Spreuke 4

₁Seuns, luister na die vermaning

van 'n vader,

en slaan ag daarop

om insig te leer ken.

₂Want dit is goeie onderrig

wat ek julle gee;

my onderwysing –

moet dit nie verontagsaam nie.

₃Toe ek 'n seun was by my vader,

onervare, en die enigste

voor my moeder,

₄het hy my geleer en vir my gesê:

“Jou hart moet my woorde vashou.

Kom my gebooie na, dan sal jy leef.

₅Verwerf wysheid, verwerf insig,

vergeet dit nie;

wyk nie af van die woorde

uit my mond nie.

₆Moet haar, die wysheid,

nie verontagsaam nie;

dan sal sy jou beskerm.

Wees lief vir haar,

dan sal sy jou bewaak.

₇Die begin van wysheid is:

Verwerf wysheid,

verwerf insig met alles wat jy besit!

₈Stel haar hoog op prys,

dan sal sy jou verhoog;

sy sal aan jou eer gee

as jy haar omarm.

₉Sy sal op jou kop

'n swierige krans sit,

'n sierlike kroon aan jou skenk.

₁₀“Luister, my seun,

en aanvaar my woorde

sodat jou lewensjare baie kan wees.

₁₁Op die pad van wysheid

sal ek jou begelei,

ek sal jou laat loop op reguit paaie.

₁₂Wanneer jy loop,

sal jou voetstappe

nie belemmer word nie;

en as jy hardloop,

sal jy nie struikel nie.

₁₃Hou vas aan vermaning,

moet dit nie laat vaar nie;

hou daarby, want dit is jou lewe.

₁₄Op die pad van goddeloses

moet jy nie kom nie;

en moenie die weg

van slegte mense betree nie.

₁₅Vermy dit,

moet dit nie eers oorsteek nie,

draai weg daarvan

en gaan verby.

₁₆Want hulle kan nie slaap nie,

behalwe as hulle kwaad doen;

hulle slaap bly weg,

tensy hulle iemand tot 'n val bring.

₁₇Ja, hulle eet brood

van goddeloosheid,

en wyn van geweld drink hulle.

₁₈Die pad van regverdiges

is soos die helder oggendlig –

dit verhelder geleidelik

tot die volle dag.

₁₉Die weg van goddeloses

is soos die donker –

hulle weet nie waaroor

hulle struikel nie.

₂₀“My seun, slaan ag

op my uitsprake;

spits jou ore vir my woorde.

₂₁Laat hulle nie aan jou oë

ontglip nie;

bewaar hulle diep in jou hart.

₂₂Want dit is die lewe

vir hulle wat dit vind;

vir die hele liggaam

bring dit genesing.

₂₃Bewaak jou hart meer

as enigiets wat bewaar word,

want daaruit ontspring die lewe.

₂₄Bly weg van 'n mond

wat valsheid verkondig,

en slinkse lippe,

hou dit ver van jou.

₂₅Jou oë moet vorentoe kyk,

jou blik moet reg voor jou

gerig wees.

₂₆Hou die pad vir jou voet gelyk;

en al jou weë,

laat dit bestendig wees.

₂₇Moenie regs of links afdraai nie,

hou jou voet weg van die kwaad.”