Spreuke 10

₁Spreuke van Salomo.

'n Wyse seun verheug sy vader,

maar 'n dwase seun

doen sy moeder verdriet aan.

₂Skatte deur onreg verkry,

baat niks nie,

maar geregtigheid red van die dood.

₃Die Here laat die keel

van 'n regverdige nie honger ly nie,

maar die gulsigheid van goddeloses

dwarsboom Hy.

₄'n Trae hand maak arm,

maar die hand van vlytiges

maak ryk.

₅Wie in die somer versamel,

is 'n verstandige seun;

wie in die oestyd vas slaap,

is 'n seun wat skande maak.

₆Seëninge is bedoel vir die kop

van 'n regverdige,

maar die mond van goddeloses

verberg geweld.

₇Herinnering aan 'n regverdige

is tot seën,

maar die roem van goddeloses verrot.

₈Wie 'n wyse hart het,

aanvaar gebooie;

maar wie dwase lippe het,

kom tot 'n val.

₉Wie onberispelik leef, leef veilig;

maar wie sy paaie vol kinkels maak,

word betrap.

₁₀Wie met sy oog knik,

veroorsaak droefheid,

en wie dwase lippe het,

kom tot 'n val.

₁₁'n Bron van lewe

is die mond van 'n regverdige,

maar die mond van goddeloses

verberg geweld.

₁₂Haat verwek tweedrag,

maar liefde bedek alle oortredings.

₁₃Op die lippe van 'n verstandige

word wysheid gevind,

maar 'n lat is vir die rug

van iemand sonder verstand.

₁₄Wyses hou kennis in bewaring,

maar die mond van 'n sot

huisves dreigende ondergang.

₁₅Die besittings van 'n ryke

is sy sterk stad;

die ondergang van armes

is hulle armoede.

₁₆Die verdienste van 'n regverdige

lei na die lewe;

die inkomste van 'n goddelose

lei na sonde.

₁₇Wie ag slaan op vermaning,

is op pad na lewe;

maar wie teregwysing

in die wind slaan,

lei ander op 'n dwaalweg.

₁₈Wie haat verberg,

het leuenagtige lippe,

en wie 'n gerug versprei,

is 'n dwaas.

₁₉By 'n oorvloed woorde

bly oortredings nie uit nie;

maar wie sy lippe in bedwang hou,

is verstandig.

₂₀Uitgesoekte silwer

is op die tong van 'n regverdige;

die gedagtes van goddeloses

is min werd.

₂₁Die lippe van 'n regverdige

voed vele;

maar sotte sterf deur 'n gebrek

aan verstand.

₂₂Die seën van die Here –

dit is wat ryk maak,

en harde werk voeg daar niks by nie.

₂₃Soos dit vir 'n dwaas 'n plesier is

om 'n skandelike daad te begaan,

so is wysheid

vir 'n skerpsinnige mens.

₂₄Wat 'n goddelose vrees,

dit kom hom oor;

maar wat regverdiges begeer,

dit gee God.

₂₅Wanneer 'n storm verbytrek,

is 'n goddelose nie meer daar nie,

maar 'n regverdige

is 'n ewige fondament.

₂₆Soos asyn vir die tande

en rook vir die oë,

so is 'n leeglêer vir die een

wat hom stuur.

₂₇Ontsag vir die Here

verleng die lewensdae,

maar die jare van goddeloses

word kortgeknip.

₂₈Die verwagting van regverdiges

is vreugde,

maar die hoop van goddeloses

vergaan.

₂₉Die weg van die Here

is 'n toevlug

vir wie onberispelik is,

maar dit bring ondergang

vir boosdoeners.

₃₀'n Regverdige sal nooit wankel nie,

en goddeloses sal die land

nie bewoon nie.

₃₁Die mond van 'n regverdige

bring wysheid voort,

maar 'n verworde tong word afgesny.

₃₂Die lippe van 'n regverdige

weet wat aanvaarbaar is,

maar die mond van goddeloses

verdraai woorde.