Psalms 59

₂My God, U moet my red van my vyande,

U moet my beskerm teen die mense

wat my wil aanval.

₃U moet my red van die mense

wat slegte dinge doen,

U moet my beskerm teen die moordenaars.

₄Want U moet dit weet, dit is sterk mense

wat vir my wag en wat my wil aanval.

Ek het niks verkeerd gedoen nie,

ek het nie 'n fout gemaak nie.

₅Ek het niks gedoen nie,

maar hulle maak vinnig gereed om my aan te val.

U moet my kom help, U moet kyk wat hulle doen.

₆U, Here, God wat oor alles regeer, God van Israel,

U moet nou begin om al die volke te straf,

U moenie genadig wees vir verraaiers nie.

₇Dit is hulle wat elke aand terugkom

en soos honde raas en om die stad loop.

₈U moet hoor wat hulle alles sê,

hulle woorde is so skerp soos swaarde,

hulle dink dat U dit nie hoor nie.

₉Maar U, Here, U lag vir hulle,

U lag vir al die volke.

₁₀Dit is die Here wat my sterk maak,

ek sal aanhou wag dat Hy my moet help,

want by Hom is ek veilig.

₁₁Hy is die God wat vir my sal doen

wat Hy belowe het,

Hy sal my vyande voor my laat val.

₁₂U moenie vir hulle dadelik doodmaak nie,

dan kan my volk onthou dat U my laat wen het.

U moet hulle na al die kante toe jaag,

U is sterk, U moet hulle op die grond laat val.

My Here, U beskerm ons.

₁₃U moet dit doen, want hulle doen sonde

wanneer hulle praat.

U moet hulle straf, want hulle is hoogmoedig,

hulle vervloek mense en hulle lieg.

₁₄U moet wys dat U kwaad is, U moet hulle laat sterf,

U moet hulle almal laat sterf.

Dan sal almal weet dat dit God is wat regeer

oor sy volk Israel en oor die hele aarde.

₁₅Dit is hulle wat elke aand terugkom

en soos honde raas en om die stad loop.

₁₆Hulle soek iets om te eet,

en as hulle nie genoeg kry nie, dan huil en blaf hulle.

₁₇Maar ek?

Ek sal sing oor u krag,

ek sal elke oggend juig

omdat U doen wat U belowe.

By U is ek veilig,

U beskerm my wanneer dit vir my gevaarlik is.

₁₈Dit is U wat my sterk maak.

Ek wil sing vir U, want by U is ek veilig,

U is my God, U doen wat U belowe.