To The Word – Day 96

Jwaloka ditsokotsane

tse ferellang naheng ya Borwa,

ya futuhang o tla hlaha

a etswa lehwatateng,

a hlahe a etswa naheng,

naheng ya matshabeho.

₂Ke bontshitswe pono e tshosang:

Moeki o a eka,

motimetsi o a timetsa.

Futuha wena Elame!

Thibella wena Media!

Matshabeho wohle ke tla a fedisa!

₃Theka la ka le opa habohloko,

ke tshwerwe ke mahlaba

sa mosadi a kena tlung,

ke kotlobane

hoo ke sitwang ho utlwa,

ke tshohile

hoo ke sitwang ho bona.

₄Pelo ya ka e a uba,

ke thothomela ke tshabo,

shwalane eo ke e hlolohetsweng

e nkenyeditse letswalo.

₅Dijo di se di lokile,

meseme e se e adilwe,

ho a jewa, ho bile ho a nowa.

Emang lona mahosana,

thebe tsa lona le di tlotse ka ole.

₆Morena o itse ho nna:

“Tsamaya o yo bea sebohodi,

se tle se behe seo se se bonang.

₇Ha se bona bapalami

ba dipere ka bobedi,

se bona bapalami

ba ditonki le ba dikamele,

se ke se be sedi, se be sedi haholo.”

₈Sebohodi sa hlaba mokgosi, sa re:

“Monga ka, ke qeta letsatsi

ke eme hodima tora,

masiu a ntshella ke ntse ke lebetse.”

₉Bonang, ho tla bapalami

ba dipere ka bobedi!

Sebohodi sa boela sa bua, sa re:

“Babilona e wele! Babilona e wele!

Tshwantsho tsa medimo ya bohata,

medimo e betlilweng,

di bjaramane, di hasantswe fatshe!”

₁₀Oho, tjhaba sa ka

se ripitlilweng seotlong,

jwaloka koro,

ke le bolella seo ke se utlwileng,

ke se utlwa ho Morena wa mabotho,

Modimo wa Iseraele.

Ke howeletswa ke motho a le Seire, o re:

“Sebohodi,

ekaba bosiu bo tla sa neng?

Sebohodi,

ekaba bosiu bo tla sa neng?”

₁₂Sebohodi sa araba, sa re:

“Tsatsi le tla tjhaba,

ho boele ho phirime.

Ha le rata ho botsa, botsang!

Le boele le kgutle

le tlo botsa hape!”

Lona mekoloko ya batsamai,

batsamai ba Badedane,

robaletsang matswatlareng a Arabia.

₁₄Lona baahi ba naha ya Tema,

tlisang metsi ho ba nyorilweng;

tlisang dijo ho baphaphathehi.

₁₅Ba balehile sabole

e ntshitswe selateng,

ba baleha diqha le malakabe a ntwa.

Ebe jwale molato ke ofe

ha e le moo

le hlweletse hodima matlo?

₂Wena motse o tletseng meferefere!

Motse wa lerata le medidietsane!

Babolauwa ba hao

ha ba a bolawa ka sabole,

babolauwa ba hao

ha ba a shwela ntweng.

₃Babusi ba hao bohle

ba balehile mmoho,

ba thopilwe ba eso fule ka diqha.

Bohle ba fumanweng kahare ho wena

ba tshwerwe mmoho,

le hoja ba ne ba balehetse hole.

₄Ka baka leo, ke ile ka re:

“Se keng la ntjheba,

ke lle sa mmokotsane;

se ikgathatseng ka ho ntshedisa,

ha moradi wa tjhaba sa heso

a timeditswe.”

₅Tsatsi lena ke la mekutu,

la ho hatakelwa, le la tshabo,

tsatsi le laotsweng ke Morena,

Modimo wa mabotho,

ka Kgohlong ya Pono,

rata la ho heletswa ha marako

le tla utlwahala kwana mahaheng.

₆Elame ya jara sehlajwe sa metsu,

ya futuha le ka bapalami ba dipere,

Kire yona ya ntsha thebe ya yona.

₇Kgohlo tsa hae tse ntle

di tletse kariki tsa ntwa,

bapalami bona ba teile theko

kgorong ya motse,

₈qhobosheane tsa Juda

tsona di heleditswe.

Tsatsing leo la hlahloba hlomo

di le ka Tlung ya Moru,

₉la bona bongata ba kgeo tsa lerako

la Motse wa Davida,

la thiba metsi a Letshana le Katlase.

₁₀Matlo a Jerusalema le a badile,

la heletsa matlo hore le tiise lerako.

₁₁Pakeng tsa marako a mabedi

la haha letamo,

la le hahela ho thibela metsi

a Letshana la Kgale;

empa la se ke la natsa

Moetsi wa lona,

kapa la tsotella

ya le rerileng kgalekgale.

₁₂Ka tsatsi leo Morena,

Morena wa mabotho, a le bitsa,

a le bitsetsa ho lla

le ho ba bofifing,

ho beola moriri

le ho apara tse mahwashe.

₁₃Empa ya eba thabo,

ya eba nyakallo,

ha hlajwa makgomo,

ha hlajwa manku,

ha jewa dinama, ha nowa veine!

“A re jeng, re inwelleng,”

lona la rialo,

“hobane hosasane

re tla be re shwele!”

“Eya ho Shebena,

e leng ramatlotlo,

le molebedi wa ntlo ya kgosi,

o re ho yena:

₁₆‘O etsang moo,

ka tumello ya mang,

ha o ntse o itjhekela lebitla,

o le tjheka moo ho phahamileng,

o ipetlela lebitla

la phomolo lefikeng?’

₁₇“Bona, Morena o kgatheng

la hoo tshwara,

a o akgele hole, wena senatla towe!

₁₈Ruri o tla o phuthaphutha

ka thata sa pidikwane,

a o lahlele hara naha e nammeng.

O tla ya shwela naheng eo,

le kariki tseo o itlotlang ka tsona

di felle moo,

wena ya tlontlolotseng

lapa la monga hao.

₁₉Ke tla o tlosa tulong tsa hao,

ke o hlobodise boemo ba hao.

Bokollang

lona dikepe tsa Tarashishe,

hobane Tire e ripitlilwe,

ha ho sa na ntlo,

ha ho sa na kou ya dikepe!

Tsebiso ena

e tswa naheng ya Kitime,

e senoletswe ba naha ya Tire.

₂Kgutsang

lona ba ahileng pela lebopo,

kgutsang lona bahwebi ba Sidone,

ba ruisitsweng

ke ba tshelang mawatle.

₃Koro ya Shihore

e tshedisitswe mawatle a maholo,

tjhai ya phula ya Nile

ya tlisetsa Tire mouno,

Tire ya ruiswa

ke ho hweba le tjhaba tse ding.

₄Ako itshwabele wena Sidone,

wena o leng qhobosheane ya lewatle,

hoba lewatle le buile, la re:

“Ha ke eso be le mahlaba a pelehi,

le ho tswala ha ke eso tswale,

ha ke eso hodise bara,

le baradi ha ke eso ba hodise.”

₅Ha Baegepeta ba hlabelwa mokgosi

ba tla tshoha ha ba utlwa tsa Tire.

₆Tshelelang mose ho Tarashishe;

bokollang lona ba ahileng

pela lebopo la lewatle.

₇Na oo ke wona motse wa lona

wa menyaka,

motse o theilweng

mehleng ya kgalekgale,

o ila romela baahi

ho ya aha naheng tse hole?

₈Ya ileng a rerela Tire tsee ke mang?

Tire,

motse wa ho hlomamisa dikgosi,

oo bahwebi ba wona

e leng mahosana,

oo bo-radikgwebo ba wona

ba tummeng fatsheng lohle?

₉Ke Morena wa mabotho

ya rerileng hona,

ho fedisa boikgantsho

ba bohle ba tlotlwang,

ho kokobetsa bohle

ba tummeng lefatsheng.

₁₀Wena moradi wa Tarashishe

haola naheng ya heno,

o haole ho yona

jwaloka noka ya Nile,

hobane ya o thibelang ha a sa le yo.

₁₁Morena o otlolotse tsoho la hae,

a le otlolla hodima lewatle,

a etsa hore mebuso e thothomele.

Malebana le Kanana

Morena o entse taelo,

hore qhobosheane tsa yona

di ripitlwe.

₁₂Yaba o re:

“Wena moradi wa Sidone

ya ripitlilweng,

o ke ke wa hlola o nyakalla hape!

Leha o ka tsamaya

wa tshelela Kitime,

le teng phomolo

o ke ke be wa e bona!”

₁₃Tadima naha ya Bakalatiya,

ya tjhaba seo e seng e se letho!

Baasiria ba e fetotse

hwatata la dibatana,

ba haha tora tsa bona tsa dibohodi,

ba heletsa qhobosheane tsa yona,

ba e siya e fetohile masupi.

₁₄Bokollang

lona dikepe tsa Tarashishe,

hoba qhobosheane ya lona

e ripitlilwe.

₁₆“Nka harepa ya hao

o potolohe le motse,

wena seotswa towe,

o seng o sa hopolwe;

tsanyaola melodi,

o bine dipina tse ngata,

o tle o boele o hopolwe hape.”

₁Morena o tla falatsa lefatshe,

a le timetse,

sebopeho sa lona a se senye,

baahi ba lona a ba hasanye.

₂Ho tla ba jwalo ho moprista

le ho setjhaba,

ho mohlanka le ho monga hae,

ho lekgabunyane

le ho mofumahadi wa lona;

ho be jwalo ho moreki

le ho morekisi,

ho moadimi le ho moadimuwa,

ho morui le ho mofutsana.

₃Fatshe le tla falatswa kahohlehohle,

tsohle tsa lona le di amohuwe,

hobane Morena o buile jwalo.

₄Fatshe le bofifing, le bile le a pona,

fatshe le a tepella, le bile le a pona,

bahlomphehi ba lefatshe

le bona ba a tepella.

₅Fatshe le silafaditswe

ke baahi ba lona,

ba tlotse melao, ba robile ditaelo;

ba sentse selekane sa kamehla yohle.

₆Kahoo thohako e aparetse lefatshe,

baahi ba lona

ba jere molato wa bona,

ba tjheswa ke lebatama,

ho sale ba mmalwana.

₇Veine e ntjha e fofile,

fate tsa morara di ponne,

ba thabileng

ba aparelwa ke maswabi.

₈Meropa ya thabo

e kgaotsa ho tidinya,

mehoo ya ba nyakaletseng

le yona e a fela,

pina tsa diharepa

le tsona di kgaoditse.

₉Veine e fedile

le dipina ha di sa le yo,

dino tse tahang

ke mohalakane ho ba di nwang.

₁₀Motse wa mafeela o fetohile lesupi,

matlo wohle a tinketswe,

hore ha se be ya ka kenang.

₁₁Diterateng tsohle

batho ba llela veine,

menyaka yohle le yona e se fedile,

lefatsheng lohle

medidietsane ha e sa utlwahala.

₁₂Hara motse ho setse masupi feela,

menyako ya motse

e robehile dikotwana.

₁₃Ho tla ba jwalo lefatsheng,

hara ditjhaba,

ho be jwaloka fate sa mohlwaare

ha se hlohlorwa,

ho kgwahlapiswa morara o setseng

ha ho kotulwa.

₁₄Ba tla howeletsa ka mantswe a phefa,

ba binele Morena ya tlotlehang,

ba howe haholo,

ba howe ho tloha bophirimela.

₁₅Lona ba ka botjhabela

tlotlisang Morena,

le lona ba dihlekehlekeng,

le tlotlise bitso la Morena,

Modimo wa Iseraele.

₁₆Pina tse tswang

pheletsong tsa lefatshe

re di utlwile:

“Tlotla e ke e iswe

ho Ya Lokileng!”

Empa nna ke re: “Ke fedile!

Ke fedile! A nna elwa!”

Mahlabaphiyo

a ntsa tswela pele ho eka,

bohlabaphiyo ba wona

bo ntse bo hatela pele!

₁₇Tshabo le mohohlo le leraba

di o emetse,

di emetse wena ya ahileng lefatsheng.

₁₈Ya balehang mokgosi

o bakwang ke tshabo,

yena o tla wela kahara mohohlo;

ya ngwangwarelang

hore a tswe ka mohohlong,

raba le tjhehilweng

yena le tla mo tshwasa.

Pula ya ditlwebelele

e tla tsholoha e etswa hodimo,

metheo ya lefatshe

le yona e tla reketla.

₁₉Fatshe lohle le tla ripitlwa,

le ripitlwe,

fatshe lohle le tla phatloha,

le phatlohe,

fatshe le tla sisinngwa

madulong a lona,

le sisinngwe.

₂₀Fatshe le tla thekesela,

le kapeye sa letahwa,

le tsokotsehe

sa lephephe la molebedi;

dibe tsa lona di tla le imela haholo,

ebe le a wa,

ha le hlole le tsoha hape.

₂₁Ka tsatsi leo, Morena o tla otla,

a otle mabotho

a hodimo lehodimong,

kgosi tsa lefatshe

a di otlele lefatsheng.

₂₂Kgosi di tla kgobokanngwa tsohle

di be mmoho,

di kgobokanngwe sa batshwaruwa

ba le ka mohohlong,

ebe di ya kwallwa ka tjhankaneng,

kamora matsatsi a mangata

di nto newa kotlo.

₂₃Kgwedi e tla fifala,

tsatsi le ipate sefahleho,

ha Morena wa mabotho

a busa Sione le Jerusalema,

baholo a ba senolela tlotla ya hae.

₁Oho, Morena,

ke wena Modimo wa ka,

ke tla o tlotla,

ke rorise lebitso la hao,

hobane wena o entse dimakatso,

merero ya hao ya kgale

e a tshepeha, ke ya nnete.

₂Wena o fetotse motse

qubu ya majwe,

motse o haheleditsweng

wa o fetola lesupi,

motse wa bokgosi wa baditjhaba

ha e sa le motse,

le ho tsoswa

o ke ke wa hlola o tsoswa.

₃Kahoo ditjhaba tse matla

di tla o tlotlisa,

metse ya tjhaba tse sehloho

e o tshabe,

₄hobane o bile setshabelo

ho mafutsana,

wa ba setshabelo

ho bahloki tsietsing tsa bona,

wa ba mosireletsi

nakong ya difefo,

wa ba moriti

hara lebatama la letsatsi.

Moya wa ya sehloho

o ka sefefo se thula lebota,

₅o ka lebatama

la letsatsi lehwatateng.

Rata la baditjhaba o tla le fedisa;

jwalokaha leswiti

le kokobetsa motjheso,

le pina ya ya sehloho

e tla fediswa jwalo.

₆Thabeng ena Morena wa mabotho

o tla etsa mokete,

a etsetse tjhaba tsohle

mokete wa dimonate,

a o etse ka veine e ritelehile,

dijo di le monate, veine e ritelehile.

₇Thabeng ena o tla tlosa lesira,

le fifaditseng tjhaba tsohle,

a tlose lesela

le fifaditseng ditjhaba tsohle.

₈Morena Modimo o tla fedisa lefu,

le felle ruri,

a hlakole meokgo

fahlehong tsa batho bohle,

a tlose dihlong

tjhabeng sa hae fatsheng lohle,

hobane Morena o buile jwalo.

₉Ka tsatsi leo, batho ba tla re:

“Ruri enwa ke Modimo wa rona,

re ile ra mo tshepa,

o re pholositse;

enwa ke Morena,

re ile ra mo tshepa,

a re nyakalleng,

re thabele ha a re pholositse.”

₁₀Morena o tla sireletsa thaba ena,

Bamoabe bona a ba hatakele,

a ba hatakele sa mmoko

o hatakellwa moraheng.

₁₁Leha ba ka phakalatsa

matsoho a bona hodima moraha,

ba a phakalatsa sa sehlapi se sesa,

Morena o tla fedisa

boikgantsho ba bona,

le hoja matsoho a bona a le bohlale.

₁₂Qhobosheane

e marako a phahameng

o tla e heletsa,

a e heletse, e burame fatshe,

a e heletse, e fetohe lerole.

Morena, ako utlwe thapelo ya ka,

o sekehele thapedi ya ka tsebe;

o nkarabe

ka baka la botshepehi ba hao,

le ka baka la ho loka ha hao.

₂O se ke wa qosa mohlanka wa hao,

hobane ho wena

ha ho ya lokileng.

₃Sera se a ntelekisa,

se nkgatakella fatshe,

se mphedisa lefifing

jwaloka ba shweleng kgalekgale.

₄Moya wa ka o imetswe,

pelo ya ka e thethefetse,

e thethefetse ka sefubeng sa ka.

₅Ke hopola ditshiu tsa boholoholo,

ke lohotha diketso tsa hao tsohle,

ke nahana mesebetsi,

mesebetsi ya matsoho a hao.

₆Ke phahamisa matsoho a ka,

ke a phahamisetsa ho wena,

moya wa ka o o nyoretswe

jwaloka lefatshe le omeletseng.

₇Morena, ako nkarabe kapele;

moya wa ka o a tepella.

O se ke wa mpatela

sefahleho sa hao,

ke se ke ka tshwana

le ba theohelang lebitleng.

₈Etsa hore ke tsebe mohau wa hao,

ke o tsebe e sa le hoseng,

hobane ke o tshepile;

mpontshe tsela

eo nka tsamayang ka yona,

hobane ke o rapela

ka moya wa ka wohle.

₉Morena, ako nnamolele,

o nnamolele direng tsa ka,

hobane ke tshabetse ho wena.

₁₀Nthute ho phetha thato ya hao,

hobane ke wena Modimo wa ka.

Moya wa hao o motle

o ke o ntsamaise,

o ntsamaise tseleng e bataletseng.

₁₁Morena, o tla nnea bophelo

ka baka la lebitso la hao,

o ntopolle matshwenyehong

ka baka la ho loka ha hao.

₁₂Ka baka la mohau wa hao ho nna,

o tla timetsa dira tsa ka,

o fedise bohle ba ntwantshang,

hobane nna ke mohlanka wa hao.