Efesiërs 6

₁Kinders, wees in die Here aan julle ouers gehoorsaam, want dit is hoe dit hoort. ₂“Eer jou vader en jou moeder,” dit is die eerste gebod met 'n belofte, ₃“sodat dit met jou goed mag gaan, en jy 'n lang lewe op aarde sal hê.”

₄En vaders: Moenie julle kinders uittart nie, maar voed hulle op deur die dissipline en teregwysing van die Here.

₅Slawe, wees met vrees en bewing aan julle aardse eienaars gehoorsaam, met opregte harte, soos aan •Christus – ₆nie met lippediens om mense se guns te wen nie, maar as slawe van Christus wat die wil van God van harte doen, ₇terwyl julle met blymoedigheid julle diens verrig, soos vir die Here, en nie vir mense nie. ₈Want julle weet dat elkeen, indien hy iets goeds doen, dit van die Here as loon sal terug ontvang, of hy 'n slaaf is of 'n vryman.

₉En julle, eienaars, tree net so op teenoor die slawe, en staak julle dreigemente, omdat julle weet dat julle en hulle Here in die hemel is, en dat Hy niemand volgens die uiterlike beoordeel nie.

₁₀Ten slotte: Vind jou sterkte in die Here en in sy geweldige krag. ₁₁Trek die volle wapenrusting van God aan, sodat julle staande kan bly teen die listighede van die Duiwel. ₁₂Vir ons is die stryd immers nie teen vlees en bloed nie, maar teen die owerhede, teen die magte, teen die wêreldheersers van hierdie duisternis, teen die bose geeste in die hemelruim. ₁₃Neem daarom die volle wapenrusting van God op, sodat julle op die dag van onheil weerstand kan bied en, nadat julle alles uitgevoer het, staande kan bly. ₁₄Staan dan vas, deur julle heupe te omgord met die waarheid, julle te bedek met die borsplaat van •geregtigheid, ₁₅en deur die bereidheid vir die evangelie van vrede as skoene aan julle voete aan te trek, ₁₆en by dit alles die skild van die geloof op te neem, waardeur julle in staat sal wees om al die vurige pyle van die Bose te blus. ₁₇Dra ook die helm van verlossing en die swaard van die Gees – dit is die woord van God. ₁₈By elke geleentheid wanneer julle bid en smeek, moet julle telkens deur die Gees bid. Daarom moet julle waaksaam wees, deur volhardend te pleit vir al die •heiliges. ₁₉Bid ook vir my sodat, wanneer ek my mond oopmaak, die gepaste woord vir my gegee mag word, om met vrymoedigheid die geheimenis van die evangelie bekend te maak – ₂₀hiervoor is ek 'n gesant in kettings – sodat ek vrymoedig daaroor kan praat soos ek moet.

₂₁Sodat julle kan weet wat my omstandighede is, en wat ek doen – alles sal Tigikus, die geliefde broer en getroue dienskneg van die Here, julle vertel. ₂₂Juis hiervoor stuur ek hom na julle, sodat julle van ons omstandighede kan weet, en sodat hy julle harte kan bemoedig.

₂₃Vrede vir die broers, en liefde en geloof van God die Vader, en van die Here, Jesus •Christus. ₂₄Sy genade bly met almal wat vir ons Here Jesus Christus onverganklik liefhet.