2 Konings 15

₁In die sewe-en-twintigste regeringsjaar van Jerobeam, die koning van Israel, het Asarja, seun van Amasia, die koning van Juda, koning geword. ₂Hy was sestien jaar oud toe hy koning geword het, en hy het twee-en-vyftig jaar lank as koning geheers in Jerusalem. Sy moeder se naam was Jegolja, uit Jerusalem. ₃Hy het gedoen wat reg is in die oë van die Here, net soos sy vader Amasia gedoen het – ₄net die offerhoogtes is nie verwyder nie. Die volk het nog steeds geslag en offers verbrand by die offerhoogtes. ₅Die Here het die koning getref, en hy het 'n velsiekte gehad tot die dag van sy dood. Hy het in 'n plek van afsondering gewoon, en Jotam, die seun van die koning, was hoof van die hofhouding en het reg gespreek oor die volk van die land.

₆Die verdere geskiedenis van Asarja en alles wat hy gedoen het, is dit nie opgeteken in die boekrol met die kronieke van die konings van Juda nie? ₇Asarja het by sy voorouers gaan rus, en hulle het hom in die Stad van Dawid by sy voorouers begrawe. Jotam, sy seun, het in sy plek koning geword.

₈In die agt-en-dertigste regeringsjaar van Asarja, die koning van Juda, het Sagaria, seun van Jerobeam, koning geword oor Israel in Samaria, ses maande lank. ₉Hy het gedoen wat verkeerd is in die oë van die Here, net soos sy voorvaders gedoen het. Hy het nie afgewyk van die sondes van Jerobeam, seun van Nebat, waarmee hy Israel laat sondig het nie. ₁₀Sallum, seun van Jabes, het 'n komplot teen hom gesmee, hom voor die volk neergevel en doodgemaak, en in sy plek koning geword.

₁₁Die verdere geskiedenis van Sagaria, kyk, dit is opgeteken in die boekrol met die kronieke van die konings van Israel. ₁₂Dit was die vervulling van die woord van die Here wat Hy tot Jehu gespreek het: “Daar sal vir jou seuns tot in die vierde geslag op die troon van Israel sit.” Dit was toe so.

₁₃Sallum, seun van Jabes, het koning geword in die nege-en-dertigste regeringsjaar van Ussia, die koning van Juda. Hy het 'n maand lank in Samaria regeer. ₁₄Menahem, seun van Gadi, het opgetrek uit Tirsa en in Samaria aangekom. Hy het Sallum, seun van Jabes, in Samaria neergevel en doodgemaak, en in sy plek koning geword.

₁₅Die verdere geskiedenis van Sallum en die komplot wat hy gesmee het, kyk, dit is opgeteken in die boekrol met die kronieke van die konings van Israel. ₁₆Menahem het in dié tyd Tifsag verwoes met alles wat daarin was, die hele gebied van Tirsa af. Omdat hulle nie vir hom oopgemaak het nie, het hy verwoesting aangerig. Al die swanger vroue het hy oopgesny.

₁₇In die nege-en-dertigste regeringsjaar van Asarja, die koning van Juda, het Menahem, seun van Gadi, koning geword oor Israel in Samaria, tien jaar lank. ₁₈Hy het gedoen wat verkeerd is in die oë van die Here. In sy hele regeringstyd het hy nie afgewyk van die sondes waarmee Jerobeam, seun van Nebat, Israel laat sondig het nie.

₁₉Pul, die koning van Assirië, het die land binnegeval. Menahem het aan Pul duisend kikkar silwer gegee, sodat hy hom sou ondersteun om sy beheer oor die koningskap te versterk. ₂₀Menahem het die geld van Israel gevorder, van al die vermoënde manne, sodat hy dit vir die koning van Assirië kon gee – vyftig sikkel silwer van elke man. Die koning van Assirië het toe omgedraai en nie daar in die land gebly nie.

₂₁Die verdere geskiedenis van Menahem, alles wat hy gedoen het, is dit nie opgeteken in die boekrol met die kronieke van die konings van Israel nie? ₂₂Menahem het by sy voorouers gaan rus, en Pekahia, sy seun, het in sy plek koning geword.

₂₃In die vyftigste regeringsjaar van Asarja, die koning van Juda, het Pekahia, seun van Menahem, in Samaria koning geword oor Israel, twee jaar lank. ₂₄Hy het gedoen wat verkeerd is in die oë van die Here. Hy het nie afgewyk van die sondes waarmee Jerobeam, seun van Nebat, Israel laat sondig het nie. ₂₅Peka, seun van Remalja, sy adjudant, het egter teen hom saamgesweer en hom in Samaria, in die vesting van die koninklike paleis neergevel saam met Argob en Haärje. By hom was vyftig man uit Gilead. Hy het hom doodgemaak en in sy plek koning geword.

₂₆Die verdere geskiedenis van Pekahia, alles wat hy gedoen het, kyk, dit is opgeteken in die boekrol met die kronieke van die konings van Israel.

₂₇In die twee-en-vyftigste regeringsjaar van Asarja, die koning van Juda, het Peka, seun van Remalja, koning geword oor Israel in Samaria, en twintig jaar lank regeer. ₂₈Hy het gedoen wat verkeerd is in die oë van die Here. Hy het nie afgewyk van die sondes waarmee Jerobeam, seun van Nebat, Israel laat sondig het nie. ₂₉In die tyd van Peka, die koning van Israel, het Tiglat-Pileser, die koning van Assirië, gekom en Ijon, Abel-Bet-Maäga, Janoag, Kedes, Gasor, Gilead en Galilea, die hele gebied van Naftali, verower, en die inwoners weggevoer na Assirië. ₃₀Hosea, seun van Ela, het 'n komplot gesmee teen Peka, seun van Remalja, hom neergevel en doodgemaak, en in sy plek koning geword in die twintigste regeringsjaar van Jotam, seun van Ussia.

₃₁Die verdere geskiedenis van Peka en alles wat hy gedoen het, kyk, dit is opgeteken in die boekrol met die kronieke van die konings van Israel.

₃₂In die tweede regeringsjaar van Peka, seun van Remalja, die koning van Israel, het Jotam, seun van Ussia, die koning van Juda, koning geword. ₃₃Hy was vyf-en-twintig jaar oud toe hy koning geword het, en hy het sestien jaar lank as koning geheers in Jerusalem. Sy moeder se naam was Jerusa, dogter van Sadok. ₃₄Hy het gedoen wat reg is in die oë van die Here, net soos sy vader Ussia gedoen het – ₃₅net die offerhoogtes is nie verwyder nie. Die volk het nog steeds geslag en offers verbrand by die offerhoogtes. Dit is hy wat die boonste poort van die huis van die Here gebou het.

₃₆Die verdere geskiedenis van Jotam, wat hy gedoen het, is dit nie opgeteken in die boekrol met die kronieke van die konings van Juda nie? ₃₇In daardie tyd het die Here die eerste keer vir Resin, die koning van Aram, en Peka, seun van Remalja, teen Juda uitgestuur. ₃₈Jotam het by sy voorouers gaan rus, en is begrawe by sy voorouers in die Stad van Dawid, sy voorvader. Agas, sy seun, het in sy plek koning geword.