1“Ons het toe van koers verander en in die rigting van Basan opgetrek. Toe het Og, die koning van Basan, ons tegemoet getrek, hy en al sy manskappe, vir 'n geveg by Edreï. 2Die Here het vir my gesê, ‘Moenie vir hom bang wees nie, want in jou hand gee Ek hom, al sy manskappe en sy land. Jy moet met hom maak soos jy gemaak het met Sihon, die koning van die Amoriete wat in Gesbon regeer het.’ 3So het die Here ons God ook Og, die koning van Basan, en al sy manskappe, in ons hand gegee. Ons het hulle so verslaan dat daar niemand van hom oor was wat kon ontvlug nie. 4Ons het in daardie tyd al sy stede ingeneem. Daar was nie 'n vesting wat ons nie van hulle afgeneem het nie: sestig stede, die hele landstreek van Argob wat die ryk van Og in Basan uitmaak. 5Dit was alles versterkte stede met hoë mure, poortdeure en sluitbalke. Dit is afgesien van die groot aantal nedersettings wat ons ingeneem het. 6Ons het die inwoners daarvan met die banvloek getref, soos ons gemaak het in die geval van Sihon, die koning van Gesbon. In elke stad is die mans, vroue en kinders met die banvloek getref. 7Al die vee en oorlogsbuit uit die stede het ons egter vir onsself uitgehou.
8“So het ons in daardie tyd die gebied oorkant die Jordaan uit die hand van die twee Amoritiese konings geneem, van die Arnondal af tot by die berg Hermon.”
9Die Sidoniërs noem Hermon Sirjon, maar die Amoriete noem dit Senir.
10“Dit sluit al die stede van die plato, van die hele Gilead en die hele Basan in, tot by Salga en Edreï – dit is die stede van die ryk van Og in Basan.”
11Og, die koning van Basan, was die laaste wat oorgebly het van die Refaïete. Sy slaapbank was sowaar van yster. Is dit nie nog steeds in Rabba, die hoofstad van die Ammoniete nie? Dit is nege el lank en vier el breed, volgens die gewone el.
12“Hierdie hele gebied het ons in daardie tyd verower, van Aroër af, wat langs die Arnondal lê, tot in die helfte van die bergland van Gilead, met die stede daarin. Ek het dit vir die stamme van Ruben en Gad gegee. 13Die res van Gilead en die hele Basan, die koninkryk van Og, het ek vir die halwe stam van Manasse gegee.”
Die hele landstreek van Argob, eintlik daardie hele Basanstreek, is die land van die Refaïete genoem. 14Jaïr, 'n afstammeling van Manasse, het die hele landstreek van Argob tot by die grens van Gesur en Maäga gekry. Hy het die dorpe, ook Basan, na homself vernoem. Dit word vandag nog Gawwoot-Jaïr genoem.
15“En vir Magir het ek Gilead gegee.
16“Vir die stamme van Ruben en Gad het ek die deel vanaf Gilead tot by die Arnondal gegee met die middel van die dal as grens; en tot aan die Jabbokdal, die grens van die Ammoniete; 17ook die Araba, met die Jordaan as grens vanaf die meer van Gennesaret tot by die See van die Araba, die Soutsee, en ooswaarts tot onder aan die hange van Pisga.
18“Ek het julle in daardie tyd opdrag gegee en gesê, ‘Die Here julle God het nou wel vir julle hierdie land gegee om in besit te neem, maar al julle onverskrokke manne moet gewapend oortrek voor julle volksgenote, die Israeliete. 19Net julle vrouens, die swakkes onder julle en julle vee – ek weet dat julle baie vee het – mag in julle stede gaan bly wat ek vir julle gegee het. 20Eers nadat die Here vir julle volksgenote rus gegee het, soos vir julle, wanneer ook hulle die land beset het wat die Here julle God vir hulle gaan gee oorkant die Jordaan, mag julle weer terugkom, elkeen na sy eiendom wat ek aan julle gegee het.’
21“Vir Josua het ek in daardie tyd opdrag gegee en gesê, ‘Jy het met jou eie oë alles gesien wat die Here julle God aan hierdie twee konings gedoen het. Die Here gaan dieselfde doen met al die koninkryke waarheen jy oortrek. 22Jy mag nie vir hulle bang wees nie, want dit is die Here julle God wat vir julle veg.’
23“Dit was ook in daardie tyd dat ek by die Here gepleit het, 24‘Here, my Heer, U het pas begin om aan u dienskneg u grootheid en sterk hand te toon; want watter god is daar in die hemel of op die aarde wat u werke en u magtige dade kan nadoen? 25Laat my asseblief oortrek en die goeie land beleef wat oorkant die Jordaan lê: hierdie mooi bergland en die Libanon.’ 26Maar die Here het oor julle woedend geword vir my, en Hy wou nie na my luister nie. Hy het vir my gesê, ‘Dit is nou genoeg! Moet nooit weer met My oor hierdie saak praat nie! 27Klim op na die kruin van Pisga en kyk na die weste, die noorde, die suide en die ooste. Kyk goed, want jy sal nie oor hierdie Jordaanrivier gaan nie. 28Gee vir Josua sy opdragte, bemoedig en ondersteun hom; want hy sal voor hierdie volk oor die Jordaan trek en vir hulle die land wat jy sien, as besitting gee.’
29“Ons het toe in die vallei oorkant Bet-Peor gebly.”
