1 Korinthiërs 8

₁Wat die afgodsoffers betref, stem ons saam: “Ons het almal kennis.” Kennis maak verwaand, maar liefde bou op. ₂As iemand dink hy weet iets, is sy kennis nog nie soos dit behoort te wees nie. ₃Maar as iemand God liefhet, word hy deur Hom geken. ₄Wat die eet van afgodsoffers betref, weet ons “Daar bestaan geen afgod in die wêreld nie,” en “Daar bestaan geen god nie, behalwe Een.” ₅Selfs al is daar inderdaad sogenaamde gode in die hemel of op die aarde, en net so ook baie “gode” en baie “here” –

₇Maar nie almal het hierdie kennis nie. Sommige is nog so gewoond aan die afgod dat hulle steeds die vleis eet as 'n afgodsoffer, en hulle gewete, wat swak is, word besoedel. ₈Kos bring ons nie nader aan God nie. As ons nie sou eet nie, ly ons nie gebrek nie, en as ons sou eet, het ons nie oorvloed nie. ₉Pasop dat hierdie vryheid van julle nie vir die swakkes 'n struikelblok word nie. ₁₀Want as iemand jou, wat die kennis het, in 'n afgodstempel aan tafel sien, sal hy nie, omdat sy gewete swak is, aangemoedig word om afgodsoffers te eet nie? ₁₁Dan gaan die swakke, 'n broer vir wie Christus gesterf het, verlore as gevolg van jou kennis. ₁₂Deur op dié manier teen die broers te sondig en hulle swak gewetens te kwets, sondig julle teen Christus. ₁₃Daarom, as kos my broer laat struikel, sal ek beslis vir ewig nie weer vleis eet nie, sodat ek nie my broer laat struikel nie.