Psalms 119

₁Dit gaan goed met die mense wat heeltemal reg lewe,

die mense wat lewe soos die Here vir hulle geleer het.

₂Dit gaan goed met mense wat doen wat die Here sê

en wat met hulle hele hart naby Hom wil wees.

₃Hulle is ook mense wat nie verkeerde dinge doen nie

en wat lewe soos die Here wil hê.

₄U het self vir ons gesê wat ons moet doen,

en ons moet dit presies so doen.

₅Ek bid dat ek sal aanhou om te lewe soos u wette sê.

₆Wanneer ek gehoorsaam is aan al u gebooie,

dan sal ek altyd weet wat om te doen.

₇Wat U besluit, is altyd reg.

Wanneer ek dit geleer het,

dan sal ek vir U dankie sê met my hele hart.

₈Ek sal doen wat u wette sê,

U moet my nie heeltemal alleen los nie.

₉Wat moet jongmense doen

sodat hulle kan weet hoe hulle moet lewe?

Hulle moet doen wat U sê.

₁₀Ek wil naby U wees met my hele hart,

U moet keer dat ek nie

ongehoorsaam is aan u gebooie nie.

₁₁Ek dink altyd aan wat U gesê het,

dit keer my dat ek nie sonde doen teen U nie.

₁₂Here, ek prys U,

U moet vir my leer wat u wette sê.

₁₃Ek wil vir die mense alles sê wat U besluit het.

₁₄Dit maak my bly om te lewe soos U sê,

so bly soos wanneer 'n mens alles het wat hy nodig het.

₁₅Ek sal dink aan wat U beveel het,

ek sal goed luister na wat U wil hê.

₁₆Ek sal altyd bly wees oor u wette,

ek sal nie vergeet wat U gesê het nie.

₁₇As U goed is vir my, u dienaar,

dan sal ek lewe en ek sal doen wat U gesê het.

₁₈U moet my oë oopmaak,

sodat ek kan sien hoe wonderlik

die dinge is wat U vir ons leer.

₁₉Ek sal nie lank hier op die aarde wees nie,

U moet vir my leer wat u gebooie sê.

₂₀My hart is seer, want ek verlang altyd

om te hoor wat U besluit het.

₂₁U praat kwaai met die hoogmoedige mense,

U het hulle vervloek.

Hulle is die mense wat nie wil doen

wat u gebooie sê nie.

₂₂U moet keer

dat mense my nie spot en verneder nie,

want ek doen wat U sê.

₂₃Ook wanneer belangrike mense

saam planne maak teen my,

dan sal ek, u dienaar, altyd aan u wette dink.

₂₄Wat U sê, maak my bly,

dit sê vir my wat ek moet doen.

₂₅Wanneer dit sleg gaan met my,

dan moet U my laat aanhou lewe, soos U gesê het.

₂₆Toe ek vir U vertel het van my lewe,

toe het U my geantwoord.

U moet vir my leer wat u wette sê.

₂₇U moet my help om te verstaan wat U beveel,

sodat ek oor u wonderwerke kan dink.

₂₈Ek smelt weg van die pyn,

U moet my regop hou, soos U gesê het.

₂₉U moet keer dat ek nie vals lewe nie,

U moet genadig wees vir my en vir my leer.

₃₀Ek het gekies om eerlik te lewe,

ek het onthou wat U besluit het.

₃₁Here, ek hou vas aan wat U sê,

U moet my help om te weet wat ek moet doen.

₃₂Ek wil graag lewe soos u gebooie sê,

want U sal my help om dit te verstaan.

₃₃U moet vir my leer wat u wette beteken,

sodat ek altyd kan doen wat die wette sê.

₃₄U moet my help om te verstaan,

sodat ek kan doen wat U vir my leer

en sodat ek daaraan gehoorsaam kan wees

met my hele hart.

₃₅U moet my laat lewe soos u gebooie sê,

want dit is vir my lekker.

₃₆U moet my help

sodat ek graag sal wil doen wat U sê

en nie sal kies om ryk te word nie.

₃₇U moet my help sodat ek nie dinge wil hê

wat niks beteken nie,

U moet my laat lewe soos U wil hê.

₃₈U moet vir my doen wat U belowe het,

vir my, u dienaar,

want U het dit belowe vir mense wat vir U dien.

₃₉U moet keer dat mense my nie spot nie,

ek is bang daarvoor, want wat U besluit, is goed.

₄₀U moet dit weet, ek wil graag hoor wat U beveel,

U sal reg doen en my laat aanhou lewe.

₄₁Here, U moet vir my doen wat U belowe het,

U moet my red, U het dit belowe.

₄₂Dan sal ek die mense kan antwoord wat my spot,

want ek glo dat U sal doen wat U gesê het.

₄₃En U moet my help om altyd die waarheid te praat,

want ek glo dat U sal doen wat U besluit het.

₄₄En ek sal aanhou doen wat U vir my leer,

altyd en altyd.

₄₅En ek sal lewe soos 'n vry mens,

want ek het probeer doen wat U beveel het.

₄₆En ek sal vir konings vertel wat U sê,

ek sal weet wat om te sê.

₄₇Ek sal aanhou bly wees oor u gebooie,

ek is lief vir hulle.

₄₈Ek respekteer u gebooie, ek is lief vir hulle,

ek sal aanhou dink oor u wette.

₄₉U moenie vergeet wat U vir my gesê het nie,

vir my, u dienaar.

Dit het my laat hoop dat U my sal help.

₅₀Toe dit sleg gegaan het met my,

het u woorde dinge verander vir my,

want die dinge wat U belowe het, het my laat aanhou lewe.

₅₁Toe hoogmoedige mense my baie gespot het,

het ek nie opgehou om te doen wat U vir my geleer het nie.

₅₂Here, wanneer ek dink aan wat U lank gelede besluit het,

dan voel ek beter.

₅₃Die mense wat verkeerd doen, maak my kwaad,

dit is húlle wat nie doen wat U vir ons geleer het nie.

₅₄Ek sal sing oor u wette,

so lank soos ek op hierdie aarde lewe.

₅₅Here, ek dink ook in die nag aan u Naam,

en ek doen wat U vir ons geleer het.

₅₆Dit het met my gebeur

omdat ek doen wat U beveel het.

₅₇Here, ek het net vir U,

ek het belowe dat ek sal doen wat U gesê het.

₅₈Ek soebat en vra vir U met my hele hart,

U moet genadig wees vir my, soos U belowe het.

₅₉Wanneer ek dink aan hoe ek lewe,

dan dink ek altyd weer aan wat U gesê het.

₆₀Ek is haastig, ek wag nie,

ek wil gehoorsaam wees aan u gebooie.

₆₁Wanneer mense wat verkeerd doen,

vir my in hulle vangnet wil vang,

dan vergeet ek nie wat U vir ons geleer het nie.

₆₂Ek staan in die middel van die nag op

om vir U dankie te sê, want alles wat U besluit het, is reg.

₆₃Ek is 'n vriend van al die mense wat vir U dien

en wat doen wat U beveel.

₆₄Here, U doen wat U belowe het,

oral op die aarde,

U moet vir my leer wat u wette sê.

₆₅Here, U het goed gedoen aan my, u dienaar,

dit is soos U gesê het.

₆₆U moet vir my leer om te weet

wat is reg en wat is verkeerd,

want ek glo dat u gebooie reg is.

₆₇Voordat dit met my so sleg gegaan het,

het ek verkeerd gelewe,

maar nou doen ek wat U sê.

₆₈U is goed en U doen goed,

U moet vir my leer wat u wette sê.

₆₉Hoogmoedige mense lieg

en hulle praat sleg van my,

maar ek doen wat U beveel

met my hele hart.

₇₀Hulle wil nie verstaan wat U vir ons sê nie,

maar ek geniet wat U vir ons leer.

₇₁Dit was vir my goed dat U my laat swaarkry het,

want so het ek geleer wat u wette sê.

₇₂Die dinge wat U vir my leer, is beter

as duisende stukke goud en silwer.

₇₃Ú het my gemaak en Ú het my laat lewe,

U moet vir my leer sodat ek u gebooie kan ken.

₇₄Die mense wat vir U dien, sal na my kyk

en hulle sal bly wees,

want hulle sal sien ek glo

dat U sal doen wat U gesê het.

₇₅Here, ek weet dat U reg besluit,

en dat U my laat swaarkry het

omdat U gesê het U sal dit doen.

₇₆U moet doen wat U belowe het,

dit sal dinge beter maak vir my.

U het dit vir my gesê, vir my, u dienaar.

₇₇U moet jammer wees vir my sodat ek kan lewe,

want ek geniet wat U vir my leer.

₇₈U moet die hoogmoedige mense laat verloor,

want hulle het vir my gelieg en hulle het my verlei.

Ék wil dink aan wat U beveel het.

₇₉U moet die mense wat vir U dien,

na my toe laat kom,

sodat hulle kan leer wat U gesê het.

₈₀Ek wil heeltemal gehoorsaam wees aan u wette,

sodat niemand my kan verneder nie.

₈₁Ek wag en verlang daarna dat U my sal red,

ek is seker dat U sal doen wat U gesê het.

₈₂My oë is moeg, want ek hou aan om te kyk

wanneer U dit weer goed sal laat gaan met my

soos U belowe het.

₈₃Ja, ek het geword soos 'n velsak

wat in die rook hang,

maar ek vergeet nie u wette nie.

₈₄Ek is u dienaar.

Hoe lank sal ek nog lewe?

Wanneer straf U die mense

wat my volg en jaag?

₈₅Die hoogmoedige mense het gate gegrawe

sodat ek daarin moet val,

húlle is die mense wat nie doen

wat U vir ons geleer het nie.

₈₆Al u gebooie staan vas, dit verander nooit.

Ek het niks verkeerd gedoen nie,

maar mense volg my en jaag my.

U moet my help.

₈₇Ek het gedoen wat U beveel het,

maar hulle het my amper doodgemaak.

₈₈U moet my laat aanhou lewe, soos U belowe het,

sodat ek kan doen wat U sê.

₈₉Here, die dinge wat U vir ons gesê het,

is altyd waar,

dit staan vas in die hemel, dit verander nooit.

₉₀U bly dieselfde vir elke geslag.

U het die aarde gesit waar dit is,

en dit is nog altyd daar.

₉₁Alles is vandag nog daar, soos U besluit het,

want almal doen wat U sê.

₉₂Ek het geniet wat U vir ons leer.

As dit nie so was nie,

dan het ek gesterf, want ek kry swaar.

₉₃Ek sal nooit vergeet wat U beveel het nie,

want U het my so laat lewe.

₉₄Ek behoort aan U, en U moet my red,

want ek probeer om te doen wat U beveel.

₉₅Die mense wat verkeerd doen,

is gereed om my dood te maak,

maar ek dink net aan wat U gesê het.

₉₆Ek het gesien dat niks vir altyd aanhou nie,

alles het 'n einde,

maar u gebooie is oral en altyd daar.

₉₇Ek is baie lief vir die dinge wat U vir my leer,

ek dink die hele dag daaroor.

₉₈U gebooie gee vir my wysheid,

meer wysheid as wat my vyande het,

want ek onthou altyd u gebooie.

₉₉Ek is verstandiger as almal

wat vir my geleer het,

want ek dink aan wat U gesê het.

₁₀₀Ek is slimmer as mense wat ouer is as ek,

want ek doen wat U beveel het.

₁₀₁Ek doen niks wat verkeerd is nie,

ek wil doen wat U gesê het.

₁₀₂Ek hou aan om te doen wat U besluit,

want U self leer vir my.

₁₀₃Dit is lekker om te praat oor die dinge

wat U belowe het,

dit is lekkerder as heuning.

₁₀₄Ek verstaan wat U beveel het,

daarom haat ek alles wat vals is.

₁₀₅Die dinge wat U vir ons gesê het,

is vir my soos 'n lamp

wanneer ek in die donker loop,

dit wys vir my hoe ek moet lewe.

₁₀₆Ek het belowe, en ek sal dit doen:

Ek sal doen wat U besluit, want U besluit reg.

₁₀₇Dit gaan baie baie sleg met my,

U moet my laat aanhou lewe, soos U gesê het.

₁₀₈Here, die dinge wat ek vir U sê,

is offers wat ek graag vir U bring.

U moet dit asseblief aanvaar en U moet vir my leer

om te verstaan wat U besluit.

₁₀₉Daar is altyd mense wat my wil doodmaak,

maar ek vergeet nie wat U vir ons geleer het nie.

₁₁₀Die mense wat verkeerd doen, wil my vang

soos 'n mens voëls vang in 'n vangnet,

maar ek hou aan om te doen wat U beveel.

₁₁₁Ek wil altyd onthou wat U sê,

want dit maak my baie bly.

₁₁₂Ek het besluit om altyd te doen

wat u wette sê, so lank soos ek lewe.

₁₁₃Ek hou nie van mense wat skynheilig is nie,

maar ek is lief vir wat U vir ons geleer het.

₁₁₄By U is ek veilig, U beskerm my,

ek weet U sal doen wat U gesê het.

₁₁₅Slegte mense moenie naby my kom nie,

sodat ek kan doen wat die gebooie

van my God sê.

₁₁₆U moet my regop hou, soos U belowe het,

dan sal ek aanhou lewe,

U moet my help, sodat ek kan aanhou hoop.

₁₁₇Wanneer U my regop hou, dan is ek veilig

en dan kyk ek altyd wat u wette sê.

₁₁₈U hou nie van mense wat ongehoorsaam is

aan u wette nie,

want hulle is vals, hulle wil mense bedrieg.

₁₁₉U los al die mense

wat verkeerd doen, hulle is soos skuim

wat niks beteken nie.

Daarom is ek lief vir wat U sê.

₁₂₀Ek is bang vir U, ek bewe,

ek is bang vir wat U besluit.

₁₂₁Ek het reg gedoen aan mense

en ek het gelewe soos U wil hê.

U moenie vir my los sodat mense my verdruk nie.

₁₂₂U moet vir my, u dienaar, belowe

dat U dit goed sal laat gaan met my.

U moenie dat hoogmoedige mense my verdruk nie.

₁₂₃My oë is moeg, want ek hou aan om te kyk

wanneer U my sal red.

Ek hou aan om te luister na wat U sê,

want wat U sê, is reg.

₁₂₄U moet vir my, u dienaar, doen wat U belowe het,

U moet vir my leer wat u wette sê.

₁₂₅Ek is u dienaar, U moet my verstandig maak

sodat ek kan verstaan wat U sê.

₁₂₆Here, U moet nou iets doen aan die mense

wat nie doen wat U vir ons geleer het nie.

₁₂₇Waarlik, ek is meer lief vir u gebooie

as vir goud, ja, goeie goud.

₁₂₈Waarlik, ek probeer altyd om alles te doen wat U beveel,

ek hou nie van iets wat vals is nie.

₁₂₉Wat U sê, is wonderlik,

daarom doen ek wat U sê.

₁₃₀Wanneer mense verstaan wat U gesê het,

dan is dit vir hulle soos 'n lig,

dit wys vir jongmense wat hulle moet doen.

₁₃₁Ek is honger vir u gebooie,

so honger soos 'n dier wat sy bek wyd oopmaak

omdat hy honger is.

₁₃₂U moet luister en genadig wees vir my,

soos U altyd doen vir die mense

wat lief is vir u Naam.

₁₃₃U moet my help, sodat ek kan aanhou

om te lewe soos U sê.

U moenie dat sonde oor my regeer nie,

nie een sonde nie.

₁₃₄U moet keer, mense moenie vir my verdruk nie,

dan sal ek kan doen wat U beveel.

₁₃₅U moet naby my wees,

naby my, u dienaar,

en U moet vir my leer wat u wette sê.

₁₃₆My trane loop soos strome water

omdat mense nie doen wat U vir ons geleer het nie.

₁₃₇Here, U doen reg, U besluit reg.

₁₃₈Alles wat U gesê het, is reg,

mense kan dit altyd glo.

₁₃₉Ek word baie kwaad wanneer my vyande

vergeet wat U gesê het.

₁₄₀Die dinge wat U sê, is baie waar.

Ek, u dienaar, is lief vir wat U sê.

₁₄₁Ek is klein en onbelangrik

maar ek het nie vergeet wat U beveel het nie.

₁₄₂U doen reg en U sal altyd reg doen,

die dinge wat U vir ons geleer het,

bly dieselfde.

₁₄₃Toe ek swaargekry het

en toe dit sleg gegaan het met my,

was dit vir my lekker om u gebooie te hou.

₁₄₄Wat U sê, is altyd reg,

U moet my help om dit te verstaan,

sodat ek kan aanhou lewe.

₁₄₅Here, ek roep en ek vra

dat U my moet help,

ek vra dit met my hele hart.

U moet my antwoord,

ek wil doen wat u wette sê.

₁₄₆Ek roep en ek vra

dat U my moet red,

sodat ek kan doen wat U sê.

₁₄₇Ek staan op voordat die son opkom

en ek vra dat U my moet help,

ek weet U sal doen wat U gesê het.

₁₄₈Ek bly die hele nag wakker,

sodat ek kan dink aan wat U belowe het.

₁₄₉Here, U doen wat U belowe het

en wat U besluit het.

U moet luister na wat ek vra,

U moet my laat aanhou lewe.

₁₅₀Die mense is naby wat my volg en jaag

om my seer te maak,

maar hulle is ver van wat U vir ons geleer het.

₁₅₁Here, U is naby en u gebooie verander nie.

₁₅₂Ek weet van die begin af wat U gesê het,

want u woorde bly altyd waar.

₁₅₃U moet kyk hoe sleg dit met my gaan

en U moet my red,

want ek het nie vergeet wat U vir ons geleer het nie.

₁₅₄U moet my help wanneer mense my beskuldig,

U moet my vrymaak, soos U belowe het,

U moet my laat aanhou lewe.

₁₅₅U sal nie die mense red wat verkeerd lewe nie,

want hulle probeer nie om te doen wat u wette sê nie.

₁₅₆Here, U is baie genadig, U het so besluit,

U moet my laat aanhou lewe.

₁₅₇Daar is baie vyande wat my volg en jaag,

maar ek hou aan om te doen wat U sê.

₁₅₈Wanneer ek sien hoe ontrou mense is,

dan wil ek naar word.

Hulle is mense wat nie doen wat U sê nie.

₁₅₉Here, U moet kyk

hoe lief is ek vir wat U beveel,

U moet my laat aanhou lewe,

soos U belowe het.

₁₆₀Alles wat U gesê het, bly dieselfde,

alles wat U besluit, is altyd reg.

₁₆₁Ek het niks verkeerd gedoen nie,

maar belangrike mense volg my en jaag my.

Ek is nie bang vir hulle nie,

ek is bang vir wat U gesê het.

₁₆₂Ek is so bly oor wat U belowe het,

so bly soos wanneer ek baie goed kry

wat ek vir my kan vat.

₁₆₃Ek haat dit wanneer mense vals is,

ek hou niks daarvan nie.

Ek is lief vir wat U vir ons geleer het.

₁₆₄Ek prys U sewe maal elke dag

omdat alles wat U besluit, reg is.

₁₆₅Dit gaan baie goed met mense

wat lief is vir wat U vir ons geleer het.

Daar gebeur niks wat sleg is met hulle nie.

₁₆₆Here, ek weet U sal my red

en ek doen wat u gebooie sê.

₁₆₇Ek hou aan om te doen wat U sê,

ek is baie lief daarvoor.

₁₆₈Ek hou aan om te doen wat U beveel

en wat U sê,

want U sien altyd hoe ek lewe.

₁₆₉Here, U moet hoor wat ek bid,

U moet my help om te verstaan wat U sê.

₁₇₀U moet luister wanneer ek tot U bid,

U moet my red, soos U belowe het.

₁₇₁Ek sal aanhou om U te prys,

want U leer vir my u wette.

₁₇₂Ek sal sing oor wat U belowe het,

want al u gebooie is reg.

₁₇₃U moet my help,

want ek het gekies om te doen wat U beveel het.

₁₇₄Here, ek verlang daarna dat U my moet red,

ek geniet wat U vir ons geleer het.

₁₇₅U moet my laat aanhou lewe,

sodat ek U kan prys.

Die dinge wat U besluit het, moet my help.

₁₇₆Ek het verdwaal soos 'n skaap wat weggeraak het,

U moet my soek, vir my, u dienaar,

want ek het nie u gebooie vergeet nie.