Job 20

₂“Job, luister na my, ek dink ek moet praat,

ek voel dat ek móét praat.

₃Ek hoor dat jy vir my wil leer

maar jy beledig vir my.

Ek verstaan nie wat jy dink

wanneer jy my nie antwoord nie.

₄Jy weet dit goed,

dit was lank gelede so,

dit was so vandat God

mense op die aarde gesit het:

₅Wanneer mense juig wat verkeerd doen,

dan kan hulle dit nie lank doen nie.

Iemand wat nie vir God wil ken nie,

kan net 'n kort tydjie bly wees.

₆So iemand word miskien baie belangrik,

hy is hoogmoedig en hy loop met sy neus

in die lug,

₇maar hy sal so vinnig verdwyn

soos sy mis.

Mense wat hom voorheen gesien het,

sal vra: ‘Waar is hy?’

₈Hy sal weggaan soos 'n droom,

en jy sal hom nie kry nie.

Mense sal hom vergeet,

soos hulle vergeet

wat hulle gesien het

toe hulle gedroom het.

₉Niemand sal hom weer sien nie,

hy sal nooit weer wees waar hy was nie.

₁₀Hy sal self die goed moet teruggee

wat hy bymekaargemaak het,

en sy kinders sal rente moet betaal

op alles wat hy gevat het van arm mense.

₁₁Hy sal nog sterk en gesond wees,

maar hy sal in sy graf moet gaan lê.

₁₂Dit was vir hom lekker om verkeerd te doen,

hy het dit geniet soos lekker kos

₁₃wat hy in sy mond hou en stadig insluk.

₁₄Maar daardie kos sal verander in sy maag,

dit sal so bitter word soos 'n slang se gal.

₁₅Hy het baie goed bymekaargemaak,

maar hy sal dit verloor soos kos

wat 'n mens opbring wanneer hy naar is.

God sal dit met hom laat gebeur.

₁₆Hy sal die gif van 'n slang moet insuig,

'n adder se tong sal hom laat sterf.

₁₇Hy sal niks kan geniet nie,

ook nie as daar riviere vol heuning

en dikmelk is nie.

₁₈Hy sal alles moet teruggee

wat hy gekry het toe hy gewerk het,

hy sal dit nie kan gebruik nie.

Hy sal koop en verkoop en ryk word,

maar hy sal dit nie geniet nie.

₁₉Want hy het op arm mense getrap

en hy het hulle nie gehelp nie.

Hy het huise vir homself gevat

wat ander mense gebou het.

₂₀Hy kry nooit genoeg nie,

hy wil altyd meer hê.

₂₁Wanneer hy eet, dan bly daar niks oor nie,

en dit is hoekom dit nie

sal aanhou goed gaan met hom nie.

₂₂Hy het baie goed,

meer as wat hy nodig het,

maar dit sal skielik sleg gaan

met hom,

hy sal baie swaar kry.

₂₃Hy sal iets anders moet eet

en hy sal vol word daarvan.

God sal kwaad word en God sal hom straf,

dít sal die kos wees

wat daardie mens moet eet.

Die slegte dinge sal op hom val soos reën.

₂₄Wanneer hy vlug vir 'n vyand met 'n yster-swaard,

dan sal 'n vyand met 'n brons-boog hom raakskiet.

₂₅Wanneer hy die pyl uittrek uit sy rug,

die blink punt van die pyl wat deur sy gal gegaan het,

dan sal hy bang wees, want hy sal weet dat hy sterf.

₂₆Die donker wag vir hom en vir alles wat hy het,

'n vuur sal brand, niemand het dit aangesteek nie,

en alles wat hy het, sal verbrand.

₂₇Die hemel en die aarde

sal getuig teen hom.

₂₈Wanneer God kwaad word en Hy wil

die persoon straf,

dan verloor daardie persoon alles.

₂₉Dit is wat God laat gebeur

met die mens wat verkeerd doen.”