Psalms 114

₁Toe die volk Israel uit Egipte weggetrek het,

toe die nageslag van Jakob weggegaan het

van die volk wat die vreemde taal praat,

₂toe het Juda die plek geword

waar die tempel staan,

en Israel het die land geword

waaroor die Here regeer.

₃Die see het dit gesien en hy het gevlug,

die Jordaan-rivier het weggedraai.

₄Die berge het gespring soos skaap-ramme,

die heuwels het gespring soos lammers.

₅See, hoekom vlug jy?

Jordaan-rivier, hoekom draai jy weg?

₆Berge, hoekom spring julle soos skaap-ramme?

Heuwels, hoekom spring julle soos lammers?

₇Die aarde moet bewe wanneer die Here kom,

wanneer die God van Jakob kom.

₈Dit is Hý wat rotse verander het,

dit het watergate geword,

Hy het harde klippe verander,

dit het water-fonteine geword.