To The Word – Day 23

₁Ka masela a maputswa, le a perese, le a mafubedu, ba loha diaparo tsa ho sebeletsa ka Sehalalelong. Ba etsetsa Arone diaparo tse halalelang, jwalokaha Modimo a ne a laetse Moshe.

₂Ba etsa setipe ka lesela le nang le mmala wa kgauta, le ka le leputswa, le le perese, le le lefubedu, le le entsweng ka lene, le loehileng. ₃Ba etsa masenke a kgauta, ba a seha maqhwele, ba a rokella pakeng tsa lesela le leputswa, le le perese, le le lefubedu, le le entsweng ka lene; ya eba mosebetsi wa setsebi. ₄Setipe sena ba se etsetsa masela a mabedi a rokeletsweng mahetleng, moo dintlha tse pedi tsa sona di kopanang teng. ₅Leqhama la setipe le ne le entswe ka mokgwa o tshwanang le sona: ka lesela le nang le mmala wa kgauta, le ka le leputswa, le le perese, le le lefubedu, le le entsweng ka lene, le loehileng, jwalokaha Morena a ne a laetse Moshe.

₆Ba kutletsa majwe a bohlokwa a kareneleane, ba a kenya dishweshweng tsa kgauta, ba a ngola mabitso a bara ba Iseraele, jwalokaha ho etswa setempe sa bopaki. ₇Ba a rokella hodima masela a setipe a mahetleng. Majwe ao e ne e le kgopotso ya bara ba Iseraele, jwalokaha Morena a ne a laetse Moshe.

₈Ba etsa mokgabiso wa sefuba; wa etswa ke setsebi, jwaloka setipe; wa etswa ka lesela le nang le mmala wa kgauta, le ka le leputswa, le le perese, le le lefubedu, le le entsweng ka lene, le loehileng. ₉Mokgabiso ona wa sefuba o ne o ena le mahlakore a mane, a menahantsweng habedi, a bolelele ba seatla, le bophara ba seatla. ₁₀Ba rokella mela e mene ya majwe a bohlokwa. Moleng wa pele e ne e le lejwe la rubi, le la topase, le la karanete. ₁₁Moleng wa bobedi e ne e le lejwe la emeraleda, le la safire, le la daemane. ₁₂Moleng wa boraro e ne e le lejwe la turukose, le la akate, le la ametise. ₁₃Moleng wa bone e ne e le lejwe la berile, le la kareneleane, le la jasepere. Ba kenya majwe ao dishweshweng tseo tsa kgauta. ₁₄Majwe ana a ne a le leshome le metso e mmedi, ho ya ka mabitso a bara ba Iseraele. Lejwe ka leng le ne le ngotswe lebitso la o mong wa merabe e leshome le metso e mmedi ya bara ba Iseraele, jwalokaha ho ngolwa setempe sa bopaki.

₁₅Hodima mokgabiso wa sefuba ba ne ba entse diketane tse lohilweng jwaloka thapo, e le mehala e entsweng ka kgauta e hlwekileng. ₁₆Ba etsa dishweshwe tse pedi tsa kgauta, le mefitshane e mmedi ya kgauta, ba hokela mafitshane e mmedi eo dintlheng tse pedi tsa mokgabiso wa sefuba. ₁₇Ba hokela mehala eo e mmedi ya kgauta mefitshaneng e mmedi, e dintlheng tsa mokgabiso wa sefuba. ₁₈Dintlha tse pedi tsa mehala ba di hokela dishweshwe tseo tse pedi, ba di tlamella maseleng a setipe a mahetleng, kapele ho setipe. ₁₉Ba etsa mefitshane e meng e mmedi ya kgauta, ba e hokela dintlheng tse pedi, tse katlase, tsa mokgabiso wa sefuba o tobaneng le setipe. ₂₀Ba boela ba etsa mefitshane e mmedi ya kgauta, ba e hokela ho tloha katlase ho mehala e mmedi ya setipe e mahetleng, kapele ho moo mehala eo e kopanang le setipe teng, kahodima leqhama la setipe. ₂₁Ba tlama mefitshane ya mokgabiso wa sefuba ka mohala o moputswa, ba o tlamella mefitshaneng ya setipe, hore mokgabiso wa sefuba o tle o dule hodima leqhama, o se ke wa lokoloha setipeng, jwalokaha Morena a ne a laetse Moshe.

₂₂Ba etsa seaparo se aparwang tlasa setipe, se entsweng ke selohi, ka lesela le leputswa feela. ₂₃Lesoba la ho se kgetshemetsa hloohong le ne le le hare ho sona, jwaloka la molala wa baki ya mohlabani. Ho potoloha lesoba leo ho ne ho entswe lemeno le le phethang, hore lesoba le se ke la taboha. ₂₄Lemenong la seaparo ba etsa dikgarenate ka lesela le leputswa, le le perese, le le lefubedu, le ka le entsweng ka lene, le loehileng. ₂₅Ba etsa mangenengene a kgauta e hlwekileng, ba hokella mangenengene ao pakeng tsa dikgarenate, hodima lemeno la seaparo, ho potoloha; ₂₆ke hore ho entswe lengenengene, ha nto etswa kgarenate, ho potoloha lemeno la seaparo sa ho sebeletsa, jwalokaha Morena a ne a laetse Moshe.

₂₇Ba etsetsa Arone le bara ba hae diaparo tse fihlang maotong ka lesela la lene, le loehileng; ₂₈le katiba ka lesela le jwalo, le dituku tsa bokgabane ka lesela le jwalo, le marikgwe ka lesela le jwalo, le loehileng. ₂₉Ba etsa le leqhama ka lesela la lene, le loehileng, le ka lesela le leputswa, le le perese, le le lefubedu, le entsweng ke sehomi, jwalokaha Morena a ne a laetse Moshe.

₃₀Ba etsa moqhaka o halalelang ka kgauta e hlwekileng, mme hodima wona ba ngola jwalokaha ho ngolwa setempe sa bopaki, ba re: Mohalaledi wa Morena. ₃₁Hodima wona ba tlamella mohala o moputswa, ba rokella moqhaka phatleng ya katiba, jwalokaha Morena a ne a laetse Moshe.

₃₂Yaba mosebetsi wa Leaho la Tente ya Morena, wa phethwa. Bana ba Iseraele ba ne ba entse tsohle ho ya kamoo Morena a neng a laetse kateng. ₃₃Ba tlisetsa Moshe Leaho, le masela a le kwahelang, le tsohle tsa lona, le dihokelo tsa lona, le dithupa tsa lona, le maballo a lona, le ditshiya tsa lona, le ditshehetso tsa tsona. ₃₄Ba tlisa le marulelo a matlalo a dipheleu a mmasa, le marulelo a matlalo a diqibi, le lesira le sireletsang areka. ₃₅Ba tlisa le areka ya selekane, le mefeng ya yona, le sekwahelo sa tefelo ya sebe; ₃₆le tafole, le dijana tsohle tsa yona, le bohobe bo halalelang; ₃₇le sedulwana sa lebone sa kgauta e hlwekileng, mabone a sona a se a beilwe hantle; le tsohle tsa sona, le ole ya ho bonesa. ₃₈Ba tlisa le aletare ya kgauta le ole e tlotsang, le mokubetso o monko o monate, le lesira la monyako wa Tente; ₃₉le aletare ya lethose, le mokgabiso wa yona wa lethose o kang letlowa, le mefeng ya yona, le tsohle tsa yona, le sekotlolo sa ho itlhatswetsa, le sedulwana sa sona. ₄₀Ba tlisa le masela a lepeletswang seotlwaneng, le ditshiya tsa wona, le ditshehetso tsa tsona; le lesira la monyako wa seotlwana, le mehala ya sona, le dimapo tsa sona, le tsohle tse sebediswang Leahong, Tenteng ya Morena. ₄₁Ba tlisa diaparo tse lohilweng, tsa ho sebeletsa Sehalalelong, e leng diaparo tse halalelang tsa moprista Arone; le diaparo tsa bara ba hae ha ba sebeletsa e le baprista.

₄₂Bana ba Iseraele ba ne ba entse mosebetsi wohle ho ya kamoo Morena a neng a laetse Moshe kateng. ₄₃Yaba Moshe o hlahloba mosebetsi kaofela, mme a bona hore ba o phethile jwalokaha Morena a ne a laetse. Moshe a ba hlohonolofatsa.

₁Morena a bua ho Moshe, a re: ₂“Ka letsatsi la pele, la kgwedi ya pele, o tla hloma Leaho, Tente ya Morena. ₃Ka ho lona o tla kenya areka ea Selekane, mme o kwahele areka eo ka lesira. ₄O tla kenya tafole, o lokise tsohle tsa yona; o tlise le sedulwana sa lebone, o bee mabone a sona hodima sona. ₅O bee le aletare ya kgauta, ya mokubetso, kapele ho areka ya selekane, ebe o lepeletsa lesira monyako wa Leaho.

₆“O tla bea aletare ya setjheso kapele ho monyako wa Leaho, Tente ya Morena; ₇ebe o bea sekotlolo seo ho itlhatswetswang ka ho sona pakeng tsa Tente ya Morena le aletare, o be o tshele metsi ka ho sona. ₈O tla hlomela Tente eo ya Morena seotlwana ho potoloha, ebe o lepeletsa lesira la monyako wa seotlwana.

₉“O tla nka ole e tlotsang, o tlotse Leaho le tsohle tse kahara lona, o le halaletse hammoho le tsohle tsa lona, mme le tla halalela. ₁₀O tla tlotsa aletare ya setjheso, le tsohle tsa yona, o hlohonolofatse aletare, mme aletare e tla halalela ka ho fetisisa. ₁₁O tla tlotsa sekotlolo se itlhatswetsang le sedulwana sa sona, ebe o a se halaletsa.

₁₂“O tla atametsa Arone le bara ba hae haufi le monyako wa Tente ya Morena, ebe o ba hlatswa ka metsi. ₁₃O tla apesa Arone diaparo tse halalelang, o mo tlotse, o mo halaletse, mme o tla ntshebeletsa e le moprista wa ka. ₁₄O tla atametsa le bara ba hae, o ba apese diaparo tse fihlang maotong. ₁₅O tla ba tlotsa jwalokaha o ile wa tlotsa ntata bona, mme ba tla ntshebeletsa e le baprista ba ka. Ho tlotsetswa boprista e tla ba ha mehla yohle, ho ya fihla ditloholong tsa bona.” ₁₆Yaba Moshe o etsa tsohle ho ya kamoo Morena a neng a mo laetse kateng.

₁₇Ka letsatsi la pele, la kgwedi ya pele, selemong sa bobedi, Leaho la hlongwa. ₁₈Moshe a hloma Leaho, a bea ditshehetso tsa lona, a bea le dithupa tsa lona, a bea le maballo a lona, a hloma le ditshiya tsa lona. ₁₉A kwahela Leaho ka masela, mme a bea marulelo hodima yona, jwalokaha Morena a ne a mo laetse.

₂₀A nka matlapa a ngotsweng Molao, a a kenya ka arekeng, a kgwesa mefeng mahlakoreng a areka, mme a bea sekwahelo sa tefelo ya sebe hodima areka. ₂₁A kenya areka kahara Leaho, a lepeletsa lesira le sireletsang areka ya selekane, jwalokaha Morena a ne a mo laetse.

₂₂A bea tafole ka Tenteng ya Morena, ka lehlakoreng le ka leboya la Leaho, ka kwano ho lesira. ₂₃Hodima yona a hlopha bohobe bo bewang kapele ho Morena, jwalokaha Morena a ne a mo laetse.

₂₄A bea sedulwana sa lebone ka Tenteng ya Morena malebana le tafole, ka lehlakoreng le ba borwa la Leaho. ₂₅A bea mabone kapele ho Morena, jwalokaha Morena a ne a mo laetse.

₂₆A bea aletare ya kgauta ka Tenteng ya Morena, kapele ho lesira. ₂₇A tjhesetsa mokubetso o monko o monate hodima yona, jwalokaha Morena a ne a mo laetse. ₂₈A lepeletsa lesira la monyako wa Leaho.

₂₉A bea aletare ya setjheso monyakong wa Leaho, Tente ya Morena, hodima yona a etsa sehlabelo sa setjheso, le nyehelo ya dijo, jwalokaha Morena a ne a mo laetse.

₃₀A bea sekotlolo se itlhatswetsang pakeng tsa Tente ya Morena le aletare, mme ka ho sona a tshela metsi a ho itlhatswa. ₃₁Bo-Moshe le Arone, le bara ba Arone, ba ne ba ye ba hlatswe maoto a bona, ba hatlele. ₃₂Ha ba ne ba kena ka Tenteng ya Morena, leha ba atamela pela aletare, ba ne ba ye ba itlhatswe, jwalokaha Morena a ne a laetse Moshe.

₃₃A hloma seotlwana ho potapota Leaho le aletare, a lepeletsa lesira la seotlwana. Yaba Moshe o phetha mosebetsi.

₃₄Yaba leru le kgurumetsa Tente ya Morena, mme tlotla ya Morena ya tlala ka Leahong. ₃₅Jwale Moshe a sitwa ho kena ka Tenteng ya Morena, hobane leru le ne le e kgurumeditse, mme tlotla ya Morena e tletse ka Leahong.

₃₆Maetong wohle a bona, e ne e ye ere ha leru le phahama hodima Leaho, bana ba Iseraele ba tswele pele leetong la bona. ₃₇Empa ha leru le ne le sa phahame, ba ne ba sa ke be ba tswele pele leetong la bona, ho fihlela mohla leru le ka phahamang. ₃₈Motsheare leru la Morena le ne le eba hodima Leaho, mme bosiu mollo o ne o ye o be teng lerung, moo bana bohle ba Iseraele ba bonang, maetong wohle a bona.

₁Nna Petrose, moapostola wa Jesu Kreste, ke dumedisa bakgethwa, bao e leng bajaki ba qhalakaneng dinaheng tsa Pontose, Galatia, Kapadokia, Asia le Bithinia, ₂ba kgethilweng ka morero wa Modimo Ntate, ba halaleditsweng ke Moya o Halalelang, e le hore ba tle ba mamele Jesu Kreste, mme ba fokwe ka madi a hae, ke re: Le ke le ekeletswe mohau le kgotso.

₃Ho bokwe Modimo, Ntata Morena wa rona Jesu Kreste. Ka baka la boholo ba mohau wa hae, o re tswetse botjha ka tsoho ya Jesu Kreste bafung, hore re tle re be le tshepo e phelang, ₄le lefa le se nang ho bola, leha e le ho silafala kapa ho pona. Ke lona lefa leo le le boloketsweng lehodimong. ₅Ka baka la tumelo ya lona, matla a Modimo a le sireletsa ho le isa pholohong, e seng e loketse ho bonahatswa nakong ya bofelo. ₆Le nyakaletse ke hona, leha hajwale le sa tshwanetse ho hlomoha ka nakwana, ka baka la ho lekwa ka mekgwa e mengata. ₇Kahoo tumelo ya lona e tla bonahala e le ya sebele, ya bohlokwahadi ho feta kgauta e senyehang, leha le yona e lekwa ka mollo. Tumelo eo e tla le fumantsha thoriso, tlotla le hlompho, mohla Jesu Kreste a bonahatswang, ₈yena eo le mo ratang le hoja le sa ka la mmona, mme le hona jwale le dumelang ho yena le hoja le eso mmone. Jwale le nyakaletse ka thabo e ke keng ya bolelwa, e tlotlehang, ₉hobane le tla amohela moputso wa tumelo ya lona, e leng pholoho ya lona.

₁₀Baporofeta, ba ileng ba porofeta tsa mohau oo le tla o newa, ba ile ba batla tsa pholoho eo, ba di fatisisa. ₁₁Ba ile ba fuputsa hore na Moya wa Kreste, o neng o le ka ho bona, o supa nako efe, e jwang, ha o paka e sa le pele tsa ho hlokofatswa ha Kreste le tsa tlotla e tlang ho ho latela. ₁₂Ba ile ba senolelwa hore ba ne ba sa itshebeletse, empa ba ne ba sebeletsa lona ka molaetsa oo le o tsebiswang jwale ke ba le bolellang wona, ka Moya o Halalelang, o romilweng o etswa lehodimong. Ke molaetsa oo le mangeloi a lakatsang ho o utlwisisa.

₁₃Ka baka leo, itokisetseng ho sebeletsa, ka ho ba tjhatsi dikelellong, le be le boitshwaro, le ntse le tshepile ka ho tlala ho newa mohau, mohla Jesu Kreste a bonahatswang. ₁₄Le le bana ba mamelang, le se ke la latela ditakatso tsa lona tsa kgale, ha le ne le sa hloka tsebo. ₁₅Jwalokaha ya le bitsitseng a halalela, le lona le halalele metsamaong yohle ya lona, ₁₆hobane ho ngotswe, ho thwe: “Le halalele, hobane le nna ke a halalela.”

₁₇Haeba le rapela Modimo e le Ntata lona, yena ya ahlolang motho ka mong ka ho ya ka mesebetsi ya hae, a sa ye ka tshobotsi, eka kgona le phele ka tshabo nakong ya bojaki ba lona mona lefatsheng. ₁₈Tsebang hore hase ka dintho tse senyehang, tse kang kgauta le silefera, le ileng la lopollwa metsamaong ya lona ya bosawana, eo le e nkileng ho bo-ntata lona, ₁₉empa ke ka madi a bohlokwa, a kang a konyana e se nang sekodi, leha e le letheba, e leng a Kreste. ₂₀O ne a kgethwe ke Modimo lefatshe le eso thewe, feela a bonahatswa dinakong tsena tsa bofelo ka baka la lona. ₂₁Ke ka yena le dumelang ho Modimo ya mo tsositseng bafung, a ba a mo nea tlotla, e le hore tumelo le tshepo ya lona di tle di be ho Modimo.

₂₂Kaha le hlwekisitse meya ya lona ka ho mamela nnete, mme le rata bana babo lona ka lerato le se nang boikaketsi, ratanang ka dipelo tsohle, ka lerato le mofuthu. ₂₃Le tswetswe botjha, e seng ka peo e bolang, empa ka e sa boleng, e leng lentswe la Modimo le phelang, le sa feleng, ₂₄hobane:

₁Ka baka leo, lahlang bobe bohle, le mano wohle, le boikaketsi, le mohono, le diketseletso tsohle. ₂Jwaloka masea a sa tswa hlaha, lakatsang lebese le hlwekileng la lentswe la Modimo, e le hore ka lona le tle le hodisetswe pholohong, ₃ha feela le latswitse molemo wa Morena.

₄Tloong ho eo e leng lejwe le phelang, le lahlilweng ke batho, empa le kgethilweng ke Modimo, e le la bohlokwa. ₅Tloong le le majwe a phelang, a sebediswang ho haha tempele ya moya. Le be baprista ba halalelang, ba nyehellang Modimo ka mahlabelo a moya, a amohelehang ho yena ka Jesu Kreste; ₆etswe Mangolo a re:

₉Empa lona le moloko o kgethehileng, le baprista ba Morena, le mofuta o halalelang, le setjhaba seo a se ruileng. Le kgethetswe ho bolela dintle tsa ya le ntshitseng lefifing, a le bitsetsa leseding la hae le hlollang. ₁₀Pele le ne le se setjhaba, empa jwale le setjhaba sa Modimo; le ne le sa hauhelwa, empa jwale le hauhetswe.

₁₁Baratuwa, le le baeti le bajaki, ke le kgothaletsa hore le lahle ditakatso tsa botho, tse lwantshanang le moya. ₁₂Le be le metsamao e metle hara bahedene, e tle ere ha ba bona mesebetsi ya lona e metle, ba tlotlise Modimo mohla letsatsi la kahlolo, le hoja jwale ba ntse ba le bua hampe, ba re le etsa tse mpe.

₁₃Ka baka la Morena, ikokobeletseng ditaelo tsohle tsa batho: e ka ba tsa kgosi e phahametseng bohle, ₁₄kapa tsa babusisi ba beilweng ke kgosi ho otla ba etsang tse mpe, le ho rorisa ba etsang tse ntle. ₁₅Ke thato ya Modimo hore, ka ho etsa tse ntle, le fedise dipuo tsa bowatla, tsa dithoto. ₁₆Le phele ka bolokolohi; feela le se ke la bo sebedisa e le lesira le patang bobe, le mpe le phele le le bahlanka ba Modimo. ₁₇Hlomphang batho bohle, ratang badumedi, tshabang Modimo, hlomphang kgosi.

₁₈Lona bahlanka, ikokobeletseng beng ba lona ka tshabo yohle; e seng ba lokileng le ba mosa feela, empa le bona ba kgopo. ₁₉Ke ntho e ntle ha motho, ka baka la ho tshaba Modimo, a ka mamella mahlomola, a se na molato. ₂₀Le ka ithorisa jwang ha le mamella dikotlo hobane le entse dibe? Empa ha le mamella mahloko, leha le ntse le etsa tse ntle, hona ho hotle mahlong a Modimo. ₂₁Ke seo le se bitseditsweng, hobane Kreste le yena o ile a hlokofatswa ka baka la lona, mme a le siela mohlala, hore le tle le hate mehatong ya hae.

₂₃Ha a hlapaolwa, ha a a ka a busetsa; ha a hlokofatswa, ha a a ka a sokela motho, empa o ile a ipea matsohong a Moahlodi ya lokileng. ₂₄Yena, ka mmele wa hae, o ile a isa dibe tsa rona sefapanong, hore re tle re shwe ka nqeng ya sebe, mme re phele ka nqeng ya ho loka. Ke yena eo le fodisitsweng ke maqeba a hae. ₂₅Le ne le lahlehile jwaloka dinku, empa jwale le kgutletse ho Modisa le Mookamedi wa meya ya lona.

₁Le lona basadi, le ikokobeletse banna ba lona, e le hore ha ho le teng ba bang ba banna ba lona ba sa dumeleng lentswe la Modimo, ba tle ba sokolohe ka baka la metsamao ya lona feela, le ntse le itholetse, ₂ka ho hlokomela metsamao ya lona e hlwekileng, e hlomphehang. ₃Mokgabo wa lona e se ke ya eba o bonwang, jwaloka meriri e lohilweng, mekgabiso ya kgauta le diaparo tse ntlehadi. ₄Mokgabo wa lona o sa senyeheng o tswe botebong ba dipelo tsa lona, e leng moya wa mosa le kgutso, oo e leng ntho ya bohlokwa ho Modimo. ₅Mehleng ya kgale basadi ba halalelang, ba neng ba tshepile Modimo, ba ne ba ikgabisa ka ho ikokobeletsa banna ba bona. ₆Mohlala ke Sara ya neng a mamela Aborahama, mme a mmitsa “Monga ka”. Lona le fetohile baradi ba hae ka ho etsa tse ntle, le se na tshabo efe kapa efe.

₇Le lona banna, le phedisane le basadi ba lona, le ntse le tseba hore ba fokola ho le feta. Le ba hlomphe hobane le bona, hammoho le lona, ke majalefa a bophelo boo Modimo a le neang bona. Etsang hona e le hore dithapelo tsa lona di tle di se ke tsa sitiswa.

₈Ke qetella ka ho re lona bohle le be pelonngwe, le utlwelane bohloko, le ratane jwaloka bana ba motho, le be mosa, le ikokobetse. ₉Se busetseng bobe ka bobe, kapa tlhapa ka tlhapa, empa le hlohonolofatse, hobane Modimo o le bitseditse ho ja lefa la mahlohonolo, hobane ho thwe:

₁₃Haeba le thahasella nnete, ke mang ya ka le etsang hampe? ₁₄Empa haeba batho ba le hlokofaletsa ho loka ha lona, le lehlohonolo. Le se ke la ba tshaba, mme le se ke la ferekana, ₁₅empa dipelong tsa lona le hlomphe Kreste, eo e leng Morena. Kamehla le itokisetse ho ikarabella ho bohle ba le botsang tsa tshepo eo le nang le yona. ₁₆Empa etsang hona ka mosa le ka hlompho, matswalo a lona a kgutsitse, e le hore ba buang hampe ka metsamao ya lona e metle, ya Bokreste, ba tle ba hlajwe ke dihlong ke diketseletso tseo tsa bona. ₁₇Ho molemo ho hlokofaletswa ho etsa tse ntle, haeba e le thato ya Modimo, ho ena le ho hlokofaletswa ho etsa tse mpe. ₁₈Kreste le yena o shwetse dibe tsa lona hanngwe, ya lokileng a shwela ba sa lokang, e le hore a tle a le tlise ho Modimo. O ile a bolawa ka nqeng ya mmele, empa a kgutlisetswa bophelong ka Moya; ₁₉a ba a ya phatlalletsa meya e tjhankaneng molaetsa o molemo. ₂₀Ke meya e neng e sa ka ya mamela Modimo, ha yena a ne a e mameletse halelele mehleng eo Nowe a neng a haha areka ka yona. Ka areka, ba seng bakae feela, e leng ba robedi, ba ile ba pholoswa metsing. ₂₁Metsi ana ke setshwantsho sa kolobetso e re pholosang jwale. Kolobetso hase ho hlatsuwa ditshila tsa mmele, empa ke ho itlama ho Modimo ka letswalo le kgutsitseng. E le pholosa ka tsoho ya Jesu Kreste, ₂₂ya nyolohetseng lehodimong, ya leng ka letsohong le letona la Modimo, mme ya busang mangeloi, le bookamedi bohle, le matla wohle.

₁Erekaha Kreste a ile a mamella mahloko mmeleng, le lona imatlafatseng ka maikutlo a tshwanang le a hae, hobane ya mameletseng mahloko mmeleng o kgaohane le sebe, ₂e le hore ditshiung tse mo saletseng lefatsheng a se hlole a phelela ditakatso tsa botho, empa a phelele thato ya Modimo. ₃Le bile le nako e lekaneng le ntse le phetha tse ratwang ke bahedene, ka ho phela ka bokgopo, ditakatso tse mpe, botahwa, botlofa dijong le dinong, le ka ditshebeletso tsa medimo ya bohata, tse sa dumeleheng. ₄Ba a makala, ebile ba a le nyefola, ha le se le sa kgeme le bona bophelong boo bo hlaha ka ho fetisisa. ₅Ba tla ikarabella ho ya seng a loketse ho ahlola ba phelang le ba shweleng. ₆Ke kahoo le bona bafu ba ileng ba phatlalletswa molaetsa o molemo, e le hore, leha ka nqeng ya botho ba se ba ahlotswe jwaloka batho bohle, ka nqeng ya moya ba tle ba phelele Modimo.

₇Qetello ya dintho tsohle e atametse. Ebang le boitshwaro, mme le fadimehele ho rapela. ₈Ho feta tsohle le ratane ka lerato le mofuthu, hobane lerato le tlosa dibe tse ngata. ₉E mong le e mong a amohele baeti a sa kganane. ₁₀Ka ho ya ka neo eo a e filweng ke Modimo, motho ka mong a ke a sebeletse ba bang jwaloka moabi ya kgabane wa mohau wa Modimo, o iponahatsang ka mekgwa e mengata. ₁₁Ya buang a bue tsa Modimo; ya sebeletsang a sebeletse ka matla ao a a filweng ke Modimo; e le hore Modimo a tle a tlotliswe dinthong tsohle ka Jesu Kreste, eo tlotla le matla e leng tsa hae kamehla le mehla. A ho be jwalo!

₁₂Baratuwa, le se ke la makala ha le le hara mollo wa teko, jwalokaha eka ke mohlolo. ₁₃Thabo ya lona e ke e lekane le kabelo eo le nang le yona mahlokong a Kreste, e le hore le tle le thabe, le nyakalle, mohla tlotla ya hae e bonahatswang. ₁₄Ha le hlapaolwa ka baka la lebitso la Kreste, le lehlohonolo, hobane Moya o tlotlehang, Moya wa Modimo, o ho lona. ₁₅Ho se be teng hara lona ya hlokofatswang kahobane e le mmolai, kapa leshodu, kapa sesenyi, kapa ya itshunyakang ditabeng tsa ba bang. ₁₆Empa ya hlokofatswang kahobane e le Mokreste, a se ke a ba dihlong, a mpe a tlotlise Modimo ka baka la lebitso leo. ₁₇E se e le nako ya hore kahlolo e qale, mme e qale ka ba ntlo ya Modimo. Jwale ha e le moo e qala ka rona, qetello ya ba sa dumeleng molaetsa o molemo wa Modimo yona e tla ba jwang?

₁₉Ha ho le jwalo he, ba hlokofatswang ho ya ka thato ya Modimo ba ipee paballong ya Mmopi ya tshepahalang, ka ho etsa tse ntle.

₁Ke kgothatsa baholo ba leng teng hara lona, nna ke le e mong wa bona, ke bile ke le paki ya mahloko a Kreste, ke ena le kabelo tlotleng ya hae e tlang ho bonahatswa. ₂Alosang mohlape wa Modimo o bodiseng ba lona. Le o hlokomele ka boithaopo, ka mokgwa o ratwang ke Modimo, e seng ka ho qobellwa; e be ka lerato, e seng ka ho ipatlela maruo ka mano. ₃Ba beilweng tlhokomelong ya lona, le se ke la ba busa ka thata, le mpe le be mohlala ho mohlape wa lona. ₄Etlare mohla Modisa wa badisa a iponahatsang, le tla amohela mofapahlooho wa tlotla, o sa senyeheng.

₅Ka mokgwa o jwalo, lona ba batjha, ikokobeletseng ba baholo. Lona bohle, ebang le maikutlo a boikokobetso, le ikokobetse e mong ho e mong, hobane:

₆Jwale le ikokobetse katlasa letsoho le matla la Modimo, e le hore a tle a le phahamise ka nako e lokelang. ₇Ditsietsi tsohle tsa lona le di rolele ho yena, hobane ke yena ya le baballang.

₈Ebang le boitshwaro, le fadimehe. Diabolosi, sera sa lona, o solla jwaloka tau e purumang, a ntse a batla eo a ka mo harolang. ₉Itwaneleng le tiile tumelong; tsebang hore mahloko a tshwanang le a lona a ntse a hlahela bana babo lona bohle, lefatsheng lohle.

₁₀Modimo wa mehauhelo yohle, ya le bitseditseng tlotleng ya hae e sa feleng, ka Kreste, etlare hoba le hlokofatswe ka nakwana, yena ka sebele o tla le etsa ba phethehileng. O tla le tiisa, a le matlafatse, a etse hore le se ke la sisinyeha. ₁₁Ho yena e ke e be matla kamehla yohle. A ho be jwalo!

₁₂Ke le ngoletse hakgutshwanyane ka thuso ya Silefanose, eo ke mo tadimang e le ngwanabo rona ya tshepahalang, ho le kgothatsa le ho paka hore mohau ona ke wona wa nnete, wa Modimo. Tiisetsang ho wona.

₁₃Kereke e Babilona, e kgethilweng jwaloka lona, e a le dumedisa; le yena Mareka, ngwana ka, o a dumedisa. ₁₄Dumedisanang ka kako e halalelang.

Kgotso e ke e be le lona bohle ba leng ho Kreste.