Job 11

₂“Moet 'n stortvloed woorde

onbeantwoord gelaat word,

of 'n loslippige man

gelyk gegee word?

₃Sou jou leë praatjies mense laat swyg,

en sou jy die spot dryf

en niemand jou beskaam nie?

₄Jy beweer, ‘My siening is suiwer,

ek is rein in u oë.’

₅Maar, as God maar net sou praat,

sy mond teen jou oopmaak,

₆jou die geheime

van die wysheid meedeel,

dat dit dubbele voordele bied,

dan sou jy besef dat God jou 'n deel

van jou sondeskuld laat vergeet.

₇Kan jy die geheimenisse van God ontrafel,

of tot die volmaaktheid

van die Almagtige deurdring?

₈Dit is hoër as die hemel –

wat kan jy vermag?

Dit is dieper as die •doderyk –

wat kan jy weet?

₉Langer as die aarde

is die maat daarvan,

en breër as die see.

₁₀As Hy verbygaan,

gee Hy prys of hou bymekaar;

en wie kan Hom keer?

₁₁Want Hy is die een

wat vals mense ken

en onreg raaksien.

Sal Hy nie daaraan aandag gee nie?

₁₂As iemand met 'n leë kop

verstand kon kry,

sou 'n wildedonkiehings

as 'n mens gebore kon word.

₁₃“As jy maar net iemand was

wat jou hart daarop gerig het,

en jou handpalms na Hom

uitgestrek het!

₁₄As daar onreg aan jou hande kleef,

raak ontslae daarvan!

Moenie ongeregtigheid

in jou tente laat woon nie!

₁₅Want dan sal jy jou kop kan lig

sonder 'n skandvlek;

jy sal stewig staan en nie vrees nie.

₁₆Ja, jy sal van teenspoed vergeet;

as water wat verbygevloei het,

sal jy daaraan dink.

₁₇Die lewe sal hoër styg

as die middagson,

die donker sal soos die oggend wees.

₁₈Jy sal geborge voel,

want daar is hoop.

Jy sal alles deurkyk

en veilig gaan slaap;

₁₉jy sal gaan lê,

en niemand sal jou opjaag nie.

Baie mense sal jou guns soek.

₂₀Maar die oë van goddeloses

raak dof

en die moontlikheid van ontvlugting

is vir hulle verlore;

hulle enigste verwagting

is om die asem uit te blaas.”