Job 7

₁“'n Mens moet hard werk op die aarde,

sy dae is so lank soos 'n dagloner se dae.

₂'n Mens is soos 'n slaaf wat wens

dat hy in die skaduwee kan kom,

hy wag vir sy beloning, soos 'n dagloner.

₃So het God vir my ook maande

en nagte lank laat swaarkry.

₄Wanneer ek gaan lê, dan vra ek:

‘Wanneer kan ek opstaan?’

Maar die nag is lank, en ek hou aan

om rond te rol totdat dit lig word.

₅My hele liggaam is vol wurms en stof,

my vel bars, en die vuil bloed vloei daaruit.

₆My dae gaan vinniger verby as 'n wewerspoel,

my lewe is amper verby, ek kan niks hoop nie.

₇Onthou, my lewe is soos die wind,

dit sal nie weer goed gaan met my nie.

₈Die oë wat my nou sien,

sal my nie weer sien nie.

Terwyl julle kyk na my,

sal ek skielik nie meer daar wees nie.”

₉“'n Wolk word kleiner en dit verdwyn.

So verdwyn iemand wat sterf,

hy kom nie op uit die doderyk nie.

₁₀Hy kom nie terug na sy huis nie,

die mense van sy woonplek

onthou hom nie meer nie.

₁₁Daarom kan ek nie my mond hou

en stilbly nie,

ek moet praat, want ek kry swaar.

Ek moet kla, want dit gaan sleg met my.

₁₂Is ek regtig so gevaarlik soos die see

of soos 'n watermonster?

Ek vra dit, want U staan wag by my.

₁₃Wanneer ek dink dat dit beter

sal gaan met my as ek op my bed gaan lê,

en dat ek dan nie so sleg sal voel nie,

₁₄dan laat U my skrik

vir die dinge wat ek droom,

dan laat U my bang word

vir die dinge wat ek sien

wanneer ek droom.

₁₅Dit sal vir my beter wees

wanneer iemand my verwurg.

Dit is beter vir my om dood te wees

as om so te lewe.

₁₆Ek haat dit om so te lewe,

ek wil nie aanhou lewe nie.

U moet my los,

my lewe is nie soos dit moet wees nie.

₁₇Hoekom is 'n mens vir U belangrik,

hoekom dink U aan hom?

₁₈Hoekom kyk U elke dag wat hy doen,

hoekom hou U aan om hom te toets?

₁₉Hoekom kyk U nie weg van my nie,

hoekom los U nie vir my nie?

Gee vir my tyd sodat ek my spoeg kan insluk!

₂₀As ek sonde gedoen het,

wat kan ek aan U doen,

U wat aanhou kyk

wat 'n mens doen?

Hoekom het U my geskiet,

hoekom wil U my nie meer dra nie?

₂₁Hoekom vergewe U nie my sonde nie,

hoekom vergeet U nie

dat ek verkeerd gedoen het nie?

Ek sal nou in die stof gaan lê,

ek sal sterf, en U sal my soek,

maar ek sal nie daar wees nie.”