Spreuke 6

₁My seun, as jy vir jou medemens

borg gestaan het,

vir 'n vreemde jou hand gegee het,

₂as jy in 'n strik getrap het deur

die woorde van jou mond,

vasgevang is deur

die woorde van jou mond,

₃doen dan dit, my seun,

om jouself te bevry,

want jy het in die palm van jou

medemens se hand beland:

Gaan – verneder jouself!

Loop reguit op jou medemens af!

₄Laat jou oë nie toe om te slaap,

en jou ooglede

om in te sluimer nie.

₅Ruk jouself los soos 'n gasel

uit die hand van 'n jagter,

soos 'n voël

uit die hand van 'n voëlvanger.

₆Gaan na die mier, luiaard,

kyk na sy weë, en word wys.

₇Hy wat nie 'n •aanvoerder,

opsiener of heerser het nie,

₈berei in die somer sy kos voor,

versamel in die oestyd sy voedsel.

₉Hoe lank, luiaard,

gaan jy nog bly lê?

Wanneer gaan jy opstaan

uit jou slaap?

₁₀'n Bietjie slaap,

'n bietjie insluimer,

'n bietjie hande vou om te rus;

₁₁dan kom, soos 'n rondloper,

jou armoede daar aan,

jou gebrek

soos 'n skaamtelose man.

₁₂'n Deugniet van 'n mens,

'n boosdoener,

is hy wat met 'n mond

vol valsheid rondloop,

₁₃wat met sy oë knik,

tekens gee met sy voete,

beduie met sy vingers,

₁₄met 'n verdorwe hart

die hele tyd kwaad stig

en tweedrag saai.

₁₅Daarom, onverwags kom

sy teenspoed –

plotseling word hy verpletter,

sonder herstel.

₁₆Daar is ses dinge waarin

die Here 'n weersin het,

sewe is vir Hom afstootlik:

₂₀My seun, hou by die gebod

van jou vader,

en moenie die onderrig

van jou moeder verontagsaam nie.

₂₁Bind dit voortdurend aan jou hart,

bind dit om jou nek.

₂₂Wanneer jy rondgaan,

sal dit jou lei;

wanneer jy slaap,

sal dit oor jou wag hou;

wanneer jy wakker word,

sal dít jou besig hou.

₂₃Want 'n gebod is 'n lamp,

en onderrig is 'n lig.

Die pad na die lewe

is teregwysing deur vermaning,

₂₄om jou te beskerm

teen 'n slegte vrou,

teen die gladde tong

van 'n vreemde vrou.

₂₅Moenie haar skoonheid

in jou hart begeer nie,

en moenie toelaat dat sy jou vang

met haar wimpers nie.

₂₆Ja, die prys vir 'n prostituut

is soveel as die prys

van 'n ronde brood,

maar iemand anders se vrou –

sy maak jag op 'n kosbare lewe.

₂₇Kan 'n man vuur

in die vou van sy kleed dra,

maar sy klere raak nie

aan die brand nie?

₂₈As 'n man op gloeiende kole loop,

sal sy voete dan nie verskroei nie?

₂₉So gaan dit met hom

wat by die vrou

van sy medemens ingaan.

Niemand wat haar aanraak,

sal ongestraf bly nie.

₃₀Verag mense nie 'n dief

as hy steel nie,

al is dit om sy eetlus te bevredig

wanneer hy honger is?

₃₁En word hy uitgevang,

moet hy dit sewevoudig vergoed;

al die besittings in sy huis

moet hy dan oorhandig.

₃₂Hy wat owerspel pleeg met 'n vrou,

is sonder verstand;

wie sy eie lewe wil verwoes,

hy doen so iets.

₃₃Slae en skande

sal hy op die lyf loop,

en sy bespotting

sal nie uitgewis word nie.

₃₄Want jaloesie

wek 'n man se woede,

en hy sal genadeloos wees

op die dag van wraak.

₃₅Hy sal nie geneë wees

tot enige omkoopgeld nie,

ook nie inwillig wanneer

die afkoopsom verhoog word nie.