2 Kronieke 16

₁In die ses-en-dertigste jaar van Asa se regering het Baesa, koning van Israel, teen Juda opgetrek en Rama versterk om verkeer van en na Asa, koning van Juda, te verhinder. ₂Asa neem toe silwer en goud uit die skatkamers van die huis van die Here en die koninklike paleis, en stuur dit na Ben-Hadad, koning van Aram, wat sy setel in Damaskus gehad het, met dié woorde: ₃“Daar is 'n verdrag tussen my en u, tussen my vader en u vader. Kyk, ek stuur vir u silwer en goud. Verbreek dan u verdrag met Baesa, koning van Israel, sodat hy van my af wegtrek.” ₄Ben-Hadad het gehoor gegee aan koning Asa en die •aanvoerders van sy krygsmag na die dorpe van Israel gestuur. Hulle het Ijon, Dan en Abel-Majim aangeval, en ook al die voorraadstede van Naftali. ₅Toe Baesa dit hoor, het hy dadelik opgehou om Rama te versterk en sy werk daar gestaak. ₆Koning Asa, daarenteen, het die hele Juda saamgeneem, en hulle het die klippe van Rama waarmee Baesa gebou het, asook die hout, weggedra. Daarmee het Asa toe Geba en Mispa versterk.

₇In daardie tyd het die siener Ganani na Asa, koning van Juda, gekom en vir hom gesê: “Omdat jy op die koning van Aram en nie op die Here jou God gesteun het nie, daarom het die leër van die koning van Aram uit jou hand vrygekom. ₈Was die Kussiete en die Libiërs nie 'n groot leërmag met 'n baie groot getal strydwaens en strydwabemanning nie? Maar omdat jy op die Here gesteun het, het Hy hulle in jou hand gegee. ₉Want die Here, sy oë deurkruis die hele aarde, om hulle wie se harte volkome by Hom is, kragtig by te staan. Hierin het jy dwaas opgetree, want van nou af sal daar oorloë teen jou wees.” ₁₀Asa het hom vir die siener vererg en hom in die blok gesit; want hy was onbeheersd kwaad vir hom daaroor. Asa het in dieselfde tyd sommige van die volk mishandel.

₁₁Kyk, die vroeëre en latere geskiedenis van Asa, is dit nie opgeteken in die boekrol van die konings van Juda en Israel nie? ₁₂In die nege-en-dertigste jaar van sy regering het Asa 'n voetkwaal ontwikkel. Sy siekte het later ernstig geword. Selfs in sy siekte het hy nie die Here geraadpleeg nie, maar by genesers raad gesoek. ₁₃Asa het by sy voorouers gaan rus. Hy het in die een-en-veertigste jaar van sy regering gesterf. ₁₄Hulle het hom begrawe in sy graf wat hy vir hom uitgekap het in die •Stad van Dawid. Hulle het hom neergelê op 'n baar, vol allerhande speserye, gemeng met die kundigheid van 'n salfmenger. Hulle het vir hom 'n besonder groot dodevuur laat brand.