Numeri 31

₁Die Here het met Moses gepraat en gesê: ₂“Vergeld die onreg wat die Israeliete aangedoen is deur die Midianiete. Daarna sal jy met jou mense verenig word.” ₃Moses het toe met die volk gepraat en gesê: “Van die manne onder julle moet hulleself bewapen vir die stryd, sodat hulle teen Midian kan optrek om die vergelding van die Here oor Midian te voltrek. ₄'n Duisend man uit elkeen van die stamme van Israel moet julle stuur vir die stryd.”

₅Uit die leërafdelings van Israel is 'n duisend man per stam gekies – twaalfduisend wat gewapen was vir oorlog. ₆Moses het hulle, die duisend uit elke stam, gestuur op die veldtog, hulle en Pinehas, seun van die priester Eleasar. Vir die veldtog het Pinehas die heilige voorwerpe en die trompette vir die waarskuwingsein by hom gehad.

₇Hulle het teen Midian gaan veg, soos die Here Moses beveel het, en al die manlike persone doodgemaak. ₈Hulle het selfs die konings van Midian doodgemaak. Onder die gesneuweldes was Ewi, Rekem, Sur, Gur en Reba, die vyf konings van Midian. Ook Bileam, seun van Beor, het hulle met die swaard doodgemaak. ₉Maar die Israeliete het die vroue van Midian en hulle kinders gevange geneem. Al hulle diere, al hulle lewende hawe en al hulle besittings het hulle buitgemaak. ₁₀Al hulle dorpe waarin hulle gewoon het en al hulle kampe het die Israeliete verbrand, ₁₁maar alles wat gestroop is en al die oorlogsbuit, mense en diere, het hulle saamgevat. ₁₂Hulle het die gevangenes, die oorlogsbuit en alles wat gestroop is, na Moses, die priester Eleasar en die volksvergadering van die Israeliete gebring in die kamp, in die vlaktes van Moab by die Jordaan, teenoor Jerigo.

₁₃Moses, die priester Eleasar en al die leiers van die volksvergadering het uitgegaan om hulle buite die kamp te ontmoet. ₁₄Moses het hom bloedig vererg vir die bevelvoerders van die leër, die aanvoerders van duisend en die aanvoerders van honderd, wat van die militêre veldtog teruggekeer het. ₁₅Moses het vir hulle gesê: “Het julle die vroue almal laat lewe? ₁₆Kyk, dit is juis hulle wat, op advies van Bileam, met die gebeure by Peor, vir die Israeliete die rede geword het om ontrou te bedryf teenoor die Here, sodat daar 'n plaag in die volksvergadering van die Here uitgebreek het. ₁₇Maak dan nou elke manlike kind dood. Maak ook elke vrou dood wat met 'n man gemeenskap gehad het, ₁₈maar spaar vir julleself al die meisies wat nog nie met 'n man gemeenskap gehad het nie. ₁₉Almal van julle wat iemand doodgemaak het, en almal wat aan 'n gesneuwelde geraak het, moet sewe dae lank buite die kamp tent opslaan. Op die derde en op die sewende dag moet julle julleself reinig – julle en julle gevangenes. ₂₀Elke kledingstuk, elke artikel van leer, alles wat van bokhaar gemaak is en elke artikel van hout moet julle reinig.”

₂₁Die priester Eleasar het vir die krygsmanne wat oorlog toe gegaan het, gesê: “Die volgende is 'n vaste wetlike voorskrif wat die Here Moses gegee het, ₂₂‘Net die goud en silwer, die brons, yster, tin en lood ₂₃– elke voorwerp wat teen vuur bestand is – moet julle deur die vuur laat gaan; dan sal dit rein wees. Maar dit moet ook met reinigingswater gereinig word. Ook alles wat nie vuurbestand is nie, moet julle deur die water laat gaan. ₂₄Julle moet julle klere op die sewende dag was, dan sal julle rein wees. Daarna kan julle in die kamp inkom.’ ”

₂₅Die Here het vir Moses gesê: ₂₆“Stel 'n lys saam van die oorlogsbuit – van die mense en diere wat gevange geneem is – jy en die priester Eleasar, asook die familiehoofde van die volksvergadering. ₂₇Verdeel dan die oorlogsbuit in die helfte tussen dié wat in die geveg betrokke was, wat uitgetrek het vir die stryd, en die hele volksvergadering. ₂₈Vorder vir die Here 'n bydrae in van die krygsmanne wat uitgetrek het vir die stryd: een uit elke vyfhonderd van die mense, van die beeste, van die donkies en van die kleinvee. ₂₉Uit húlle helfte moet julle dit neem en dit vir die priester Eleasar gee, as 'n •wydingsgeskenk vir die Here. ₃₀Uit die helfte-aandeel van die Israeliete, moet jy een uit vyftig neem van die mense, die beeste, die donkies, die kleinvee, van al die diere. Jy moet dit vir die Leviete gee wat hulle verpligtinge by die •tabernakel van die Here nakom.” ₃₁Moses en die priester Eleasar het toe gedoen wat die Here Moses beveel het.

₄₈Die bevelvoerders wat oor die leërafdelings was, die aanvoerders van duisend en die aanvoerders van honderd, het Moses genader ₄₉en vir hom gesê: “U dienaars het 'n hoofdelike telling gehou van die krygsmanne wat onder ons bevel staan, en nie een van hulle word vermis nie. ₅₀Daarom bied elkeen van ons wat goue voorwerpe gevind het, 'n offergawe vir die Here aan – armkettinkies, armbande, ringe, oorringe en halskettings – om voor die Here vir ons lewens versoening te doen.” ₅₁Moses en die priester Eleasar het die goud van hulle geneem, al die smeewerk. ₅₂Al die goud van die wydingsgeskenk wat hulle aan die Here afgestaan het, was 16 750 sikkel. Dit was afkomstig van die aanvoerders van duisend en die aanvoerders van honderd. ₅₃Die krygsmanne het elkeen vir homself ook buit geneem. ₅₄Moses en die priester Eleasar het die goud in ontvangs geneem van die aanvoerders van duisend en van honderd. Hulle het dit in die Tent van Ontmoeting ingeneem om voor die Here te dien as 'n herinnering aan die Israeliete.