2 Kronieke 12

₁Toe Rehabeam se koningskap stewig gevestig was en hy magtig geword het, het hy die wet van die Here verlaat, en die hele Israel saam met hom. ₂Omdat hulle ontrou was aan die Here, gebeur dit toe dat Sisak, die koning van Egipte, in die vyfde regeringsjaar van koning Rehabeam optrek teen Jerusalem ₃met eenduisend tweehonderd strydwaens, sestigduisend perderuiters en ontelbare manskappe wat saam met hom uit Egipte gekom het: Libiërs, Sukkiete en Kussiete. ₄Hy het die stede wat versterk is van Juda ingeneem en tot by Jerusalem gevorder. ₅Semaja, die profeet, kom toe na Rehabeam en na die •aanvoerders van Juda wat vanweë Sisak se optrede in Jerusalem byeengekom het, en sê vir hulle: “So sê die Here, ‘Júlle het My verlaat, nou laat Ek julle op my beurt in die hand van Sisak.’ ” ₆Die aanvoerders van Israel en die koning het hulle verootmoedig en gesê: “Die Here het gelyk.”

₇Toe die Here sien dat hulle hulle verootmoedig, het die woord van die Here tot Semaja gekom: “Hulle verootmoedig hulle. Ek sal hulle nie vernietig nie, maar sal binnekort vir hulle uitkoms bied. My woede sal nie oor Jerusalem uitgestort word deur die hand van Sisak nie, ₈maar hulle sal sy onderdane word, sodat hulle sal ervaar wat diens aan My inhou teenoor diens aan die koninkryke van ander lande.”

₉Toe Sisak, die koning van Egipte, teen Jerusalem opgetrek het, het hy die skatte van die huis van die Here en die skatte van die koninklike paleis gevat; dit alles het hy gevat. Hy het ook al die goue skilde wat Salomo gemaak het, gevat. ₁₀Koning Rehabeam het toe in die plek daarvan bronsskilde gemaak. Hy het dit toevertrou aan die bevelvoerders van die hardlopers wat die ingang na die koninklike paleis bewaak het. ₁₁Telkens wanneer die koning die huis van die Here binnegegaan het, het die hardlopers ook ingegaan en die skilde gedra, maar dit daarna weer teruggeneem na die wagkamer van die hardlopers.

₁₂Toe Rehabeam hom verootmoedig het, is die toorn van die Here van hom afgewend. Hy het hom nie heeltemal vernietig nie. Ook in Juda was daar nog goeie dinge.

₁₃Koning Rehabeam het sy posisie in Jerusalem versterk en het aanhou regeer. Ja, Rehabeam was een-en-veertig jaar oud toe hy koning geword het, en hy het sewentien jaar lank as koning geheers in Jerusalem, die stad wat die Here gekies het uit al die stamme van Israel om sy Naam daar te vestig. Die naam van Rehabeam se moeder was Naäma, die Ammoniet. ₁₄Hy het gedoen wat verkeerd is, want hy het nie sy hart daarop gerig om die Here te soek nie.

₁₅Die vroeëre en latere geskiedenis van Rehabeam, is dit nie as 'n geslagsregister opgeteken in die Geskiedenis van Semaja die profeet en Iddo die siener nie? Daar was voortdurend oorlog tussen Rehabeam en Jerobeam. ₁₆Rehabeam het by sy voorouers gaan rus, en hy is in die •Stad van Dawid begrawe. Sy seun Abia het in sy plek koning geword.