Deuteronomium 14

₁Moses het gesê: “Julle is kinders van julle God die Here. Julle mag nie julleself stukkend sny of julle voorkop kaal skeer omdat julle hartseer is omdat iemand gesterf het nie, ₂want julle is die gewyde volk van julle God die Here. Die Here het vir júlle gekies uit al die ander volke op die aarde om aan Hom te behoort en om sy eie volk te wees.”

₃“Julle mag nie iets eet wat die Here haat nie. ₄Julle mag net hierdie diere se vleis eet: beeste, skape, bokke, ₅rooi takbokke, gaselle, vaal takbokke, klipbokke, oer-osse, bergbokke. ₆Julle mag die vleis eet van enige dier wat gesplete hoewe het en wat sy kos herkou. ₇Maar julle mag nie die vleis eet van diere wat herkou maar wat nie gesplete hoewe het nie, ook nie die vleis van diere wat gesplete hoewe het maar wat nie herkou nie. Kamele en hase en dassies herkou maar hulle het nie gesplete hoewe nie. Hulle is onrein vir julle. ₈Varke het gesplete hoewe, maar hulle herkou nie. Hulle is onrein vir julle. Julle mag nie hierdie diere se vleis eet nie en julle mag nie aan hulle dooie liggame raak nie. ₉Julle mag al die diere in die water eet wat vinne en skubbe het, ₁₀maar julle mag niks eet wat nie vinne en skubbe het nie, dit is onrein vir julle. ₁₁Julle mag die vleis van enige rein voël eet. _12-18Die voëls wat julle nie mag eet nie, is: arende, aasvoëls, vis-arende, valke, kraaie, volstruise, seemeeue, uile, pelikane, visvangers, duikers, ooievaars, reiers, hoep-hoepe, en ook vlermuise. ₁₉Al die insekte wat vlerke het, is onrein vir julle, julle mag dit nie eet nie. ₂₀Julle mag net rein voëls eet.

₂₁“Julle mag nie die vleis eet van enige dier wat self gevrek het nie, julle mag dit vir die vreemdelinge gee wat by julle woon sodat hulle dit kan eet. Of julle mag daardie vleis verkoop aan mense wat nie Israeliete is nie. Hoekom? Want julle is die gewyde volk van julle God die Here.

“Julle mag nie 'n bok-lam kook in sy ma se melk nie.”

₂₂“Julle moet elke jaar een tiende van alles wat julle geplant het en wat julle uit die grond kry, apart hou. ₂₃Dan moet julle dit eet op die plek wat julle God die Here sal kies om self daar te woon, daar waar Hy is. Julle moet die tiende van julle koring en julle wyn en julle olyf-olie daar eet, en ook die vleis van die eerste kalwers en lammers, sodat julle kan leer om julle God die Here altyd te eer. ₂₄Maar miskien is daardie plek te ver van julle, die plek wat julle God die Here sal kies om daar te woon, en miskien kan julle nie die tiendes daarnatoe dra nie, die tiendes van die dinge waarmee julle God die Here julle geseën het. ₂₅Dan mag julle die tiendes verkoop en die geld saamneem na die plek wat julle God die Here sal kies. ₂₆Daar mag julle dan alles koop wat julle wil hê: beeste, skape, bokke, wyn, bier, enige iets wat julle wil hê. En dan moet julle eet en feesvier daar waar julle God die Here dit kan sien, julle en julle huisgesinne. ₂₇En julle moenie vergeet om die Leviete wat by julle woon ook te nooi om saam met julle fees te vier nie, want hulle het nie grond gekry saam met julle nie.

₂₈“Elke drie jaar moet julle die hele tiende van alles wat julle in daardie jaar kry, in julle woonplekke bêre. ₂₉Die Leviete het nie hulle eie grond saam met julle gekry nie, en hulle mag dan kom en hulle mag eet totdat hulle genoeg het. Die vreemdelinge en die weeskinders en die weduwees wat by julle woon, mag ook kom eet. Dan sal julle God die Here dit goed laat gaan met alles wat julle doen.”