Psalms 100

Juig tot eer van die Here, o ganse aarde!

₂Dien die Here met blydskap,

kom in sy teenwoordigheid

met 'n gejubel.

₃Erken dat die Here God is;

Hy het ons gemaak;

aan Hom behoort ons,

sy volk, die kleinvee wat Hy laat wei.

₄Gaan sy poorte binne met lofprysing,

sy voorhowe met 'n loflied;

loof Hom, prys sy Naam.

₅Want die Here is goed,

vir ewig duur sy troue liefde,

van geslag tot geslag sy trou.