Josua 4

₁Toe die hele nasie die deurtog deur die Jordaan voltooi het, het die Here vir Josua gesê: ₂“Neem vir julle twaalf manne uit die volk, een man uit elke stam, ₃en gee aan hulle opdrag, ‘Tel vir julle twaalf klippe op daar in die middel van die Jordaan, op die plek waar die voete van die priesters stewig staan. Neem dit saam met julle deur die rivier en sit dit neer op die plek waar julle vannag gaan oornag.’ ”

₄Josua het die twaalf manne wat hy uit die Israeliete aangewys het, een uit elke stam, ontbied. ₅Josua het vir hulle gesê: “Gaan voor die ark van die Here julle God uit tot in die middel van die Jordaan, en tel elkeen dan self 'n klip op sy skouer, net soveel as die stamme van die Israeliete, ₆sodat dit kan dien as 'n teken onder julle. Wanneer julle kinders in die toekoms vra, ‘Wat beteken hierdie klippe vir julle?’ ₇moet julle vir hulle sê dat die water van die Jordaan afgesny was voor die verbondsark van die Here. Sê vir hulle, ‘Toe die ark deur die Jordaan moes gaan, is die water van die Jordaan afgesny; en hierdie klippe dien vir altyd as 'n herinnering aan die Israeliete.’ ”

₈Die Israeliete het gemaak soos Josua beveel het: Hulle het twaalf klippe, net soveel as die stamme van die Israeliete, uit die middel van die Jordaan opgetel, soos die Here vir Josua gesê het. Hulle het dit met hulle saamgeneem na hulle oornagplek en dit daar neergesit.

₉Nog twaalf klippe is deur Josua in die middel van die Jordaan opgerig op die plek waar die voete van die priesters wat die verbondsark gedra het, gestaan het. Dit is daar tot vandag toe.

₁₀Die priesters wat die ark gedra het, het bly staan in die middel van die Jordaan, totdat alles afgehandel was wat die Here Josua beveel het om vir die volk te sê, net soos Moses vir Josua beveel het. Die volk het haastig deurgetrek; ₁₁en toe die hele volk die deurtog voltooi het, het die ark van die Here en die priesters voor die volk deurgegaan. ₁₂Die nageslag van Ruben en Gad en die halwe stam van Manasse het voor die Israeliete in slagorde deurgetrek, soos Moses vir hulle gesê het. ₁₃Ongeveer veertigduisend het, gewapen vir die oorlog, voor die Here vir die geveg na die vlaktes van Jerigo deurgetrek. ₁₄Op daardie dag het die Here Josua se aansien verhoog in die oë van die hele Israel en hulle het, solank hy geleef het, vir hom ontsag gehad soos hulle vir Moses ontsag gehad het.

₁₅Die Here het vir Josua gesê: ₁₆“Beveel die priesters wat die ark met die Getuienis dra, om uit die Jordaan op te klim.” ₁₇Josua het toe die priesters beveel: “Klim op uit die Jordaan!” ₁₈Toe die priesters wat die verbondsark van die Here dra, uit die middel van die Jordaan opklim en hulle voetsole droë grond raak, het die water van die Jordaan teruggevloei na sy plek. Dit het soos voorheen kant en wal geloop.

₁₉Die volk self het uit die Jordaan opgetrek op die tiende van die eerste maand. Hulle het kamp opgeslaan by Gilgal aan die oosgrens van Jerigo. ₂₀Daardie twaalf klippe wat hulle uit die Jordaan geneem het, het Josua in Gilgal opgerig. ₂₁Hy het vir die Israeliete gesê: “As julle kinders in die toekoms vir hulle ouers vra, ‘Wat beteken hierdie klippe?’ ₂₂dan moet julle aan julle kinders verduidelik, ‘Op droë grond het Israel deur hierdie Jordaan getrek.’ ₂₃Want die Here julle God het die water van die Jordaan voor julle laat opdroog, totdat julle deurgetrek het, soos wat die Here julle God gedoen het met die Rietsee wat Hy voor ons laat opdroog het, totdat ons deurgetrek het, ₂₄sodat al die volke van die aarde mag weet dat die hand van die Here sterk is, en sodat julle altyd vir die Here julle God ontsag sal hê.”