Eksodus 20

₁God het gesê:

₂“Ek is jou God die Here. Ek het jou uit Egipte gebring, uit die plek waar jy 'n slaaf was.

₃“Jy mag nie ander gode aanbid nie. Ek is die enigste God.

_4-5“Jy mag nie vir jou 'n beeld maak en voor hom buig en hom dien nie, nie 'n beeld wat lyk soos iets bo in die hemel of soos iets onder op die aarde of soos iets in die water onder die aarde nie. Ek is jou God die Here, jy moet net vir My dien. Ek straf die kinders as die pa sonde gedoen het. Ek straf ook sy kleinkinders en agterkleinkinders as hy My haat en ongehoorsaam is aan My. ₆Maar as iemand lief is vir My en as hy gehoorsaam is aan My, dan sal Ek goed wees vir hom en vir sy kinders, 1 000 geslagte lank.

₇“Jy mag die Naam van jou God die Here nie gebruik vir iets wat verkeerd is nie, want die Here sal elkeen straf wat sy Naam gebruik vir iets wat verkeerd is.

₈“Jy moet onthou die sewende dag is 'n gewyde dag. ₉Jy moet ses dae lank werk en alles doen wat jy moet doen. ₁₀Maar die sewende dag is die Sabbatdag van jou God die Here. Dan mag jy niks werk doen nie, nie jy of jou seun of jou dogter, of jou slaaf of slavin, of jou diere of die vreemdelinge wat by jou woon nie. ₁₁Die Here het ses dae lank die hemel en die aarde gemaak, die see en alles wat daarin is, maar op die sewende dag het Hy nie gewerk nie. Daarom het die Here die Sabbatdag geseën en Hy het dit 'n gewyde dag gemaak.

₁₂“Jy moet jou ouers respekteer, dan sal jy lank woon in die land wat jou God die Here vir jou gee.

₁₃“Jy mag nie iemand vermoor nie.

₁₄“Jy mag nie egbreuk pleeg nie.

₁₅“Jy mag nie steel nie.

₁₆“Jy mag nie leuens vertel oor ander mense nie.

₁₇“Jy mag nie 'n ander mens se huis vir jouself wil hê nie. Jy mag nie 'n ander man se vrou vir jouself wil hê nie, ook nie sy slaaf of slavin, sy bees of sy donkie, of enige iets wat aan 'n ander mens behoort nie.”

₁₈Al die mense het die donderweer en die ramshoring gehoor. Hulle het ook die weerlig gesien en die berg wat vol rook is. Toe die mense dit sien, het hulle gebewe en hulle het ver weg bly staan. ₁₉Hulle het vir Moses gesê: “As jý met ons praat, dan sal ons luister, maar God moenie met ons praat nie, want dan sal ons sterf.”

₂₀Moses het vir die mense gesê: “Julle moenie bang wees nie, want God het gekom om julle te toets. God wil hê julle moet Hom eer en julle moenie sonde doen nie.”

₂₁Die mense het toe ver weg bly staan, maar Moses het nader gegaan na die donker wolk waar God was.

₂₂Die Here het vir Moses gesê hy moet vir die Israeliete sê:

“Julle het self gehoor dat Ek met julle uit die hemel gepraat het.

₂₃“Julle mag nie vir julle gode van silwer of goud maak nie.”

₂₄“Julle moet vir My 'n altaar van grond maak, en daarop moet julle die brand-offers en julle ete-offers bring, julle skape en bokke en julle beeste. Ek sal na julle toe kom en Ek sal julle seën op elke plek waar Ek wil hê dat julle My moet aanbid. ₂₅Wanneer julle vir My 'n altaar van klippe maak, dan moet julle dit nie bou met klippe wat julle gekap het nie, want as julle die klippe kap, dan sal die altaar onrein wees. ₂₆Julle mag nie met trappe opklim na my altaar nie, want dan kan die mense miskien onder julle klere inkyk.”