Numeri 30

₁Moses het vir die stamhoofde van die Israeliete gesê: “Dit is wat die Here gesê het:

₂“Wanneer iemand 'n gelofte aan die Here maak of hy belowe dat hy iets sal doen en hy sê die Here moet die getuie wees, dan mag hy nie sy gelofte breek nie. Hy moet alles doen wat hy belowe het.

_3-4“Wanneer 'n vrou nog jonk is en sy woon by haar ouers en sy maak 'n gelofte aan die Here, dan moet sy alles doen wat sy belowe het. Sy moet dit ook doen wanneer sy belowe om iets te doen en sy sê die Here moet die getuie wees, en haar pa hoor wat sy belowe het en hy sê niks. ₅Maar as haar pa hoor wat sy belowe, en hy sê dadelik vir haar sy mag nie doen wat sy belowe het nie, dan moet sy dit nie doen nie. As haar pa so gesê het, dan sal die Here haar vergewe.

₆“As 'n vrou getroud is en sy het 'n gelofte gemaak, of as sy iets belowe voordat sy goed gedink het, ₇en haar man hoor dit maar hy sê niks, dan moet sy doen wat sy belowe het. ₈Maar as haar man hoor wat sy belowe, en dadelik vir haar sê sy mag dit nie doen nie, dan stop hy die gelofte wat sy gemaak het en dan keer hy dat sy doen wat sy belowe het voordat sy goed gedink het. Die Here sal haar vergewe.

₉“Maar 'n weduwee of 'n geskeide vrou moet doen wat sy belowe het.

₁₀“Wanneer 'n getroude vrou 'n gelofte gemaak het of iets belowe het en gesê het die Here is die getuie, ₁₁en haar man hoor dit en hy bly stil en hy sê nie sy mag dit nie doen nie, dan moet sy alles doen wat sy belowe het. ₁₂Maar as haar man hoor wat sy belowe, en hy stop dadelik die belofte wat sy gemaak het, dan moet sy nie doen wat sy belowe het nie. Haar man het gesê sy moenie dit doen nie, en die Here sal haar vergewe. ₁₃Haar man mag elke gelofte wat sy gemaak het en alles wat sy belowe het, so laat bly, of hy mag dit stop. ₁₄Maar as haar man hoor wat sy belowe en hy sê niks daaroor voor die volgende dag nie, dan laat hy alles wat sy belowe het, so bly. Hy het niks gesê toe hy dit gehoor het nie, hy het die gelofte so laat bly. ₁₅Maar as hy die geloftes breek lank nadat hy daarvan gehoor het, dan is hý skuldig omdat sy vrou nie doen wat sy belowe het nie.”

₁₆Dit is wat die Here vir Moses gesê het, dit is die wette vir 'n vrou wat getroud is of wanneer sy nog jonk is en by haar pa woon.