Lied van die drie jong manne
Gebed van Asarja
24 Hulle het in die middel van die vuur rondgestap en vir God liedere gesing en die Here geprys.
25 Asarja het gaan staan en reg in die middel van die vuur sy mond oopgemaak en gesê:
26 “Lofwaardig is U, Here,
God van ons voorvaders,
en prysenswaardig;
en roemryk is u Naam tot in ewigheid,
27 want U is regverdig in alles
wat U aan ons gedoen het;
al u werke is waar,
u weë is reg
en al u oordele is betroubaar.
28 U het immers betroubare
oordele gevel in alles
wat U oor ons gebring het
en oor Jerusalem,
die heilige stad van ons voorouers,
omdat U met u betroubare oordeel
dit alles oor ons gebring het
as gevolg van ons sondes.
29 Want ons het gesondig
en u wet oortree deurdat ons
van U weggedraai het.
Ons het in alles uitermate gesondig
en nie na u gebooie geluister nie.
30 Ons het hulle nóg nagekom,
nóg onderhou,
soos U ons beveel het
om vir ons eie beswil te doen.
31 Alles wat U oor ons gebring het
en alles wat U ons aangedoen het,
het U op grond van 'n betroubare
oordeel beskik.
32 U het ons oorgegee
in die hand van vyande –
wettelose, allerhaatlikste opstandelinge –
en aan 'n onregverdige koning,
die slegste een op die hele aarde!
33 Nou kan ons nie eers
ons mond oopmaak nie;
dit het 'n skande en oneer
geword vir u dienaars
en dié wat U aanbid.
34 Moet ons nie vir altyd
aan hulle uitlewer nie –
ter wille van u Naam!
Moet u verbond nie ophef nie!
35 Moet u barmhartigheid
nie van ons wegneem nie –
ter wille van Abraham
vir wie U liefgehad het,
en ter wille van Isak, u dienaar,
en Israel, u heilige,
36 aan wie U gesê het
dat U hulle nageslag sal vermeerder
soos die sterre van die hemel
en soos die sand langs die seestrand.
37 Want ons, Here,
het minder geword as al die nasies;
ons staan vandag voor
die hele wêreld vernederd
as gevolg van ons sondes.
38 Ons het in hierdie tyd
geen regeerder, profeet of leier nie,
ook nie 'n •brandoffer of slagoffer
of •graanoffer of •wierookoffer nie,
en nie 'n plek om •eerstelingoffers
voor U te bring
en barmhartigheid te ontvang nie.
39 Maar mag ons
met 'n verbryselde siel
en in 'n gees van nederigheid
aanvaar word,
asof ons brandoffers
van ramme en bulle
en met tienduisende
vet lammers bring.
40 Laat dit vandag ons offer
in u teenwoordigheid wees,
en laat dit in vervulling gaan
terwyl ons U navolg,
omdat daar geen skande
sal kom oor dié
wat op U vertrou nie.
41 Nou volg ons U heelhartig;
ons het ontsag vir U
en ons soek u aangesig.
Laat ons nie beskaamd staan nie,
42 maar handel met ons
volgens u goedheid
en volgens die rykdom
van u barmhartigheid.
43 Red ons deur u wonderdade
en bring eer aan u Naam, Here!
44 Mag almal beskaamd staan
wat u dienaars slegte dinge aandoen;
mag hulle sonder enige
heerskappy en mag
tot skande kom;
mag hulle krag gebreek word.
45 Laat hulle besef dat U,
Here, alleen God is,
verheerlik oor die hele wêreld.”
Verwarming van die smeltoond
46 Die koning se dienaars wat hulle ingegooi het, het nie opgehou om die smeltoond te stook met nafta, teer, tou en stukkies hout nie. 47 Die vlam het nege-en-veertig el bo die smeltoond uitgeslaan, 48 uitgesprei en die Galdeërs verbrand wat naby die smeltoond was. 49 Maar die •engel van die Here het afgekom en was saam met Asarja en sy vriende in die smeltoond. Hy het die vlam van die vuur uit die smeltoond gewerp 50 en die middel van die smeltoond koel gemaak asof 'n klam wind daardeur waai. Die vuur het hulle hoegenaamd nie geraak nie en hulle nie seergemaak of ongemak veroorsaak nie.
Lied van die drie jong manne
51 Toe het hierdie drie in die oond God uit een mond besing, verheerlik en geprys:
52 “Lofwaardig is U, Here,
God van ons vaders,
en uitermate prysenswaardig
en verhewe tot in ewigheid!
Lofwaardig is u heerlike
en heilige Naam,
en uitermate prysenswaardig
en verhewe tot in ewigheid!
53 Lofwaardig is U in die •tempel
van u heilige heerlikheid,
en uitermate lofwaardig
en heerlik tot in ewigheid!
54 Lofwaardig is U
op die troon van u koninkryk,
en uitermate prysenswaardig
en verhewe tot in ewigheid,
55 en lofwaardig is U
wat in die dieptes kyk,
op die gerubs sit,
en prysenswaardig en uitermate
verhewe tot in ewigheid!
56 Lofwaardig is U in die
uitspansel van die hemel,
en prysenswaardig
en heerlik tot in ewigheid!
57 Loof die Here,
alle werke van die Here,
en besing en verhef Hom
tot in ewigheid!
58 Loof die Here,
engele van die Here,
en besing en verhef Hom
tot in ewigheid!
59 Loof die Here, hemele,
en besing en verhef Hom
tot in ewigheid!
60 Loof die Here,
waters bokant die hemel,
en besing en verhef Hom
tot in ewigheid!
61 Loof die Here, al die magte,
en besing en verhef Hom
tot in ewigheid!
62 Loof die Here, son en maan,
en besing en verhef Hom
tot in ewigheid!
63 Loof die Here,
sterre van die hemel,
en besing en verhef Hom
tot in ewigheid!
64 Loof die Here, reën en dou,
en besing en verhef Hom
tot in ewigheid!
65 Loof die Here, al die winde,
en besing en verhef Hom
tot in ewigheid!
66 Loof die Here, vuur en hitte,
en besing en verhef Hom
tot in ewigheid!
67 Loof die Here, koue en hitte,
en besing en verhef Hom
tot in ewigheid!
68 Loof die Here, dou en ryp,
en besing en verhef Hom
tot in ewigheid!
69 Loof die Here, ys en koue,
en besing en verhef Hom
tot in ewigheid!
70 Loof die Here, hael en sneeu,
en besing en verhef Hom
tot in ewigheid!
71 Loof die Here, dae en nagte,
en besing en verhef Hom
tot in ewigheid!
72 Loof die Here, lig en duister,
en besing en verhef Hom
tot in ewigheid!
73 Loof die Here, blitse en wolke,
en besing en verhef Hom
tot in ewigheid!
74 Laat die aarde die Here loof,
laat dit Hom besing en verhef
tot in ewigheid!
75 Loof die Here,
berge en heuwels,
en besing en verhef Hom
tot in ewigheid!
76 Loof die Here,
al die plante op die aarde,
en besing en verhef Hom
tot in ewigheid!
77 Loof die Here, fonteine,
en besing en verhef Hom
tot in ewigheid!
78 Loof die Here, seë en riviere,
en besing en verhef Hom
tot in ewigheid!
79 Loof die Here, seemonsters
en alles wat in die waters beweeg,
en besing en verhef Hom
tot in ewigheid!
80 Loof die Here,
al die voëls van die hemel,
en besing en verhef Hom
tot in ewigheid!
81 Loof die Here,
al die wilde en mak diere,
en besing en verhef Hom
tot in ewigheid!
82 Loof die Here, mensekinders
en besing en verhef Hom
tot in ewigheid!
83 Loof die Here, Israel,
en besing en verhef Hom
tot in ewigheid!
84 Loof die Here,
priesters van die Here,
en besing en verhef Hom
tot in ewigheid!
85 Loof die Here,
diensknegte van die Here,
en besing en verhef Hom
tot in ewigheid!
86 Loof die Here,
geeste en siele van die opregtes,
en besing en verhef Hom
tot in ewigheid!
87 Loof die Here,
heiliges en nederiges van hart,
en besing en verhef Hom
tot in ewigheid!
88 Loof die Here,
Ananias, Asarja en Misael,
en besing en verhef Hom
tot in ewigheid,
want Hy het ons
aan Hades ontruk,
ons uit die greep
van die dood verlos,
uit die hart van die vlam
van 'n brandende smeltoond gered,
ons uit die hart van die vuur gered!
89 Dank die Here
omdat Hy goed is,
omdat sy barmhartigheid
tot in ewigheid bly!
90 Loof die God van die gode,
julle almal wat die Here eer,
en besing en dank Hom
omdat sy barmhartigheid
tot in ewigheid bly!”
