word – Day 166

₂“Na motho

a ka etsetsa Modimo tse molemo,

jwalokaha mohlalefi

a iketsetsa tse molemo?

₃Na ke thabo ho Ya Matla wohle

haeba o lokile?

Kapa o a mo entsha

ha tsela tsa hao di hloka kodi?

₄“Na o tla o kgalemella

ho mo tshaba ha hao,

ka baka la hona a o etsetse qoso?

₅Bokgopo ba hao bo boholo haholo,

dibe tsa hao di hloka moedi!

₆O nkile peeletso ho ngwaneno

a se na molato,

ba hlobotseng bona

wa ba hlokisa le nketlana.

₇Ba nyorilweng

ha o a ka ba nyorolla ka metsi,

ba lapileng

ha o a ka ba ngwathela letho,

₈le hoja o no le matla,

fatshe o le ruile,

batho ba o tlotla,

o phela ho lona.

₉Bahlolohadi ba tlohile ho wena

ba itlhophere,

ha e le kgutsana tsona

wa di robokela.

₁₀Ke kahoo maraba

a o potapotileng kahohle,

tshabo e tsometsang

e o hlokisang boiketlo,

₁₁fifi le o aparetseng,

o sitwang ho bona,

phororo tsa metsi

di phuthumanang hodima hao.

₁₂“Modimo ya mahodimong

a hodimodimo,

o tadimela dinaledi tlase,

o di tadimela tlase

le hoja di le hodimo!

₁₃Empa wena o re:

‘Modimo o tseba eng?

A ka ahlola jwang

hara fifi le lekaalokaalo?

₁₄O hara lesira la maru,

a ke ke a tseba ho bona,

ha a ntsa ralotsa

hopong la lehodimo.’

₁₅“Na o tla hanella tseleng ya kgale,

tseleng e kutlilweng ke ba kgopo?

₁₆Ba tlositswe

nako ya bona e eso fihle,

metheo ya bona

ya hoholwa ke dikgohola;

₁₇bona ba itseng ho Modimo:

‘Re hlokomolohe!

Ya Matla wohle a ka re etsang?’

₁₈Empa ke ka yena

matlo a bona a tletseng menono,

kahoo nna ke hole le keletso

tsa ba kgopo.

₁₉“Ba lokileng

ha ba bona ba a nyakalla,

ba se nang molato

ba a soma, ba re:

₂₀‘Dira tsa rona

di timeleditswe ruri,

tlotlo la tsona

la tjheswa ke malakabe.’

₂₁“Boelana le Modimo,

o tlo be le kgotso,

ka ho etsa jwalo

o tla tlelwa ke tse molemo.

₂₂Amohela thuto

e tswang molomong wa hae,

polelo tsa hae

o di boloke ka pelong ya hao.

₂₃Ha o ka kgutlela ho Ya Matla wohle,

yena o tla o hlohonolofatsa,

ha o fedisa bokgopo

kahara leaho la hao.

₂₄Ha o lahla kgauta ya hao,

o e lahlela hara lerole,

le kgauta e tswang Ofire,

o e lahlela dikgohlong hara mafika,

₂₅Ya Matla wohle

e tla ba yena kgauta ya hao,

e be silefera ya hao e hlwekisitsweng.

₂₆Ya Matla wohle o tla mo thabela,

fahleho sa hao se tadime ho Modimo.

₂₇O tla rapela Modimo,

ebe o a o utlwa,

kano tsa hao

o tsebe ho di phetha.

₂₈Merero yohle ya hao e tla atleha,

sedi le kgantshetse tsela tsa hao;

₂₉hoba Modimo o kokobetsa baikakasi,

baikokobetsi bona a ba pholose.

₃₀Le ya molato

Modimo o a mo pholosa:

O tla pholoswa

ka ho hlweka ha matsoho a hao.”

₂“Le kajeno sello sa ka

se sa le bohloko;

le hoja ke bile ke fehelwa hakaalo,

tsoho la Modimo

le ntse le nkimetse.

₃Hoja ke a tseba

hore na nka mo fumana kae,

ke ne ke tla ema

kapela setulo sa hae,

₄nyewe ya ka ke e rale kapela hae,

ka ho tlala

ke lokodise mabaka a ka.

₅Ke ne ke tla utlwa ha a nkaraba,

ke utlwisise

polelo tsa hae ho nna.

₆Na Modimo a ka ntshobokella

ka bonatla ba hae?

Le ho ka!

a ka sekeha tsebe, a mmamela!

₇Ya lokileng

a ka arabisana le yena moo;

ho Moahlodi wa ka

ke lokollelwe ruri.

₈“Ha ke eya botjhabela

ha ke mo fumane,

ha ke eya bophirima

le teng ha ke mo fumane,

₉ha a le leboya

ha ke mmone,

ha a sebetsa borwa

le teng ha ke mmone.

₁₀Empa Modimo o tseba

metsamao ya ka;

ha a nteka ke tla tswa

ke hlwekile seka kgauta.

₁₁Mehato ya ka

e hodima mehato ya hae,

ke tsamaile tseleng ya hae,

ha ke a e kgeloha.

₁₂Taelo tse tswang molomong wa hae

ha ke a di kgeloha,

ka pelong ya ka

ke bolokile polelo tsa hae.

₁₃“Ha a rerile o rerile,

a ka hanyetswa ke mang?

O iketsetsa tsohle ka ho rata ha hae;

₁₄seo a se rerileng

o se phetha ka nna,

merero e kang ona

e mengata ho yena,

₁₅ka baka leo ke tshaba ho ema

kapele ho yena,

ha ke mo hopola

tswalo le a nkgekgetha.

₁₆Modimo o mphokodisitse,

ke hloka sebete,

Ya Matla wohle

o nkgekgethisa letswalo;

₁₇empa lefifi le ke ke la nkgutsisa,

fifi la bo-nka-ntjana

le mphoufaditseng.”

₁“Na Ya Matla wohle

tsatsi la kahlolo ha a le tsebe?

Ba mo sebeletsang

nako ya lona ba a e tseba?

₂“Ba kgopo ba suthisa

mekolokotwane ya meedi,

ba utswe mehlape,

ba be ba e katle.

₃Tonki ya kgutsana

ba e kgothela pele,

pholo ya mohlolohadi

ba e nkele peeletso.

₄Ba thesela bafumanehi

hore ba suthe tseleng,

mafutsana wohle

a phela ka ho ipata.

₅“Jwaloka tonki e hlaha, lehwatateng,

mafutsana a tsohella mosebetsing,

ho ya sela,

lefeella ke lona

le fepang bana ba wona.

₆A kotula dijo masimong a ba kgopo.

A kgwahlapise morara

rapeng tsa ba kgopo.

₇A robala a le feela

ke ho hloka kaparo,

rame se fella hodima wona

ke ho hlobola.

₈Mafutsana a kolobiswa

ke medupe ya thaba,

a be a maname mafikeng

ke ho hloka lephephe.

₉“Kgutsana e hlothwa letsweleng,

tsweleng la mma yona,

mofutsana o lefa molato

ka lesea la hae.

₁₀Ba tsamaisa mafutsana

a se na le nketlana,

a thotha dihlopha tsa koro

a ntsa lapile,

₁₁a tulela

tholwana tsa mohlwaare matlapeng,

a etsa ole,

a tlhotla veine morareng

a ntse a nyorilwe.

₁₂Medumaelo ya ba shwang

e utlwahala hara motse,

ba tswileng dikotsi

ba llela hore ba thuswe,

empa thapelo tsa bona

Modimo ha a di natse.

₁₃“Ho na le ba bang

ba hloileng lesedi,

ba sa tsebeng tsela tsa lona

le ho tsamaya ka tsona.

₁₄Mmolai o tsoha ha mafube a hlaha,

a bolaye mofumanehi,

a bolaye le mofutsana;

athe bosiu teng

o fetoha leshodu hantle.

₁₅Sehlola se a lebella,

se lebella hore shwalane e tshware,

se re:

‘Ha nka ke ka bonwa ke ope,’

ebe jwale se ikwahela sefahleho.

₁₆Bosiu mashodu a thuakanya matlo,

motsheare teng ebe a a ipata;

lesedi lona ha a kopane le lona.

₁₇Ho wona wohle

fifi le tshwana le motsheare,

matshabeho a lefifi

ho mashodu ke metswalle.

₁₈“Ba jwalo ba ka mahohodi

a lwebang hodima metsi,

masimo a bona a neilwe thohako,

ha ho ya yang

rapeng tsa bona tsa morara.

₁₉Jwalokaha komello le motjheso

di qhibidisa lehlwa,

lebitla le lona

baetsadibe le a ba metsa.

₂₀Popelo e tla ba lebala,

diboko di ba nyabele;

ba ke ke ba hlola ba sa hopolwa,

bokgopo bo tla fela

sa fate se robehile.

₂₁Mosadi wa nyopa ba a mo sotla,

mohlolohadi yena

ba mo hlokele mohau.

₂₂Ka matla a hae

Modimo o lelefatsa bophelo,

o lelefatsa bophelo ba bo-ramonatla,

ba ka tsitsa,

tshepa la ho phela lona ha le yo.

₂₃O a ba sireletsa,

ba be ba rue letshepa,

athe metsamao ya bona

yona o e disitse.

₂₄Ba tuma ka nakwana,

ba be ba nyamele,

ba theolwe dikalaneng,

ba timetswe jwaloka bohle,

ba shwe sa diako tsa koro

ha di kgaolwa.

₂₅“Haeba ho se jwalo,

nka shanofatswa ke mang?

Ke mang ya ka reng

polelo tsa ka ke tsa bosawana?”

₂“Puso le tshabo di tswa ho Modimo,

ke mothei wa kgotso

mahodimong a hae a hodimo.

₃Na mabotho a hae a ka balwa?

Ke ofe ya sa tjhabelweng

ke sedi la hae?

₄Motho a ka lokafatswa jwang

mahlong a Modimo?

Ya tswetsweng ke mosadi

a ka hlweka jwang?

₅Haesita mahlong a hae

kgwedi e se na kganya,

naledi le tsona

di se na bohlweki,

₆motho a ka loka jwang,

yena e le popane,

ya tswetsweng ke motho,

yena e le seboko!”

₂“Wa tla wa thusa

motho a fokola!

Wa tla pholosa letsoho le fokola!

₃O eleditse sethoto

hantle hakaakang!

O bontshitse tsebo

e kgolo hakaakang!

₄O rutilwe ke mang

ho bua polelo tsee?

Polelo tseo o di buang ke tsa mang?

₅“Ba ka mabitleng ba a thothomela,

le tsohle tse tlasa metsi,

tse phelang ho wona.

₆Nqalo ya Bafu

e feela kapela Modimo,

mohohlo wa timelo o ahlame,

ha o a kwahelwa.

₇Modimo o sarolotse leboya

hodima sepakapaka,

a leketlisa lefatshe

hodima bofeelafeelane.

₈O phuthetse metsi

kahara maru a hae;

ha ho leru le phatlolwang

ke boima ba metsi!

₉Kgwedi ha e tolokile o a e fifatsa,

ka maru a hae a e etsetse lesira.

₁₀O radile sedikadikwe,

a se rala hodima lewatle,

a etsa moedi

ho arohanya lesedi le lefifi.

₁₁Tshiya tsa lehodimo

le tsona di a reketla,

di reketla

ke ho tshoha kgalemelo ya hae.

₁₂Ka matla a hae

lewatle a le tsosa maqhubu,

ka bohlale ba hae

a tamukanya Rahaba.

₁₃Ka moya wa hae

a ntlafatsa mahodimo,

ka tsoho la hae

a hlaba noha e lelesela.

₁₄Tsena ke dinyane feela

tsa matla a hae,

tse bolelwang ka yena

ke lehweshehweshe;

boholo ba matla a hae

bo ka utlwisiswa ke mang?”

₂“Ka Modimo ya phelang,

ya nkamohileng toka,

ka Ya Matla wohle,

mohlokofatsi wa moya wa ka;

₃ha feela nna

ke sa ntsane ke phela,

ke ntse ke phefumoloha

moya wa Modimo,

₄molomo wa ka

o ke ke be wa bua bokgopo,

leme la ka

le ke ke be la bolela bohata.

₅Ha nka ke ka dumela hore le nepile,

ke tla be ke yo shwa

ke ntse ke itatola.

₆“Ho loka ha ka

ke boshwa-bo-tshwerwe,

ha ke ntse ke phela

tswalo le ke ke la nkgwebetha.

₇“Dira tsa ka

di ke di tshwane le ba kgopo,

bantwantshi ba ke ba be

jwaloka balotsana.

₈Letshepa la moetsadibe ke lefe,

mohla Modimo

a mo amohang bophelo?

₉Na Modimo a ka mamela,

a mamela sello sa hae,

ha tlokotsi e se mo wetse hodimo?

₁₀Na yena o tla thabela

Ya Matla wohle,

a ipiletse ho Modimo

ka nako tsohle?

₁₁“Ke tla le ruta

seo matla Modimo a leng sona;

merero ya Ya Matla wohle

nke ke be ka e pata.

₁₂Tsena tsohle

le lona ka mahlo le di bone;

ke ka baka lang

ha le ntse le bua mafeelafeelane?

₁₃“Seo Modimo

a se abetseng ya kgopo,

lefa leo Ya Matla wohle

a le abetseng ya sehloho, ke lena:

₁₄Leha a ka atelwa ke bana,

ba tla shwa ka sabole,

tloholo tsa hae

di ke ke tsa anelwa ke dijo;

₁₅masalla a hae

a tla shwa ke lefu la sewa,

bahlolohadi ba hae

ba ke ke ba mo llela.

₁₆Leha a ka bokella silefera

e kaa ka lehlabathe,

bongata ba aparo tsa hae

ba ba kaa ka letsopa,

₁₇tsa etsa pokella,

ya lokileng o tla di apara;

ba se nang molato

silefera ba e arolelane.

₁₈O hahile ntlo e fokola

sa bolepo ba sekgo,

e tshwana le lephephe

la motshosi masimong.

₁₉O robala a ruile

e le kgetlo la ho qetela;

ere ha a phaphama

a tsohe a itlhophere.

₂₀Tsietsi di mo wela hodimo

jwaloka sekgohola,

fefo se mo fefola bosiu

ha ho robetswe.

₂₁Moya wa botjhabela o a mo nka,

o ikele ka yena,

o mo pheulele hole le lapa la hae;

₂₂o puputlele ho yena o se na mohau,

e be lekgerakgara

ha a leka ho o baleha.

₂₃Ba mo opela diatla,

ba be ba mo je tlepane,

ba mo letsetse molodi

ha a tloha lapeng ha hae.”