Ester (Grieks) 10

₁ Die koning het belastings vir sy koninkryk op land en op see voorgeskryf. ₂ En wat sy mag en dapperheid en die rykdom en roem van sy koninkryk betref, kyk, dit staan alles ter nagedagtenis geskryf in die •boekrol van die konings van die Perse en die Meders. ₃ Mordegai het koning Artaxerxes opgevolg. Hy was 'n vername man in die koninkryk en is deur die Judeërs vereer. Hy was geliefd en het vir sy hele volk in besonderhede van sy optrede vertel.

₄3a En Mordegai het gesê: “Hierdie dinge kom van God, ₅3b want ek het die droom onthou wat ek hieroor gehad het. En nie 'n woord daarvan het onvervuld gebly nie: ₆3c die fonteintjie wat 'n rivier geword het, en die lig en son en die baie water wat daar was. Die rivier is Ester, met wie die koning getrou het en vir wie hy koningin gemaak het. ₇3d Die twee drake is ek en Haman. ₈3e Die nasies is dié wat saamgespan het om die naam van die Judeërs uit te wis. ₉3f My volk, dit is Israel, het tot God geroep en is verlos. Die Here het sy volk verlos, die Here het ons gered van al hierdie rampe, en God het tekens en groot wonders gedoen wat nie onder die nasies plaasgevind het nie. ₁₀3g Daarom het Hy twee lotsbestemmings bepaal: een vir die volk van God en een vir al die nasies. ₁₁3h Hierdie twee lotsbestemmings het aangebreek op die uur en die besondere tyd en dag van oordeel voor God en onder al die nasies. ₁₂3i God het sy volk onthou en het reg laat geskied aan sy erfdeel. ₁₃3k Hierdie dae moet in die maand Adar, op die veertiende en vyftiende van dieselfde maand, voor God onder sy volk gedenk word, van geslag tot geslag vir altyd, met samekomste vol blydskap en vreugde onder sy volk Israel.”

₁₄3l Tydens die vierde regeringsjaar van Ptolemeus en Cleopatra het Dositeus, wat gesê het dat hy 'n priester en Leviet was, en sy seun Ptolemeus die voorafgaande brief oor die Purim onder die aandag gebring. Hulle het gesê dat dit eg was en dat Lisimagus, die seun van Ptolemeus, 'n inwoner van Jerusalem, dit vertaal het.