Klaagliedere van Jeremia 5

₁Onthou, Here, wat met ons gebeur het;

kyk tog, en sien ons vernedering raak!

₂Ons erfenis is oorhandig aan vreemdes,

ons huise aan buitelanders.

₃Weeskinders het ons geword –

ons is sonder 'n vader;

ons moeders is soos weduwees.

₄Ons betaal vir ons drinkwater;

ons hout kom teen 'n prys.

₅Ons agtervolgers blaas in ons nekke;

ons is uitgeput, ons word nie rus gegun nie.

₆Ons moes 'n verdrag sluit met Egipte,

ook met Assirië,

om met brood versadig te word.

₇Ons voorouers het gesondig;

hulle is nie meer daar nie,

maar ons dra hulle skuld.

₈Slawe heers oor ons;

niemand red ons uit hulle hand nie.

₉In lewensgevaar verkry ons ons brood,

weens die swaard in die woestyn.

₁₀Ons vel gloei soos 'n oond;

ons brand van honger.

₁₁Vroue is in Sion verkrag,

jong meisies in die stede van Juda.

₁₂Vorste is aan hulle hande opgehang;

oudstes is met minagting behandel.

₁₃Jong manne moet met meulstene werk;

jong seuns steier onder hout.

₁₄Oudstes het uit die stadspoort verdwyn,

ook die jong manne se snarespel.

₁₅Vreugde het verdwyn uit ons hart;

ons dans het in roubeklag verander.

₁₆Die kroon het van ons kop geval.

Wee ons, want ons het gesondig.

₁₇Hieroor het ons hart gebreek,

hieroor het ons oë dof geword:

₁₈oor die berg Sion verlate is,

oor jakkalse daar ronddwaal.

₁₉U, Here, U heers vir ewig.

U troon is van geslag tot geslag.

₂₀Waarom vergeet U ons vir altyd,

waarom verlaat U ons vir goed?

₂₁Bring ons terug na U toe, Here,

sodat ons kan terugkeer;

maak ons dae nuut soos voorheen,

₂₂tensy U ons heeltemal verwerp het,

tensy U uitermate woedend vir ons is.