To The Word – Day 89

₁Jesu a fihla a phunyeletsa motse wa Jeriko. ₂Ho ne ho ena le monna ya bitswang Sakiya, eo e neng e le hlooho ya balekgetho, e bile e le morui. ₃A rata ho bona hore na Jesu ke mang, empa a sitwa ka baka la letshwele, hobane o ne a le mokgutshwanyane. ₄A mathela pele, a hlwella sefateng sa feiye e hlaha, hore a tle a mmone, kaha a ne a tla feta ka tsela eo.

₅Ha Jesu a fihla sebakeng seo, a lelalla sefateng, a re ho yena: “Sakiya, phakisa o theohe, hobane eka kgona ke hlole tlung ya hao kajeno.” ₆A phakisa a theoha, mme a mo amohela ka thabo.

₇Yare ha ba bona hoo, ba korotla bohle, ba re: “O fapohetse ha monna wa moetsadibe.”

₈Sakiya a ema, a re ho Morena: “Bona, Morena, maruo a ka ke a arolela mafutsana ka lehare, mme eo ke mo amohileng ho hong ka mano ke mmuseletsa hona hane.”

₉Yaba Jesu o re: “Kajeno lelapa lena le fumane pholoho, kaha le yena e le mora wa Aborahama, ₁₀hobane Mora Motho o tlile ho batla le ho pholosa ba lahlehileng.”

₁₁Yare ba sa mametse tsena, Jesu a eketsa a bolela setshwantsho, hobane a ne a atametse Jerusalema, mme ba ne ba hopola hore Mmuso wa Modimo o se o tla hlaha kapelepele. ₁₂Yaba o re: “Monna e mong wa leloko la borena o ne a ye lefatsheng le hole ho ya newa borena, a nto kgutla. ₁₃Hoba a bitse ba leshome ba bahlanka ba hae, a nea e mong le e mong wa bona mina, a nto re ho bona: ‘Hwebang ka tsona, ho fihlela ke kgutla.’

₁₄“Empa kaha baahi ba naha ya hae ba ne ba mo hloile, ba mo sadisa baromuwa morao, ba re: ‘Ha re rate ha eo a rena hodima rona.’

₁₅“Eitse ha a kgutla, e se e le kgosi, a laela hore bahlanka bane bao a ba neileng tjhelete ba bitsetswe ho yena, hore a tle a tsebe hore na ba fumane phaello e kae ka ho hweba.

₁₆“Ha tla wa pele, a re: ‘Morena, mina ya hao e tswetse dimina tse leshome.’

₁₇“A re ho yena: ‘O entse hantle, mohlanka ya kgabane, hobane o ile wa tshepahala nthong e nyenyane, busa metse e leshome.’

₁₈“Ha tla wa bobedi, a re: ‘Morena, mina ya hao e tswetse dimina tse hlano.’

₁₉“Ho eo a re: ‘Wena okamela metse e mehlano.’

₂₀“Empa e mong a tla, a re: ‘Morena, bona, mina ya hao, eo ke neng ke e phuthetse leseleng, ke e patile, ke ena. ₂₁Ke o tshabile, hobane o motho ya thata: o nka seo o sa kang wa se bea, mme o kotula seo o sa kang wa se jala.’

₂₂“A re ho yena: ‘Ke tla o ahlola ka tsa molomo wa hao, mohlanka towe ya kgopo! O tsebile hore ke motho ya thata, ya nkang seo ke sa kang ka se bea, ya kotulang seo ke sa kang ka se jala! ₂₃Ke hobaneng ha o sa ka wa bea tjhelete ya ka bankeng? Ha ke kgutla nka be ke ile ka e ntsha hammoho le phaello!’

₂₄“A nto re ho ba emeng haufi: ‘Mo amoheng mina eo, le e nee ya nang le dimina tse leshome!’

₂₅“Ba re ho yena: ‘Morena, o se a ena le dimina tse leshome!’

₂₆“Ke a le bolella hore ho tla newa e mong le e mong ya nang le letho, empa ya se nang letho, le seo a nang le sona o tla se amohuwa. ₂₇Empa dira tsena tsa ka, tse sa kang tsa rata ha ke rena hodima tsona, di tliseng kwano, le di bolaele kapela ka.”

₂₈Hoba a bolele tsena, a ba etella pele, a nyolohela Jerusalema. ₂₉Eitse ha a atamela Bethefage le Bethania, pela thaba e bitswang Thaba ya Mehlwaare, a roma ba babedi ba barutuwa, ₃₀a re: “Eyang motseng o kapele ho lona, oo etlare ha le kena ho wona le fumane petsana e holehilweng, e esong ho palangwe ke motho; le e lokolle, le e tlise mona. ₃₁Ha motho a ka le botsa, a re: ‘Le e lokollelang?’ le tla araba tjena: ‘Morena o a e hloka.’ ”

₃₂Jwale ba romilweng ba ya, ba fumana ho le jwalokaha a ba boleletse. ₃₃Ha ba ntse ba lokolla petsana, beng ba yona ba re ho bona: “Le lokollelang petsana eo?”

₃₄Ba re: “Morena o a e hloka.”

₃₅Ba tlisa petsana ho Jesu, ba ala diaparo tsa bona hodima yona, ba mo palamisa yona. ₃₆Ha a ntse a tswela pele, batho ba ala diaparo tsa bona ka tseleng.

₃₇Ha a atamela, a le motheong wa Thaba ya Mehlwaare, bongata bohle ba barutuwa ba qala ho rorisa Modimo ka mantswe a phahameng bo thabile, ka baka la diketso tsohle tse matla tseo bo di boneng, ₃₈ba re:

₃₉Yaba ba bang ba Bafarisi ba hara letshwele, ba re ho yena: “Moruti, kgalemela barutuwa ba hao.”

₄₀A araba, a re: “Ke a le bolella, haeba barutuwa bana ba ka kgutsa, majwe a tla howa.”

₄₁Ha a ntse a atamela, a bona motse, a o llela, ₄₂a re: “Hojane le wena o tsebile ka letsatsi lena tse hlahisang kgotso! Empa jwale di siretse mahlo a hao. ₄₃O tla fihlelwa ke matsatsi, ao ka wona dira tsa hao di tla o etsetsa thibella, di o teele hare, di o patise kahohle, ₄₄di o ripitle, wena le bana ba hao ba ho wena, mme di ke ke tsa siya lejwe hodima lejwe le leng, hobane o sa ka wa tseba nako eo Modimo a o etetseng ka yona ho o pholosa.”

₄₅Jesu a kena ka Tempeleng, a qala ho leleka ba rekisang, ₄₆a re ho bona: “Ho ngotswe, ho thwe:

₄₇O ne a ruta ka Tempeleng ka tsatsi le leng le le leng. Baprista ba baholo, le Ditsebi tsa Molao, le baetapele ba setjhaba ba ne ba batla ho mo timetsa, ₄₈empa ba ne ba sa fumane seo ba ka se etsang, hobane batho bohle ba ne ba mo kgomaretse, ba mo mamela.

₁Ka le leng la matsatsi ao, Jesu o ne a ruta batho ka Tempeleng, a ba bolella molaetsa o molemo. Baprista ba baholo le Ditsebi tsa Molao le baholo ba tla ho yena, ₂ba mmotsa, ba re: “Re bolelle hore na ke ka matla afe o etsang tsena, kapa na ya o neileng matla ana ke mang?”

₃A ba araba, a re: “Le nna ke tla le botsa potso, mme le nkarabe: ₄Na kolobetso ya Johanne e ne e etswa lehodimong kapa bathong?”

₅Ba buisana ba le bang, ba re: “Haeba re ka re: ‘Lehodimong,’ o tla re: ‘Ke ka baka lang le sa kang la mo dumela?’ ₆Empa haeba re ka re: ‘Bathong,’ setjhaba sohle se tla re tlepetsa ka majwe, hobane se kgotswe hore Johanne e ne e le moporofeta.”

₇Yaba ba araba ka hore ha ba tsebe moo e neng e etswa teng.

₈Jesu a re ho bona: “Le nna he, ha ke le bolelle hore na ke etsa tsena ka matla afe.”

₉Jwale Jesu a bolella batho setshwantsho sena: “Motho e mong a na a lema tshimo ya morara, a e etsa seahlolo le balemi, mme a eta nako e telele. ₁₀Ka nako ya teng, a roma mohlanka ho balemi, hore ba tle ba mo nee karolo ya ditholwana tsa tshimo, empa balemi ba mo kgakgatha, ba mo kgutlisa a se na letho. ₁₁A boela a roma mohlanka e mong, empa le eo ba mo kgakgatha, ba mo tlontlolla, ba mo kgutlisa a se na letho. ₁₂A eketsa a roma wa boraro, empa le eo ba mo ntsha maqeba, ba mo lahlela kantle.

₁₃“Jwale monga tshimo a re: ‘Ke tla etsa jwang? Ke tla roma mora wa ka eo ke mo ratang; mohlomong yena ba tla mo hlompha.’

₁₄“Empa ha balemi ba mmona, ba buisana ba le bang, ba re: ‘Enwa ke mojalefa; a re mmolayeng, hore lefa e tle e be la rona.’ ₁₅Yaba ba mo lahlela kantle ho tshimo, ba a mmolaya.

“Ekaba monga tshimo o tla ba etsa jwang? ₁₆O tla tla, a timetse balemi bao, tshimo a e nee ba bang.”

Yare ha ba utlwa hoo, ba re: “A ho se be jwalo!”

₁₇A ba tadima, a re: “Sena se ngotsweng ke ho reng:

₁₉Ditsebi tsa Molao le baprista ba baholo ba batla ho mo tshwara ka yona nako eo, hobane ba tsebile hore o boletse setshwantsho seo a lekanya bona, empa ba tshaba batho.

₂₀Ba disa Jesu ka hloko, mme ba roma dihlwela tse iketsang e ka ke batho ba lokileng, hore di tle di mo tshware ka dipuo, di mo neele mmusisi. ₂₁Tsa mmotsa, tsa re: “Moruti, re a tseba hore seo o se buang le seo o se rutang se nepahetse. Ha o ye ka tshobotsi, empa o ruta tsela ya Modimo ka nnete. ₂₂Na ho a dumelleha hore re ntshetse Sesare lekgetho kapa tjhe?”

₂₃Empa a lemoha bophokojwe ba bona, a re ho bona: ₂₄“Mpontsheng tjhelete ya denare. E na le setshwantsho sa mang le mongolo wa mang?”

Ba re: “Ke tsa Sesare.”

₂₅A re ho bona: “Jwale he, neang Sesare seng sa Sesare le Modimo seng sa Modimo.”

₂₆Ba sitwa ho mo tshwasa ka dipuo pontsheng ya setjhaba, ba makalla karabo ya hae, mme ba kgutsa.

₂₇Jwale ha tla ba bang ba Basaduke, ba latolang tsoho ya bafu, ba mmotsa, ₂₈ba re: “Moruti, Moshe o re ngoletse hore: ‘Ha ngwanabo monna a eshwa a ena le mosadi, a se na bana, ngwanabo mofu a kenele mohlolohadi eo, a tswalle ngwanabo bana.’ ₂₉Ho ne ho ena le bara ba motho ba supileng, yaba wa pele o a nyala, mme a shwa a se na bana. ₃₀Wa bobedi, ₃₁le wa boraro, le bona ba mo kenela; ka mokgwa o jwalo, ka bosupa ba bona ba eshwa ba sa siye bana. ₃₂Qetellong le yena mosadi a shwa. ₃₃Ha ho le jwalo, tsohong ya bafu mosadi e tla ba mohatsa ofe ho bona, kaha e bile mohatsa bona ka bosupa ba bona?”

₃₄Jesu a re ho bona: “Bana ba lefatshe ba a nyalana, ba a nyadiswa, ₃₅empa ba nang le tokelo ya ho ba le kabelo tsohong ya bafu mehleng e tlang, bona ha ba nyalane, ha ba nyadiswe. ₃₆Ba ke ke ba hlola ba eshwa hobane ba tshwana le mangeloi. Ke bana ba Modimo hobane ba tsositswe bafung. ₃₇Ha e le hore bafu ba tla tsoha, le Moshe o ne a ngole ditabeng tsa sehlahla se meutlwa, moo a reng: ‘Morena ke Modimo wa Aborahama, Modimo wa Isaka, le Modimo wa Jakobo.’ ₃₈Modimo hase wa bafu, ke Modimo wa ba phelang, hobane bohle ba phela ka yena.”

₃₉Ditsebi tse ding tsa Molao tsa araba, tsa re: “Moruti, o buile hantle,” ₄₀hobane di ne di ke ke tsa beta pelo ho mmotsa letho.

₄₁Jesu a re ho bona: “Batho ba ka le bolella hore Kreste ke mora wa Davida jwang? ₄₂Bukeng ya Dipesalema Davida ka boyena o re:

₄₅Ha batho bohle ba ntse ba mametse, Jesu a re ho barutuwa ba hae: ₄₆“Hlokomelang Ditsebi tsa Molao tse thabelang ho tsamaya di apere diaparo tse phuphuthang, tse ratang ho dumediswa mabaleng a metse, le ditulo tse hlomphehang matlung a thapelo, le ditulo tse kapele meketeng, ₄₇tse jang matlo a basadi ba bahlolohadi, mme di ntse di etsa dithapelo tse telele ka boikaketsi. Di tla ahlolwa ka ho fetisisa.”

₁Yare ha Jesu a phahamisa mahlo, a bona barui ba nokela dinyehelo tsa bona letloleng la matlotlo. ₂A bona le mosadi e mong wa mohlolohadi, ya futsanehileng, a nokela teng tjheletana tse pedi. ₃Jesu a re: “Kannete ke a le bolella: Mohlolohadi eo ya futsanehileng o noketse ho feta bohle, ₄hobane bao bohle ba noketse dinyehelo ba nkile bonkong, athe yena o noketse seo a se nkileng bohloking, sohle seo a neng a ena le sona, seo a neng a tla phela ka sona.”

₅Yare ha ba bang ba bua ka Tempele, ba re e kgabisitswe ka majwe a matle le ka dinyehelo, Jesu a re: ₆“Ha e le tseo le di bonang, ho tla tla matsatsi ao ka wona ho ke keng ha siuwa lejwe hodima lejwe le leng le sa heletswa.”

₇Ba mmotsa, ba re: “Moruti, dintho tsee di tla etsahala neng? Pontsho e tla ba efe ha tseo di se di tla etsahala?”

₈A re: “Hlokomelang hore le se ke la tshoha le kgeloswa, hobane ba bangata ba tla tla ka lebitso la ka, ba re: ‘Ke nna,’ ba be ba re: ‘Nako e atametse.’ Le se ke la ba sala morao. ₉Ha le utlwa mekgosi ya dintwa le meferefere, le se ke la tshoha, hobane eka kgona tseo di etsahale pele, empa bofelo bo ke ke ba eba teng hanghang.”

₁₀Yaba o re ho bona: “Ditjhaba di tla tsohelana matla, le mebuso e futuhelane. ₁₁Dibakeng tse ding ho tla ba le ditshisinyeho tse kgolo tsa lefatshe, le mafu a sewa, le ditlala, le matshabeho, le dipontsho tse kgolo tse tswang lehodimong.

₁₂“Empa pele ho tseo tsohle ba tla le tshwara, ba le hlorise, ba neelane ka lona matlung a thapelo le ditjhankaneng, ba le ise pela mahosi le babusisi ka baka la lebitso la ka. ₁₃Hona ho tla etsa hore le mpake. ₁₄Ka hona qetelang ka dipelong tsa lona hore ha le na ho itokisetsa boitshireletso ba lona, ₁₅hobane ke tla le nea mantswe le bohlale boo bahanyetsi bohle ba lona ba tla sitwa ho bo hanyetsa le ho bo lwantsha. ₁₆Batswadi ba lona, le bana babo lona, ba tla neelana ka lona, mme ba tla bolaya ba bang ba lona. ₁₇Bohle ba tla le hloya ka baka la lebitso la ka. ₁₈Empa ha ho ka ke ha lahleha leha e le qoba e le nngwe ya moriri hloohong tsa lona. ₁₉Ka tiisetso ya lona le tla ithuela bophelo.”

₂₀“Etlare ha le bona Jerusalema e teelwa hare ke mabotho, le tsebe hore ho ripitlwa ha yona ho atametse. ₂₁Mohlang oo ba leng Judea ba balehele dithabeng, ba hara motse ba tswe, mme ba naheng ba se ke ba kena ho wona, ₂₂hobane ke wona matsatsi a phetetso, ho tle ho phethahale tsohle tse ngotsweng. ₂₃Matsatsing ao ho tla ba madimabe baimana le batswetse. Tlokotsi e tla ba kgolo lefatsheng, le kgalefo ya Modimo setjhabeng sena. ₂₄Ba tla bolawa ka sabole, ba qhalanyetswe ditjhabeng tsohle e le bathopuwa, mme Jerusalema e tla hatakelwa ke baditjhaba, ho fihlela nako ya bona e fela.”

₂₅“Ho tla ba le dipontsho letsatsing, kgweding, le dinaleding. Lefatsheng ditjhaba di tla ba matswalong le tsielehong ka baka la modumo wa lewatle le maqhubu. ₂₆Batho ba tla akgeha ke tshabo le tebello ya tse tlang lefatsheng, hobane dinaledi tsa lehodimo di tla tsukutleha. ₂₇Jwale ba tla bona Mora Motho a etla a le lerung, ka matla le ka tlotla e kgolo. ₂₈E tle ere ha tsena di qala ho etsahala le pashalle, le phahamise dihlooho, hobane topollo ya lona e atametse.”

₂₉Jesu a ba bolella setshwantsho, a re: “Tadimang sefate sa feiye le difate tsohle: ₃₀Ha le di bona di fupa, le tseba ka bolona hore lehlabula le se le le haufi. ₃₁Ka mokgwa o jwalo le lona, ha le bona tsena di etsahala, le tsebe hore Mmuso wa Modimo o haufi.

₃₂“Ruri ke a le bolella hore moloko ona ha o ka ke wa fela tsena tsohle di eso etsahale. ₃₃Lehodimo le lefatshe di tla fela, empa mantswe a ka ha a ka ke a fela.”

₃₄“Itlhokomeleng, esere mohlomong dipelo tsa lona tsa imelwa ke botlofa le botahwa, le matshwenyeho a bophelo bona, mme letsatsi lela la le tsometsa, ₃₅hobane jwaloka sefi, le tla pitla bohle ba ahileng lefatsheng lohle. ₃₆Fadimehang ke hona, le rapele ka dinako tsohle, hore le tle le be le matla a ho phonyoha tsena tsohle, tse seng di tla etsahala, le a ho ema pela Mora Motho.”

₃₇Jesu o ne a ruta ka Tempeleng motsheare, empa bosiu o ne a etswa, a ya hlola thabeng e bitswang Thaba ya Mehlwaare, ₃₈mme batho bohle ba ne ba tsohella ho yena Tempeleng ho ya mo mamela.

₁Mokete wa bohobe bo sa lomoswang, o bitswang Paseka, o ne o atametse. ₂Kaha baprista ba baholo le Ditsebi tsa Molao ba ne ba tshaba batho, ba batla leqheka la ho bolaya Jesu. ₃Yaba Satane o kena ka ho Judase ya bitswang Isekariota, eo e neng e le e mong wa ba leshome le metso e mmedi. ₄A ya buisana le baprista ba baholo le balaodi ba Tempele kamoo a ka ba neelang yena kateng. ₅Ba thaba, mme ba dumellana le yena ho mo fa tjhelete. ₆A utlwisisa, a ba a batla monyetla wa ho ba neela yena letshwele le le siyo.

₇Jwale ha fihla letsatsi la bohobe bo sa lomoswang, leo konyana ya Paseka e neng eka kgona e hlajwe ka lona. ₈Jesu a roma Petrose le Johanne, a re: “Eyang, le re lokisetse Paseka, hore re tle re e je.”

₉Ba re ho yena: “O rata ha re e lokisetsa kae?”

₁₀A re ho bona: “Bonang, ha le kena motseng le tla kgahlana le motho ya jereng nkgo ya metsi; mo lateleng ho ya tlung eo a kenang ho yona. ₁₁Le re ho monga ntlo: ‘Moruti o re ho wena: Kamore e kae, eo nka jelang Paseka ho yona mmoho le barutuwa ba ka?’ ₁₂Motho eo o tla le bontsha kamore e kahodimo, e kgolo, e nang le thepa. Le lokisetse Paseka hona teng.”

₁₃Ba ya, ba fumana ho le jwalokaha a ba boleletse, mme ba lokisetsa Paseka.

₁₄Nako ha e fihlile, Jesu a qala ho ja le baapostola ba hae. ₁₅A re ho bona: “Ke lakaditse haholo ho ja Paseka ena le lona, ke eso hlokofatswe, ₁₆hobane ke a le bolella hore ha nka ke ka e ja ho fihlela e phethahatswa Mmusong wa Modimo.”

₁₇A nka senwelo, a leboha, a re: “Se nkeng, mme le se sielane, ₁₈hobane ke a le bolella, ho tloha jwale ha nka ke ka hlola ke enwa se tswang tholwaneng ya morara ho fihlela Mmuso wa Modimo o etla.”

₁₉A nka bohobe, a leboha, a bo ngwatha, a ba nea bona, a re: “Hona ke mmele wa ka o fanwang ka baka la lona; etsang hona hore le tle le nkgopole.”

₂₀Ha ba se ba jele, a etsa jwalo le ka senwelo, a re: “Senwelo sena ke selekane se setjha se tiisitsweng ka madi a ka, a tshollelwang lona. ₂₁Empa bonang, ya nkekang o na le nna mona tafoleng. ₂₂Ruri Mora Motho o ikela ho ya kamoo ho rerilweng kateng; leha ho le jwalo, ho madimabe motho ya mo ekang.” ₂₃Ba qala ho botsana hore na ekaba ke ofe ho bona ya tla etsa hona.

₂₄Kgang ya eba teng hara bona, ya hore na ke ofe ho bona ya ka nkwang e le e moholo. ₂₅Empa Jesu a re ho bona: “Mahosi a ditjhaba a a di busa, mme ba nang le matla hodima tsona ba bitswa bababalli. ₂₆Empa ho lona ho se be jwalo; e moholo hara lona a mpe a be jwaloka e monyenyane, mme ya tsamaisang a be jwaloka ya sebeletsang. ₂₇Ana e moholo ke ofe: Na ke ya jang kapa ya fepang? Na hase ya jang? Hara lona, nna ke jwaloka ya fepang. ₂₈Lona le ba ileng ba ema le nna ha ke ne ke lekwa. ₂₉Jwalokaha Ntate a nkgethetse Mmuso, le nna ke le kgethela wona, ₃₀hore le je, le nwe tafoleng ya ka Mmusong wa ka. Le tla dula diteroneng le ahlole meloko e leshome le metso e mmedi ya Iseraele.”

₃₁“Simone, Simone, bona, Satane o le kopile hore a le hlokole jwaloka koro, ₃₂empa ke o rapeletse hore o se ke wa fellwa ke tumelo. Jwale wena, ha o se o bakile, o matlafatse bana beno.”

₃₃Simone a re ho yena: “Morena, ke itokiseditse ho ya le wena tjhankaneng le lefung.”

₃₄Empa Jesu a re: “Petrose, ke a o bolella hore kajeno, pele mokoko o lla, o tla be o se o ntatotse hararo, o re ha o ntsebe.”

₃₅Jesu a re ho bona: “Ha ke ne ke le romile le se na sepatjhe, mokotla, le meqathatso, na le ile la haellwa ke letho?”

Ba re: “Le letho.”

₃₆A re ho bona: “Empa jwale, ya nang le sepatjhe a se nke, le wona mokotla ka mokgwa o jwalo. Ya hlokang sabole a rekise seaparo sa hae, a e reke. ₃₇Ke a le bolella hore se ngotsweng, se reng: ‘O baleletswe le baetsadibe’, eka kgona se phethahale ho nna, hobane se ngotsweng ka nna se tla phethahala.”

₃₈Yaba ba re: “Morena, bona, disabole tse pedi ke tsena.”

A re ho bona: “Ho lekane.”

₃₉Jesu a tswa, a ya Thabeng ya Mehlwaare ka tlwaelo ya hae, mme barutuwa ba hae ba mo latela. ₄₀Yare ha a fihla sebakeng seo, a re ho bona: “Rapelang, hore le se kene molekong.” ₄₁A sutha pela bona, sebaka se ka bang kaa ka sa lejwe ha le betswa, mme a kgumama, a rapela, ₄₂a re: “Ntate, ha o rata, ako tlose senwelo sena ho nna; feela ho etswe thato ya hao, e seng ya ka.” ₄₃Lengeloi la hlaha ho yena le etswa lehodimong, la mo matlafatsa. ₄₄Ha a le ditlallong tsa lefu a rapela ka ho fetisisa, mme mofufutso wa hae wa eba jwaloka marothodi a madi a rothelang fatshe.

₄₅Ha a rapetse a ya ho barutuwa, a ba fumana ba kgalehile ke maswabi, ₄₆mme a re ho bona: “Le robaletseng? Tsohang le rapele, hore le se kene molekong.”

₄₇Yare Jesu a sa bua, ha hlaha letshwele, mme e mong wa ba leshome le metso e mmedi ya bitswang Judase, o ne a le eteletse pele. Yaba o atamela ho Jesu, hore a mo ake. ₄₈Jesu a re ho yena: “Judase, na o ka eka Mora Motho ka kako na?”

₄₉Yare ha ba potapotileng Jesu ba bona se tla etsahala, ba re: “Morena, re ba hlathe ka sabole?” ₅₀Yaba e mong wa bona o se a hlatha mohlanka wa Moprista e Moholo, a mo poma tsebe ya letsoho le letona.

₅₁Jesu a re: “Tlohelang, ho lekane!” Yaba o ama tsebe ya hae, o a mo fodisa.

₅₂Jwale Jesu a re ho baprista ba baholo le balaodi ba Tempele ba tlileng ho mo tshwara: “Na ebe ke senokwane ha le tlile ka disabole le dikoto tjee? ₅₃Ke ne ke ntse ke ena le lona ka matsatsi wohle ka Tempeleng, ha le a ka la ntshwara! Empa nako ena ke ya lona le ya Matla a Lefifi.”

₅₄Yare hoba ba mo tshware, ba mo isa ha Moprista e Moholo. Petrose a latela a le sebakana. ₅₅Ha ba se ba besitse mollo hara lebala, mme ba dutse hammoho, Petrose a dula hara bona. ₅₆Lekgabunyane le leng ha le mmona a dutse mollong, la mo tadimisisa, la re: “Le enwa o ne a ena le yena.”

₅₇Empa a latola, a re: “Hela mosadi, ha ke mo tsebe!”

₅₈Ho se hokae e mong a mmona, a re: “Le wena o wa bona.”

Petrose a re: “He, monna, ha ke yena!”

₅₉Ha ho fetile nako e ka bang hora, e mong hape a tiisa, a re: “Kannete le enwa o ne a ena le yena, etswe ke Mogalelea.”

₆₀Empa Petrose a re: “Hela, monna, ha ke tsebe seo o se bolelang.” Hanghang, a sa bua, mokoko wa lla. ₆₁Yaba Morena o a reteleha, o tadima Petrose, mme Petrose a hopola polelo ya Morena, kamoo a ileng a re ho yena kateng: “Kajeno, pele mokoko o lla, o tla be o se o ntatotse hararo.” ₆₂A tswela kantle a lla habohloko.

₆₃Banna ba tshwereng Jesu ba mo soma, ba mo otla. ₆₄Ba ne ba mo kgurumetsa sefahleho, ba mmotsa, ba re: “Porofeta! Ke mang ya o otlileng?” ₆₅Ba mmuela le tse ding tse ngata ka ho mo nyefola.

₆₆Ha bo sele, lekgotla la baholo ba setjhaba la phutheha, le baprista ba baholo le Ditsebi tsa Molao. Ba tlisa Jesu kgotleng la bona, ₆₇ba re: “Haeba o le Kreste, re bolelle.”

A re ho bona: “Ha nka le bolella, ha le ka ke la ntumela, ₆₈mme ha nka le botsa, ha le ka ke la nkaraba. ₆₉Empa ho tloha jwale, Mora Motho o tla dula ka letsohong le letona la Modimo ya matla wohle.”

₇₀Jwale bohle ba re: “Ha ho le jwalo, na o Mora wa Modimo?”

Yena a re ho bona: “Le a bolela, ke yena.”

₇₁Ba re: “Re sa hloka bopaki ba eng? Re ikutlwetse molomong wa hae.”

₁Yaba lekgotla lohle le a ema, mme le mo isa ho Pilato. ₂La qala ho mo qosa, la re: “Re fumane monna enwa a kgelosa setjhaba sa rona, a thibela ha ho ntshetswa Sesare lekgetho, mme a ipolela hore ke Kreste, Kgosi.”

₃Pilato a mmotsa, a re: “Na o kgosi ya Bajuda?”

A mo araba, a re: “Wena o rialo.”

₄Pilato a re ho baprista ba baholo le ho matshwele: “Ha ke fumane molato ho motho enwa.”

₅Empa bona ba pheella, ba re: “O hlohleletsa setjhaba ka ho ruta Judea yohle, ho tloha Galelea ho fihlela kwano.”

₆Yare Pilato ha a utlwa, a botsa hore na motho eo ke Mogalelea na. ₇Ha a se a tsebile hore o pusong ya Heroda, a mo romela ho Heroda, kaha le yena a ne a le Jerusalema matsatsing ao.

₈Jwale Heroda a thaba haholo ha a bona Jesu, hobane e ne e le kgale a lakatsa ho mmona. O ne a utlwile tsa hae, mme a tshepile ho bona mohlolo o etswang ke yena. ₉Yaba Heroda o mmotsa potso tse ngata, empa Jesu a se ke a mo araba. ₁₀Baprista ba baholo le Ditsebi tsa Molao ba ne ba eme ba mo qosa ka matla. ₁₁Yare hoba Heroda le bahlabani ba hae ba mo nyedise, ba mo some, ba mo apesa seaparo se mahadihadi, mme Heroda a mo kgutlisetsa ho Pilato. ₁₂Ka lona letsatsi leo Heroda le Pilato ya eba metswalle, athe pele e ne e le dira.

₁₃Jwale Pilato a bitsa baprista ba baholo, le babusi, le batho, ₁₄a re ho bona: “Le tlisitse monna enwa ho nna e le ya kgelosang batho, empa bonang, nna, ha ke mmotsisisa moo le leng teng, ha ke a fumana molato ho yena ka tseo le mo qosang ka tsona. ₁₅Le Heroda ha a ya o fumana, hobane o mo kgutliseditse ho rona. Ha ho letho leo a le entseng le ka lokelang lefu. ₁₆Ka baka leo, ke tla mo shapa, ke nto mo lokolla.” ₁₇Jwale o ne a tlameha ho ba lokollela motho a le mong ka mokete o mong le o mong wa Paseka.

₁₈Empa bohle ba howa hammoho, ba re: “Bolaya enwa, o re lokollele Barabase!” ₁₉Barabase eo o ne a hlahletswe tjhankaneng ka baka la moferefere o ileng wa eba teng hara motse le ka baka la polao.

₂₀Pilato a bua le bona hape, a rata ho lokolla Jesu. ₂₁Empa ba howa, ba re: “Mo thakgise, mo thakgise!”

₂₂A re ho bona kgetlo la boraro: “Hobaneng? O entse bobe bofe? Ha ke a fumana letho ho yena le ka lokelang lefu; ka baka leo, ke tla mo shapa, ke nto mo lokolla.”

₂₃Empa ba pheella ho howa ka mantswe a phahameng, ba kopa hore a thakgiswe; yaba mehoo ya bona e a mo hlola. ₂₄Pilato a ahlola ka hore kopo ya bona e phethwe. ₂₅A lokolla eo ba neng ba mo kopa, ya neng a hlahletswe tjhankaneng ka baka la moferefere le polao, a ba neela Jesu ho etsa borata ka yena.

₂₆Ha ba ntse ba qhoba Jesu, ba tshwara motho e mong wa Sirene, ya bitswang Simone, ya neng a etswa naheng, ba mo jarisa sefapano, a latela Jesu. ₂₇Jesu a latelwa ke letshwelehadi la batho, le basadi ba neng ba mo hlomohetse, ba mo llela. ₂₈Jesu a retelehela ho bona, a re: “Baradi ba Jerusalema, se nteleleng; iteleleng, le llele le bana ba lona, ₂₉hobane bonang, matsatsi a ya tla, ao ka wona ho tla thwe: ‘Ho lehlohonolo dinyopa, le popelo tse sa kang tsa tswala, le matswele a sa kang a anyesa.’ ₃₀Ke moo ba tla qala ho re ho dithaba:

₃₂Ba bang ba babedi, bao e neng e le disenyi, ba iswa ho ya bolawa le yena. ₃₃Ha ba fihlile sebakeng se bitswang Lehata, ba mo thakgisa teng le disenyi tseo, se seng ka ho letona, se seng ka ho le letshehadi. ₃₄Jesu a re: “Ntate, ba tshwarele, hobane ha ba tsebe seo ba se etsang.” Jwale ba arolelana diaparo tsa hae ka lotho.

₃₅Batho ba ne ba eme ba tadimile. Le babusi ba ne ba mo phoqa, ba re: “O pholositse ba bang; haeba e le Kreste, mokgethwa wa Modimo, a ipholose!”

₃₆Le bahlabani ba mo soma; ba atamela, ba mo fa asene, ₃₇mme ba re: “Ha o le kgosi ya Bajuda, ipholose he!”

₃₈Kahodimo ho yena ho ne ho ena le lengolo le reng: enwa ke kgosi ya bajuda.

₃₉Se seng sa disenyi tse fanyehilweng se ne se mo nyefola, se re: “Na ha o Kreste na? Ipholose, le rona o re pholose!”

₄₀Empa se seng sa araba, sa se kgalemela, sa re: “Na wena ha o tshabe Modimo, empa le le kahlolong e tshwanang? ₄₁Rona re hlile re ahlotswe ka toka, hobane re amohela moputso wa diketso tsa rona; athe yena ha a ka a etsa letho le sa lokang.”

₄₂Sa ba sa re: “Jesu, ako nkgopole ha o etla ka matla a hao a borena.”

₄₃A re ho sona: “Ruri ke a o bolella, kajeno o tla ba le nna paradeising.”

₄₄E ne e ka ba hora ya leshome le metso e mmedi motsheare, ha lefifi le aparela naha yohle ho fihlela ka hora ya boraro motsheare wa mantsiboya, ₄₅letsatsi le ntse le fifetse; yaba lesira la Tempele le taboha ka lehare. ₄₆Jesu a meketsa ka lentswe le phahameng, a re: “Ntate, ke bea moya wa ka matsohong a hao.” Hoba a rialo, a neela moya.

₄₇Yare ha molaodi wa lebotho la ba lekgolo a bona se etsahetseng, a tlotlisa Modimo, a re: “Kannete motho enwa o ne a lokile.” ₄₈Matshwele wohle a neng a phuthehetse ho tla bona, hoba a bone se etsahetseng, a kgutla a swabile haholo. ₄₉Empa metswalle yohle ya Jesu, le basadi ba neng ba mo latetse ho tloha Galelea, ba ne ba eme sebakana, mme ba bona ketsahalo tsena.

₅₀Ho ne ho ena le monna ya bitswang Josefa, monna ya molemo, ya lokileng, mme e le setho sa lekgotla. ₅₁E ne e le wa Arimathea motse wa Bajuda, mme o ne a lebeletse Mmuso wa Modimo. Feela yena o ne a sa dumellana le lekgotla le diketso tsa lona. ₅₂Monna eo a ya ho Pilato, a kopa setopo sa Jesu, ₅₃a se fanyolla, a nto se phuthela ka lesela, a se bea ka lebitleng le betlilweng lefikeng, leo ho neng ho eso ka ho epelwa motho ho lona. ₅₄E ne e le letsatsi la tlhekelo, mme e ne e se e tla ba Sabatha.

₅₅Basadi ba neng ba tlile le Jesu ba etswa Galelea, ba latela Josefa, ba bona lebitla le kamoo setopo sa hae se beilweng kateng. ₅₆Ba kgutla, ba lokisa dinoko tse monko o monate le setlolo, mme ba phomola ka Sabatha ho ya ka Molao.

₁Ka letsatsi le qalang beke ba ya lebitleng e sa le kameso, ba nkile ditlolo tseo ba di lokisitseng. ₂Ba fumana lejwe le phikoloseditswe thoko le lebitla. ₃Ha ba kena, ba se ke ba fumana setopo sa Morena Jesu. ₄Yare ba sa tsielehile ke hoo, bonang, banna ba babedi ba diaparo tse hadimang, ba ema pela bona. ₅Yare ha ba tshoha, mme ba tadima fatshe, banna bao ba re ho bona: “Ya phelang le mmatlelang hara bafu? ₆Ha a yo mona, o tsohile bafung. Hopolang kamoo a neng a le bolelle kateng a sa le Galelea, ₇ha a re: ‘Eka kgona Mora Motho a neelwe matsohong a baetsadibe, mme a thakgiswe, a nto tsoha ka tsatsi la boraro.’ ” ₈Ba hopola dipolelo tsa Jesu.

₉Hoba ba kgutle lebitleng, ba tsebisa ba leshome le motso o mong le ba bang bohle ditaba tseo tsohle. ₁₀E ne e le Maria wa Magadala, le Johanna, le Maria, mma Jakobo, le basadi ba bang ba neng ba ena le bona, ba neng ba bolella baapostola ditaba tseo. ₁₁Dipolelo tseo ya ka tshomo ho bona, mme ba se ke ba ba kgolwa. ₁₂Empa Petrose a ema, a mathela lebitleng; ha a fihla a nyarela, a bona masela feela; yaba o tloha a maketse ke se etsahetseng.

₁₃Ka lona letsatsi leo barutuwa ba babedi ba ne ba eya motsaneng o bitswang Emmause, o bohole ba dikilomethara tse leshome le motso o mong ho tloha Jerusalema. ₁₄Ba ne ba qoqa ka diketsahalo tseo tsohle. ₁₅Ha ba ntse ba qoqa jwalo, ba buisana, Jesu ka sebele a atamela, a tsamaya le bona, ₁₆empa mahlo a bona a rebeha, ba se ke ba mo tseba.

₁₇A re ho bona: “Ditaba tseo le tsamayang le buisana ka tsona ke dife?”

Ba ema tlekelele! Ba swabile. ₁₈E mong wa bona, ya bitswang Keleopase, a mo araba, a re: “Na ebe ke wena feela o leng moeti moo Jerusalema, ya sa tsebeng tse etsahetseng teng matsatsing aa?”

₁₉A re ho bona: “Dife?”

Ba re ho yena: “Tsa Jesu wa Nasaretha, eo e neng e le monna wa moporofeta ya matla diketsong le dithutong pela Modimo le pela setjhaba sohle, ₂₀kamoo baprista ba baholo le babusi ba rona ba neelaneng ka yena hore a ahlolelwe lefu kateng, ba bileng ba mo thakgisa. ₂₁Rona re ne re tshepile hore ke yena ya tla lopolla Iseraele. Ntle ho tsena tsohle, lena ke letsatsi la boraro tsena di etsahetse. ₂₂Empa basadi ba bang ba habo rona ba re makaditse. Ba ile ba tsohella lebitleng, ₂₃feela ba se ke ba fumana setopo sa hae. Ba kgutla ba re ba bone mangeloi a reng o a phela. ₂₄Le ba bang ba neng ba ena le rona ba ile ba ya lebitleng, mme ba fumana ho le jwalokaha basadi ba ile ba bolela, empa yena ha ba a ka ba mmona.”

₂₅A re ho bona: “Jo, dithoto tse pelo di diehang ho dumela tsohle tseo baporofeta ba ileng ba di bolela! ₂₆Na Kreste o ne a sa tlameha ho hlokofatswa tjee, a nto kena tlotleng ya hae?” ₂₇A qala ka Moshe le ka Baporofeta bohle, a ba qaqisetsa tse amanang le yena, tse Mangolong wohle.

₂₈Ha ba atamela motsaneng oo ba yang ho wona, Jesu a etsa sa mokana a fetela pele. ₂₉Ba mo qophella, ba re: “Hlola le rona, hobane letsatsi le se le rapame, mme e se e tla ba mantsiboya.” Yaba o a kena, o hlola le bona.

₃₀Eitse ha a le dijong le bona, a nka bohobe, a boka, a bo ngwatha, a ba nea bona. ₃₁Jwale ha re etlo! mahlong, mme ba mo tseba, empa a ba nyamella. ₃₂Ba botsana, ba re: “Ana pelo tsa rona di ne di sa tjhese ka ho rona ha a bua le rona tseleng, a ntse a re hlalosetsa Mangolo na?”

₃₃Ba ema ka yona nako eo, ba kgutlela Jerusalema. Ba fumana ba leshome le motso o mong le ba nang le bona ba phuthehile, ₃₄ba bile ba bolela hore Morena o fela a tsohile, mme o iponahaditse ho Simone. ₃₅Le bona ba pheta tse etsahetseng leetong la bona, le kamoo ba ileng ba mo tseba kateng, ha a ngwatha bohobe.

₃₆Yare ba sa bua jwalo, Jesu a ema hara bona, a re ho bona: “Kgotso e be le lona!”

₃₇Empa ba tshoha, ba tshaba, ba hopola hore ba bona sethotsela. ₃₈A re ho bona: “Le ferekanetseng? Ke ka baka lang le hlahelwang ke dipelaelo dipelong tsa lona? ₃₉Bonang matsoho a ka le maoto a ka, hore ke nna ka sebele. Ntoboketseng le utlwe, hobane sethotsela ha se na nama le masapo, kamoo le mponang ke ena le tsona kateng.”

₄₀Hoba a rialo, a ba bontsha matsoho le maoto a hae. ₄₁Yare ha ba ntse ba sa dumele ke thabo, ba maketse, a re ho bona: “Na le na le ho ka jewang moo?” ₄₂Ba mo nea leqa la tlhapi e besitsweng. ₄₃A le nka, a le ja ba mo shebile.

₄₄Jwale a re ho bona: “Ke wona mantswe a ka, ao ke ileng ka le bolella wona ha ke sa na le lona, hore eka kgona ho phethahale tsohle tse ngotsweng Molaong wa Moshe, le Baporofeteng, le Dipesalemeng ka nna.”

₄₅Yaba o ba bula dikelello hore ba utlwisise Mangolo. ₄₆A re ho bona: “Ho ngotswe jwalo hore eka kgona Kreste a hlokofatswe, a tsohe bafung ka tsatsi la boraro, ₄₇le hore ka lebitso la hae, ditjhaba tsohle di phatlalletswe pako le tshwarelo ya dibe, ho qala Jerusalema. ₄₈Lona le dipaki tsa ditaba tsena. ₄₉Bonang, nna ke tla le romella seo Ntate a le tshepisitseng sona, empa le dule motseng mona ho fihlela ha le apeswa matla a tswang hodimo.”

₅₀Jwale Jesu a ba isa kantle ho motse, a ya le bona ho ya fihla Bethania, a phahamisa matsoho, a ba hlohonolofatsa. ₅₁Eitse ha a ntse a ba hlohonolofatsa, a tloha ho bona, a nyollelwa lehodimong. ₅₂Hoba ba mo kgumamele, ba kgutlela Jerusalema ka nyakallo e kgolo, ₅₃mme ba nna ba eba ka Tempeleng ka nako tsohle, ba boka Modimo.