To The Word – Day 178

₅“Ke o tsebile ke eso o bope

ka popelong ya mmao,

ka ba ka o halaletsa o eso tswalwe,

ka o kgethela

ho ba moporofeta wa ditjhaba.”

“Koduwa e tla hlaha e etswa leboya,

baahi bohle ba naha ena

e ba wele hodimo.

₁₅Ke kgatheng la ho mema ditjhaba,

tjhaba tsohle tsa mebuso,

mebuso e ka leboya,”

ho rialo Morena.

“Kgosi tsa bona

di tla emisa terone tsa tsona,

di di emise

kapela dikgoro tsa Jerusalema;

di tla di emisa

ho potapota marako,

di di emise

metseng yohle ya Juda.

₁₆Tjhaba seo sa ka ke tla se ahlola,

ke se ahlolele bokgopo

ba ho mphuralla,

ba ho etsa mahlabelo,

ho a etsetsa medimo esele,

ho kgumamela medimo

e entsweng ka matsoho a sona.

₁₇“Ka baka leo, wena itlame letheka,

o eme, o bue le tjhaba seo,

o se bolelle tsohle

tseo ke o laelang tsona.

O se ke wa tshaba ha o se bona,

esere ka o tshosa o le kapela sona.

₁₈Bona,

kajeno ke o etsa qhobosheane,

tshiya ya tshepe

le lerako la lethose,

hore o eme senna

kapela naha yohle,

kapela dikgosi le kgosana tsa Juda,

kapela baprista le baahi ba Juda.

₁₉ba tla o tsohela matla,

ba o lwantshe,

empa ho o hlola

ba ke ke be ba o hlola,

hobane ke na le wena

ho o namolela,”

ho rialo Morena.

“ ‘Ke hopola ho nkgomarela ha hao

botjheng ba hao,

kamoo o nthatileng kateng

o sa le monyaduwa,

wa ntshala morao lehwatateng,

naheng eo ho sa jalwang,

ho sa jalwang letho ho yona.

₃Ho Morena, Iseraele e ne halalela,

e le dilopotsiya tsa kotulo ya hae;

bohle ba di jang ba ne ba le molato,

bobe bo ba wela hodimo,’ ”

ho rialo Morena.

“Baholoholo ba lona

ba bone kgopo ba ka e le bofe,

ha ba ile ba mphuralla,

ba mathelaka mafeela,

mme jwale ba fetohile mafeela?

₆Ke hobaneng

ba sa kang ba botsa, ba re:

‘O kae Morena ya re nyolotseng

naheng ya Egepeta,

yena ya ila re fetisa hara lehwatata,

naheng ya mahlabathe

le ya madumela;

naha e sekaka,

e leng naha ya matshabeho,

eo ho seng ya kila tsamaya ho yona,

eo motho a eso phele ho yona?’

₇Ke le tlisitse naheng e manoni,

hore le je tholwana tsa yona

le menate ya yona;

empa ha le fihla le ile la e silafatsa,

lefa la ka la le fetola manyala.

₈Baprista ha ba a ka ba re:

‘O kae Morena?’

Ditsebi tsa Molao

ha di a hlola di sa ntseba,

babusi ba setjhaba

le bona ba mphetohela;

baporofeta ba porofeta

ka lebitso la Baale,

ba latela medimo

e ke ke ya ba thusa.”

₉“Kahoo ke tla le qosa,”

ho rialo Morena,

“ke be ke qose

le tloholwana tsa lona.

₁₀Eyang hlekehlekeng tsa Kitime

le ke le bone,

le romele maqosa Kedare,

le hlahlobe hantle,

le bone na ho tjena

ho kile ha eba teng.

₁₁Na tjhaba se teng

se kileng sa fetola medimo ya sona,

le hoja medimo eo

e ne le ya bohata?

Empa tjhaba sa ka se anantse nna,

nna Tlotla ya sona,

sa nkananya ka medimo

e se na thuso.

₁₂Lona mahodimo tsotang,

le makalle sena,

le thothomele, le tshabe haholo,”

ho rialo Morena.

₁₃“Tjhaba sa ka

se entse dibe di le pedi:

Se furaletse nna,

diba sa metsi a phoroselang,

sa itjhekela diqanthana

tseo e leng tsa sona,

qanthana tseo metsi

a ke keng a ema ka ho tsona.”

₁₄“Na Iseraele ke mohlanka

ya tswetsweng e le lekgoba?

Ho ya kang

ha a sa fetohile lelobelo?

₁₅Tawana di a puruma,

di a mo kgobolaka,

naha ya hae

di e fetotse nanaola,

metse ya hae

ke masupi, ha e na baahi.

₁₆Banna ba Nofe le ba Tahepanehese,

le bona ba se ba mmeotse lekorana.

₁₇Na hase wena ya ipileditseng hoo

ka ho furalla Morena,

Modimo wa hao,

nakong ya ha a ne

a o tsamaisa tseleng?

₁₈O ratelang ho ya Egepeta

ho ya nwa metsi a Shihore?

O ratelang ho ya Asiria

ho ya nwa metsi a Noka?

₁₉Bokgopo ba hao

ke bona bo tla o otla,

ho mphuralla ha hao

hona ho o kgaleme.

Imamele ke hona o ele hloko

kamoo o babelwang

ke bokgopo ba hao,

ha o furalla Morena,

Modimo wa hao,

o bile o so sa ntshabe le ho ntshaba,”

ho rialo Morena, Modimo wa

mabotho.

₂₀“Joko ya hao ke kgale o no e robe,

marapo a yona wona wa a kgaola,

wa re:

‘ha ke sa tla ba lekgoba la hao!’

Yaba o hlwella hodima maralla,

tlasa difate tse talana wa lelera,

wa paqama fatshe ho etsa bootswa.

₂₁Ke ne ke o hlomme

sa morara o motlemotle,

sa morara o jetsweng

ka peo e butswitseng;

jwale o ile wa mphuralla jwang,

wa fetoha hlahlaane

ya morara wa naha?

₂₂Leha o ka ba itlhatswa ka sota,

wa itlhatswa ka sesepa se le sengata,

ke tla nne ke bone letheba

la molato wa hao,”

ho rialo Morena Modimo.

₂₃“O ka bua jwang, wa re:

‘Ha ke a silafala;

ha ke a ka ka petlapetla

kamora bo-Baale?’

Hlahloba boitshwaro ba hao

ba ka kgohlong,

o nahane seo o ileng wa se etsa!

O tshwana le kamele e palesitse,

e parakanya,

e kgaohanya tsela tsa yona;

₂₄o ka tonki e hlaha,

e tlwaetseng lehwatata,

e fofonelang moya

ha e fihletswe ke takatso;

ha e palesitse

e ka thibelwa ke mang?

Poho tse e batlang

di ke ke tsa ikgathatsa,

di tla e fumana

ka kgwedi ya ho tlolelwa.

₂₅Kgaotsa ho tsamaya,

oto le se fellwe ke meqathatso,

mmetso wa hao

o se omelle ke lenyora.

Empa wena o itse:

‘Tjhe, ha ho na thuso!

Nna ke ithatela medimo,

medimo ya baditjhaba,

mme ke tlameha hore

ke e sale morao!’ ”

₂₆“Jwalokaha leshodu

le hlajwa ke dihlong,

le hlajwa ke dihlong ha le tshwerwe,

Baiseraele le bona

ba hlajwe ke dihlong jwalo,

bona le dikgosi le mahosana a bona,

le baprista le baporofeta ba bona.

₂₇Ba re ho sefate:

‘Wena o ntata rona!’

Ho lefika ba re:

‘Rona re tswetswe ke wena!’

Ba mphuraletse,

fahleho tsa bona ha di ntadime;

athe ka nako ya ditsietsi ba re:

‘Ako tle, o re pholose!’

₂₈“E kae jwale medimo ya lona,

medimo ya maiketsetso?

A e ke e tle

haeba e tseba ho le pholosa

nakong ena ya lona ya ditsietsi!

Palo ya metse ya hao, wena Juda,

e lekana le palo ya medimo ya hao.

₂₉“Ke ka baka lang

ha le phea kgang le nna?

Kaofela ha lona

le ba mphetohetseng,”

ho rialo Morena.

₃₀“Ke otlile bara ba lona,

empa thuso ha e yo;

kgalemelo ya ka

ba hanne ho e mamela;

sabole tsa lona

di jele baporofeta ba lona,

tsa ba ja sa tau e harolakang.

₃₁“Lona ba moloko ona,

mamelang lentswe la Morena:

Na ke bile lehwatata ho Baiseraele,

ka ka naha e lefifi ho bona?

Ke ka baka lang

ha tjhaba sa ka se re:

‘Rona re tla iketsetsa borata,

ha re ka ke ra kgutlela ho wena?’

₃₂Na morwetsana a ka lebala

mekgabiso ya hae,

monyaduwa a lebala aparo tsa hae?

Empa tjhaba sa ka sona se ntebetse,

se ntebetse ka ditshiu di se na palo!

₃₃O hlalefetse tsela tsa ho batla lerato,

o rutile le diotswa tsela tseo tsa hao.

₃₄Aparong tsa hao madi a fumanwe,

madi a bafumanehi

ba se nang molato,

e seng madi a mashodu,

dithuamatlo.

₃₅Empa wena o re:

‘Ha ke na molato!

Ruri kgalefo ya Morena

e tla mphapoha!’

Bona mona, nna ke tla o ahlola,

hobane o re wena ha o a etsa sebe.

₃₆O lelera hakaale ka baka lang,

o tsamaya o kgeloha tsela tsa hao?

O tla hlabiswa dihlong ke Egepeta,

jwalokaha Asiria

e o hlabisitse dihlong.

₃₇Le moo Egepeta, o tla kgutla,

o kgutle teng

matsoho o a beile hloohong,

hoba Morena o furaletse

bao o ba tshepang,

mme ba ke ke

ba o fumantsha katleho.”

“Ha monna a hlala mosadi wa hae,

mosadi a mo tlohela,

a nyalwa ke monna osele,

na monna a ka kgutlela ho yena?

Naha e ka silafala kahohle!

O bile seotswa

sa banna ba le bangata,

na o ka boela

wa kgutlela ho nna hape?”

ho rialo Morena.

₂“Phahamisa mahlo

o tadime maralleng;

ke kae moo o sa kang

wa etsa bootswa teng?

O ila emela banna kathoko ho tsela,

wa ba lalla sa Moarabia lehwatateng.

O silafaditse naha ka bootswa ba hao,

wa e silafatsa le ka bokgopo ba hao.

₃Kahoo mafafatsane a ile a thibelwa,

pula ya hwetla le yona

ya se ke ya na;

empa wa tiisa phatla jwaloka seotswa,

wa ngangella,

dihlong tsa se ke tsa o hlaba.

₄Ha ke re o qeta ho ipiletsa,

o ipiletsa ho nna, o re:

‘Ntate, motswalle wa ka

ho tloha botjheng ba ka,

₅na o tla nkgalefela kamehla,

disuwa tsa hao e be tsa mehla yohle?’

Dintho tsena tsohle o di buile,

wa etsa bokgopo bohle

ka boithatelo ba hao.”

“Kgutla, wena Iseraele

wa mokwenehi,”

ho rialo Morena.

“Ha nka ke ka hlola

ke o sosobanyetsa sefahleho,

hobane ke mohau,”

ho rialo Morena.

“Ha ke na ho o halefela

kamehla yohle.

₁₃Dumela feela molato wa hao,

Hore o fetohetse Morena,

Modimo wa hao,

rato la hao,

wa le hafela medimo esele,

wa le hafa

o le tlasa difate di le talana;

esita le nna ha o a ntlhompha,”

ho rialo Morena.

“Ke ne ke tla thabela

ho le etsa bana ba ka,

ke le abele naha e kgahlehang,

lefa le letle

ho feta mafa a tjhaba tsohle.

Ka ba ka re:

Lona le tla mpitsa Ntate,

mme le ke ke la kgaotsa ho ntatela.

₂₀Empa jwaloka mosadi

ya hlokang botshepehi,

a bo hloke a ba a tlohele monna,

le lona ba ntlo ya Iseraele

le ntlohetse

le ntlhoketse botshepehi.”

ho rialo Morena.

₂₁Lentswe le llang

le utlwahetse hodima maralla,

e le dithapelo tsa bana ba Iseraele,

hoba ba kgelohile ditsela tsa bona,

ba lebetse Morena,

Modimo wa bona.

₂₂“Kgutlang lona bana ba bakwenehi!

Bokwenehi boo ba lona

ke tla bo phekola!”

“Bona, ke rona bana,

re tla ho wena,

hobane o Morena, Modimo wa rona.

₂₃Ho rapella hodima maralla

ha ho thuse letho,

lereberebe le hodima dithaba

ha le thuse letho;

ruri Morena, Modimo wa rona,

ke yena Mopholosi wa Baiseraele.

₂₄Ho tloha botjheng ba rona

bo-Baale ba jele,

ba eja tse sebeditsweng

ka thata ke bo-ntata rona:

Mehlape ya dikgutshwane

le mehlape ya dikgomo,

bara ba bona le baradi ba bona.

₂₅A re paqameng fatshe

ka dihlong tsa rona,

sekgobo sa rona se re aparele,

hoba re sitetswe Morena,

Modimo wa rona,

rona mmoho le bo-ntata rona;

ho tloha botjheng ba rona

ho fihlela kajeno,

ha re a ka ra mamela Morena,

Modimo wa rona.”

“Ha o rata ho kgutla,

wena Iseraele,

kgutlela ho nna.

Ha o ka tlosa manyala a hao

mahlong a ka,

wa se ke wa hlola o kgeloha hape;

₂ha o ka hlapanya

ka nna Morena ya phelang,

wa hlapanya ka nnete

le ka botshepehi, le ka ho loka,

ditjhaba tsohle

ke tla di hlohonolofatsa,

ditjhaba tsohle di tla ntlotlisa.”

“Ikgatheleng dithite tsa lona,

le se ke la jala hara meutlwa;

₄bolokang selekane sa lona le nna,

le ineele nna ka pelo tsa lona tsohle,

lona banna ba Juda

le baahi ba Jerusalema;

esere kgalefo ya ka

ya laima sa malakabe,

ya tjhesa ho se ya ka e timang,

ka baka la bokgopo ba ketso tsa lona.”

₅“Bolelang

kahara naha yohle ya Juda,

le phatlalletse le Jerusalema,

le re: ‘Letsang lenaka

kahara naha yohle!’

Hlabang mokgosi,

le phuthehe, le re:

‘Kgobokanang, le thee theko!

Tshabelang metseng,

metseng e sireleditsweng!’

₆Phahamisang mokgele,

le lebe Sione!

Potlakelang teng, le se ka la dieha!

Ke tlisa koduwa e hlaha leboya,

koduwa eo e tla ba nanaola.”

₇Tau e tswile selaong sa yona,

motimetsi wa ditjhaba o futuhile;

o tswile hae ho senya naha ya hao,

metse e be masupi, e hloke baahi.

₈Apara tse mahwashe,

o lle sa mmokotsane,

kgalefo e tlokomang ya Morena

ha e a re tlohela.

₉“Mohla tsatsi leo,”

ho rialo Morena,

“pelo ya kgosi le tsa mahosana

di tla nyahama,

baprista ba tla tshoha,

baporofeta ba tsielehe.”

“Moya o omeletseng o tla hlaha,

o hlahe tutudung tsa lehlabathe,

o fokele tjhabeng sa ka,

o etswa lehwatateng;

ha e yo ba wa ho olosa,

ha e yo ba wa ho fefera,

₁₂e tla ba lehodiotswana,

hobane o tswa ho nna,

ke tla be ke ba phatlalletse

le dikahlolo tsa bona.”

₁₃Sera se subuhlellana

sa maru a phethesela,

kariki tsa sona tsa ntwa

di tla sa setsokotsane,

belo la pere tsa sona

le feta la ntsu.

A rona bale! Re timetse ruri!

₁₄Hlatswa bokgopo pelong ya hao,

o bo hlatswe, o pholohe Jerusalema;

pelo ya hao e tla kwetla mehopolo,

e kwetle mehopolo e kgopo

ho fihlela neng?

₁₅Mokgosi o utlwahala o etswa Dane,

o hlajwa thabeng ya Efraime

ho bolela tlokotsi!

₁₆“Tsena o di tsebise ditjhaba tsohle,

o phatlalletse le Jerusalema:

‘Mara a thibellang

a tswa naheng e hole,

a futuhela metse ya Juda

ka mehoo ya ntwa,

₁₇a e teela hare

sa banna ba lebetse tshimo,

hobane e mphetohetse,’ ”

ho rialo Morena.

₁₈“Boitshwaro ba hao le diketso tsa hao

ke tsona tse tlisitseng tsena,

tsa di tlisa ho wena;

bona ke bona bokgopo ba hao.

Bona kamoo bo babang kateng!

Kamoo bo o kenang pelong kateng!”

₁₉“Ke longwa ke mala!

Ke longwa ke mala!

Botebo ba pelo ya ka

bo tletse mahlaba!

Pelo ya ka e uba kahare ho nna;

nke ke ka kgutsa,

hobane ke utlwile

modumo wa lenaka

le mokgosi wa ntwa.

₂₀Koduwa di fihla ka ho latellana,

hobane fatshe lohle le senyehile;

hanghang tente tsa ka

di a senyeha,

masira a tsona

a tabohe ka ho panya ha ntshi.

₂₁Ke tla bona mokgele

ho fihlela neng,

ke utlwe modumo wa lenaka

ho fihlela neng?

₂₂“Tjhaba sa ka se thotofetse,

ha se sa ntseba,

ke tseketseke tsa bana,

ha se na kutlwisiso;

ho etsa bokgopo se ho hlalefetse,

ho etsa botle hona ha se ho tsebe.”

₂₃Ka tadima lefatshe, mme ka le bona

le se na sebopeho, le se na letho;

le mahodimo ha ke a tadima,

ka fumana le wona a se na leredi.

₂₄Ka tadima dithaba,

ka bona di thothomela,

maralla wohle le wona a sisinyeha.

₂₅Ka tadima hape,

ka bona ho se na motho,

nonyana tsohle tsa lehodimo

di balehile.

₂₆Ka boela ka tadima,

ka bona masimo e le mehola,

metse yohle ya moo

e fetohile masupi,

e heleditswe ke Morena

ka kgalefo e tlokomang.

“Lefatshe lohle le tla senyeha,

empa ha ke na ho le timeletsa ruri.

₂₈Kahoo lefatshe le tla ba le bofifi,

mahodimo a hodimo le wona a fifale,

hobane ke boletse, ke se ke rerile,

nke ke ka fetoha kapa ka tjhetjha.”

₂₉Ha rata la bapalami

le ba diqha le utlwahala,

baahi ba metse yohle ba tla baleha;

ba tla kena merung,

ba hlwelle hodima mafika;

metse yohle e tla furallwa

ke baahi ba yona,

ha ho le ya mong

ya tla phela ho yona.

₃₀O tla etsang ha o so faladitswe?

Leha o ka apara

seaparo se sefubedu,

leha o ka tlatlapela

mekgabiso ya kgauta,

fahleho sa hao

wa se tlotsa ka kgokgotsi,

ha o ka ke wa hlola o sa rateha,

baratuwa ba hao ba tla o nyedisa,

ba batle ho timetsa bophelo ba hao.

₃₁Ke utlwile sello

se kang sa mosadi a pepa,

modumaelo o kang wa mosadi,

mosadi wa letsibolana;

sello sa moradi wa Sione

ha a fehelwa, ha a itelela,

a phakalatsa matsoho, a re:

“Ka tla ka le bona!

Bophelo ba ka

bo matsohong a babolai!”

₁“Nyolosang, le theose diterata,

terata tsa Jerusalema;

le qamake kahohle le hlokomele,

le batlisise le mabaleng a motse;

ha le ka fumana motho

leha a le mong,

motho ya etsang toka,

ya batlang nnete,

motse wa Jerusalema

ke tla o tshwarela.

₂Leha ba hlapanya, ba re:

‘Ka Morena ya phelang,’

nnete ke hore

ba hlapanya ka thetso.”

₃Morena, ha ke re wena

o batla nnete?

O ba otlile,

ha ba a utlwa bohloko;

o ba kgahlotse,

ha ba a boela tseleng,

ba thatafaditse

fahleho tsa bona sa lejwe,

ba hanne ho bakela dibe tsa bona.

₄Yaba nna ke re:

“Bana ke bathwana

ba hlokang tsebo,

bao tsela ya Modimo

ba sa e tsebeng,

ba sa tsebeng taelo

tsa Modimo wa bona.

₅Ke tla ya ho ba baholo,

ke buisane le bona;

tsela ya Morena bona ba a e tseba,

ba tseba le taelo

tsa Modimo wa bona.”

Empa kaofela ha bona

joko ba e robile,

marapo le wona ba a kgaotse.

₆Kahoo tau tsa meru

di tla ba bolaya,

phiri tsa lehwatata di ba harolake,

mangau a solle hara metse ya bona.

Bohle ba tswelang kantle

ba tla tsekollwa,

hobane dibe tsa bona di ngatangata,

bokwenehi ba bona bo feta tekanyo.

₇“Nka o tshwarela tsee

ka baka lang?

Bana ba hao ba mphuraletse,

ba hlapanya ka medimo

eo e seng medimo.

Hoba ke ba fepe,

ba je sa mpanaphatloha,

ba ile ba ikabela ho etsa bofebe,

ba hlolokana matlung a diotswa.

₈Ba ka poho tsa dipere

tse fepehileng,

tse batlang ho thokola,

monna ka mong

o lakatsa mosadi wa e mong.

₉Na ha ke lokele

ho ba otlela tsee?”

ho rialo Morena.

“Na tjhaba se tjee ha se lokelwe

ke boiphetetso ba ka?

₁₀“Kenang hara merara ya sona

le e robake,

feela le se ke la e roba

kaofela ha yona;

makala a yona le a kgaole,

hobane makala ao

hase makala a Morena.

₁₁Ba ntlo ya Iseraele

le ba ntlo ya Juda,

ba ntlhoketse botshepehi haholo,”

ho rialo Morena.

“Ha a ka ke a re etsa letho;

bobe bo ke ke ba re wela hodimo,

ntwa le tlala ha re sa tla di bona!

₁₃Baporofeta bona ke moya feela,

ha ba na molaetsa

o tswang ho Morena;

a ba ke ba timele ke hona!”

“Kaha setjhaba

se buile mantswe ana,

bona, polelo tsa ka

tse tswang molomong wa hao,

ke tla di etsa mollo,

tjhaba sena e be patsi

e tjheswang ke wona.

₁₅Wena ntlo ya Iseraele,”

ho rialo Morena,

“ke tlisa tjhaba se tswang hole

ho o futuhela,

tjhaba sa kgale, sa boholoholo,

tjhaba seo puo ya sona

o sa e tsebeng,

tjhaba seo leme le sona

o sa le tsebeng.

₁₆Dihlajwa tsa sona

di ka bitla le ahlameng,

kaofela ke tjhaba sa dinatla,

natla tsa bahlabani.

₁₇Se tla ja dijalo le dijo tsa hao,

se je bara le baradi ba hao;

se je mehlape ya dikgutshwane

le ya dikgomo,

se je morara le feiye ya hao.

Metse e hahetsweng marako,

eo o e tshepang,

e tla timetswa ka sabole,

e timetswe ke sera seo.

₂₀“Bolelang tsena

ho ba ntlo ya Jakobo,

le di phatlalletse

ba ntlo ya Juda, le re:

₂₁Mamelang tsena,

lona tjhaba se sethoto,

lona tjhaba se se nang kutlwisiso,

tjhaba se nang le mahlo

empa se sa bone,

tjhaba se nang le ditsebe

empa se sa utlwe:

₂₂Na ha le ntshabe?”

ho rialo Morena.

“Ha le thothomele keng

ha le le kapele ho nna?

Nna ya etseditseng lewatle moedi,

ka o etsa ka lehlabathe,

moedi o sa tloheng,

oo le ke keng la o tlola?

Maqhubu a ka tsudubutlana,

a ka ke be a o tlosa!

A ka kwasa a ratile,

a ke ke be a o tlola!

₂₃Empa tjhaba sena se manganga,

se fetohaka feela;

se se se kgelohile,

mme jwale se iketse.

₂₄Ha se sa bua le ka dipelo, sa re:

‘A re tshabeng Morena,

Modimo wa rona,

ya re nesetsang dipula tsa hwetla,

le mafafatsane a selemo

ka nako ya teng;

ya sa keng a lebala

ho re tlisetsa

dinako tse sa fetoheng,

nako tsa ho kotula.’

₂₅Ditshito tsa lona

di thibetse tsena,

dibe tsa lona

tsa le amoha melemo ena.

₂₆“Batho ba kgopo ba teng

tjhabeng sa ka,

ba lallang sa batshosi ba dinonyana,

sa ba tjhehang difi

hore ba kgate batho.

₂₇Jwalokaha serobe

se ye se tlale dinonyana,

matlo a bona le wona

a tletse thetso,

kahoo ba a matlafala,

leruo la bona le ate.

₂₈Ba a rotoloha,

ba be moropotsana,

ketso tse kgopo tsa bona

ke tse se nang moedi;

ha ba ahlole dinyewe ka toka,

ha ba buelle dikgutsana dinyeweng,

ha ba lwanele tokelo tsa mafutsana.

₂₉Na ha ke lokele

ho ba otlela tsee?”

ho rialo Morena.

“Na tjhaba se tjee ha se lokelwe

ke boiphetetso ba ka?

₃₀“Ntho e tshabehang,

e nyonyehang haholo,

e etsahetse kahara naha ena:

₃₁Baporofeta ba porofeta leshano,

baprista ba kgema le baporofeta,

tjhaba sa ka se rata

ha taba di eme jwalo.

Le tla etsang

ha tsee di fihla qetellong?”

₁“Bana ba Benjamine, balehang,

le tswe Jerusalema!

Letsang lenaka

le le motseng wa Tekowa!

Hlabang mokgosi

ka kganare ya mollo,

le o hlabe hodima Bete-Kereme!

Koduwa le timelo e kgolo

di hlaha leboya.

₂Ke tla timetsa moradi wa Sione,

yena e motle,

ya bokotswang haholo.

₃Badisa ba tla mo futuhela

ka mehlape ya bona,

ba hlome tente tsa bona

ho mo potapota,

modisa ka mong

a fudise kgulong la hae.”

₄“Ba tla re:

‘Itokisetseng ho mo futuhela!

Emang, re futuheng

ha tadi e anyesa!

Re madimabe hakaakang!

Tsatsi le se le sekame!

Meriti ya mantsiboya

e hlahlamela dithaba!

₅Emang ke hona,

re futuheng bosiu,

qhobosheane tsa hae

re di thuakanye!’ ”

“Remang difate, le hahe metero,

le etsetse Jerusalema thibella.

Ona motse o lokelwa ke kotlo,

kahare ho wona ho tletse kgatello.

₇Jwalokaha sediba se kopotsa metsi,

le motse ona

o kopotsa bokgopo ho wona;

mahahapa le timelo

di utlwahala hara wona,

kamehla ke bona bohloko ba wona

le maqeba a wona.

₈Itlhokomele ke hona,

wena Jerusalema,

esere lerato leo

ke o ratang ka lona la mphella,

ka o fetola nanaola,

naha e hlokang baahi.”

“Tjhaba sa Iseraele

se tla fediswa ho hang,

se tshwane le tshimo ya morara

e kgwahlapisitswe.

₁₀“Nka buisana le mang

ka mo eletsa?

Ke mang ya tla ke a mmamele?

Tsebe tsa bona ke tsa leshoma,

kahoo ha ba ka ke ba utlwa.

Ntswe la Morena ba a le nyedisa,

thabo ha ba e fumane ho lona.

₁₁Le nna ke bipeditswe

ke kgalefo ya Morena,

ke se ke kgathetse

ke ho e thibela.

“E hlatsetse hodima bana,

bana bana ba diterateng,

hodima bahlankana,

bahlankana bana ba kgobokaneng;

monna le mosadi

ba tla thoptjwa bobedi,

ho thopuwe raputswe

le ya seng a kgokgoba.

₁₂Matlo a bona a tla abelwa basele,

ho ajwe masimo,

le basadi ba bona ka ho tshwana,

ha ke otlollela tsoho la ka

ho baahi ba naha ena,”

ho rialo Morena.

₁₃“Ho tloha ho e monyenyane

ho isa ho e moholo,

bohle ba labalabela

ho fumana qhoqha;

baporofeta le baprista

ka ho tshwana,

kaofela ha bona

ba phela ka bolotsana.

₁₄Maqeba a tjhaba sa ka ba a a oka

jwalokaha eka ba oka mengwapo.

‘Kgotso! Kgotso!’ ba rialo ho batho,

le hoja ba tseba

hore kgotso eo ha e yo.

₁₅Na ba ke ba be dihlong

ha ba entse manyala?

Le ho ka!

Ho hang ho bona dihlong ha di yo!

Le ho pudufallwa ha ba pudufallwe;

kahoo ba tla wela hara ba weleng,

mohla ke ba otlang ba tla timela,”

ho rialo Morena.

“Emang mateanong a ditsela

le qamake, le botse:

‘Tsela ya kgale, e lokileng, e kae?’

Tsamayang ka yona,

mme le tla fumana phomolo.

Empa lona la re:

‘Ha re ka ke ra e tsamaya!’

₁₇Yaba ke le kgethela balebedi,

ka re: ‘Mamelang modumo

wa lenaka ha le lla!’

Empa lona la re:

‘Ha re ka ke ra o mamela!’

₁₈“Ka baka leo,

mamelang lona ditjhaba!

Lona kaofela bonang

se tla hlahela tjhaba sa ka!

₁₉Wena lefatshe mamela!

Tjhaba sena ke se tlisetsa koduwa,

e leng tholwana ya merero ya sona,

hoba ha se a mamela mantswe a ka,

le molao wa ka se o lahlile.

₂₀Mokubetso o tswang Sheba

o ntlisetsa molemo ofe?

Wa ntshwe e tswang naheng tse hole

wona ke ofe?

Nyehelo tsa lona tsa setjheso

ha di amohelehe,

le mahlabelo a lona ha a nthabise.”

“Ke tla hloma dikgopi

tseleng ya tjhaba sena,

di tla kgopa bo-ntata

le bara ka ho tshwana,

metswalle le ba ahelaneng le yona

ba tla timela.”

“Bonang! Tjhaba se tswang

naheng e ka leboya se a tla;

tjhaba se matla

se tswa pheletsong tsa lefatshe.

₂₃Se hlometse ka diqha

sa hlomela le ka marumo

se sehloho, se bile se hloka mohau;

mantswe a sona

a hwasa sa lewatle le befile;

se palame dipere,

se theile theko ya ntwa,

se futuhela wena Moradi wa Sione.”

“Botumo ba tjhaba seo

re se re bo utlwile,

matsoho a rona

a lepeletse ke ho fokola;

ditlokotsi le tsona di se di re apere,

bohloko bo tshwana le ba mosadi,

mosadi a kena tlung.

₂₅Se tsweleng kantle

la tsamaya hara naha,

le ditseleng

le se ke la tsamaya teng,

hobane sera

se hlometse ka disabole,

tshabo le yona e fumanwa kahohle.”

₂₆“Lona tjhaba sa ka,

aparang tse mahwashe,

le be le ipitike hara molora;

le lle se bohloko sa mmokotsane,

le lle jwalokaha eka

le llela mora ya mong,

hoba motimetsi o tla futuha,

a futuhe ka ho tsometsa.”

₂₇“Ke o entse mohlahlobi

wa tjhaba sena sa ka,

hore o tsebe tsela tsa sona,

o di hlahlobe.

₂₈Ke tjhaba sa bakwenehi,

tjhaba se manganga,

se tsamayang

ka ho hafotsaka bohata;

ke tjhaba se tshwanang

le lethose le tshepe,

kaofela ha sona

ke tjhaba sa balotsana.

₂₉Mofutho o futha haholo,

loto e fella hara mollo;

mohlwekisi o sebeletsa lelea:

Ba kgopo ha ba ke ba tshekeha.

₃₀Ba tla bitswa silefera e lahlilweng,

kahobane Morena o ba lahlile.”