To The Word – Day 85

₂Lona ditjhaba tsohle, mamelang!

Wena lefatshe, sekeha tsebe!

Le tsohle tse ho wena

di sekehe tsebe!

Morena Modimo o tla le qosa

a le ka Tempeleng ya hae,

Tempele e halalelang.

₃Bonang!

Morena o tswa ka leahong la hae;

o tla theoha,

a hate tlhorong tsa dithaba.

₄Dithaba di tla qhibidiha

tlasa maoto a hae,

fatshe le peperane,

ho hlahe dikgohlo;

dithaba di qhibidihe

sa tshotso e utlwa mollo,

di phorosele

sa metsi a theoha mothipoloheng.

₅Tsena tsohle di bakilwe

ke dibe tsa Jakobo,

di bakilwe

ke dibe tsa ntlo ya Iseraele.

Dibe tsa Jakobo di bakilwe ke mang?

Di bakilwe ke baahi ba Samaria.

Ho kgumamela medingwana

ho bakilwe ke mang Judea?

ho bakilwe ke baahi ba Jerusalema.

₆“Ka baka leo,

Samaria ke tla e fetola lesupi,

dirapa tsa morara di lengwe teng;

majwe a yona

ke tla a akgela ka kgohlong,

metheo ya yona e sale poyaneng.

₇Medingwana yohle ya Samaria

e tla pshatlwa,

dimpho tsohle

tse lefshwang diotswa di tjheswe.

Medimo yohle ya bohata

ke tla e timetsa,

hobane e bokeletswe

e le moputso wa bootswa,

mme e tla nne e be moputso,

moputso wa bootswa.”

₈Yaba Mmikiya o re:

“Kahoo ke tla lla, ke bokolle,

ke tsamaye ke hlobotse,

maotong ke sa rwala;

ke tla ngaya sa phokojwe ha e ngaya,

ke purume sa mpshe ha e puruma.

₉Qeba la Samaria le a petla,

ha le na pheko,

le petlile la ya tshwaetsa le Juda,

la ya fihla le kgorong

ya tjhaba sa ka,

la ba la ya fihla le Jerusalema.”

₁₀Le se ke la e bolela Gate,

le ho bokolla le se ke la bokolla;

baahi ba Bete-Leafera

le ipitike leroleng.

₁₁Lona baahi ba Shafire

fetang ka tsela,

le fete le le feela, le le dihlong.

Baahi ba Saanane

ba hana ho tswa motseng.

Ha le utlwa ba Bete-Esele ba lla,

le tle le tsebe

hore ha le sa sireleditswe.

₁₂Baahi ba Marote

ba lebeletse ho lopollwa,

hoba Morena o ba dihetse koduwa,

a e diha, ya ya fihla

le kgorong ya Jerusalema.

₁₃Lona baahi ba Lakishe

panang dipere,

le pane dipere kariking tsa ntwa;

ke lona ba baketseng

Moradi wa Sione sebe,

tshito tsa Iseraele

di fumanwe ho lona.

₁₄Kahoo le tla phahla,

le phahlele Moreshete-Gate,

motse wa Akasibe e tla ba thetso,

e be thetso ho dikgosi tsa Iseraele.

₁₅Lona baahi ba Maresha

ke tla le neella ka seqhobane,

eo e leng tlotla ya Iseraele o tla tla,

o tla tla lehaheng la Adulame.

₁₆Beolang dihlooho,

le di etse lekorana,

le llele bana bao le ba ratang;

le phumohe mafatla,

le tshwane le tlake,

hoba bana ba tla le siya,

ba ye bothopuweng.

₁Ho madimabe ba rerang bolotsana,

ba nahanang bokgopo

ba le diphateng tsa bona!

Ha bosiu bo esa

ba a bo phethathatsa,

hobane ba na le matla

a ho etsa jwalo.

₂Ba tswela masimo a batho pelo,

ba a hape,

ba honohele matlo a batho,

ba inkele wona;

ba hatella motho

le ba lelapa la hae,

ba mo hatelle, ba je lefa la hae.

“Ke ntse ke rera koduwa,

ke e rerela tjhaba sena,

koduwa eo se ke keng

sa ba sa e phema.

Ha se ka ke sa tsamaya,

sa tsamaya ka boikakaso,

hobane e tla be e le nako,

nako ya tlokotsi.

₄Mohla tsatsi leo ba tla le soma,

ba le binele kodi-ya-malla

ba re: ‘Re fela re faladitswe,

Morena o re amohile naha ya rona,

a e abela bathopi ba rona.’ ”

₅Kahoo kahara phutheho,

phutheho ya Morena,

ha ho na ho ba le motho le ya mong

ya tla le arolela naha ka lotho.

“Se ke wa re porofetela,

se ke wa porofeta dintho tsena;

Modimo ha a ka ke

a re hlabisa dihlong.”

₇Na ho ka botswa ntlo ya Jakobo

ha thwe: “Ebe Morena

o feletswe ke mamello?

Na tse tjee di etswa ke yena?”

“Na polelo tsa ka

ha di tlise molemo,

di o tlisetsa ba etsang ho loka?

₈Empa lona tjhaba sa ka

le iphetotse sera!

Motho wa kgotso

ha a feta ka tsela,

a iphetela, a sa nahane tsa ntwa,

le mo amoha kobo a e apere.

₉Basadi ba tjhaba sa ka

le a ba leleka,

le ba leleka malapeng,

malapeng a bona a matle;

le amoha bana ba bona tlotla ya ka,

le ba amoha yona ho-ya-ho-ile.

₁₀Emang, le tsamaye, le tlohe mona!

Baka sena hase sa lona

sa ho phomola,

ka baka la hobane se silafetse,

se senyehile,

se ke ke sa hlola se loka.

₁₁Haeba ya leshano,

ya thetsang, a ka re:

‘Ke porofeta hore veine ya lona

e tla kopotsa,

jwala ba lona

e be bo bongata haholo,’

eo e ka ba yena

moporofeta wa tjhaba sena!”

₁₂“Ruri ke tla le phutha kaofela,

ke phuthe lona bohle

ba ntlo ya Jakobo;

ruri masalla a Baiseraele

ke tla a phutha,

ke a kgobokanye

sa nku di kena sakeng,

ke a phuthe

sa mohlape o le makgulong,

e be boiyane

bo phetheselang ba batho.

₁₃Pulamadiboho e tla ba etella pele;

ba tla roba mekwallo ya kgoro,

ba itsamaele.

Kgosi ya bona

e tla tswa pele ho bohle,

ka sehloohong sa bona

Morena a itlhomme.”

₁Yaba ke re:

“Lona baetapele ba Jakobo,

mamelang!

Lona babusi ba ntlo ya Iseraele,

mamelang!

Na toka ha le a tshwanela ho e tseba?

₂Le hloile botle, le rata bokgopo,

le thwebola setjhaba sa ka,

le se thwebola letlalo,

le se tswebolotse dinama masapong;

₃le buha tjhaba sa ka letlalo,

le se buhe, le itjelle nama ya sona,

masapo a sona

le a robake dikotwana;

le se kgabela sa nama e tla hadikwa,

sa nama e kgabelwang e tla apehwa.”

₄Ke moo ba tla ipiletsa ho Morena,

Morena a ke ke a ba araba.

Mohlang oo

o tla ba patela fahleho sa hae,

ka baka la diketso tsa bona,

ketso tsa bona tse kgopo.

₅Morena o bua tjena:

“Baporofeta bana

tjhaba sa ka ba a se kgelosa,

ba re ‘kgotso’

ho motho ya ntshang diphomoso,

ba lwane ya kgumamela

le ya se nang tsona.”

₆Ho baporofeta bana Morena o re:

“Ka baka leo,

bosiu bo tla le aparela,

bo le aparele,

le se ke la bona dipono,

le aparelwe ke lefifi,

le bonohe bo fele,

tsatsi le dikele,

baporofeta ba phirimelwe,

ho bona motsheare

e ke fifi le letsholetsho.

₇Bo-radipono dihlong di tla ba hlaba,

dinohe le tsona di tlontlolohe;

kaofela ha bona

ba tla ikgurumetsa difahleho,

hobane Modimo a sa ba arabele.”

₈Empa nna ruri ke na le matla,

Moya wa Morena o ka hare ho nna;

o nthutile toka, wa mpha le sebete

ho bolella Jakobo ditlolo tsa hae,

le ho bolella Iseraele sebe sa hae.

₉Lona baetapele ba ntlo ya Jakobo,

mamelang!

Lona babusi ba ntlo ya Iseraele,

mamelang!

Tsohle tse lokileng le a di nyedisa,

tsohle tse nepahetseng le di sokamise.

₁₀Ka tshollo ya madi

Sione le e hahile,

ka bokgopo ba lona

la haha Jerusalema.

₁₁Baetapele ba yona

ba ahlolela ba ba neang tjotjo,

baprista ba yona

ba rutela ho newa moputso,

baporofeta ba yona

ba porofetela tjhelete;

ho le jwalo, ba tshepile Morena,

ba re: “Ha re re Morena

o teng kahara rona?

Ha ho koduwa

e ka ba re wela hodimo!”

₁₂Ka baka la lona Sione e tla lengwa,

e lengwe jwalokaha tshimo e lengwa,

Jerusalema e fetohe, e be masupi,

thaba ya Tempele e ririellane difate.

₁Mohla matsatsi a ho qetela,

thaba eo Tempele ya Morena

e hahilweng hodima yona,

e tla phahamela dithaba tsohle,

e phahamele le maralla wohle,

ditjhaba tsohle di phallele ho yona.

₂Matjhabatjhaba a tla fihla,

a re: “Tloong,

re nyoloheleng thabeng ya Morena,

re nyoloheleng Tempeleng

ya Modimo wa Jakobo.

O tla re ruta ditaba tsa hae,

re tle re tsamaye tseleng tsa hae;”

kaha molao o tla tswa,

o tswe thabeng ya Sione,

ntswe la Morena le tswe Jerusalema.

₃Morena o tla ahlola

a ahlolele tjhaba tse ngata,

a fedise ho se utlwane

hara tse ngata, tse hole;

sabole tsa tjhaba tseo

di tla etsa mehoma,

marumo a tsona di a etse disekele.

Tjhaba di ke ke tsa hlola

di nkelana disabole,

di ke ke tsa hlola

di itokisetsa dintwa.

₄Motho ka mong o tla phomola

tlasa morara wa hae,

a phomole

tlasa sefate sa hae sa feiye;

ha ho le ya mong ya sa tla ba tshosa,

hobane Morena wa mabotho

o boletse jwalo.

₅Tjhaba tsohle

di sebeletsa medimo ya tsona,

empa rona re tla sebeletsa Morena,

re sebeletse Modimo wa rona

kamehla le mehla.

₆“Mohla tsatsi leo,”

ho rialo Morena,

“ke tla bokella ba hlotsang,

ke phuthe ba qhalantsweng,

ke phuthe bao ke ba otlileng.

₇Ba hlotsang ke tla ba etsa masalla,

ba qhalantsweng

ke ba etse tjhaba se matla.

Morena o tla ba busa

a le Thabeng ya Sione,

a ba buse ho tloha mohla tsatsi leo,

a ba buse kamehla le mehla.

₈Ha e le wena, Tora ya Mohlape,

wena qhobosheane

ya Moradi wa Sione,

o tla buseletswa puso ya hao ya pele,

mmuso o kgutlele

ho Moradi wa Jerusalema.”

₉Jwale wena o llelang hakaale?

Na ebe wena ha o na kgosi?

Na moeletsi wa hao o timetse,

ha e le moo o utlwa bohloko,

bohloko bo kang,

ba mahlaba a pelehi?

₁₀Meneka, o bobole,

wena Moradi wa Sione,

o ke ya tshwerweng

ke mahlaba a pelehi,

jwale o tla tswa kahara motse,

o tswe, o yo aha nahathothe.

O tla tsamaya, o ye Babilona,

ke hona moo o tla pholoswa teng,

Morena o tla o lopolla

o le hona moo,

a o namolele

matsohong a dira tsa hao.

“A Sione e ke e silafale,

re be re e bone ha e silafala!”

₁₂Empa mehopolo ya Morena

ha ba e tsebe,

le morero wa hae ha ba o utlwisise,

yena ya ba bokeletseng

sa mangata seotlong.

₁₃“Wena Moradi wa Sione,

tsoha, o pole!

Ke tla o kgwesa manaka a tshepe,

ke o rwese tlhako tsa lethose,

o tlo robokele tjhaba tse ngata.”

O tla nyehella Morena

ka kgapo ya hao,

o mo nyehelle ka leruo la tsona,

o nyehelle Morena wa lefatshe lohle.

₁Wena Jerusalema,

kgobokanya bahlabani ba hao,

hobane re etseditswe thibella;

mmusi wa Iseraele ba tla mo otla,

ba mo otle ka thupa lerameng.

₂“Ha e le wena

Betlelehema Eferata,

leha o le monyenyane

hara meloko ya Juda,

ho wena

ho tla tswa mmusi wa Iseraele,

eo leloko la hae

le qalehileng kgale,

la qaleha mehleng ya baholoholo.”

₃Kahoo Morena

o tla furalla Baiseraele,

a ba furalle

ho fihlela mosadi a beleha;

ke moo Baiseraele ba tla kgutla,

ho kgutle

Baiseraele ba phonyohileng,

ba kgutle,

ba ikopanye le bana babo bona.

₄O tla ema,

a alose mohlape wa hae,

a o alose

ka matla a tswang ho Morena,

ka bitso le tlotlehang

la Morena Modimo wa hae.

Ba tla phela ba sireletsehile,

hobane boholo ba hae bo tla nama,

bo namele pheletsong tsa lefatshe.

₅Yena e tla ba kgotso ya bona.

Ha Asiria e futuha,

e futuhela naha ya rona,

qhobosheane tsa rona e di ripitla,

re tla e neella ka balaodi ba supile,

le ka mahosana a robedi a setjhaba.

₆Ba tla busa naha ya Asiria ka sabole,

le naha ya Nimerode

ka sabole e motsutswe;

mmusi ya tswang Betlelehema

o tla re namolela,

a re namolele matleng a Asiria

ha e futuhela naha ya rona,

e hwanka kahara meedi ya rona.

₇Masalla a Jakobo a tla ba teng,

a be teng hara ditjhaba tse ngata,

a be jwaloka phoka

e tswang ho Morena,

a be jwaloka medupe

e kolobisang jwang,

medupe e sa ke be

e laelwe ke motho,

kapa e emele

ho phetha thato ya motho.

₈Masalla a Jakobo a tla ba teng,

a be teng hara ditjhaba,

a be teng hara merabe e mengata,

a be jwaloka tau

hara dibatana tsa meru,

a be jwaloka tawana

hara mehlape ya dinku,

tawana e fetang e harola, e tsekolla,

empa ho se ya ka pholoswang,

ya ka pholoswang tleneng tsa yona.

₉Tsoho la hao

le tla phahamela hodimo,

le phahamele

hodima ba o lwantshang,

dira tsa hao tsohle di tla timetswa.

₁₀“Mohla tsatsi leo,”

ho rialo Morena,

“ke tla bolaya dipere tsa lona,

ke robe dikariki tsa lona tsa ntwa.

₁₁Ke tla heletsa

metse ya naha ya lona,

ke qhaqhe

qhobosheane tsohle tsa lona.

₁₂Boloi ba lona ke tla bo fedisa,

le ho laola ha le sa tla laola.

₁₃Medingwana ya lona

ke tla e pshatlaka,

le ditshiya tsa lona tse halalelang;

ha le sa tla hlola

le obamela mesebetsi ya lona,

e leng mesebetsi ya matsoho a lona.

₁₄Tshiya tsa lona tsa Ashera

ke tla di koqola,

le metse ya lona ke e heletse.

₁₅Ka bohale le ka kgalefo

ke tla iphetetsa,

ditjhaba tse sa mmameleng ke di otle.”

“Emang le behe nyewe ya lona,

le e behe kapele ho dithaba,

maralla a ke a utlwe

boipiletso ba lona.

₂Lona dithaba,

mamelang qoso ya Morena;

lona metheo ya lefatshe,

sekehang tsebe.

Lona metheo e tiileng

sekehang tsebe.

Morena o qosa setjhaba sa hae,

Morena o tsekisana le Baiseraele.

₃“Lona tjhaba sa ka

ebe ke le entseng?

Ke le imeditse kang?

Nkarabeng hle!

₄Ke ile ka le ntsha naheng ya Egepeta,

ka le lopolla naheng ya bokgoba.

Ka romela Moshe ho le etella pele,

ka mo romela

a ena le Arone le Meriama.

₅Lona tjhaba sa ka,

hopolang morero wa Balake,

morero wa Balake, kgosi ya Moabe,

le hopole le karabo ya Bileame,

mora wa Beore.

Hopolang le lona leeto la lona

la ho tloha Shitime ho ya Gilegale,

le tle le tsebe

ketso tse pholosang tsa Morena.”

₆Ke tla tla ke nkile eng

ha ke eya ho Morena?

Ke tla obama jwang

kapele ho Ya Hodimodimo?

Na ke tla fihla

ke nkile nyehelo ya setjheso,

ke nkile nyehelo

ya manamane a selemo?

₇Na Morena o tla kgahlwa

ke kete tsa dipheleu,

a kgahlwe

ke nyehelo ya ole e ngatangata?

Na ke tla nyehela

ka ngwanaka wa matsibolo,

ke nyehele ka yena

ka baka la tshito tsa ka,

ke nyehele

ka ngwanaka wa matswathaka,

ke nyehele

ka yena ka baka la sebe sa ka?

₈Wena motho,

o boleletswe se molemo;

ebe Morena

o lebeletse eng ho wena?

Ke ho etsa tse lokileng,

le ho ba le lerato,

le ho ikokobeletsa Modimo wa hao.

₉Ya bohlale

o tshaba lebitso la Morena.

Morena o ipiletsa ho motse, o re:

“Lona tjhaba se phuthehileng,

se phuthehetseng mona, mamelang!

₁₀Na nka iphapanyetsa

matlotlo a bolotsana,

le dikala tse qhekanyetsang,

tse rohakehileng?

₁₁“Na ke tla lokolla

ya nang le sekala se qhekanyetsang?

Ke lopolle

ya nang le sekala sa bolotsana,

eo boima ba mokotla wa hae

bo sa nepahalang?

₁₂“Barui ba lona ke banna ba sehloho;

tjhaba sa lona ke batho ba leshano,

maleme a bona

ke maleme a thetsang.

₁₃Kahoo ke se ke qadile ho le otla,

ke le timetsa

ka baka la dibe tsa lona.

₁₄Le tla ja, empa le ke ke la kgora!

Le tla sala le ntse le lapile jwalo.

Le tla ba le mahlaba a pelehi,

empa bana bona

le ke ke la ba beleha;

esita leha le ka beleha bana,

bana bao

ke tla ba bolaya ka sabole.

₁₅“Le tla jala,

empa le ke se kotule letho;

le tla tlhotla tholwana tsa mohlwaare,

empa le ke se itlotse ka ole ya tsona;

le tla tlhotla tholwana tsa morara,

empa le ke se nwe veine ya tsona.

₁₆Ditaelo tsa Omeri le di phethile,

le mesebetsi yohle ya ntlo ya Akabe,

dikeletso tsa bona le ile la di latela;

ka baka leo, ke tla le timetsa,

tjhaba sa lona ke se fetole sesomo,

sekgobo sa baditjhaba

le se jare jwalo.”

₁Ke madimabe hakaakang!

Ke ka motho

ya reng o kgola tholwana,

ya reng o kgola tsa hlabula

athe ha di yo.

Ke ka rapa sa morara

se kgwahlapisitswe;

ha ho lesihla la morara

le ka jewang,

ha ho feiye ya pele

eo nka e lakatsang.

₂Ba hlomphang Modimo

ha ba sa le yo lefatsheng,

ha ho le ya mong

ya etsang ho lokileng;

bohle ba laletse ho tsholla madi,

motho o tjhehile ngwanabo,

o mo tjhehile ka letlowa.

₃Ka matsoho a bona

ba ithutile ho etsa bokgopo,

ba bile ba bo etsa ba kgothetse;

mmusi o batla hore

a ntshetswe dimpho,

moahlodi yena o amohela tjotjo;

ba matla ba laela hore

ho phethwe ditakatso,

takatso tsa bona tse kgopo,

ba loha mano jwalo ba le hammoho.

₄Ya lokileng ho ba feta

o ka hlabahlabane,

ya tshepahalang ho ba feta

o ka lekgwakgwa

le baletswe ka leoka.

Letsatsi la balebedi ba hao le fihlile,

letsatsi leo

Modimo a tla o otla ka lona,

nako ya hore ba ferekane

jwale e fihlile.

₅O se tshepe ya ahisaneng le wena,

motswalle le yena

o se ke wa mo tshepa;

esita le ho yena mosadi wa hao,

o ele hloko

seo o se buang ho yena.

₆Mora o hlompholla ntatae,

moradi o fetohela mmae,

ngwetsi e fetohela matsalayo,

ba lapa la motho

ke bona dira tsa hae.

₇Empa nna ke tla lebella Morena,

ke lebelle Modimo,

Mopholosi wa ka;

Modimo wa ka o tla nkutlwa.

₈Wena sera sa ka,

o se ke wa nyakalla ka nna!

Leha nka wa ke tla boela ke tsohe;

leha nka dula lefifing

Morena o tla mponesetsa.

₉Ke sitetswe Morena, ke entse sebe,

kahoo kgalefo ya Morena

ke tla e mamella,

ke e mamelle ho fihlela a ntwanela,

a ntwanela, a nnea tokelo ya ka.

Morena o tla nkisa,

a nkise kganyeng ya hae,

teng ke bone ho loka ha hae.

₁₀Ke moo dira tsa ka di tla bona,

di bone, di aparelwe ke dihlong,

tsona dira tse neng

di bua ho nna, di re:

“O kae Morena Modimo wa hao?”

Ke tla bona

ha di hatakelwa ka maoto,

di hatakelwa sa qhafutso diterateng.

₁₁Tsatsi le tla fihla

la ho tsosa marako a motse,

tsatsi la ho atolosa meedi ya lona.

₁₂Mohla tsatsi leo

batho ba tla tla ho lona,

ba tle ba etswa Asiria le Egepeta,

ba etswa Egepeta,

ba etswa Euferatese;

ba tle ba etswa mawatleng wohle,

ba tle ba etswa dithabeng tsohle.

₁₃Lefatshe le tla fetoha nanaola,

le fetohe nanaola

ka baka la baahi ba lona,

le fetohe nanaola

ka baka la diketso tsa bona.

₁₄Morena, ka lere la hao

alosa mohlape wa hao,

alosa mohlape oo e leng lefa la hao,

mohlape o dulang

o le inotshi kahara moru,

o dulang

kahara makgulo a nonneng;

o ke o fule Bashane le Gileade,

o fule teng

jwaloka mehleng ya boholoholo.

₁₅“Ke tla bontsha tjhaba sa ka,

ke se bontshe dimakatso,

ke se bontshe tsona

sa mohla se tswang Egepeta.”

₁₆Ditjhaba di tla bona,

di hlajwe ke dihlong,

le hoja di le matla;

ditjhaba di tla makala,

di be di hlollwe,

le tsebe tsa tsona di be di thibane.

₁₇Di tla nyeka lerole jwaloka dinoha,

di le nyeke

sa dihahabi di holoba fatshe.

Di tla tswa diahelong tsa tsona

di thothomela,

di retelehele ho Morena,

Morena Modimo wa rona,

di retelehele ho yena di tshohile,

di tshohile haholo hobane di o tshaba.

₁₈Ke Modimo ofe

ya tshwanang le wena?

Ya tshwarelang dibe, a leballe ditlolo

tsa masalla a setjhaba sa hae?

Wena o Modimo

ya sa halefeleng ruri,

wena o Modimo

ya thabelang ho hauhela.

₁₉O tla boela o re utlwela bohloko,

makgopo a rona o a hatakella fatshe,

dibe tsa rona

o di lahlela botebong ba lewatle.

₂₀O tla bontsha Jakobo,

o mmontshe botshepehi ba hao,

Aborahama le yena o mo hauhele,

jwalokaha o ila wa hlapanya,

wa hlapanyetsa bo-ntata rona

mehleng ya kgalekgale.