Job 37

₁Die storm laat my hart bewe,

ek skrik en ek ruk.

₂Luister goed na die stem van God,

hoor hoe raas en dreun dit!

₃Hy stuur die weerlig oral deur die lug,

dit slaan oor die hele aarde.

₄En dan raas en dreun die donderweer,

God praat met sy harde stem,

en die donderweer hou aan om te raas

terwyl Hy, die Koning, praat.

₅God doen wonderlike dinge

wanneer Hy sy stem laat raas,

Hy doen groot dinge,

dinge wat ons nie verstaan nie.

₆Hy sê vir die sneeu:

‘Val op die aarde!’

en Hy sê vir die reën:

‘Maak die grond goed nat!’

₇Hy laat al die mense ophou werk

sodat hulle kan sien wat Hy doen.

₈Die diere gaan lê

en hulle bly in hulle lêplek.

₉Die stormwind kom uit die suide,

die koue winde kom uit die noorde.

₁₀Die wind wat God stuur,

laat die water vries,

dit word een stuk ys.

₁₁God maak die wolke vol water,

die weerlig slaan in die wolke.

₁₂Die wolke draai om en om

wanneer God so besluit,

hulle doen wat Hy sê,

oral op die aarde.

₁₃God stuur die storms

om mense te straf of om

vir die aarde te sorg

of om te doen wat Hy

belowe het.

₁₄Job, jy moet luister na

wat ek sê,

jy moet stilstaan en dink

oor die wonderwerke van God.

₁₅Weet jy hoe God dit alles doen?

Weet jy hoe Hy die weerlig uit die wolke

laat slaan?

₁₆Weet jy hoe die wolke bymekaarkom?

Dit is God wat hierdie wonderlike dinge

laat gebeur,

God wat alles weet.

₁₇Job, jou klere word baie warm

wanneer die warm oostewind waai.

₁₈Jy kan nie die hemeldak maak nie,

die hemeldak wat so hard is soos

'n spieël van metaal.

₁₉Wil jy nou vir ons leer wat ons

vir God moet sê?

Ons weet nie wat om te sê nie,

ons is baie dom.

₂₀Niemand moet vir God sê

dat ek wil praat nie.

Ek wil nie hê dat Hy my moet

laat sterf nie.

₂₁Mense kan nie na die son kyk

wanneer die wind gewaai het

en die wolke weg is nie.

₂₂Wanneer God uit die noorde kom,

dan blink alles soos goud,

almal word bang vir die lig

wat rondom Hom, die Koning, is.

₂₃Ons kan nie naby die Almagtige kom nie,

sy krag is baie groot.

Hy doen reg, Hy is altyd regverdig,

Hy verdruk niemand nie.

₂₄Daarom is al die mense bang vir Hom.

Hy kyk nie na mense wat dink

dat hulle wysheid het, maar hulle het dit nie.”